Ãnd dãmb la Wẽnnaam zo-rãmba?

A Zezi Kirist ya a Zeova Biribla la a zo-nongr sẽn pẽ-a n yɩɩd fãa. A Zezi vɩɩmda saasẽ n yaa bõn-naandg sẽn tar pãng wʋsg nif sẽn pa ne t’a nan pa wa tẽng zug n vɩɩmd wa ninsaal ye. (Zã 17:5) Rẽ poore, a waa tẽng zug n zãms nebã sɩdã Wẽnnaam wɛɛngẽ. (Zã 18:37) A leb n kõo a ninsaal vɩɩmã sẽn na yɩl n fãag ninsaan-sakdbã ne yel-wẽnd la kũum. (Rom dãmbã 6:23) Masã a Zezi yaa Wẽnnaam Rĩungã Rĩmã. Rĩung kãng yaa goosneema sẽn be saasẽ sẽn na n wa ne Arzãn tẽn-kãngã zugu.—Wilgri 19:16.

Malɛgsã me yaa Wẽnnaam zo-rãmba. Malɛgsã vɩɩm pa sɩng wa ninsaalbã sẽn be tẽng zugã ye. Wẽnnaam naan-b-la saasẽ t’a nan pa maan tẽngã ye. (Zoob 38:4-7) Malɛgsã yaa milyõ rãmba. (Daniɛll 7:10) Wẽnnaam zo-rãmb kãensã sẽn be saasẽ wã ratame tɩ nebã bao n bãng sɩdã a Zeova wɛɛngẽ.—Wilgri 14:6, 7.

Wẽnnaam tara zo-rãmb tẽng zug me. Ya a Zeova Kaset rãmbã. Kaset soab sẽn be bʋʋd zĩigẽ togsda a sẽn mi ned bɩ bũmb zugu. A Zeova Kaset rãmbã togsda neb a taabã b sẽn mi bũmb ning a Zeova la a raabã wɛɛngẽ wã. (Ezai 43:10, NW ) Wala malɛgsã, Kaset rãmbã rat n sõnga yãmb tɩ y bao n bãng sɩdã a Zeova wɛɛngẽ. B ratame tɩ yãmb me yɩ Wẽnnaam zoa.