Zãmsg a 4

A Sʋɩtãan yaa ãnda?

A Sʋɩtãan yii yɛ? (1, 2)

A Sʋɩtãan maanda wãn n tudgd nebã? (3-7)

Bõe yĩng tɩ y segd n tõdg a Sʋɩtãan daabã? (7)

1. Gom-biig ning sẽn yaa “Sʋɩtãanã” võor yaa bɛ bɩ kɩɩsda. A Sʋɩtãan leb n yaa munaafɩɩk bɩ tẽn-kãn-neda. Yaa woto la b boond Wẽnnaam bɛ-kãsengã. Sɩngrẽ wã, a ra yaa malɛk sẽn pa tar yell n be saasẽ ne Wẽnnaam. La kaoosg zugẽ a lebga tɩtaam soaba, hal n wa rat baleng ning sẽn segd ne Wẽnnaamã.—Matɩe 4:8-10.

2. Malɛg-kãng b sẽn boond t’a Sʋɩtãanã tũnuga ne waaf n gom ne a Hawa. A yaga ziri n kɩt t’a Hawa kɩɩs Wẽnnaam. A Sʋɩtãan sẽn maan woto wã, a kɩɩsa Wẽnnaam naamã sẽn ka to wã. A mak n na n wilgame tɩ Wẽnnaam pa segd n dɩ naamã, la t’a sẽn dɩt-a to-to wã pa nafd nebã sõma ye. A Sʋɩtãan leb n yeelame tɩ ninsaal baa a yembr pa na n tõog n kell n sak Wẽnnaam ye. A sẽn maan woto wã, a lebga Wẽnnaam bɛ. Yaa rẽ yĩng la b sẽn boond malɛg-kãng tɩ Sʋɩtãan la munaafɩɩkã.—Sɩngre 3:1-5; Zoob 1:8-11; Wilgri 12:9.

3. A Sʋɩtãan tudgda nebã n dat tɩ b balm-a. (2 Korẽnt dãmba 11:3, 14) Bũmb a ye a sẽn tũnugd ne n tudgd nebã yaa ziri tũudmã. Tũudum sã n zãmsd nebã ziri Wẽnnaam zugu, yaa a Sʋɩtãan daab la a maanda. (Zã 8:44) Neb nins sẽn be ziri tũudmã pʋgẽ tõe n tẽeda ne b sũy fãa tɩ b balemda sɩd Wẽnnaamã. La sɩd-sɩda, yaa a Sʋɩtãan la b balemda. Yẽ n yaa ‘dũni kãngã wẽnnaam.’—2 Korẽnt dãmba 4:4.

4. Bũmb a to a Sʋɩtãan sẽn tũnugd ne n paamd nebã yaa tɩtã. Neb kẽer tũnugda ne zĩn dãmbã n baood koglgo, n maand b taab wẽnga, n baood n na n bãng beoog yɛla, bɩ n maand yel-soalma. Yaa a Sʋɩtãan n be tʋʋm-kãensã fãa poorẽ. Tõnd sã n dat n noog Wẽnnaam sũuri, d segd n laka d mens fasɩ ne yel-kãensã buudã.—Tõodo 18:10-12; Tʋʋma 19:18, 19.

5. A Sʋɩtãan leb n belgda nebã n kɩtdẽ tɩ b wukd b mens b buudã yĩnga, la a tusd-b tɩ b sakd politik siglsã wa b Wẽnnaam. Kẽer sɩd tagsdame tɩ bãmb buudã bɩ b tẽngã n yaa sõma n yɩɩda. La yaool n pa sɩd ye. (Tʋʋma 10:34, 35) Neb a taab tẽedame tɩ yaa politik siglsã n na n welg ninsaalbã zu-loeese. B sẽn maand woto wã b zãgsda Wẽnnaam Rĩungã. Yaool n yaa Rĩung kãng bal n yaa tõnd zu-loeesã tɩɩm.—Daniɛll 2:44.

6. A Sʋɩtãan tũnugda ne yel-wẽnã tʋlsem me n tudgd nebã. A Zeova yeta tõnd tɩ d lak d mens ne tʋʋm-wẽnsã, bala a miime tɩ rẽ na n sãam-d lame. (Galat dãmba 6:7, 8) Neb kẽer na n datame tɩ y naag-b n tʋm tʋʋm-kãensã. La tẽeg-y tɩ sɩd-sɩda, yaa a Sʋɩtãan n dat tɩ yãmb maan bõn-kãense.—1 Korẽnt dãmba 6:9, 10; 15:33.

7. A Sʋɩtãan tõe n kɩtame tɩ b nams-y bɩ b kɩɩs-y y tẽebã yĩnga, sẽn na yɩl tɩ y bas a Zeova. Neb kẽer yãmb sẽn nong sũy tõe n puuga wʋsg y sẽn zãmsd Biiblã yĩnga. Neb a taab tõe n yaal-y lame. La ãnda n kõ yãmb vɩɩmã? A Sʋɩtãan dat n yɛɛsa yãmb tɩ y ra zãms Biiblã n bãng a Zeova ye. Da bas-y t’a Sʋɩtãan tõog-y ye! (Matɩe 10:34-39; 1 Pɩɛɛr 5:8, 9) Y sã n tõdg a Sʋɩtãan daabã, y na n nooga a Zeova sũuri, la ne rẽ, y na n wilgame tɩ y sakame tɩ yẽ la naab sẽn ka to wã.—Yelbũna 27:11.

[Foto rãmba, seb-neng a 9]

Ziri tũudmã, tɩtã, la tẽn-nonglmã tudgda nebã

[Foto, seb-neng a 9]

Kɩɩs-y-yã a Sʋɩtãan n ket n zãmsd n bãngd a Zeova