Sak 120

A Pɩɛɛr kɩɩsame t’a ka mi a Zezi ye

A PƖƐƐR ne a Zã ra yɛɛsame, n naag tʋm-tʋmdb a taabã n zoe n bas a Zezi Gɛtsemane zẽedẽ wã. La rẽ poore b tek n yalsame. Tõeeme tɩ yaa b sẽn da wa n tall a Zezi n kẽng a Ann zakẽ wã la b tɩ paam-a be. A Ann sẽn da wa n yeel tɩ b tall a Zezi n kẽng maan-kʋʋd kãsem a Kayɩf nengẽ wã, a Pɩɛɛr ne a Zã ra paa poorẽ n pʋgd nebã yɩɩg-yɩɩga. Wõnda wakat kãnga yɛlã ra pak-b lame: b ra zoeta b yõorã, b leb n da maanda yɩɩr me ne yell ning sẽn da na n paam b Zusoabã.

B sẽn ta a Kayɩf zag-yalengẽ wã, a Zã tõog n paamame n kẽ zakã pʋga, bala maan-kʋʋd kãsmã ra mi-a lame. La a Pɩɛɛr paa zaka noor yɩnga. La pa kaoos la a Zã leb n tɩ yã sõgen-poak ning sẽn da gũud zakã noorã, t’a bas a Pɩɛɛr t’a kẽ.

Ra yaa waoodo, tɩ zakã tʋm-tʋmdb la maan-kʋʋd kãsmã gard dãmb ra yõgen bugum n wootẽ. A Pɩɛɛr me ra tɩ naag-b lame n woot bugmã la a gũud n na n bãng a Zezi bʋʋdã sẽn na n baas to-to. Bugmã vẽenem yĩnga, sõgen-poakã sẽn da bas a Pɩɛɛr t’a kẽ wã maneg n ges-a-la neere. A zẽka a koɛɛg n yeele: “Yãmb me ra bee ne Galile rao a Zezi.”

Nebã sẽn bãng a Pɩɛɛrã, yɛɛs-a lame t’a kɩɩs neba taoor t’a zɩ n bãng a Zezi ye. A yeelame: “Mam ka mi [yẽ] ye. Mam ka bãng fo sẽn dat n togs bũmb ninga ye.”

Dẽ, a Pɩɛɛr yiimi n kẽng zakã noore. Beenẽ, bi-pugl a to n yã-a n yeel neb nins sẽn da yas be wã woto me: “Dao kãngã me ra bee ne a Zezi sẽn yi Nazarɛt[ã].” Be yɛsa, a Pɩɛɛr kɩɩsame, n wẽen woto: “Mam ka mi rao kãng ye.”

A Pɩɛɛr kell n paa zaka pʋga, n makd n na n solg wa a sẽn tõe tɛka. Tõe tɩ wakat kãnga, tõdbeoogã, no-raoog kɛleng n yɛɛs a Pɩɛɛre. Wakat kãng tɩ b ra bʋʋda a Zezi, la wõnd ra yaa zakã zugẽ doog a yembr pʋgẽ. Sãmbg sẽn ka be, a Pɩɛɛr la neb a taabã ra bee tẽngr n gũudẽ, n da ne tɩ kaset rãmbã kẽedẽ la b yita.

Neba sẽn da bãng t’a Pɩɛɛr ya a Zezi tũud-n-taagã looga lɛɛr la bala. Masã neb nins sẽn da lagem n yas be wã waa yẽ nengẽ n yeele: “Hakɩka, yãmb me yaa bãmb ned a yembre, tɩ bõe, yãmb goama wilgda woto.” A Malkus sẽn ya a Pɩɛɛr sẽn fiuug rao ning tʋbrã roagd n da be sul-kãng pʋgẽ. Nin-kãng yeelame: “Mam ka yã foo tɩ-sullẽ wã ne bãmb sɩda?”

Dẽ, a Pɩɛɛr yɩk n lʋɩɩme tɩ yẽ “ka mi rao-kãng ye.” Sɩda, a kãabda a meng la a wẽendẽ, sẽn na yɩl tɩ b fãa sak tɩ b tudgame. Togs sɩda, a ra yetame meng t’a sã n ka togsd sɩd fãa, bɩ yel-beed paam-a.

A Pɩɛɛr sẽn da wa n kɩɩsd t’a ka mi a Zezi naoor a tãab soabã bal la no-raoog kelem-yã. La wakat kãnga, wõnda a Zezi ra yii zugẽ doogã taoore, n wẽnemd n ges a Pɩɛɛr zaka pʋg tẽngre. Zĩig pʋgẽ bala, a Pɩɛɛr tẽega a Zezi sẽn da yeel bũmb ning b sẽn da ket zugẽ doogẽ wã lɛɛr a wãn sẽn dengã: “Sẽn deng no-raoog sẽn na n kelem naoor a yiibu, fo na n kɩɩsa maam naoor a tãabo.” A Pɩɛɛr yel-wẽndã sãama a sũur wʋsgo, t’a yi yɩng n yãb wʋsgo.

Yel-kãngã maana wãn n wa tõog n yɩ? Sɩngame tɩ wãna, t’a Pɩɛɛr ra kɩs sɩd t’a tẽebã tara pãnga, n baas n kɩɩs t’a ka mi a Zusoabã naoor a tãab fãa wakat bilf pʋgẽ woto? Yaa vẽeneg tɩ yɛlã linga a Pɩɛɛre. B ra golemda sɩdã, n da bilgd a Zezi wala bi-be-wẽnga. B maaname tɩ sẽn yaa tɩrg lebg wa sẽn yaa wẽnga, tɩ bʋʋm soab lebg wa taal soaba. Dẽ, yɛlã sẽn sẽbg a Pɩɛɛr woto wã kɩtame t’a pa le mi a sẽn maandg ye. Zĩig pʋgẽ wã a kɩs-sɩdã menemame. Ninsaal zoees tõog-a lame. Kaeto! Wẽnd na laas-d ne woto buudu! Matɩe 26:57, 58, 69-75; Mark 14:30, 53, 54, 66-72; Luk 22:54-62; Zã 18:15-18, 25-27.

▪ Wãn to la a Pɩɛɛr la a Zã tõog n paam n kẽ maan-kʋʋd kãsmã zak pʋga?

▪ A Pɩɛɛr ne a Zã sẽn da wa n be zaka pʋgã, bõe n da maand roogẽ wã?

▪ Naoor a wãn la no-raoog kelem-yã, la naoor a wãn la a Pɩɛɛr kɩɩs t’a ka mi Kiristã?

▪ A Pɩɛɛr sẽn kãab a meng la a wẽena rat n yeelame tɩ bõe?

▪ Bõe n kɩt t’a Pɩɛɛr kɩɩs t’a ka mi a Zezi Kirista?