Bõe yĩng tɩ d kiidẽ?
“Kunkubã fãa zut yaa sɩɩ masã, tɩɩsa fãa zutu vʋʋsgo f kõn wʋm ye; liuuli wã gõee tɩɩsã pʋsẽ: gũ; wala bãmba ka la bilfu fo me na n vʋʋsame.”—A JOHANN WOLFGANG VON GOETHE, ALEMAYN POƐTE.
1, 2. a) B naana ninsaalbã ne bõe tʋlsem? b) Vɩɩm bʋg buud la pipi rao wã ne pagã paam-yã?
WẼNNAAM naana ninsaalbã ne tʋlsem sẽn tar pãng sẽn yaa vɩɩmd wakat sẽn-kõn-sa. Sɩda, Biiblã yetame t’a ninga “ninsaal pʋgẽ wã wakat sẽn ka sɛt tagsgo.” (Koɛɛg Soaba 3:11, La Bible du Semeur) La Wẽnnaam maana sẽn yɩɩd kõ ninsaalbã tʋlsem ning sẽn yaa vɩɩmd wakat sẽn-kõn-sa wã. A le kõo segb tɩ b tõe n maan dẽ.
2 B ra naana tõnd pipi roagdbã sẽn yaa a Ãdem ne a Hawa wã, tɩ b zems zãnga, tɩ zang ba a ye ra ka be b tagsgẽ wã bɩ b yĩngẽ wã ye. (Tõodo 32:4) Tags-y n gese, zabdem bɩ toom sẽn kaoosd wakat fãa, rabeem sẽn sãamd bɩ yɩɩr da ka be ye! Sẽn paase, Wẽnnaam ning-b-la yir sẽn yaa arzãn sẽn be rasãnd pʋgẽ. Wẽnnaam yãka bõn-datl tɩ ninsaal ra na n vɩɩmda wakat sẽn-kõn-sa, la tɩ sã n wa beẽ tẽngã ra na n pida ne a kambã sẽn zems zãngã. (Sɩngre 1:31; 2:15) Bõe yĩng masã tɩ tõnd kiidẽ?
Tõdgrã waa ne kũum
3. Vɩɩm sẽn-kõn-sa wã a Ãdem ne a Hawa yĩngã ra bee ne bõe maanego?
3 Wẽnnaam kõ a Ãdem noor n yeele: “Fo tõe n yãgsa tɩɩsa fãa sẽn be zẽeda zĩigẽ wã biis n dɩ; la ra sak n yãk sõama ne wẽng bãngr tɩɩga biis n dɩ ye. Tɩ bõe, fo sã n dɩ a biisa daare, fo sɩd na n kiimi.” (Sɩngre 2:16, 17) Woto, vɩɩm sẽn-kõn-sa wã a Ãdem ne a Hawa yĩngã ra bee ne bũmb maanego. Ra bee ne b sẽn na n sak Wẽnnaam.
4. A Ãdem ne a Hawa sẽn maan yel-wẽndã, bõe yĩng tɩ b menes saagr ning sẽn yaa vɩɩmd wakat sẽn-kõn-sa Arzãna pʋgẽ wã?
4 La zu-beedo, a Ãdem ne a Hawa kɩɩsa Wẽnnaam tõogã. (Sɩngre 3:1-6) B sẽn maan dẽ wã, b lebga yel-wẽn-maandba, bala “yel-wẽna yaa tõog kɩɩsgo.” (1 Zã 3:4) Rẽ kɩtame t’a Ãdem ne a Hawa ra ka le tar vɩɩm sẽn-kõn-sa saagr ye. Bõe yĩnga? Bala “yel-wẽna yaood yaa kũum.” (Rom dãmb 6:23) Dẽ, a sẽn da wa n kaood bʋʋd a Ãdem ne a Hawa zugã, Wẽnnaam yeelame: “Fo yaa tẽng tom, la fo na n le lebga tẽng tom yɛsa.” Rẽ poore b riga tõnd pipi roagdbã n yiis b yirã sẽn yaa Arzãnã pʋgẽ. Daar ning b sẽn maan yel-wẽndã, a Ãdem ne a Hawa sɩnga kũum bilf-bilf tɩ tɩɩm kaẽ ye.—Sɩngre 3:19, 23, 24.
“Kũum yelg n taa nebã fãa”
5. Wãn to la kũumã yelg n ta ninsaalbã buud tõre?
5 Masã yel-wẽndã ra kẽe a Ãdem ne a Hawa zɩɩmã sõma. Woto yĩnga, b ra ka tõe n dog kamb sẽn zems zãng ye, wala b sẽn ka tõe n dɩk mull sẽn ka zems zãng n yag teed sẽn zems zãngã. (Zoob 14:4) Sɩda, ninsaal fãa rogem sɩd wilgdame tɩ tõnd pipi roagdbã menesa laafɩ sẽn zems zãng la vɩɩm sẽn-kõn-sa b mensã la b yagensã yĩnga. Tʋm-tʋmd a Poll sẽn yaa kiris-nedã gʋlsame: “Ne ned a ye tũnugr la yel-wẽnd kẽ dũniyã tɩ kũum wa ne yel-wẽnd maasem, la woto kũum yelg n taa neba fãa b fãa sẽn da maan yel-wẽnd yĩngã.”—Rom dãmb 5:12, NW; Mak-y ne Yɩɩl Sõamyã 51:7.
6. Bõe yĩng tɩ d kiidẽ?
6 Rũndã-rũndã bãngdbã pʋd n ka mi bũmb ning sẽn kɩt tɩ ninsaalbã kʋʋndẽ la b kiidẽ wã ye. La Biiblã wilgdame tɩ tõnd sẽn kiidã yaa d sẽn dog n yaa yel-wẽn-maandbã, tɩ halhaal kãng d sẽn dog ne wã yaa d sẽn paam d pipi roagdbã nengẽ. La bõe n paamd tõnd d sã n ki?