Sak 100

Min dãmbã makre

A ZEZI da rabda Zerizalɛm n tek n yals a Zase zakẽ wã. Tõe t’a ra ket n bee be. A karen-biisã ra tẽedame tɩ b sã n da ta Zerizalɛm, a Zezi na n mooname n togs tɩ yẽ la Mesi wã la a lugl a Rĩungã. Dẽ, a Zezi rɩka makr sẽn na yɩl n dems b tagsgã, la a wilg tɩ Rĩungã waoong ket n zãrame.

A yeelame: “Na-biig a yembre n da yi n kẽng tẽng sẽn zãr n na n tɩ reeg naam la a lebg n wa.” A Zezi la ‘na-biigã’ tɩ saasẽ yaa ‘tẽng sẽn zãrã.’ A Zezi sã n da ta beenẽ, a Ba wã na n kõ-a-la naam.

Sẽn deng tɩ na-biigã loogã, a boola a tʋm-tʋmdb piig n kõ-b wanzũri min dãmba, n yeel-ba: “Bɩ y yõd [n] tolemdẽ tɩ m kẽng la m wa.” Pipi, tʋm-tʋmdb piigã ra makda a Zezi pipi karen-biisã, la pa tek bãmb bal ye, tʋm-tʋmdb piigã leb n makda neb nins fãa sẽn da saagd n na n dɩ naam ne Kiristã saasẽ Rĩungã pʋgẽ wã.

Wanzũri min dãmbã yaa ligd koeems sẽn tar yõod wʋsgo, t’a yembr fãa ra zem ka-koaad kiis a tãab yaoodo. La min dãmbã yẽ makda bõe? La yaa toleng bʋg buud la tʋm-tʋmdbã ra segd n dɩk-b n maane?

Min dãmbã makda paoong karen-biisã sẽn zae ne vʋʋsem sõngã sẽn da tõe n dɩk n bao saasẽ Rĩungã nanambs n paas hal t’a Zezi wa n lebg Rĩm Rĩungã b sẽn kãabã pʋgẽ. A Zezi vʋʋgrã la a sẽn vẽneg a meng ne a karen-biisã poore, a kõo a karen-biisã makr wɛɛngẽ min dãmba, sẽn na yɩl tɩ b maan karen-biisi, n kɩt tɩ saasẽ Rĩungã neb sõor paase.

A Zezi paasame: “La [na-biigã] soolem neba kisga yẽnda n tʋm koɛɛg tɩ pʋgl yẽnda n yeele: Tõnd ka rat tɩ rao kãngã soog tõnd ye.” Soolem nebã makda Israɛll nebã bɩ Zʋɩf rãmbã, la a Zezi karen-biisã ka naag be ye. A Zezi saasẽ loogrã poore, Zʋɩf kãens namsa a karen-biisã n wilg tɩ b ka rat t’a yɩ b rĩm ye. Woto, b maana wala soolem nebã sẽn tʋm koɛɛg tɩ pʋgl yẽnda wã.

Wãn to la tʋm-tʋmdb piigã rɩk b min dãmbã n tʋme? Ad a Zezi sẽn wilgi: “La yẽ sẽn deeg naam n lebg n wa, yẽ kɩtame tɩ b bool tʋm-tʋmdb nins yẽ sẽn da kõ ligda tɩ b wa yẽ nengẽ, tɩ yẽ tõe n bãng ned kam fãa sẽn tolem n paam yõod to-to. La pipi soaba wa n yeelame: Zusoaba, yãmb min a yembra dogla min piiga. Yẽ yeela tʋm-tʋmd kãng yaa: Be neere, tʋm-tʋmd sõngo, fo sẽn maan neer ne bũmb bilfa yĩnga, bɩ f soog tẽns piiga. La yiib soaba wa n yeelame: Zusoaba, yãmb min a yembra dogla min a nu. Yẽ yeela tʋm-tʋmda yaa: Bɩ fo me soog tẽns a nu.”

Tʋm-tʋmd ning sẽn tar-a min dãmb piigã makda karen-biis sull sẽn zĩnd yʋʋmd 33 tɛk hali n tõk masã, t’a Zezi tʋm-tʋmdbã be b sʋka. Tʋm-tʋmd ning sẽn paam min dãmb a nu wã me makda karen-biis sull sẽn zĩnd wakat kãng pʋgẽ me. Bãmb me tũnuga ne soay nins b sẽn paame, la sẽn zems ne b pãn-tõog n kɩt tɩ Rĩma paoong fɩɩg tẽng zugu. Sul a yiibã neb moona koe-noogã ne yẽesem, tɩ rẽ kɩt tɩ pʋ-peelem dãmb wʋsg lebg kiris-neba. Tʋm-tʋmdb piigã sʋka, bãmb b wɛ n tolem n paam yõodo, n fɩɩg arzɛgs nins b sẽn kɩs-bã.

A Zezi leb n paasame: “La a to wa n yeelame: Zusoaba, ad yãmb min mam sẽn vil ne peende n bĩngi. Tɩ bõe, mam zoeta yãmba, yãmb sẽn yaa nin-toaaga yĩnga. Yãmb dɩkda yãmb sẽn ka dɩglẽ ye, la yãmb tigisda yãmb sẽn ka bʋdẽ ye. Yẽ yeela tʋm-tʋmd kãng yaa: tʋm-tʋmd wẽnga, mam na n kaoo fo bʋʋda ne f menga goama. Fo miimi tɩ mam yaa nin-toaaga n dɩkd mam sẽn ka rɩglẽ ye la m tigisd mam sẽn ka bʋdẽ ye. Dẽ, yaa bõe tɩ fo ka ning mam ligdã bãnk pʋgẽ? Tɩ mam sã n wa bɩ m deeg m dẽnd ne yõodo? La yẽ yeela neb nins sẽn be be wã tɩ b reeg min a yembra yẽ sẽn tarã n kõ ned ninga sẽn tar-a min piigã.”

B sẽn deeg tʋm-tʋmd wẽngã makr wɛɛngẽ minnã, rat n yeelame t’a konga zĩig saasẽ Rĩungã pʋgẽ. Makr wɛɛngẽ a konga zu-noog ning sẽn yaa rɩ naam tẽns piig bɩ a nu zutã. Tẽeg-y tɩ b ka yeel tɩ tʋm-tʋmdã yaa wẽnga, tʋʋm wẽns a sẽn maan yĩng ye, la ya a sẽn ka tʋm n kɩt t’a zu-soabã rĩungã paoong fɩɩga yĩnga.

B sẽn deeg tʋm-tʋmd wẽngã min n na n kõ pipi soabã, ned a ye n kɩɩs n yeele: “Zusoaba, yẽ tara min piiga.” La a Zezi leokame: “B na n kõo ned ninga sẽn tara, la ned ninga sẽn ka tarã, b na n deega baa bũmb bilf ninga yẽ sẽn tarã. La sẽn keta, wa-y ne mam bɛɛba ka, neb nins sẽn ka rat tɩ mam soog-bã, kʋ-y bãmb mam taoore.” Luk 19:11-27; Matɩe 28:19, 20.

▪ Bõe n kɩt t’a Zezi rɩk min dãmbã makre?

▪ Na-biigã yaa ãnda, la a da rebda tẽn-bʋgo?

▪ Ãnda rãmb la tʋm-tʋmdbã, la min dãmbã makda bõe?

▪ Ãnda rãmb la soolem nebã, la wãn to la b wilg b kisgrã?

▪ Bõe yĩng tɩ b bool tʋm-tʋmd a yembr tɩ tʋm-tʋmd wẽnga, la b sẽn deeg a minnã võor yaa bõe?