Sak 111

Yaoolem dayã bãnde

MASÃ tɩ ra yaa talaatã raar wĩnd-kaoore. A Zezi ra zĩi oliiv tɩɩs tãngã zug n get wẽnd-doogã tẽngre, t’a Pɩɛɛre, a Ãndere, la a Zak wa a nengẽ n na n yã-a. Yaa wẽnd-doogã yell n da pak-ba, bala a Zezi ra nan deng n togsame tɩ kugr ba a ye kõn zĩnd a to zug tɩ b ka lub-a ye.

La wõnda wa b sẽn da wa n wat a Zezi nengẽ wã, sẽn yɩɩd rẽ n be b yamẽ wã. Semen a wãn sẽn deng rẽ, a ra goma a sẽn na n wa be a Rĩungã naamẽ yelle, sẽn yaa wakat ning “Ninsaal Biiga sẽn na n pukã.” Sẽn paase a rag n goma ne-b ‘zãmaanã sɛɛb wakat’ (NW ) yelle. Rẽ n so tɩ tʋm-tʋmdbã ra rat sõma n bãng n paas yel-kãensã zugu.

B yeela woto: “Bɩ y togs tõnd bõn-kãens sẽn na n zĩnd wakat ninga [tɩ rẽ na n baas ne Zerizalɛm la a wẽnd-doogã sãoongã], la bãnd ninga sẽn na n wilg yãmb [sẽn na n wa be y Rĩungã naamẽ la zãmaanã] sɛɛb wakate.” Sɩda b sokrã tara nens a tãabo. Pipi b ra rat n bãnga yɛl sẽn tɩ loe ne Zerizalɛm la a wẽnd-doogã sɛɛbo, rẽ poore, yɛl sẽn tɩ loe ne a Zezi sẽn na n wa be a Rĩungã naamẽ, la sẽn na n baase, yɛl sẽn tɩ loe ne zãmaanã tõr sɛɛbo.

A Zezi leoka sokrã nens a tãabã fãa a leok-wokã pʋgẽ. A kõo bãnd sẽn na n kɩt tɩ b bãng Zʋɩf rãmbã zãmaan saab wakate, la a togs yɛl a taab n paase. A leb n kõo bãnd sẽn na n sõng a beoog-daar karen-biisã tɩ b bãng tɩ b vɩɩ a sẽn be a Rĩungã naamẽ wakate, la tɩ zãmaanã tõr kolga saabo.

Yʋʋmd ne a to fãa, tʋm-tʋmdbã ra na n geta a Zezi bãngr-gomdã sẽn pidsd to-to. Sɩda, yɩɩ bãmb wakatã meng la yɛl nins a sẽn deng n togsã sɩng pidsgu. Yaa rẽ yĩng la Zʋɩf rãmbã ne b wẽnd-doogã sãoong yʋʋm 37 loogr zugẽ, yʋʋmd 70 wã pʋgẽ sẽn ka ling wakat kãng kiris-nebã.

Baasg zãnga, Kiristã sẽn na n wa be a Rĩungã naamẽ wã ka yɩ yʋʋmd 70 wã ye. Bõn-kãng waa kaoosg zugẽ rẽ poore. La yɩɩ wakat bʋgo? A Zezi bãngr-gomdã vaeesg n wilgd rẽ.

A Zezi reng n togsame tɩ b “na n wʋmame tɩ zabr beeme la tɩ zabr kɩbar beeme.” A yeelame tɩ “buud a yembr na n yika zabr ne buud a to,” tɩ kom, tẽn-digimdgu, la bã-longds me wa. Neba na n kisga a karen-biisã la b kʋ-ba. Ziri no-rɛɛsdb na n pukame n belg neb wʋsgo. Noy kɩɩsg na n paasame, tɩ neb wʋsg nonglem na n lebg maasga. Wakat kãng pʋgẽ me, b na n moona Wẽnnaam Rĩungã koe-noog tɩ yɩ kaset buud fãa yĩnga.

Sẽn deng Zerizalɛm sãoongã yʋʋmd 70 wã pʋgẽ, yɛl nins a Zezi sẽn togs a bãngr gomdã pʋgẽ paama pidsg bilfu. La pids-kãsengã na n yɩɩ Kiristã sẽn na n wa be a Rĩungã naamẽ la zãmaana sɛɛb wakate. Yʋʋmd 1914 tɛka, d sã n tags dũniyã yɛl zug neere, d yãtame t’a Zezi bãngr-gom-kãsengã paamda a pids-kãsengã yʋʋm-kãng tɛk n tar n watẽ.

Bãndã a Zezi sẽn kõ wã neng a to tɩ loee ne “sãoong bõn-wẽnga” pukri. Yʋʋmd 66, Rom “sodaas wʋsg” sẽn wa n gũbg Zerizalɛm n sãam wẽnd-doogã lalgã n yɩ bõn-wẽng kãng pukri. “Bõn-wẽnga” ra yasa zĩig ning a sẽn ka segd n yalsẽ.

Bãndã pids-kãseng pʋgẽ, bõn-wẽngã yaa Tẽn-tẽns Lagem taabã [Société des Nations] ne a lɛdgdã sẽn yaa Tẽn-tẽns sẽn lagem Taabã [Organisation des Nations Unies (O.N.U.)]. Dũni kiris-nedemdã getame tɩ siglg kãngã sẽn be dũniyã laafɩ yĩngã ledgda Wẽnnaam Rĩungã. Ad wã sɩd yaa bõn-wẽnga! Rẽ n so tɩ wakat watẽ tɩ nanambsã na n wa lagem ne O.N.U. wã n pig dũni kiris-nedemdã (sẽn makd pĩnd Zerizalɛmã) n sãam-a.

Dẽ a Zezi reng n togsame: “Toog kãseng na n zĩndame, toog sẽn yaa woto nan ka zĩnd dũniyã zug ye, la a kõn leb n zĩnd yõ wã zugẽ abada ye.” Zerizalɛm sãoongã yʋʋmd 70 wã sɩd yɩɩ to-kãsengã, tɩ b wilg tɩ b kʋʋ sẽn yɩɩd neb milyõ. A Zezi bãngr-gomdã nen-kãngã pids-kãsengã na n yɩɩ kãseng wʋsg n yɩɩge.

Bas-yard tallg yaoolem dayã wakate

Nizã kiuug rasem 11 talaatã raar zaabr ra kolgdame. A Zezi ra ket n gomda ne tʋm-tʋmdbã a sẽn na n wa be a Rĩungã naamẽ wã la zãmaanã sɛɛb wakat bãnd yelle. A yeelame tɩ b gũus ne ziri Kirist rãmbã. A yeelame tɩ b na n makame n ‘belg nin-tũusdsa mense.’ La wala sɩls nin sẽn ne yɩɩga, nin-tũusds kãensã na n tigma zĩig ning b sẽn tõe n yãẽ tẽeb rɩɩb meng-mengã, sẽn dat n yeel tɩ Kirist hakɩkã nengẽ, a sẽn na n wa be a Rĩungã naamẽ tɩ ninsaal nif ka neẽ wã sasa. B ka na n belg-b tɩ b tɩ tigim ne ziri Kirist ye.

Ziri Kirist dãmb sẽn tõe bal yaa b puk tɩ neb nin yã-ba. La a Zezi sẽn na n wa be a Rĩungã naamẽ wã na n yɩɩ bũmb ninsaalb nin sẽn ka ne. A Zezi yeelame tɩ to-kãsengã sɩngr poore, “wĩndga na n sobgame, la kiuug kõn kõ a vẽenem yɛs ye.” N-ye, sasa kãng na n yɩɩ wakat ning sẽn yaa libsg n tɩ yɩɩdã, ãdem-biis sẽn be tẽng zug tɛka. Na n yɩɩ wala wĩndg sẽn na n tiig n sobg wĩnto-sʋka, tɩ kiuug pa kõt a vẽenem yʋngo.

A Zezi leb n yeelame: “Saasẽ pãens na n digimdame.” Woto a wilgdame tɩ sa-gãongã yalẽ na n waa ne rabeem. Pelen-yɩkã, la nen-kɛglmã tʋʋma piuugr na n yɩɩga ninsaalb sẽn zoe n yã b sẽn be tẽng zug tɛka.

A Zezi yeelame tɩ rẽ yĩnga, “toog kãseng na n zĩnda buud toɛy-toɛy zutu, hal tɩ b kõn bãng b sẽn na maan bũmb ninga ye, bõn-kãens sẽn wõnd bʋrga la ko-wiisi sẽn be ko-kãsenga zuga yĩnga. Neba sũyã na n lebga yog-yoge rabeem yĩnga b sẽn gũud bũmb nins sẽn na n wa dũniyã zuga yĩnga.” Sɩda, ninsaalbã vɩɩm wakat ning sẽn yaa libsg n yɩɩdã sã n wa kolgd a saab zĩigẽ ‘ninsaal Biiga bãnd na n puka yĩngri, tɩ dũniyã buud fãa na n wiisi.’

La ‘Ninsaal Biiga sã n wa wat ne pãng’ n na n sãam zãmaan kãngã nin-wẽnsã, ka neba fãa n na n wiis ye. ‘Nin-tũusdsã’ sẽn yaa neb 144 000 sẽn na n dɩ naam ne Kiristã a saasẽ Rĩungã pʋgẽ wã ka na n wiis ye. Na n yɩɩ woto me ne bãmb tũud-n-taasã a Zezi sẽn dag n bool tɩ ‘piis a taabã.’ Baa ne b sẽn da na n vɩɩmd ninsaalbã wakat ning sẽn yaa libsg n yɩɩdã sasa wã, nin-kãensã na n tũu a Zezi sagl-kãngã: “La bõn-kãens sã n sɩng n zĩndi, bɩ y rooge n nak n ges yĩngri, tɩ bõe, yãmb fãagra kolgame.”

A Zezi rɩka makr sẽn na yɩl t’a karen-biis nins sẽn da na n vɩɩmd yaoolem dayã wakatã bãng tɩ saabã pẽnegame. Mak kãng la woto: “Bɩ y ges kankanga la tɩɩs fãa. Bãmb sẽn tobda, yãmb yãame la yãmb mens bãngame tɩ sig-noor kolgame. Woto me, yãmb sã n yã tɩ bõn-kãens beeme, bɩ y bãng tɩ Wẽnnaam [Rĩungã] kolgame. Mam yeta yãmb sɩda tɩ bõn-kãens na n maaname tɩ [zamaan kãnga kamb,” Sebr Sõngo] nan ka ki zãng ye.”

Woto, a karen-biisã sã n da yã tɩ bãndã nens wʋsg paamd pidsgu, b segd n bãngame tɩ zãmaanã saab kolgame, la tɩ pa na n kaoos la Wẽnnaam Rĩungã yiis wẽng buud fãa ye. Sɩda, saabã na n waa neb nins sẽn na n yã yɛl nins a Zezi sẽn deng n togsã fãa pidsg zãmaanẽ! A Zezi sagla a karen-biis nins sẽn na n vɩɩmd yaoolem dayã sẽn ka na n yɩ reem yellã wakate, n yeele:

“Gũus[-y] y mense n da sak tɩ yão-beed ne rã-yũuri la vɩɩm kãnga yɛla pak yãmb tɩ ra-kãng wa ling yãmb ye. Tɩ bõe, a na n wa linga neba fãa sẽn be dũniyã zuga wa kũusri. Dẽ yĩnga, bɩ y gũ la y pʋʋs daar fãa n paam pãng n põs bõn-kãens fãa sẽn na n wa wã, la y yals Ninsaal Biiga taoore.”

Pʋg-sadb sẽn tar yam, la pʋg-sadb sẽn ka yam

A Zezi tʋm-tʋmdbã ra kos-a-la bãnd sẽn wilgd a sẽn na n wa be a Rĩungã naamẽ, t’a ra leokd-ba. Masã a kõo bãndã nens wʋsg a taaba, n tũnug ne makr a tãabo.

Neb nins sẽn na n vɩɩmd a sẽn na n be a Rĩungã naamẽ wã wakat na n yãa a makr fãa pidsgu. A sɩnga pipi makrã woto: “Dẽ, [saasẽ Rĩungã] na n yɩɩ wa pʋg-sadb piig sẽn dɩk b fɩtl dãmb n yi n na n tɩ seg pʋg-paal sɩda. A nu wã ka yam ye, la a nu wã yaa yam dãmba.”

A Zezi sẽn yeel tɩ ‘saasẽ Rĩungã na n yɩɩ wa pʋg-sadb piigã,’ a ka rat n yeel tɩ neb nins sẽn na n paam saasẽ Rĩungã pʋɩ-sʋk yaa yalemb tɩ pʋɩ-sʋk yaa yam dãmb ye! Ayo, a rat n yeelame tɩ sẽn tɩ loe ne saasẽ Rĩungã, manesem buud toɛy-toɛy la b na n yã, bɩ tɩ yɛlã na n wõnda woto bɩ woto.

Pʋg-sadb piigã makda kiris-neb nins fãa sẽn da tõe n paam bɩ sẽn yet tɩ b tõe n paama saasẽ Rĩungã. Ra yaa yʋʋmd 33 Pãntekotẽ la b sɩʋ kiris-neb tigingã kãadem ne pʋg-paal sɩdã sẽn ya a Zezi Kirist b sẽn vʋʋg n kõ ziirã. La yaa saasẽ la kãadem kibsã na n wa zĩnd beoog-daare, wakat b sẽn ka togse.

Makrã pʋgẽ, pʋg-sadb piigã yiimi n na n tɩ seg pʋg-paal sɩdã n lagem ne neb nins sẽn yãagd-a wã. Pʋg-paal sɩdã sã n da ta, pʋg-sadbã ra na n waoog-a lame, b sẽn na n vẽneg sorã ne b fɩtl dãmbã t’a tũ ne a pʋg-paalã n kẽ roog ning b sẽn segl pʋg-paalã yĩngã pʋgẽ. La a Zezi wilgame: “Pʋg-sadb nins sẽn ka yama rɩka bãmb fɩtl dãmba, la b ka zɩ kaam ye. La yam dãmba suii tʋgd kaam n zɩ ne bãmb fɩtl dãmba. La pʋg-paala sɩd sẽn kaoosda, gõeem yõka bãmb fãa tɩ b gũsi.”

Pʋg-paal sɩdã waoong sẽn kaoosã wilgdame tɩ Kiristã sẽn na n wa rɩt naamã a Rĩungã pʋgẽ wã wakat na n kaoosa wʋsg n yaool n wa. A wa n baas n deega naamã yʋʋmd 1914. Yʋng ning sẽn woglã sẽn deng rẽ wã sasa, pʋg-sadba fãa gũsame. La b ka ning-b taal rẽ yĩng ye. Pʋg-sadb sẽn ka yamã taalã yaa b sẽn ka zɩ kaam b tʋgdẽ wã. A Zezi togsa b sẽn nek pʋg-sadbã to-to pʋg-paal sɩdã sẽn wa n watẽ wã: “Yʋʋn-sʋka kɛleng n yiki: Gese, pʋg-paala sɩd watame. Bɩ y yi n tɩ seg bãmba! Dẽ, pʋg-sadb kãens fãa yikame n maneg b fɩtl dãmba. Pʋg-sadb nins sẽn ka yama yeela yam dãmba yaa: Yãk-y y kaama n kõ tõnd tɩ tõnd fɩtl dãmba rat n kiime. Yam dãmba leokame: Ayo, a ka na n sek tõnd ne yãmb me ye. La sẽn yaa neer n yɩɩda, bɩ y kẽng koaasdba nengẽ n tɩ ra.”

Kaamã makda bũmb ning sẽn kɩtd tɩ kiris-nebã ket n yãgd wala fɩtl dãmbã. Rẽ yaa Wẽnnaam Gomdã vʋʋsem sõng sẽn vẽneg tɩ kiris-nebã gãd-a kãn-kãe wã, n paas vʋʋsem sõngã sẽn sõngd-b tɩ b wʋmd Gomdã võorã. Tẽeb kaamã kɩtdame tɩ pʋg-sadb sẽn tar yamã tõe n kõ vẽenem n seg pʋg-paal sɩdã kãadem kibsã zĩigẽ kẽngr sasa. La pʋg-sadb nins sẽn ka yamã sẽn makd b rãmbã ka tar tẽeb kaamã b sẽn da segd n tallã b nengẽ, bɩ b tʋgdẽ wã ye. Dẽ, a Zezi wilga bũmb ning sẽn maane:

“La [pʋg-sadb nins sẽn yaa yalembã] sẽn kẽng n na n tɩ ra [kaamã] wakate, pʋg-paala sɩd waame. La neb nins sẽn segl n sɛ wã tũu yẽnda n kẽ kibsã, la kʋɩlenga pagame. Dẽ, pʋg-sadb a taaba yaool n waame n yeele: Zu-soaba, Zu-soaba, pak-y tɩ d kẽ. La yẽ leokame: Mam yeta yãmb sɩda tɩ mam ka mi yãmb ye.”

Kirist sẽn wa a saasẽ Rĩungã pʋgẽ poore, pʋg-sadb nins sẽn tar yamã sẽn makd b rãmbã sẽn yaa kiris-neb nins sẽn sɩd paam zaeebã nekame. B bãngame tɩ yaa zu-noog tʋʋmd la b sẽn tarã, b sẽn paam n tõe n kõ vẽenem dũni libsg kãngã pʋgẽ, n pẽg pʋg-paal sɩdã sẽn lebg n wa wã. La b rãmb nins b sẽn mak ne pʋg-sadb sẽn ka yamã ka segl n na n kõ pẽg-kãng ye. Dẽ, wakatã sã n wa ta, Kirist ka na n pak kʋɩleng tɩ b kẽ kãadem kibsẽ wã saasẽ ye. A na n bas-b-la yɩng dũniyã yʋng lik sẽn yaa bida pʋgẽ, tɩ b naag noy kɩɩsdb a taabã n sãam. A Zezi baasa a goama n yeele: “Woto yĩnga bɩ y gũ, tɩ bõe, yãmb ka mi daare la wakat me ye.”

Talã rãmbã makre

A Zezi kell n talla sõasg ne a tʋm-tʋmdbã oliiv tɩɩs tãngã zugu. Masã a togs-b-la makr a to, sẽn ya a yiib-n-soab bãmb b tãab sẽn pʋg taab sʋka. Rasem a wãn sẽn deng a Zezi sẽn da wa n be Zeriko, a togsa min dãmbã makr n wilg tɩ Rĩungã waoong ra na n kaoosa wʋsgo. Makr ning a sẽn togsd masã wã tara nens kẽer sẽn wõnd pĩnd soabã, la a leb n bilgda tʋʋm sẽn da na n maan Kirist sẽn na n wa be a Rĩungã naamẽ wã wakate. Yaa makr sẽn wilgd t’a karen-biisã tog n tʋmame n paas ‘a paoongã,’ b sẽn be tẽng zug wakate.

A Zezi sɩnga kɩbarã woto: “A [sẽn dat n yeel tɩ yɛl sẽn tɩ loe ne Rĩungã] na n yɩɩ wa rao a yembre sẽn togd sore n bool a tʋm-tʋmdba n kɩs bãmb a paoongo.” A Zezi la rao ning sẽn tog sor n kẽng saasẽ wã. La sẽn deng t’a tog sorã a bobla a paoongã a tʋm-tʋmdbã, sẽn ya a karen-biisã sẽn tõe n paam saasẽ Rĩungã. Paoong kãng ka makd tẽng zug laog ye, la a makda pʋʋg b sẽn segl tɩ Kirist bʋd a pʋgẽ t’a tõe n wa ne karen-biis n paase.

A Zezi bobla a tʋm-tʋmdbã a paoongã, bilf bal sẽn deng t’a rʋ saasẽ. Wãn-wãn la a maan rẽnda? Ya a sẽn kõ-b noor tɩ b ket n tʋmd pʋʋgã b sẽn seglã pʋgẽ la b moond Rĩungã koɛɛg dũniyã tɛk fãa wã. Wa a Zezi sẽn yeelã: “Yẽ kõo ned a ye talã a nu, la a to talã a yiibu, la a tãab soaba talã a yembre. Yẽ kõo ned kam fãa sẽn zems-a, la a loogame.”

Woto b pʋɩɩ tʋm-tʋmdbã talã rãmb a nii, sẽn yaa Kirist paoongã, tɩ zems ne ned fãa tõog tẽebã wɛɛngẽ. Tʋm-tʋmdbã yaa karen-biis sula. Pipi yʋʋm kob-gĩndẽ wã, yɩɩ vẽeneg tɩ tʋm-tʋmdbã zĩnda sull ning sẽn deeg talã rãmb a nu wã sʋka. A Zezi leb n paasame tɩ tʋm-tʋmdb nins sẽn deeg talã rãmb a nu wã la talã rãmb a yiibã fãa tʋmame tɩ b talã rãmb fɩɩg n ta naoor a yiibu. B maana rẽ, ne b sẽn moon Rĩungã la b maan karen-biisã. La tʋm-tʋmd ning sẽn deeg talã a yembrã tɩ tuu bok n bus-a.

A paasame: “La sẽn kaoos wʋsgo tʋm-tʋmdb kãens zu-soaba waame n yeel tɩ ned kam fãa tall a ligdi n wa sõd t’a gese.” Yɩɩ hal yʋʋm 1 900 poore, yʋʋm kob-gĩnd 20 soabã pʋgẽ, la Kiristã lebg n na n wa maan gɛɛlã n gese. Sɩd yɩɩ wakat “sẽn kaoos wʋsgo.” Rẽ poore a Zezi wilgame:

“Sẽn deeg-a talã a nu wã talla talã a nu yẽ sẽn paama n kolg n yeele: Zusoaba, yãmb kɩsa maam talã a nu. La gese, mam paama yõod talã a nu n paase. Yẽ zu-soaba yeela yẽ yaa: Yaa neere, tʋm-tʋmd sõngo sẽn maand sɩda. Fo maana sɩd ne bũmb bilfu, mam na n kõo foo tɩ f soog bũmb wʋsgo. Bɩ f paam pʋɩɩr ne f zu-soaba sũ-noogo.” Tʋm-tʋmd ning sẽn deeg talã rãmb a yiibã me maaname t’a rẽnd fɩɩg n ta b sẽn kõ-a wã naoor a yiibu, tɩ b pẽg yẽ me la b kõ-a keoore.

La wãn to masã la tʋm-tʋmdb kãensã sẽn tall kɩs-sɩdã paamd pʋɩɩr ne zusoabã sũ-noogo? B Zusoab a Zezi Kirist sũ-noogã yɩɩ a sẽn tog sor n kẽng a Ba nengẽ saasẽ n tɩ reeg Rĩungã. Sã n yaa ne rũndã-rũndã tʋm-tʋmdb sẽn yaa wẽn-sakdbã, b paama sũ-noog sẽn yaa kãseng b sẽn bobl-b Rĩungã tʋʋm n paasã. Sẽn paase, b sã n wa ki, b na n paama sũ-noog sẽn yaa kãseng n yɩɩd fãa, b sẽn na n vʋʋg-b tɩ b paam saasẽ Rĩungã yĩnga. La yaa wãn to yẽ ne tʋm-tʋmd a tãab-n-soabã?

Tʋm-tʋmd kãng wa n wilga a sũ-pa-noaang woto: “Zusoaba, mam miime tɩ yãmb yaa nin-toaaga, rabeem yõka maam tɩ m kẽng n tɩ tu bok n bus yãmb talã wã. Ade, bɩ y reeg y rẽnda.” Tʋm-tʋmdã tõdgame t’a kõn tʋm pʋʋgã b sẽn seglã pʋgẽ, n moon la a maan karen-biis ye. Dẽ, zu-soaba yeelame t’a yaa ned sẽn yaa ‘wẽnga la kʋɩɩma,’ n kao a bʋʋd woto: “Bɩ y reeg a talã wã. . . . La bɩ y rig tʋm-tʋmd ninga sẽn ka barka t’a kẽ lik sẽn be kɛɛnga. Yãbre ne yẽn wãbr na n zĩnda be.” B sẽn dig tʋm-tʋmd wẽngã sẽn makd b rãmbã n yiis yɩngã yĩngã, b ka tõe n paam tẽeb sũ-noog ye.

Woto yaa zãmsg sẽn yaa kãseng n kõ neb nins fãa sẽn yet tɩ b yaa Kiristã karen-biisã. B sã n dat tɩ Kiristã pẽg-b la a kõ-b keoore, n da rig-b n yiis n lob yɩng likã pʋgẽ tɩ wa baas ne sãoongo, b tog n tʋmame tɩ b saasẽ Zusoabã paoong fɩɩge, n kẽes b mens zãng-zãng koe-moonegã pʋgẽ. Yãmb tara yẽesem zĩ-kãng wɛɛngẽ bɩ?

Kirist sã n wa wa a Rĩungã naam pʋgẽ

A Zezi ra ket n bee ne a tʋm-tʋmdbã oliiv tɩɩs tãngã zugu. A ra leokda b sẽn da sok-a n dat n bãng a sẽn na n wa be a Rĩungã naamẽ wã la zãmaana sɛɛb wakatã bãndã. Masã a togs-b-la yaoolem makre, makr a tãab sẽn pʋg taab sʋka. A Zezi sɩnga woto: “Ninsaal Biigã sã n wa ne b naam la ne b malɛk rãmba fãa, b na n zaoonda b naam geer zugu.”

Waoong kãng na n yɩɩ wakat ning zãmaan kãngã saab sẽn na n wa kolg wʋsgã. La yaa sẽn na n maan bõe? A Zezi wilgame: “Buuda fãa na n tigma bãmb taoore. Bãmb na n welga bãmb ne taab wa pe-kɩɩm sẽn welgd a piis ne a bʋʋse. La bãmb na n ninga piisa b rɩtgo la b ning bʋʋsa b goabga.”

A Zezi bilga bũmb ning sẽn na n paam b rãmb nins b sẽn welg n ning lohorem zĩigẽ wã, n yeele: “Dẽ, rĩma na n yeela neb nins sẽn be b rɩtgã: Wa-y-yã, yãmb dãmba sẽn tar m Ba barka. Bɩ y reeg [Rĩung] ninga sẽn segl yãmb yĩng hal dũniyã naaneg wakatã.” Mak kãngã pʋgẽ piisã ka na n dɩ naam ne Kirist saasẽ ye, la b Rĩungã paoongã võor yaa b sẽn na n yɩ a nin-buiid tẽng zugã. “Dũniyã naaneg” yell b sẽn gom ka wã yɩɩ wakat ning a Ãdem ne a Hawa sẽn sɩng kamb rogem, tɩ b tõe n dɩ segls nins Wẽnnaam sẽn maan n na n yao n fãag ãdem-biisã nafa wã.

La bõe yĩng tɩ b welg piisã n ning rĩma rɩtg sẽn yaa lohorem zĩigã? Ad Rĩma leokre: “Tɩ bõe, kom dag n tara maam la yãmb wa n kõo maam dɩɩbo, ko-yũud dag n tara maam, la yãmb kõo maam koom tɩ m yũ, mam dag n yaa sãana, la yãmb sika maam y yiri, mam dag n yaa beelle, la yãmb yeelga maam fuugu, mam dag n ka laafɩ ye, la yãmb wa n gesa maam, mam dag n bee bi-bees-roogẽ, la yãmb waa mam nengẽ.”

La sẽn mik tɩ piisã bee tẽng zugã, b ra ratame n bãng bãmb sẽn yɩ to-to n tõog n maan tʋʋm sõma a woto n kõ b saasẽ Rĩma. Dẽ b sokame: “Zusoaba, dabʋr la tõnd yã tɩ kom tar yãmba, tɩ tõnd kõ yãmb dɩɩbo, la tɩ ko-yũud tar yãmba tɩ tõnd kõ yãmb koom tɩ y yũ? Dabʋr la tõnd yã tɩ yãmb yaa sãan tɩ tõnd sik yãmb d yiri, la beelle tɩ tõnd kõ yãmb fuug tɩ y yeelge? Dabʋr la tõnd yã tɩ yãmb ka laafɩ, la tɩ yãmb be bi-bees-roogẽ, tɩ tõnd wa yãmb nengẽ?”

Tɩ rĩma leok-ba: “Mam yeta yãmb sɩda tɩ wakat fãa yãmb sẽn maand bõn-kãens ne yembre sẽn yaa yao-zʋʋga neb kãens sʋka sẽn yaa mam ba-biisi, yaa maam la yãmb maanda.” Kiristã ba-biisa yaa neb 144 000 sẽn na n dɩ naam ne-a saasẽ wã kellã sẽn be tẽngã zugã. La a Zezi ra yetame tɩ b sã n maan bãmb yel-sõmde, yaa wala b sẽn maan yẽ bala.

Rẽ poore, Rĩma goma ne bʋʋsã, n yeel-ba: “Yãmb kãab wẽng rãmba, loog n bas-y maam. Bɩ y loog n kẽ bugum sẽn ka kiid pʋgẽ sẽn segl Sʋɩtãana ne a malɛk rãmba yĩnga. Tɩ bõe, kom dag n tara maam, la yãmb ka kõ maam dɩɩb ye, ko-yũud dag n tara maam, la yãmb ka kõ maam koom tɩ m yũ ye, mam dag n yaa sãana, la yãmb ka sik maam y yir ye, mam dag n yaa beelle, la yãmb ka kõ maam fuug ye, mam dag n ka laafɩ ye, la mam dag n bee bi-bees-roogẽ, la yãmb ka wa n ges maam ye.”

La bʋʋsã kɩɩsame n yeele: “Zusoaba, dabʋr la tõnd yã tɩ kom tar yãmba, walla tɩ ko-yũud tar yãmba, walla tɩ yãmb yaa sãana, walla tɩ yãmb yaa beelle, walla [y] ka laafɩ, walla tɩ yãmb bee bi-bees-roogẽ tɩ tõnd ka sõng yãmba?” B sẽn tik bũmb ning zug n kao piisã bʋʋd tɩ b paam bʋʋmã, leb n yaa rẽ me zug la b tik n kao bʋʋsã bʋʋd tɩ b paam taale. A Zezi leokame: “Wakat fãa yãmb sẽn ka maan ne yembre sẽn yaa yao-zʋʋga neb kãens [sẽn yaa mam saam-biisã] sʋka, yãmb ka maan maam me ye.”

Dẽ, sẽn deng zãmaan wẽng kãngã saab to-kãsengã wakatã, bʋ-kaoor wakat n na n zĩnd Kirist sẽn na n wa be a Rĩungã naamẽ sasa. Bʋʋsã “na n loog n paama [sãoong] sẽn ka sɛta, la nin-tɩrsa [piisã] na n paama vɩɩm sẽn ka sɛta.” Matɩe 24:2–25:46; 13:40, 49; Mark 13:3-37; Luk 21:7-36; 19:43, 44; 17:20-30; 2 Tɩmote 3:1-5; Zã 10:16.

▪ Bõe n wa ne tʋm-tʋmdbã sokre, la wõnda yel-bʋs a taab n da be b yamẽ?

▪ A Zezi bãngr-gomdã nen-bʋg n paam pidsg yʋʋmd 70 wã pʋgẽ, la bõe n ka maan wakat kãnga?

▪ Wakat bʋg la a Zezi bãngr-gomdã paam a pipi pidsgu, la wakat bʋg la a paam a pids-kãsengã?

▪ Bõn-wẽngã yɩɩ bõe pipi pidsgẽ wã la yaoolem pidsgẽ wã?

▪ Bõe yĩng tɩ to-kãsengã ka paam a yaoolem pidsg ne Zerizalɛm sãoongã?

▪ Dũniyã yel-bʋs n wilgd tɩ Kirist bee a Rĩungã naamẽ?

▪ Wakat bʋg la ‘dũniyã buud fãa na n wiisi,’ la bõe la Kiristã karen-biis na n maand wakat kãnga?

▪ Mak-bʋg la a Zezi rɩk sẽn na yɩl n sõng a beoog-daar karen-biisã tɩ b bãng tɩ saabã kolgame?

▪ Sagl-bʋg la a Zezi kõ a karen-biis nins sẽn na n wa vɩ yaoolem dayã sasa?

▪ Pʋg-sadb piigã makda ãnd dãmba?

▪ Wakat bʋg la b sɩʋ kiris-neb tigingã kãadem ne pʋg-paal sɩdã, la wakat bʋg la pʋg-paal sɩdã wa n peeg pʋg-paalã n kẽng kãadem kibsẽ wã?

▪ Kaamã makda bõe, la pʋg-sadb sẽn yaa yam dãmbã sẽn tar kaamã kɩtdame tɩ b tõe n maan bõe?

▪ Yɛɛnẽ la kãadem kibsã maanda?

▪ Keoor sẽn yaa kãseng bʋg la pʋg-sadb sẽn ka yamã kong-yã, la b baasg yaa bõe?

▪ Talã rãmbã makr zãmsda tõnd bõe?

▪ Ãnda rãmb la tʋm-tʋmdbã, la paoongã b sẽn bobl-bã yaa bõe?

▪ Wakat bʋg la zu-soabã wa n na n maan gɛɛlã n gese, la bõe la a mik-yã?

▪ Tʋm-tʋmdb sẽn yaa sakdbã sẽn paamd sũ-noog ningã yaa bõe, la bõe n paam tʋm-tʋmd a tãab-n-soabã sẽn yaa nin-wẽngã?

▪ Kirist sã n wa be a Rĩungã naamẽ, bʋ-kaoor tʋʋm bʋg la a na n maane?

▪ Wãn-wãn to la piisã paamd Rĩungã?

▪ ‘Dũniyã naanegã’ yɩɩ wakat bʋgo?

▪ B tika bõe zug n kao neba bʋʋd n wilg b sã n yaa piis bɩ bʋʋse?