Sak 127

B mum-a-la arzũma, la hatã t’a yaoogã ra yaa vɩʋʋgo

MASÃ tɩ arzũma zaabr ra kolgame, la Nizã kiuug rasem 15 wã sẽn yaa vʋʋsg daarã ra segd n sɩnga wĩndgã kõomẽ. A Zezi ra kiimi n yag ra-lukã zugu, la fãadb a yiibã sẽn da be a goabg la a rɩtgã ra ket n vɩɩme. B ra boonda arzũma wĩnd-kaoor tɩ Seglgo, bala ra yaa wakat kãng la neba ra segend rɩɩbã la b baasd tʋʋm yãgdem a taab sẽn da ka tõe n gũ vʋʋsg daarã poore.

Vʋʋsg daar ning sẽn da na n sɩngã ra ka wala raasenkam vʋʋsg daarã (sẽn yaa rasem a yopoe soab daarã) ye, la ra yaa vʋʋsg ray a yiib sẽn seg taaba, bɩ vʋʋsg “ra-kãsenga.” Nizã kiuug rasem 15 wã yaa Bur sẽn ka rabɩll Kibsã sẽn kaoosd rasem a yopoe wã pipi daare. Wakat fãa ra-kãng yaa vʋʋsg daare, ba a sẽn seg raar ning fãa rasem a yopoe wã pʋgẽ. La so-kãngã, Nizã rasem 15 wã sega ne raasenkam vʋʋsg daarã, rẽ n so tɩ b boond-a tɩ vʋʋsg ra-kãsengã.

Wẽnnaam Tõoga ra yetame tɩ kũum pa segd n pa ra-luk zug tɩ beoog vẽeg-a be ye. Dẽ, Zʋɩf rãmbã kosa a Pɩlat t’a kɩt tɩ b kao b rãmb nins b sẽn ka ra-lugs zutã kars tɩ b ki tao-tao. Dẽ, sodaasã tɩ kaoo fãadb a yiibã karse. La sẽn yaa vẽeneg t’a Zezi ra zoe n kiimi wã, b pa kao a karsã ye. Rẽ pidsa Gʋlsg Sõamyã gom-kãngã sẽn yet tɩ: “Bãmb kõbr ba a ye kõn kaoog ye.”

La sẽn na yɩl n bãng vẽeneg t’a Zezi sɩd kiimi, sodaag a yembr n kõs a lʋgrã ne a kãnde, tɩ kãndã kẽ n tãag sũurã babg tɩ zɩɩm ne koom yi. Tʋm-tʋmd a Zã sẽn maan kaset ne yel-kãngã wã wilgame tɩ rẽ pidsa Gʋlsg Sõamyã gomd a to: “Bãmb na n gesa b sẽn kõs a soaba.”

A Zozɛf sẽn yit Arimate wã sẽn yaa Sãnedrẽ wã nin-kãseng a yembrã me ra zĩnda kʋʋbã zĩigẽ. A zãgsame t’a kõn naag bʋ-kaoodb sul-kãsengã neb n dɩk sard tɩ b kʋ a Zezi ye. Sɩd-sɩda, a Zozɛf ra ya a Zezi karen-biiga, ba a sẽn da zoet rabeem n ka rat n maan tɩ neba bãngã. La masã, a talla raood n kẽng a Pɩlat nengẽ n tɩ kos kũumã. A Pɩlat boola sodaasã naab n sok a Zezi sã n sɩd kiimi, la a yaool n na n kõ sor t’a rɩk kũumã.

A Zozɛf rɩka kũumã n vil-a ne peen-sõng sẽn yaa yɩlemd n segl-a solgr yĩnga. A Nikodɛm sẽn yaa Sãnedrẽ wã ned a to wã n da sõngd-a. A Nikodɛm me ra ka vẽneg n wilg t’a tẽeda a Zezi ye, bala a ra zoeta b na n wa reeg a naamã. La masã yẽ me waa ne tɩdar buud a yiib ligd sẽn toe, sẽn tar yũ-noogo, sẽn na ta kɩlo 33. B vila a Zezi yĩngã ne pɛɛl b sẽn naag ne ka-kãensã, tɩ zems ne Zʋɩf rãmbã sẽn da minim n segend kũum to-to n na n muma.

Rẽ poore, b talla kũumã n tɩ ning a Zozɛf yao-paalgẽ wã. Yaoogã b sẽn da pees kugr pʋgã ra bee zẽedã sẽn pẽ be wã pʋgẽ. Sẽn na n baase, b bilma kug-bedr n pag yaoogã noore. B segla kũuma tao-tao sẽn na yɩl n tõog n solg-a tɩ vʋʋsg daarã nan ka sɩng ye. Rẽ n so, t’a Maari Madelɛne, la a Zak bil ma a Maari, sẽn da sõngd ne kũuma seglgã, yɩ tao-tao n kul n na n tɩ segl tɩdar la kaam sẽn tar yũ-noog n wa paase. B ra geendame n na n lebg n wa vʋʋsg daarã poor n maneg a Zezi yĩngã n paase, t’a tõog n kaoos wʋsg n da põog ye.

Vẽk-n-beoogã sẽn yaa sibrã (sẽn yaa vʋʋsg daarã), maan-kʋʋdbã kãsem dãmb la Fariziẽ rãmbã kẽnga a Pɩlat nengẽ n tɩ yeel-a: “Zusoaba, tõnd tẽegame tɩ bɛlgd kãng ra yeela b sẽn ket n vɩ wakate: Dasem a tãab sã n looge, mam na n vʋʋgame. Woto yĩnga, bɩ y kɩt tɩ b gũ yaooga hal tɩ ta [rasem a tãab-n-soab raarã] tɩ bãmb karen-biisa ra wa ne yʋng n zuk kũumã n yeel neba tɩ bãmb vʋʋgame ye. Yaoolem belgr kãng na n yɩɩga pipi soabã.”

T’a Pɩlat leok-ba: “Yãmb tara gũudba, bɩ y kẽng n tɩ gũ yaooga wa yãmb sẽn data.” Dẽ b kẽngame n tɩ sog yaoogã noor kugr la b ning Rom sodaas be tɩ b gũ-a, sẽn na yɩl tɩ bũmb da maan ye.

Hatã yibeoog pĩnda, a Maari Madelɛn ne a Zak ma a Maari, n paas a Salome, a Zan, ne pagb a taab n tall tɩdar n wa yaoogẽ wã n na n zae kũumã. Sorẽ wã b ra yeta taab woto: “Ãnda n na n lak kugrã n bas yaoogã noor n kõ tõndo?” La b sẽn ta wã, b mikame tɩ tẽn-digimdg n da maane, t’a Zeova malɛkã bilim kugrã n lak n bas yaoogã. Sodaasã ra loogame, tɩ yaoogã ra yaa vɩʋʋgo! Matɩe 27:57–28:2; Mark 15:42–16:4; Luk 23:50–24:3, 10; Zã 19:14, Zã 19:31–42 Zã 20:1; Zã 12:42; Maankʋʋre 23:5-7; Tõodo 21:22, 23; Yɩɩl Sõamyã 34:21; Zakari 12:⁠10.

▪ Bõe yĩng tɩ b ra boond Arzũma daar tɩ Seglgo, la vʋʋsg “ra-kãsenga” yaa bõe?

▪ Sẽn tɩ loe ne a Zezi yĩngã, Gʋlsg Sõamyã gom-bʋs n paam pidsgu?

▪ Bõe la a Zozɛf ne a Nikodɛm maan a Zezi mumbẽ wã, la bõe n be bãmb ne a Zezi sʋka?

▪ Maan-kʋʋdbã kosa a Pɩlat bõe, la a Pɩlat leok-b lame tɩ bõe?

▪ Bõe n maan hatã yibeoog pĩnda?