Zãmsg a 6

Wẽnnaam Rĩungã yaa bõe?

Wẽnnaam Rĩungã bee yɛ? (1)

Ãnda la a Rĩma? (2)

Neb a taab n dɩt naamã ne Rĩmã bɩ? Sã n yaa n-ye, yaa bãmb b wãna? (3)

Bõe n wilgd tɩ tõnd vɩɩ dũni kãngã saab wakate? (4)

Bõe la Wẽnnaam Rĩungã na n maan n kõ ninsaalbã beoog-daare? (5-7)

1. A Zezi sẽn da wa n be tẽng zugu, a zãmsa a karen-biisã tɩ b pʋʋs tɩ Wẽnnaam Rĩungã wa. Rĩung yaa goosneema, t’a taoor soabã yaa rĩma. Wẽnnaam Rĩungã yaa goosneema sẽn pa wõnd a taaba. B lugl-a-la saasẽ t’a na n zĩnd be n dɩ naam tẽngã zugu. Rĩungã na n kɩtame tɩ Wẽnnaam yʋʋrã paam pẽgr bɩ n sõms-a. A na n kɩtame tɩ Wẽnnaam daabã maan tẽng zug wa a sẽn maand saasẽ wã.—Matɩe 6:9, 10.

2. Wẽnnaam da kãabame t’a Zezi na n wa yɩɩ a Rĩungã Rĩmã. (Luk 1:30-33) A Zezi sẽn da wa n be tẽng zugu, a wilga vẽeneg t’a na n yɩɩ na-sõng la rĩm-tɩrg sẽn zems zãnga. A Zezi sẽn wa n leb saasẽ wã, b pa kõ-a Wẽnnaam Rĩungã naam zĩig pʋgẽ ye. (Hebre dãmba 10:12, 13) Yʋʋmd 1914, a Zeova kõo a Zezi naam ning a sẽn da kãab-a wã. Wakat kãng tɛka, a Zezi sẽn yaa Rĩm ning Wẽnnaam sẽn yãkã rɩta naam saasẽ.—Daniɛll 7:13, 14.

3. A Zeova leb n yãka rap la pagb kẽer sẽn yaa sakdb tẽngã zug tɩ b na n kẽng saasẽ. Bãmb na n tɩ yɩɩ rĩm dãmb sẽn na n dɩ naam ne a Zezi ninsaalbã zutu, n yɩ bʋ-kaoodb la maan-kʋʋdba. (Luk 22:28-30; Wilgri 5:9, 10) A Zezi boola nin-kãensã sẽn na n naag-a n dɩ naamã tɩ “bãg-bila.” B sõorã yaa neb 144000.—Luk 12:32, NW; Wilgri 14:1-3.

4. A Zezi sẽn lebg Rĩmã bala, a riga a Sʋɩtãan ne a malɛg-wẽnsã saasẽ tɩ b sig tẽngã zugu. Yaa rẽ n kɩt tɩ yʋʋmd 1914 tɛkã, yɛlã maneg n yãng woto tẽng zug ka wã. (Wilgri 12:9, 12) Zabã, komã, bã-longdsã, noyã kɩɩsg sẽn tar paasgã fãa naaga “bãnd ning” sẽn wilgd t’a Zezi rɩta naam, la tɩ dũni wẽng kãngã bee a yaoolem wakat pʋgẽ wã.—Matɩe 24:3, 7, 8, 12; Luk 21:10, 11; 2 Tɩmote 3:1-5.

5. Ka la bilfu a Zezi na n kaoa nebã bʋʋdo, n welg-b wala pe-kɩɩm sẽn welgd piis ne bʋʋse. “Piisã” yaa neb nins sẽn da zoe n wilg tɩ b sakda Rĩmã. B na n paama vɩɩm sẽn-kõn-sa tẽngã zugu. “Bʋʋsã” yaa neb nins sẽn da zoe n wilg tɩ b zãgsda Wẽnnaam Rĩungã. (Matɩe 25:31-34) Ka la bilfu, a Zezi na n sãama neb nins fãa sẽn wõnd bʋʋsã. (2 Tesalonik rãmba 1:6-9) Yãmb sã n dat n zĩnd a Zezi “piisa” sʋka, y tog n kelga Rĩungã koɛɛg la y tũ y sẽn zãmsd bũmb ningã.—Matɩe 24:14.

6. Rũndã-rũndã, nebã pʋɩɩ tẽngã t’a lebg tẽns toɛy-toɛya. Tẽng fãa tara a toorẽ goosneema. Tẽn-kãens nong n zabda taaba. La Wẽnnaam Rĩungã na n ledga goosneema kãens fãa. Yaa Wẽnnaam goosneema wã bal n na n dɩ naam tẽngã gill zugu. (Daniɛll 2:44) Rẽ, zabã, tʋʋm wẽnsã la maan taab pãng pa na n ye zĩnd ye. Nebã fãa na n vɩɩmda bãan la zems-n-taar pʋgẽ.—Miise 4:3, 4.

7. A Zezi Yʋʋm Tusr Naamã wakate, ninsaalb nins sẽn yaa sakdbã na n lebga neb sẽn zems zãnga, tɩ tẽngã gill lebg arzãna. Yʋʋm tusrã ne a na n wa sa wã t’a Zezi maana bũmb nins fãa Wẽnnaam sẽn yeel t’a maanã. Rẽ masã a na n lebsa Rĩungã a Ba wã. (1 Korẽnt dãmba 15:24, NW) Bɩ y togs y zo-rãmbã la y mitinsã Wẽnnaam Rĩungã sẽn na n maan bũmb ninsã.

[Foto, seb-neng 13]

A Zezi naamã rɩɩb wakate, kisgr bɩ sãbs-taab ka na n le zĩnd ye