Sak 126

“Hakɩka, dao kãngã sɩd yaa Wẽnnaam Biiga”

A ZEZI sẽn da be raoogã zugã pa kaoos la zĩigã fãa lebg lik ye. Likã sɩnga wĩnto-sʋka, la a kaoosa lɛɛr a tãabo. Ka yũug-tar-kiuug buud sẽn maan wĩntoog sasa n wa ne lik kãngã ye, tɩ bõe, rẽ maanda kiuugã yiib paalem wakat bala, la kiuugã ra yaa pɛɛlg faga Pakã wakate. Sẽn paase, yel-kãngã buud kaoosda minit a wãn bala. Rẽnd likã yita Wẽnnaam nengẽ! Tõe tɩ yel-kãngã kɩtame tɩ neb nins sẽn da yaand a Zezi wã yaas n tagse, la kɩt meng tɩ b bas b yaalgã.

Yel-solem kãngã sã n maaname tɩ wẽng-maandã ra nan pa zab a bi-be-taagã la a kos a Zezi t’a tẽeg a yelle, dẽnd tõe tɩ yaa rẽ n kɩt t’a sɩd tek a yamã. Tõeeme tɩ yaa likã wakat la pagb a naas kolg a Zezi namsg ra-lukã zĩigẽ. Pʋg-kãens ya a Zezi ma wã ne a ma wã ba-bi-poak a Salome, a Maari Madelɛne, n paas tʋm-tʋmd a Zak bil ma a Maari. A Zã sẽn ya a Zezi tʋm-tʋmd nongrã me ra bee ne-ba.

Ad a Zezi ma wã ‘sũur sãam-yã,’ a sẽn da get biig ning a sẽn yẽsem la a wubã sẽn yag raoogã zug n namsdẽ wã! Baasg zãnga, a Zezi ra ka tagsd a mengã toog yell ye, ra ya a ma wã yelle. A Zezi maana modgr wʋsg n tees a Zã ne a zugã, n yeel a ma woto: “Paga, ad f biiga.” La a tees a Maari ne a zugã, n yeel a Zã: “Ad f ma.”

Woto a Zezi ninga a ma wã, sẽn yaa pʋg-kõor masã wã, a tʋm-tʋmd nongrã nugẽ t’a ges a yelle. A Zezi maana woto, bala a Maari komdibli a taabã ba a yembr da nan ka wilg t’a tẽed-a lame ye. Woto a kõo mak-sõngo, a sẽn segl sẽn na yɩl tɩ b ges a ma wã yell yĩngã wɛɛngẽ la tẽebã wɛɛngẽ wã.

Sẽn zems zaabr wakat a tãabo, a Zezi yeelame: “Ko-yũud n tar maam.” A Zezi ra neeme tɩ ra yaa wala a Ba wã yãka a koglgã yẽ zugu, sẽn na yɩl t’a burkĩndã paam makr zãng-zãnga. Rẽ n so t’a zẽk a koɛɛg n yeele: “Mam Wẽnnaam, mam Wẽnnaam, yaa bõe tɩ yãmb bas maam?” Neb kẽer sẽn yas n pẽ be sẽn wʋm woto b zẽka b koees n yeele: “Gese, b boonda a Eli.” Tao-tao bala bãmb ned a yembr n wudg n dɩk bũmb n los rã-miising pʋgẽ n fõoge, n yaag n tui tãn-wĩig kãn-kãr zugu, n kõ-a t’a yũ. La neb a taabã yeelame: “Bas-y tɩ d ges a Eli sã n na wa n sik bãmba.”

A Zezi sẽn deeg rã-miisingã, a zẽka a koɛɛg n yeele: “A sɛɛme!” N-ye, a sɛɛ bũmb ning fãa a Ba wã sẽn tʋm-a tẽng zug t’a wa maanã. Sẽn na n baase, a yeelame: “M Ba, mam basda m [vʋʋsmã] yãmb nugẽ.” Woto a Zezi bobla a vɩɩm pãngã Wẽnnaam, n kɩs sɩd tɩ Wẽnnaam na n wa lebs n dɩk-a lame n kõ-a. Rẽ poore, a sulga a zug n ki.

A Zezi kũuma wakat bala, tẽngã rigimda ne pãnga, tɩ pĩisã pusi. Tẽngã rigimda ne pãng wʋsg hal tɩ yaadã sẽn da be Zerizalɛm rapoorã pags tɩ kũ rãmbã bugsi. So-loaagdb sẽn yã kũ-rãmbã sẽn bugs n dʋrẽ wã kẽe tẽngã pʋgẽ n togse.

Sẽn paase, a Zezi kũuma wakate, Wẽnnaam doogẽ wã, fu-lilldg kẽengã sẽn da welgd Zĩ-sõngã ne Zĩ-sõng sẽn yɩɩdã pãrga a yiibu, a zugẽ n tɩ tãag a tẽngre. Wõnda fu-lilldg kãngã b sẽn da nags neerã zãntlem ra zemsa metr 18 la a ra tagem wʋsgo! Yel-solem kãngã sẽn yɛɛsdã wilgdame tɩ Wẽnnaam sũur puuga ne neb nins sẽn kʋ a Biriblã. Ra leb n dat n yeelame me t’a Zezi kũumã kɩtame tɩ neb tõe n paam sor masã n kẽng Zĩ-sõng sẽn Yɩɩdẽ wã sẽn yaa saasẽ mengã.

Neba sẽn yã tẽn-digimdgã la yɛl nins sẽn maanã, rabeem yõk-b-la wʋsgo. Sodaas naab ning sẽn da get kʋʋbã yellã pẽga Wẽnnaam. A zẽka a koɛɛg n yeele: “Hakɩka, dao kãngã sɩd yaa Wẽnnaam Biiga.” Tõeeme tɩ b sẽn da gomd a Zezi sã n yaa Wẽnnaam biig bɩ a ka Wẽnnaam biigã yell a bʋʋdã wakat a Pɩlat taoorã, tɩ soda-kãng ra bee be. La masã a kɩsa sɩd t’a Zezi yaa Wẽnnaam Biribla, n-ye, t’a yaa zãmaan fãa nin-kãseng sẽn ka to wã.

Yel-solem kãensã linga neb a taabã tɩ loog nugu, tɩ b lebg n kuiisẽ la b wilgd b sũ-sãang la b yãnde. A Zezi karen-bi-pogs wʋsg sẽn da yas yɩɩg n getẽ yɛɛsa wʋsg yel-kãsems kãensã yĩnga. Tʋm-tʋmd a Zã me ra bee be. Matɩe 27:45-56; Mark 15:33-41; Luk 23:44-49; 2:34, 35; Zã 19:25-30.

▪ Bõe yĩng tɩ ka tõe n yaa yũug-tar-kiuug buud sẽn maan wĩntoog sasa n wa ne likã sẽn kaoos lɛɛr a tãabã?

▪ Bilf sẽn deng a kũumã, mak-sõng bʋg la a Zezi kõ b rãmb nins sẽn tar roagdb sẽn kʋʋlã?

▪ Sẽn deng a kũumã, a Zezi yaoolem goam a naasã yɩɩ bʋse?

▪ Tẽn-digimdgã kɩtame tɩ bõe maane, la wẽn-doogã fu-lilldg sẽn pãrg a yiibã võor yaa bõe?

▪ Sodaas naabã sẽn da get kʋʋbã yellã sẽn yã yel-soalmã, a manesem yɩɩ wãn-wãna?