Sak 102

Kirist kẽe Zerizalɛm pʋgẽ ne ziiri

VẼK-N-BEOOG yibeoogã sẽn da yaa Nizã rasem a 9 wã, a Zezi ne a karen-biisã yii Betani n tũ oliiv tɩɩs tãngã zug n na n kẽng Zerizalɛm. Pa kaoos la b kolg Bɛtfaaze, sẽn be oliiv tɩɩs tãngã zugã ye. A Zezi yeela a karen-biis a yiib woto:

“Bɩ y kẽng tẽng ninga sẽn be yãmb taoorã. La tao-tao bala yãmb na yã bõang sẽn loe tɩ bõn-bil be ne-a. Bɩ y lok bãmb n wa kõ maam. Ned sã n yeel tɩ bũmbu, bɩ y leok yaa: Zusoabã n dat bãmba. La wakat kãng bala a na n basa bãmb tɩ b wa.”

Sɩngrẽ wã karen-biisã ka bãng tɩ bũmb ning a sẽn yeel tɩ b maanã pidsda Biiblã bãngr-gomd ye. La b wa n bãngame. No-rɛɛs a Zakari da reng n togsame tɩ Rĩm ning Wẽnnaam sẽn kãab t’a na n waame wã na n zomba bõang n kẽ Zerizalɛm, n-ye, n ‘zomb bõn-bil sẽn yaa bõn-yãang biiga.’ Woto me, rĩm a Salomo me rag n zomba bõn-bil n kẽng tɩ b tɩ zae-a.

Karen-biisã taa Bɛtfaaze n lok bõn-bilã ne a ma wã. Neb kẽer sẽn da yas n kɛg be sokame: “Yãmb maanda bõe?” La b sẽn togs-b tɩ ya a Zezi n da rat rũmsã, neba basame tɩ karen-biisã tall-b n kẽng a Zezi nengẽ. Karen-biisã rɩka b zugẽ futã n paal bõn-yãangã ne a biigã poɛy zutu, la yaa bõn-bilã la a Zezi zomb-yã.

A Zezi sẽn da zao bõangã n teesd Zerizalɛmã, kʋʋngã ra tara paasg bala. Neba wʋsg ra yɛdgda b zugẽ futã sorã zugu, tɩ neb a taab ra keed tɩɩs vãad n yɛdgdẽ. Neba ra kaasda woto: “Wẽnd na bark rĩm ninga sẽn wat ne [a Zeova] yʋʋrã! Laafɩ bee [saasẽ], la naam bee yĩngri!”

Fariziẽ rãmbã kẽer sẽn zĩnd kʋʋngã sʋk n wʋm b sẽn moond woto wã sãama b sũyã, tɩ b yẽgem n yeele: “Karensaamba, leng-y y karen-biisã.” La a Zezi leok-b lame: “Mam yeta yãmba tɩ bãmb sã n sĩndi, kuga na n kelmame.”

A Zezi sẽn da wa n kolgd Zerizalɛmã, a gesa tẽngã n sɩng n yãbd a zugu, n yetẽ: “Mam nonga fo me sã n bãng b sẽn kõ foo bũmb ninsi sẽn wat ne fo laafɩ wã rũnda. La masã, b solga ne foom.” Zerizalɛm sẽn tõdg t’a kõn sakã, a na n paama sɩbgre, wa a Zezi sẽn deng n yeel woto wã:

“Fo bɛɛba [Rom Zenerall a Tɩtus ne a sodaasã] na n tu[u] bok n gilgi n gũbg foom tɩ fo neba ka tõe n yi ye. Bãmb na n sarma foom ne f kamba sẽn be f pʋgẽ wã, la bãmb kõn bas kugr ba a yembr kugr a to zugu fo pʋgẽ ye.” Zerizalɛm sãoong kãngã waoong a Zezi sẽn da reng n togsã sɩd zĩnda yʋʋm 37 loogr zugẽ, yʋʋmd 70 wã pʋgẽ.

Semen a wãn sẽn deng rẽ bala, neb wʋsg sẽn be kʋʋngã sʋk ra yãa a Zezi sẽn vʋʋg a Lazaare. Masã, nin-kãens ra ket n togsda neb a taabã yel-solem kãnga. Dẽ a Zezi sẽn kẽ Zerizalɛmã, galʋ-tẽngã tõr rãmbame. Neba ra sokda woto: “Yaa yɛ ned la woto?” Tɩ kʋʋngã ra yet woto: “Yaa Wẽnnaam no-rɛɛs a Zezi sẽn yi Galile Nazarɛt.” Fariziẽ rãmbã sẽn yã woto, b sũyã sãamame b sẽn ne tɩ bãmb sẽn maand fãa yaa zaalmã, bala wa b sẽn yeelã: ‘Neba fãa tũuda yẽnda.’

A Zezi kẽnga wẽnd-doogẽ wã n na n tɩ zãms nebã, wa a sẽn da minim n maand to-to a Zerizalɛm waoong fãa wã. Beenẽ zoensã la wobsã fãa waame t’a Zezi sãoog-ba! La maan-kʋʋdbã kãsem dãmb sẽn yã bõn-kãsems nins a Zezi sẽn maandã, la b sẽn wʋmd tɩ komdibli wã sẽn be wẽn-doogẽ wã kaasdẽ tɩ, “Bɩ y fãage, Davɩɩd Biigã!” (NW ) b sũyã yikame. Dẽ b zaba woto: “Yãmb wʋmda kamba sẽn yeta bɩ?”

T’a Zezi leoke: “N-ye, yãmb nan ka karem gom-kãens sẽn yeta: Yãmb paama pẽgre sẽn yit kom-bõonego la kamb sẽn ket n yẽsemda noy pʋsẽ bɩ?”

A Zezi ra ket n zãmsda nebã, la a get bũmb nins fãa sẽn be wẽnd-doogã pʋgẽ wã. Zĩigã sẽn da sobgdã, yẽ ne a karen-biisã kẽna sẽn zems kɩlometr a tãab n leb Betani. A gãanda hatã yʋng be, tõe tɩ ra ya a zoa a Lazaar yirã. Matɩe 21:1-11, 14-17; Mark 11:1-11; Luk 19:29-44; Zã 12:12-19; Zakari 9:9.

▪ Wakat bʋgo, la ne manesem bʋg la a Zezi kẽ Zerizalɛm wala Rĩma?

▪ Bõe yĩng tɩ tar yõod wʋsg tɩ kʋʋngã pẽg a Zezi?

▪ A Zezi sẽn yã Zerizalɛma, a manesem yɩɩ wãn to, la bãngr-gom-bʋg la a togs-yã?

▪ A Zezi sẽn kẽng wẽnd-doogẽ wã bõe n maane?