Zãmsg a 8

Zak vɩɩm sẽn tat Wẽnnaam yam

Ãnda la zakã zu-soaba? (1)

Sɩd manesem ne a pag segd n yɩɩ wãn to? (2)

Ba zɩɩb yaa bõe? (3)

Pagã tʋʋmd yaa bõe zakã pʋgẽ? (4)

Bõe la Wẽnnaam dat tɩ roagdbã la kambã maane? (5)

Kẽed-n-taasã sẽn mi n welg taab wall b kao b kãadmã wɛɛngẽ, Biiblã yetame tɩ bõe? (6, 7)

1. Biiblã yetame tɩ yaa sɩdã la zakã zu-soaba. (1 Korẽnt dãmba 11:3) Rao tog n talla pag a ye bala. B segd n kẽe kãadem tɩ zems ne laloa wã.—1 Tɩmote 3:2; Tɩt 3:1.

2. Sɩd segd n nonga a pag wa a menga. A manesem ne a pagã segd n yɩɩ wa a Zezi sẽn tall manesem ning ne a karen-biisã. (Efɛɛz rãmba 5:25, 28, 29) A pa segd n pãb a pagã abada bɩ n nams-a ne manesem buud baa a yembr ye. La a segd n nand-a lame la a waoogd-a.—Kolos rãmba 3:19; 1 Pɩɛɛr 3:7.

3. Ba segd n tʋma sõma sẽn na yɩl n ges a zaka yelle. Yaa yẽ n tog n bao roogo, rɩɩb la fut n kõ a pagã la a kambã. Leb n yaa ba wã n segd n zãms a zakã neb tɩ b paam zood ne Wẽnnaam. Yẽ n lʋɩt taoor n zãmsd a zaka neb sẽn na yɩl tɩ b bãng Wẽnnaam la a raabã.—1 Tɩmote 5:8; Tõodo 6:4-9; Efɛɛz rãmba 6:4.

4. Pag segd n yɩɩ a sɩdã sõngda. (Sɩngre 2:18) A segd n sõnga a sɩdã ne b kambã wubr la b zãmsgo. (Yelbũna 1:8) A Zeova ratame tɩ pag ges a zak yell ne nonglem. (Yelbũna 31:10, 15, 26, 27; Tɩt 2:4, 5) A segd n waoogda a sɩdã wʋsgo.—Efɛɛz rãmba 5:22, 23, 33.

5. Wẽnnaam datame tɩ kambã sak b roagdbã. (Efɛɛz rãmba 6:1-3) A ratame tɩ roagdbã zãms b kambã la b kibl-ba. Yaa tɩlae tɩ roagdbã rɩkd sẽk n sõsd ne b kambã la b zãmsd-b Biiblã, n sõngd-b tɩ b tẽebã bɩtẽ, la b wilgd-b tɩ b nong-b lame. (Tõodo 11:18, 19; Yelbũna 22:6, 15) Roagdbã pa segd n kibl b kamba ne toom ye.—Kolos rãmba 3:21.

6. Kẽed-n-taasã sã n wa pa zemsd taaba, b segd n modgame n tũ Biiblã saglse. Biiblã sagenda tõnd tɩ d tall nonglem la d yɩ sugr-kõtba. (Kolos rãmba 3:12-14) Wẽnnaam Gomdã pa sagend kẽed-n-taasã tɩ mo-yõs sã n wa be b sʋk bɩ b welg taab ye. La tõe tɩ pag yãk yam n yi n bas a sɩda, sã n mik t’a sɩdã 1) tõdga a zakã yell gesgo, 2) t’a namsd-a-la hal wʋsg tɩ tõe n wa koms a laafɩ wã bɩ tũ ne a yõore, bɩ 3) a gɩdgd-a-la wʋsg hal t’a pa tõe n balem a Zeova ye.—1 Korẽnt dãmba 7:12, 13.

7. Kẽed-n-taasã pa segd n yo ye. Ned sẽn kẽ kãadem sã n yo, a beega Wẽnnaam la a kẽed-n-taagã. (Hebre dãmba 13:4) Sã n yaa ne Biiblã, yaa yoob bal n kõt kẽed-n-taag sor t’a tõe n kao a kãadem n lebs n kẽ kãadem ne ned a to. (Matɩe 19:6-9; Rom dãmba 7:2, 3) Ned sã n kao a kãadem tɩ pa zems ne bʋʋm ning Biiblã sẽn kõtã, n lebs n kẽ kãadem ne ned a to, a Zeova kisa rẽ.—Malaki 2:14-16.

[Foto rãmba, seb-neng 16, 17]

Wẽnnaam ratame tɩ roagdbã zãms b kambã la b kibl-ba

[Foto, seb-neng 17]

Ba sẽn nong a zak neb geta b yelle, yĩngã la tẽebã wɛɛngẽ