Zãmsg a 9

Wẽnnaam sõgen dãmbã segd n yɩɩ yɩlma

Bõe yĩng tɩ d segd n yɩ yɩlem bũmb fãa pʋgẽ? (1)

Yɩ yɩlemd tũudmã wɛɛngẽ rat n yeelame tɩ bõe? (2)

Yɩ yɩlemd vɩɩm manesmã wɛɛngẽ rat n yeelame tɩ bõe? (3)

Yɩ yɩlemd d sũyã tagsg pʋgẽ rat n yeelame tɩ bõe? (4)

Yɩ yɩlemd yĩngã wɛɛngẽ rat n yeelame tɩ bõe? (5)

D segd n laka d mens ne gom-dẽgd bʋs buudu? (6)

1. Wẽnnaam a Zeova yaa yɩlemd la sõngo. A ratame t’a balemdbã yɩ yɩlem b tũudmã wɛɛngẽ, b vɩɩm manesmã la b sũyã tagsg pʋgẽ, la yĩngã wɛɛngẽ. (1 Pɩɛɛr 1:16, Sebr Sõngo) Kell n yɩ yɩlemd Wẽnnaam taoor yaa bũmb sẽn baood modgr menga, bala tõnd sẽn vɩ dũni ning pʋgẽ wã nebã tʋʋm yaa rẽgdo. D leb n segd n maoome n da sak tõnd mensã tʋlsem nins sẽn tusd-d tɩ d maan wẽngã ye. La d pa segd n koms raood n bas ye.

2. Yɩ yɩlemd tũudmã wɛɛngẽ: Tõnd sã n dat n balem a Zeova, d pa segd n ket n tẽed ziri tũudmã zãmsg la d tũud a minimdã baa a yembr ye. D segd n yii ziri tũudmã pʋgẽ zãng fasɩ n da le teel-a ne manesem buud baa a yembr ye. (2 Korẽnt dãmba 6:14-18; Wilgri 18:4) Tõnd sẽn bãng sɩdã Wẽnnaam zugã, d tog n gũusame tɩ neb ra wa tudg-d ne ziri zãmsg ye.—2 Zã 10, 11.

3. Yɩ yɩlemd vɩɩm manesmã wɛɛngẽ: A Zeova ratame t’a balemdbã tall yel-manesem sẽn segd ne kiris-ned hakɩk wakat buud fãa. (1 Pɩɛɛr 2:12) A nee bũmb ning fãa tõnd sẽn maande, baa d sã n solgame. (Hebre dãmba 4:13) D segd n laka d meng ne yoob la dũniyã tʋʋm-dẽgd a taabã.—1 Korẽnt dãmba 6:9-11.

4. Yɩ yɩlemd d sũyã tagsg pʋgẽ: Tõnd sã n pidsd d yamã ne tags-sõma, d yel-manesmã me na n yɩɩ sõma. (Filip rãmba 4:8) La d sã n tagsd bõn-dẽgd yell n pa basdẽ, na n tus-d lame tɩ d maan tʋʋm-wẽnse. (Matɩe 15:18-20) D segd n laka d mens ne reem nins sẽn tõe n dẽgem d yamã. D sã n zãmsd Wẽnnaam Gomdã, na n sõng-d lame tɩ d pids d yamã ne tags-sõma.

5. Yɩ yɩlemd yĩngã wɛɛngẽ: Kiris-nebã sẽn moond Wẽnnaam yʋʋrã yĩnga, b yĩnsã la b futã segd n yɩɩ yɩlma. D sã n kẽng we-kɛɛng poore d segd n pɛgsa d nusã. D leb n segd n pɛgsa d nusã n yaool n dɩ bɩ n sɩɩs rɩɩbo. Yãmb sã n pa tar bĩn-boko, y segd n tu n busa we-kɛɛngã. (Tõodo 23:13, 14) D sã n yaa yɩlma, sõngd-d-la laafɩ wã wɛɛngẽ. Kiris-ned roog la a zak segd n yɩɩ yɩlma. Sakã pʋgẽ, nebã segd n neeme t’a zakã yaa yɩlemde.

6. Yɩlemd d goamã pʋgẽ: Wẽnnaam sõgen dãmbã segd n togsda sɩd wakat fãa. Zɩlem-be-nebã pa na n kẽ Wẽnnaam Rĩungã pʋgẽ ye. (Efɛɛz rãmba 4:25; Wilgri 21:8) Kiris-nebã pa gom-yood rãmb ye. B pa kelgd bɩ n deemd reem-yood wall b gomd gom-dẽgd ye. B goamã sẽn yaa yɩlma yĩnga, nebã getame tɩ b yaa toor b tʋʋmã zĩisẽ, b lekoll dãmbẽ wã bɩ b sagsẽ wã.—Efɛɛz rãmba 4:29, 31; 5:3.

[Foto rãmba, seb-neng 18, 19]

Wẽnnaam sõgen dãmbã segd n yɩɩ yɩlem bũmb fãa pʋgẽ