Zoa ka be n yɩɩd Wẽnnaam ye

Y sẽn na n lebg Wẽnnaam zoa n são sẽn keta fãa. Wẽnnaam na n zãmsa yãmb n wilg-y y sẽn tõe n paam sũ-noog la bãan to-to. A na n kõ-y-la paam-m-meng ne ziri tẽeb wʋsg la minim wẽns wʋsgo. A na n kelga y pʋʋsgã. A na n sõng-y lame tɩ y paam sũur pʋgẽ bãan la bas-m-yam. (Yɩɩl Sõamyã 71:5; 73:28) Wẽnnaam na n teel-y-la gudgr wakate. (Yɩɩl Sõamyã 18:19) La Wẽnnaam kãabd-y-la a kũunã sẽn yaa vɩɩm sẽn-kõn-sa wã.—Rom dãmbã 6:23.

Yãmb sã n pẽneg Wẽnnaam, y na n pẽnega Wẽnnaam zo-rãmbã. Bãmb me na n lebga yãmb zo-rãmba. Sɩda, b na n yɩɩ wa y saam-biis la y saam-bi-pogse. B sũy na n yɩɩ noog tɩ b zãms yãmb Wẽnnaam wɛɛngẽ, la b na n sõng-y lame la b kõ-y raoodo.

Tõnd pa zem Wẽnnaam ye. Y sẽn baood zood ne Wẽnnaamã sasa bɩ y bãng bũmb sẽn tar yõod wʋsgo. Zood ne Wẽnnaam pa neb sẽn zem taab zood ye. A yʋʋmã la a yamã la a pãngã yɩɩda tõnd rẽndã zĩig sẽn zãre. A yaa tõnd Naab wa sẽn segde. Rẽnd d sã n dat n yɩ a zoa, d segd n kelg-a lame la d maan a sẽn yet tõnd tɩ d maan bũmb ningã. Rẽ na n nafa tõnd wakat fãa.—Ezai 48:18.