Sak 97

Viyn pʋʋgẽ wã tʋm-tʋmdba

A ZEZI ra nan yeela paalem tɩ “taoor dãmb wʋsg na n lebga poorẽ dãmba, la poorẽ dãmb wʋsg na n lebga taoor dãmba.” Masã a rɩka makr n bilg gom-kãngã võore. A sɩnga woto: “[Saasẽ Rĩungã] wẽnda yir soab sẽn yi yibeoog pĩnda n na n dɩk tʋm-tʋmdba n ning a [viyn] pʋʋgẽ.”

A kẽnga ne kɩbarã taoor woto: “[Yira soab] sara ne bãmb tɩ b sak daar a yembr denie a ye, la yẽ tʋma bãmb tɩ b kẽng a pʋʋgẽ. La sõ-bɩɩmd wakate [wakat a tãab soabã, NW ] yẽ yiime n yã neb a taab sẽn yas zaalem daaga pʋgẽ. Yẽ yeela bãmb yaa: Bɩ yãmb me kẽng mam viyn pʋʋgẽ wã, la bũmb ninga sẽn zemse mam na kõ yãmba. La bãmb kẽngame. La yẽ leb n yii wĩnto-sʋka la zafare [wakat a yoob la a wɛ soabã, NW ] n maan woto bala. La wĩndga sẽn dat n kẽ wakate [wakat piig la a ye soabã, NW ], yẽ yiime n yã tɩ neb a taab yas raagẽ zaalem. La yẽ soka bãmb tɩ yaa bõe tɩ b yas be zaalem wĩndga tɛka? Bãmb leoka yẽnda yaa: Ned ka rɩk tõnd ye. Yẽ yeela bãmb yaa: Bɩ yãmb me kẽng mam pʋʋgẽ wã.”

Yaa Wẽnnaam a Zeova la yira soaba, bɩ viyn pʋʋgã soaba, tɩ viyn pʋʋgã yaa Israɛll buudã. Viyn pʋʋgã tʋm-tʋmdb yaa neb b sẽn kẽes Tõogã kaool pʋgẽ. Sẽn yɩɩd fãa, bãmb ya a Zezi tʋm-tʋmdbã wakatẽ Zʋɩf rãmbã. Ra yaa ne daarã tõr tʋm-tʋmdb bal la b sar-yã. Daar a yembr tʋʋmd yaood ra yaa denie a ye. “Wakat a tãab soabã” sẽn yaa yibeoog wakat a 9 wã, rat n yeelame tɩ tʋm-tʋmdb nins b sẽn dɩk wakat a 3, a 6, a 9, la 11 soabã tʋma lɛɛr a 9, a 6, a 3, la lɛɛr a 1.

Lɛɛr 12 bɩ daarã tõr tʋm-tʋmdbã makda Zʋɩf rãmbã taoor dãmb sẽn da tʋmd tũudum tʋʋm wakat fãa wã. Bãmb da ka wa a Zezi karen-biisã sẽn da yaa zĩm-yẽedb bɩ b maand nug-tʋʋm a taab b vɩɩmã tõr la balã ye. Yɩɩ yʋʋmd 29 wã sẽn wa n kolg saab bal la “yira soab” tʋm a Zezi Kirist t’a tɩ tigim-b tɩ b lebg a karen-biisi. Dẽ, b yɩɩ “poorẽ dãmba,” bɩ wakat 11 soab viyn pʋʋgã tʋm-tʋmdba.

Sẽn na n baase, yɩɩ ne a Zezi kũumã la makr wɛɛngẽ tʋʋmd daarã baas-yã, tɩ wakat ra ta tɩ b segd n yao tʋm-tʋmdbã. La b pa maan wa raasenkam ye, b sɩnga ne yaoolem dãmbã yaoobo. A Zezi wilga woto: “La zĩiga sẽn dat n sobge, pʋʋga soab yeela a rakõora t’a bool tʋm-tʋmdbã n sɩng ne yaoolem dãmbã n kõ bãmb b yaoodo tɩ ta dẽenem dãmbã. Neb nins sẽn sɩng tʋʋmda wĩndga sẽn dat n kẽ wakata deega denie a yembr-yembre. Dẽenem dãmba sẽn yaool n wa, bãmb tẽedame tɩ bãmb na n deega sẽn yɩɩd woto, la bãmb me reega denie a yembr-yembre. La bãmb sẽn deege, bãmb yẽgma ne yira soab n yeele: Yaoolem dãmb kãensã tʋma bilf bala, la yãmb maana bãmb tɩ b zems tõndo sẽn nams wĩndga tɛka ne tʋʋlgã. Yẽ leoka bãmb ned a yembr yaa: M zoa, mam ka maan foo sẽn ka tɩrg ye. Fo ka sar ne maam n sak denie a yembr la? Deeg f rẽnd n kẽnge, yaa maam ne m yam tɩ kõ yaoolem soaba wa mam sẽn kõ foomã. Mam ka tar noor tɩ maan m sẽn dat ne m meng rẽnd bɩ? Fo maanda sũ-kiir mam sẽn maan neera yĩng bɩ?” Sẽn na n baase, a Zezi lebs n togsa tagsg ning a sẽn da togs pĩndã n yɩlem, n yeele: “A yaa woto yaoolem dãmb na lebg dẽenem dãmba, la dẽenem dãmb na lebg yaoolem dãmba.”

Denie wã reegr ka yɩ a Zezi kũumẽ wã ye, la ra yaa yʋʋmd 33, wakat ning Kiristã, sẽn yaa “rakõora” sẽn pʋdg vʋʋsem sõngã a karen-biisã zutã. A Zezi karen-bi-kãensã ra yaa wala “yaoolem dãmbã,” bɩ wakat 11 soab tʋm-tʋmdba. Denie wã ka makd vʋʋsem sõngã b sẽn kõ-bã ye. A yaa bũmb b sẽn kõ karen-biisã tɩ b rɩk n tʋm tẽng zug ka n paam n vɩɩmd wakat sẽn ka sate. A yaa zu-noog ning b sẽn tara, n yaa tẽeb Israɛllã neba, tɩ b zae-b tɩ b moon Wẽnnaam Rĩungã.

Pa kaoos la b rãmb nins b sẽn dɩk tʋʋm pipi wã bãng tɩ b yaoo a Zezi karen-biisã, la b neẽ tɩ b rɩkd makr wɛɛngẽ denie wã n tʋmdẽ ye. La b rata sẽn zʋʋg vʋʋsem sõngã la Rĩungã zu-nood sẽn tɩ loe ne-a wã. B yẽgengã la b zabrã yaa b sẽn nams Kiristã karen-biisã sẽn yɩ “yaoolem” tʋm-tʋmdb viyn pʋʋgã pʋgẽ wã.

Rẽ yĩnga a Zezi makrã pidsa pipi yʋʋm kob-gĩndẽ wã bal bɩ? Ayo, yaoolem yʋʋm kob-gĩna pʋsẽ, dũni kiris-nebã tũudum taoor dãmb naam la b zɩɩb kɩtame tɩ bãmb yɩ ‘dẽenem dãmb’ b sẽn dɩk tʋʋm Wẽnnaam makr wɛɛngẽ viyn pʋʋgã pʋgẽ. B gesa koe-moondb sẽn tar yẽesmã sẽn lagem ne Sosiete Wats Tawa wã wa “yaoolem” dãmba, n ka segd ne tʋʋmd sẽn tar yõod Wẽnnaam tʋʋmdã pʋgẽ ye. La sɩd-sɩda yaa nin-kãensã egiliizã taoor dãmb sẽn kisã n paam denie wã, sẽn dat n yeel tɩ zu-noog n yɩ Wẽnnaam saasẽ Rĩungã koe-taasdb sẽn zae ne vʋʋsem sõngã. Matɩe 19:30–20:16.

▪ Viyn pʋʋgã makda bõe? Viyn pʋʋgã soaba, la lɛɛr 12 ne lɛɛr a 1 tʋm-tʋmdbã makda ãnd dãmba?

▪ Wakat bʋg la makr wɛɛngẽ tʋʋmd daarã baas-yã, la wakat bʋg la b yao yaoodã?

▪ Denie wã yaoob makda bõe?