Sak 94

Pʋʋsg la sik-m-meng yaa tɩlae

A ZEZI sẽn da wa n be Zide, a rɩka makr sẽn wilgd tɩ tara yõod tɩ d wɩng ne pʋʋsgo. La masã a Zerizalɛm yaoolem kẽndã wakate, a leb n tẽega rẽ vẽenega. Tõeeme tɩ ya a Zezi sẽn da ket n be Samari bɩ Galile wã la a togs a karen-biisã kɩba-kãngã:

“Bʋ-kaood a ye n da be tẽng a yembr pʋgẽ n ka zoet Wẽnnaam ne neba nif me ye. La pʋg-kõor a yembr me n da be tẽn-kãng pʋgẽ n wa n yeel bʋ-kaoodã: [Bɩ y bʋ maam ne m bʋʋd-n-taaga bʋʋd tɩrga n kõ-m bʋʋm, Sebr Sõngo]. Bʋ-kaooda zãgsame n yeel t’a ka na n sõng-a ye. La a yaool n tagsame n yeel yaa: Baa mam sẽn ka zoet Wẽnnaam ne neba nifã, baoosgo, pʋg-kõ-kãngã sẽn pẽdgd maamã, mam na n sõng-a lame t’a ra wat daar fãa n namsd maam ye.”

Rẽ poore a Zezi togsa a kɩbarã sẽn tar zãmsg ningã, n yeele: “Kelg-y bʋ-kaood sẽn ka tɩrga sẽn yeele. La Wẽnnaam kõn sõng bãmb nin-tũusdsa sẽn zẽkd b koees n kot bãmb wĩntoog ne yʋnga [ba a sã n tara sũ-mar ne-b] bɩ?”

A Zezi ra ka rat n yeel tɩ Wẽnnaam a Zeova yaa wala bʋ-kaood kãngã sẽn ka tɩrgã ye. Ayo, bʋ-kaood sẽn ka tɩrg sã n na n saka kosg b sẽn maan-a ne pẽdgre, yaa vẽeneg tɩ Wẽnnaam sẽn yaa tɩrg la sõngã na n deega neb nins sẽn pẽdgd ne pʋʋsgã kosg n yɩɩda. Dẽ a Zezi paasame: “Mam yeta yãmba tɩ [Wẽnnaam] na n sõnga bãmb tao-tao.”

Naoor wʋsgo b mongda nin-talsã la naong rãmbã bʋʋm, n yaool n maand nin-bɛdã la rakãagbã lohorem. La Wẽnnaam na n kɩtame tɩ b sɩbg nin-wẽnsã wa sẽn zems yembo, la sẽn paase, a na n gesame t’a sõgen dãmbã paam bʋʋm, n kõ-b vɩɩm sẽn ka sɛta. La rẽ yĩnga, neb a wãn n sɩd kɩs sɩd tɩ Wẽnnaam na n kɩtame tɩ b kao bʋʋd tɩrg tao-tao?

Sẽn yɩɩd fãa a goma tẽeb ning d sẽn segd n tall ne pʋʋsgã pãngã yelle, n soke: “La Ninsaal Biiga sã n wa, b na n yãa tẽeb dũniyã zugu?” B basa sokrã n pa leok ye. La wõnda sokrã rat n wilgame tɩ Kiristã sã n wa wa a Rĩungã naamẽ, a ka na n mik tɩ neb wʋsg tara tẽeb a woto ye.

Neb kẽer n da be a Zezi kɛlgdbã sʋk n tar bas-m-yam tɩ loog ne b mensã tẽebo. B ra kɩsa sɩd tɩ b mens yaa tɩrse, la b ra paoogda neb a taabã. Tõe t’a Zezi karen-biisã kẽer meng ra bee b sʋka. Rẽ n so t’a Zezi togs nin-kãens kɩbar ning sẽn pʋgdã:

“Doap a yiib n da tũ taab n kẽng Wẽnnaam doogẽ n na n tɩ pʋʋse. Yembra yaa Fariziẽ la a to wã yaa yõor yaood dɛɛgda. Fariziẽ wã yalsame n pʋʋs a sũur pʋgẽ woto: Wẽnnaam, mam pʋʋsda yãmb barka mam sẽn ka wẽnd neb a taaba sẽn yaa fãadba la nin-wẽnse, la yoaadba la [wala] yõor yaood dɛɛgd kãnga me ye. Mam loeta noor naoor a yiib dasem a yopoe fãa pʋgẽ, mam yãkda piig pʋɩɩr ne bũmb fãa mam sẽn tara.”

B ra mii Fariziẽ rãmbã wala neb sẽn wilgd b tɩrlmã neb taoore, sẽn na yɩl tɩ neb a taabã yã n pẽge. B ra yãka no-loeer b mens yĩnga, n da minim n maand rẽ tẽne la lamus raare. B ra gũusda neer n yaood pʋtã zẽ-bõones piig pʋɩɩre. Kiis a wãn sẽn looge, Zãn Kibsã wakate, b ra wilga vẽeneg tɩ b kisa nin-buiidã, b sẽn yeel tɩ: “La neb kʋʋngã sẽn ka mi tõogã [sẽn dat n yeel tɩ Fariziẽ rãmbã sẽn da wilgd Tõogã võor to-to wã], b yaa neba, kãab wẽng sẽn be b zutu.”—Kãab-paalgã Koe-noogo.

A Zezi kẽnga ne a kɩbarã taoor n gom neb nins ‘b sẽn kãab wẽngã’ a ye yell woto: “La yõor yaood dɛɛgda yalsa yɩɩga n ka sak n doog ba a zug n ges yĩngr ye, a wẽe a yãoog n yeele: ‘Wẽnnaam, bɩ y zoe mam nimbãanega tɩ m yaa yel-wẽn soaba.’ ” La yõor yaood dɛɛgdã sɩd sak n deega ne sik-m-meng t’a kongame. Rẽ n so t’a Zezi yeel woto: “Mam yeta yãmba tɩ yẽ soab kuila ne tɩrlem la Fariziẽ wã ka paam ye. Tɩ bõe, ned ninga sẽn waoogd a menga a na paam paoogre, la ned ninga sẽn sikd a menga, a na paam waoogre.”

Woto a Zezi leb n wilga vẽeneg tɩ sik-m-mengã yaa tɩlae. B sẽn wub a Zezi karen-biisã zãmaan ning pʋgẽ wã, Fariziẽ rãmbã sẽn yaa tɩrs b mens nifẽ wã ra tara tõog neba zut sõma. Sẽn paase, wakat fãa neba ra nee naamã la kãsengã n yɩɩda. Rẽ n kɩt tɩ ka lingr ne-do, yam kãng sẽn bẽeg a Zezi karen-biisã mengã ye. Ad sɩd yaa zãmsg sẽn yaa sõma meng la a Zezi kõ sik-m-mengã wɛɛngẽ! Luk 18:1-14; Zã 7:49.

▪ Bõe yĩng tɩ bʋ-kaood sẽn ka tɩrgã baas n sak pʋg-kõorã kosgo, la kɩbar ning a Zezi sẽn togsã zãmsda tõnd bõe?

▪ A Zezi sã n wa, tẽeb bʋg buud la a na n bao n yã neba nengẽ?

▪ Ãnda rãmb la a Zezi togs a kɩbarã sẽn tɩ loe ne Fariziẽ la yõor yaood dɛɛgdã?

▪ Fariziẽ rãmbã manesem bʋg la d ka segd n talle?