Sak 121
Sãnedrẽ wã taoore, la a Pɩlat taoore
ZĨIGÃ ra kolga yẽegre. A Pɩɛɛr ra kɩɩsame t’a ka mi a Zezi naoor a tãabo, tɩ Sãnedrẽ wã ra sa b zirẽ-be-bʋʋdã paalem la b sãeeg taaba. Zĩigã sẽn yẽege, b lebg n tigma taab arzũma yibeoogo, la so-kãngã yɩɩ Sãnedrẽ wã roogẽ. Tõeeme tɩ b ra ratame n maan tɩ yɩ wa b yʋngẽ bʋʋdã zemsa ne Tõogã. B sẽn tall a Zezi n wa b taoore, wa b sẽn da maan yʋngẽ wã, b leb n sokame: “Yãmb sã n yaa Kirist, bɩ y wilg tõndo.”
T’a Zezi leok-ba: “Mam sã n yeel yãmba, yãmb kõn deeg ye. La mam sã n sok yãmb bũmbu yãmb kõn leok ye.” Baasg zãnga, ne raoodo, a Zezi togs-b-la a sẽn yaa ned ninga: “Sẽn sɩng masã Ninsaal Biiga na n zĩnda Wẽnnaam sẽn so pãngã fãa wã rɩtgo.”
Dẽ, b fãa naaga taab n soke: “Dẽ, yãmb yaa Wẽnnaam Biig bɩ?”
T’a Zezi leoke: “Yãmb n yeele, mam yaa bãmba.”
Sã n yaa ne nin-kãensã sẽn da rat a Zezi n kʋ wã, leok kãngã sekame. Sã n yaa ne bãmbã, yaa wẽn-tʋʋsgo. “Bõe kaset la tõnd dat n paase?” woto la b sok-yã. La b yeele: “Tõnd mens wʋma bãmb noor goama.” Dẽ b sẽba a Zezi n tall-a n tɩ kɩs Rom guvɛrneer a Põns Pɩlate.
A Zida sẽn ya a Zezi zãmbdã ra pʋgd n geta yɛlã. A sẽn yã tɩ b ninga a Zezi taalã, a sũur sãama wʋsgo. Dẽ a kẽnga maan-kʋʋdba kãsem dãmb la kãsem dãmbã nengẽ n na n tɩ lebs wanzũri ligd bõoneg 30 wã, n wilg woto: “Mam maana yel-wẽna mam sẽn zãmb bʋʋm soaba yĩnga.”
Tɩ b ka zoe nimbãaneg n leok-a: “Tõnd toor bee be bɩ? Yõ wã bee ne foom.” Dẽ a Zida loba wanzũri ligd bõonegã wẽnd-doogã pʋg la a kẽng n na n tɩ sãrg a menga. La yaa wa will ning a Zida sẽn da loe wĩirã kaoogame t’a vũ n lʋɩ pĩisã sẽn da be tẽngrã zut n pusgi.
Maan-kʋʋdbã kãsem dãmb ra ka mi b sẽn na n maaneg ne wanzũri ligd bõonegã ye. B baas n yeelame: “A ka zems ne tõog tɩ b ning yõ wã Wẽnnaam dooga ligd zĩigẽ ye, tɩ bõe, a yaa zɩɩm ligdi.” Dẽ b yãa taaba, n dɩk ligdã n da yagdbã pʋʋg tɩ na n lebg sãamb yaado. Neba wa n boonda pʋʋgã tɩ ‘zɩɩm pʋʋgo.’
B sẽn da tall a Zezi n kẽng guvɛrneerã zakẽ wã tɩ ra ket n yaa yibeoog pĩnda. La b sẽn ta wã, Zʋɩf rãmb nins sẽn yãag-a wã zãgsame tɩ b kõn kẽ ye, bala b ra tẽedame tɩ lageng woto ne bu-zẽms neb na n dẽgem-b lame. Dẽ a Pɩlat sakame n na n yi yɩng n bʋʋg-ba. A sokame: “Rao kãnga maana bõe tɩ yãmb tall-a n wa ka?”
Tɩ b leoke: “Bãmb sã n da ka maan wẽnga, tõnd da ka na n tall bãmb n wa yãmb nengẽ ye.”
A Pɩlat ra ka rat n kẽes a toog yellã pʋgẽ ye, rẽ n so t’a yeele: “Bɩ yãmb mens tall bãmb n tɩ bʋ bãmb bʋʋd wa sẽn zems [yãmb] tõogo.”
Zʋɩf rãmbã wilgame tɩ b ra tʋlla a Zezi kũum, n yeele: “A ka zems tõog tɩ tõnd kʋ ned ye.” Sɩd me, b sã n da kʋ a Zezi Pakã kibs wakate, ra na n waa ne rãmbg zãma wã sʋka, bala neb wʋsg ra tara naneb wʋsg ne-a. La b sã n da tõog n dõd a Zezi naamã poorẽ tɩ Rom dãmbã tik rẽ zug n kʋ-a, rokdẽ-la taal b zut nin-buiidã taoore.
Rẽ n so tɩ tũudmã taoor dãmb ka gom bãmb sẽn da reng n kao a Zezi bʋʋd wẽn-tʋʋsg yĩngã yell ye. B basa rẽ n dõd a Zezi ne yɛl a taab masã. B rõd-a-la ne yɛl a tãabo: “Tõnd yãa rao kãngã [1] tɩ b rãmbd tõnd soolmã [2] n yetẽ tɩ neba ra yao Sezaar yaood ye. [3] La b yetame tɩ bãmb meng yaa Kirist la rĩma.”
Yaa rõadg ning sẽn yet t’a Zezi yaa rĩma n da pak a Pɩlate. Rẽ n so t’a leb n kẽ na-zakẽ wã n bool a Zezi n sok-a: “Yãmb yaa Zʋɩf rãmba rĩm bɩ?” Sẽn dat n yeele, fo kɩɩsa laloa wã n yeel tɩ foo la rĩm n na n wags ne a Sezaar bɩ?
A Zezi me ra ratame n bãng a Pɩlat sẽn zoe n wʋm bũmb nins yẽ zugã. Rẽ n so t’a sok-a: “Yaa yãmb meng n yeel woto bɩ, bɩ neb a taab n gom mam yell woto ne yãmba?”
Dẽ a Pɩlat wilgame t’a ka mi baa fɩ a Zezi zug ye, la tɩ yẽ ra rata sɩdã bal n bãnge. A Pɩlat leokame: “Mam yaa Zʋɩf la? Yaa yãmb buuda ne maan-kʋʋdba kãsem dãmbã n tall yãmb n wa kɩs maam. Yãmb maana bõe?”
A Zezi ka bao n na n gil naamã yell ye. Sãmbg kae tɩ leokr ning a Zezi sẽn da na n kõ a Pɩlat masã wã ling-a lame ye. Luk 22:66–23:3; Matɩe 27:1-11; Mark 15:1; Zã 18:28-35; Tʋʋma 1:16-20.
▪ Bõe yĩng tɩ Sãnedrẽ wã neb leb n tigim taab yibeoogo?
▪ Wãn-wãn la a Zida ki-yã, la bõe la b rɩk wanzũri ligd bõoneg 30 wã n maane?
▪ Bõe yĩng tɩ Zʋɩf rãmbã pa kʋ a Zezi b toore, n da rat tɩ Rom nebã kʋ-a?
▪ Bõe rõadg la Zʋɩf rãmbã rõd a Zezi?