Dũni kãngã na n põsa sãoong bɩ?

B ra nan zɩ n wʋm tɩ b gomd dũniyã saab yell wala tõnd wakatã ye. Neb wʋsg yɛɛsda b na n wa tall zab-teed wẽnem sẽn loog nug n sãam dũniyã. Sãnda tagsdame tɩ yaa koomã, pemsmã la tẽn-gãongã b sẽn dẽgemdã n na n sãam dũniyã. La neb kẽer me sẽn yɛɛsd yaa laogã zu-loees na n wa kɩt tɩ ãdem-biisã fãa yik zabr ne taaba.

Dũni kãngã sɩd tõe n saame bɩ? A sã n tõe n saame, a saabã na n yɩɩ wãn-wãna? Rẽ yĩnga dũni ra zoe n zĩndame n wa sa bɩ?

Dũni n sa t’a to ledg-a

N-ye, dũni n zoe n zĩnd n wa sa. Yaa a Nowe wakatẽ dũniyã sẽn da wa n lebg wẽng wʋsgã. Biiblã wilgame tɩ “dũniyã sẽn da be pĩnda sãama koom sẽn lim-a wã” yĩnga. A yeelame me tɩ “[Wẽnnaam] ka bas pĩnd dũniyã tɩ põs ye, la bãmb sẽn tʋm sãoong sa-kãseng Wẽn-kɩɩsdba sẽn be dũniyã zuga yĩngã, bãmb fãaga a Nowe sẽn yaa tɩrlem koe-moaanda ne neb a yopoe.”—2 Pɩɛɛr 2:5; 3:6.

Ges-y dũni kãng saabã sẽn yɩ to-to. A saabã pa yɩ ãdem-biisã fãa sãoong ye. A Nowe ne a zakã rãmb põsa sãoong sa-kãsengã sasa. Saas sɩd-sɩdã la tẽngã tõnd sẽn tabdã me pa sãam ye. Yɩɩ “wẽn-kɩɩsdba sẽn [da] be dũniyã zuga” la b sãam-yã.

A Nowe kambã wa n doga kamba, tɩ tarẽ-n-tarẽ tɩ dũniyã le wa pid ne neba. Yaa nin-kãens n tall fɩɩgr hal tɩ ta rũndã. La zaba, nin-kʋʋr la nen-kɛglem tʋʋm kell n zĩndame n tãag masã. Bõe n na n paam dũni-kãngã? Rẽ yĩnga a na n põsa sãoong bɩ?

Bũmb ning sẽn na n paam dũni kãngã

Biiblã sẽn yeel t’a Nowe wakatẽ dũniyã paama sãoongã zugẽ, a paasa woto: “Ne gom-kãng bala, yĩngr la dũniyã sẽn be masã wã bĩnga bugum yĩnga.” (2 Pɩɛɛr 3:7) Sɩd me, wala Biiblã gʋlsd a ye sẽn yeelã, “[dũni kãngã] . . . loogdame.” —1 Zã 2:17.

Biiblã pa yeel tɩ yaa tẽngã tõnd sẽn tabdã ne saas sɩd-sɩdã la sẽn na n loogã ye, bala bõn-kãens pa loog a Nowe wakatẽ wã me ye. (Yɩɩl Sõamyã 104:5) Yaa dũni kãngã ne a “saasã” sẽn makd politik nanambsã sẽn be a Sʋɩtãan nugẽ wã, la a “tẽngã” sẽn makd a nin-buiidã la b na n wa sãam fasɩ wa bugum sẽn dɩ bũmbu. (Zã 14:30; 2 Korẽnt dãmba 4:4) B na n sãama masã dũniyã me wa b sẽn da sãam dũni ning sẽn zĩnd nand tɩ sãoong sa-kãsenga ni wã. A Zezi Kirist meng yeelame tɩ bũmb nins sẽn zĩnd “a Nowe wakata” buud na n zĩnda dũni kãngã zug nand tɩ b sãam-a.—Matɩe 24:37-39.

D bãng t’a Zezi sẽn da wa n gomd a Nowe wakatã yellã, a ra leokda sokr a tʋm-tʋmdbã sẽn soke. B kos-a-la woto: “Bɩ y togs tõnd bõn-kãens sẽn na n zĩnd wakat ninga la bãnd ninga sẽn na n wilg yãmb waoongo la dũniyã sɛɛb wakate.” (Matɩe 24:3) A Zezi karen-biisã ra miime tɩ dũniyã na n saame. La b sẽn da mi rẽ wã kẽes-b-la rabeem bɩ?

Ayo. A Zezi sẽn wa n bilg bũmb nins sẽn na n zĩnd dũniyã saab sẽn wat n kolgã, a pʋd n yeela a karen-biisã tɩ sasa kãng bɩ b kɩdem tɩ bala ‘b fãagra kolgame.’ (Luk 21:28) B sɩd na n fãag-b-la a Sʋɩtãan nugẽ la ne a dũni wẽngã n kẽes-b dũni paalg sẽn na n tall bãan pʋgẽ!—2 Pɩɛɛr 3:13.

La yaa wakat bʋg la masã dũniyã na n sa? Bõe la a Zezi kõ tɩ na n yɩ “bãnd” sẽn na n wilg a ‘waoongã la dũniyã sɛɛbo’?

‘Bãndã’

Gɛrk gom-biig ning b sẽn lebg kaanẽ tɩ “waoongã” yaa paruzia. Gom-bi-kãng võorã yaa “belem,” bɩ bũmb sẽn zoe n beẽ. Dẽnd b sã n da wa yã ‘bãndã,’ pa rat n wilg tɩ Kirist waoongã keta bilf ye, rẽ na n wilgame t’a zoe n waame n beẽ, la t’a sɩnga naam dɩɩb saasẽ, tɩ ket bilf masã t’a sãam a bɛɛbã fãa.—Wilgri 12:7-12; Yɩɩl Sõamyã 110:1, 2.

A Zezi pa wilg yell a yembr bal sẽn da na n yɩ ‘bãndã’ ye. A wilga yɛl ka tɛka. Bõn-kãens fãa ra na n zĩnda wakat ning Biiblã gʋlsdb sẽn bool tɩ ‘yaoolem wakatã.’ (2 Tɩmote 3:1-5; 2 Pɩɛɛr 3:3, 4) D ges yɛl kẽer a Zezi sẽn da reng n togs tɩ na n zĩnda ‘yaoolem wakatã.’

“Buud a yembr na n yika zabr ne buud a to, la soolem ne soolem a to.” (Matɩe 24:7) Zabã zɩ n yɩ wʋsg woto dũniyã zug wala tõnd wakatã ye. Pĩnd yɛl mit a yembr gʋlsa woto: “Dũni gill pipi zabrã [sẽn sɩng yʋʋmd 1914] yɩɩ pipi zabr sẽn ta zĩigã fãa.” La dũni gill zabr a yiib-n-soabã n kʋ neb n yɩɩge. Zabã ket n sãamda tẽngã. Sɩd-sɩda, a Zezi goamã pidsa kɛpɩ!

‘Kom na n zĩndame.’ (Matɩe 24:7) Kom ning sẽn zĩnd dũni gill pipi zabrã loogr poorã pa tall to pĩnd ye. Kom-bɛɛg me n zĩnd dũni gill zabr a yiib-n-soabã loogr poore. Dũniyã zugu, neb a nu sʋka, ned a yembr n namsd rɩɩbã sẽn pa sekdã yĩnga, tɩ rẽ kɩt tɩ kamb milyõ 14 kiid yʋʋmd fãa. Hakɩka, ‘kom sɩd zĩndame’!

‘Tẽn-digimdg kãsems na n zĩndame.’ (Luk 21:11) Yʋʋmd 1914 tɛka, yʋʋmd fãa tẽn-digimdgã sẽn kʋʋd neb ninsã sõor yɩɩda a sẽn zoe n kʋ yʋʋm kobs nins sẽn loogã naoor piig la bala. Ges-y tẽn-digimdg kãsems a wãn bal sẽn kʋ neb sõore: Yʋʋmd 1920 wã, yaa neb 200000 n ki Sin tẽngã, yʋʋmd 1923 wã, neb sẽn na maan 140000 n ki bɩ n menem Zapõ, yʋʋmd 1939 wã, neb 32700 n ki Turki, yʋʋmd 1970 wã, neb 66800 n ki Peru, tɩ yʋʋmd 1976 pugẽ wã, sẽn na maan neb 240000 n ki Sin tẽngã, (bɩ sã n yaa ne kɩbay kẽere, yaa neb 800 000). Ad sɩd yɩɩ “tẽn-digimdg kãsemse”!

“Bã-longds na n zĩnda zĩig-zĩiga.” (Luk 21:11) Dũni gill pipi zabrã loogr poor bala, bãag ning b sẽn boond tɩ girip ɛspayõllã kʋʋ neb milyõ 21. Rẽ wɛɛngẽ, b yeela sebr a ye (Science Digest) pʋgẽ woto: “Kũum da nan zɩ n kʋ neb wʋsg wakat bilf pʋgẽ woto ye.” Sẽn sɩng ne rẽ tɛka, sũurã bãase, kãnsɛɛrã, SIDA wã, la tood a taab kʋʋ neb milyõ rãmb kobse.

‘Wẽnga na n yɩɩ wʋsgo.’ (Matɩe 24:12) Sẽn sɩng ne yʋʋmd 1914 tɛkã, nin-kʋʋrã la tʋʋm-wẽnsã pãng talla paasg dũniyã zugu. Tẽns wʋsg pʋsẽ, baa wĩntoog menga, nebã zoeta rabeem soayã zutu. Yʋngo, b paada b zagsẽ wã n pagd sõma n pa rat n yi, rabeemã yĩnga.

B ra togsame tɩ yɛl wʋsg a taab me n na n zĩnd yaoolem wakatã, la bãmb fãa me pidsdame. Rẽ wilgdame tɩ dũniyã saab kolgame. La zu-noogo, neb n na n põse. Biiblã sẽn yeel tɩ “dũniyã ne a ratem wẽnga me loogdame” wã poore, a kãabame tɩ “ned ninga sẽn maand Wẽnnaam daab paada wakat sẽn ka sɛta.”—1 Zã 2:17.

Dẽnd d segd n zãmsa Wẽnnaam daabã n bãng-a la d maan-a. Yaa rẽ la d na n tõog n põs dũni kãngã saabã sasa, n paam bark nins sẽn na n zĩnd Wẽnnaam dũni paalgã pʋgẽ wã wakat sẽn-kõn-sa yĩnga. Biiblã kãabame tɩ wakat kãnga, ‘Wẽnnaam . . . na n yẽesa nintãmã fãa [nebã] ninẽ, la kũum ka na n le zĩnd ye, la sũ-sãoong bɩ yãbre walla toog kõn le zĩnd yɛs ye.’—Wilgri 21:3, 4.

Biiblã verse rãmb nins sẽn be seb-​kãngã pʋgẽ wã yita Wẽnnaam Sebre b sẽn zems ne moorã gʋlsg yaoolem noyã pʋgẽ.