Pipi saka
Lagem-n-taar Wẽnnaam balengã pʋgẽ rũndã-rũndã võor yaa bõe?
1, 2. a) Bõe la neb wʋsg maand rũndã-rũndã? b) Bũmb sẽn sɩd be yamleoog bʋg la pʋ-peelem dãmbã gũuda?
DŨNIYÃ gill zugu, d nee neb wʋsg sẽn lagemd taab Wẽnnaam balengã pʋgẽ. B tigma neb milyõ rãmb sẽn yit tẽns fãa, buud fãa la sẽn gomd buud-goam toɛy-toɛy baleng kãng pʋgẽ. Yʋʋmd fãa, neb n wat n paasdẽ. Biiblã pʋgẽ b boond-b lame t’a Zeova “kaset dãmba,” la b boond-b me tɩ ‘kʋʋn-kãsenga.’ B maanda Wẽnnaam “tʋʋmd wĩndg la yʋngo.” (Ezai 43:10-12; Wilgri 7:9-15) Bõe yĩng tɩ b maand woto? Yaa b sẽn bãng t’a Zeova a yen tãa la sɩd Wẽnnaamã yĩnga. Rẽ kɩtdame tɩ b rat n tũ a no-tɩrsã b vɩɩmã pʋgẽ. Sẽn paase, b bãngame tɩ d vɩɩ dũni kãngã sẽn yaa wẽngã ‘yaoolem wakate,’ la tɩ Wẽnnaam na n sãam-a-la ka la bilfu, la a ledg-a ne a dũni paalgã sẽn yaa arzãnã.—2 Tɩmote 3:1-5, 13; 2 Pɩɛɛr 3:10-13.
2 Wẽnnaam Gomdã kãabda woto: “A keta bilf bala tɩ nin-wẽng kõn tol n zĩnd ye. . . . La [sik-m-mens] dãmba na n sooga dũniyã n maan sũ-noog laafɩ wʋsg yĩnga.” (Yɩɩl Sõamyã 37:10, 11) “Nin-tɩrs na n sooga dũniyã la bãmb na n zĩnda a zug wakat sẽn ka sɛta.” (Yɩɩl Sõamyã 37:29) “[Wẽnnaam] na n yẽesa nintãma fãa t’a ra le zĩnd bãmb ninẽ ye, la kũum ka na n le zĩnd ye, la sũ-sãoong bɩ yãbre walla toog kõn le zĩnd yɛs ye, tɩ bõe, dẽenem bũmb fãa loogame.”—Wilgri 21:4.
3. Wãn to la lagem-n-taar balengã pʋgẽ tõe n zĩndi?
3 Neb nins b sẽn tigim Wẽnnaam baleng hakɩkã pʋgẽ masã wã n yaa dũni paalg kãng pipi neba. B zãms n bãnga Wẽnnaam daabã sẽn ya a soaba, n sakd-a wa b sẽn tõe tɛka. A Zezi wilga rẽ yõod n yeele: “Vɩɩm sẽn ka sɛta yaa woto, tɩ bãmb na bãng yãmb sẽn yaa sɩd Wẽnnaam sẽn ka to la a Zezi Kirist yãmb sẽn tʋm a soabã.” (Zã 17:3) Tʋm-tʋmd a Zã gʋlsame: “Dũniyã ne a ratem wẽnga me loogdame, la ned ninga sẽn maand Wẽnnaam daab paada wakat sẽn ka sɛta.”—1 Zã 2:17.
A võorã sẽn sɩd ya a soaba
4. a) B sẽn tigimd neb wʋsg tɩ b lagemd taab Wẽnnaam balengã pʋgẽ rũndã-rũndã wã võor sɩd yaa bõe? b) Wãn to la Biiblã bilgd tigis-kãngã?
4 Tigim neb wʋsg tɩ b lagem taab baleng hakɩkã pʋgẽ rũndã-rũndã wã võor sɩd yaa bõe? Rẽ wilgda vẽeneg tɩ dũni wẽng kãngã saabã kolga wʋsgo, la tɩ Wẽnnaam dũni paalgã na n sɩnga rẽ poor bala. Tõnd mensã maanda kaset ne Biiblã bãngr-goam sẽn deng n togs neb wʋsg woto tigingã pidsgu. Bãngr-gomd a yembr yetame: “La wakat watame [yaoolem day kãensã] tɩ [a Zeova] rooga tãng [a baleng hakɩkã] na n zẽk n yɩɩg tãensa fãa [n yɩɩd baleng buud a taabã fãa]. La buud wʋsg na n maga taab n kẽng be. Buud wʋsg na n waame n wa yeele: ‘Wa-y tɩ d rʋ [a Zeova] tãng[ã] zug n kẽng a Zakoob Wẽnnaam doogẽ wã tɩ b zãms tõnd d sẽn tog n maan bũmb ninsi la d tũ bãmb sore.’ ”—Miise 4:1, 2; Yɩɩl Sõamyã 37:34.
5, 6. a) Wãn to la Miise 4:1, 2 paamd pidsg rũndã-rũndã? b) Sogs-bʋs la d segd n sok d mens masã?
5 Wa b sẽn togs bãngr-gomdã pʋgẽ wã, rũndã-rũndã, neb milyõ rãmb sẽn yit buud fãa pʋsẽ n wat a Zeova tẽeb roogẽ wã n na n balem-a. B sã n wa bãng Wẽnnaam a Zeova raabã sẽn pukd a nonglmã la a zʋg-sõma wã, kẽeda b sũyã sõma. Ne sik-m-menga, b baood n na n bãnga Wẽnnaam sẽn dat tɩ b maan bũmb ningã. Wa yɩɩl gʋlsdã, b pʋʋsda woto: “Bɩ y zãms maam tɩ m maan sẽn tat yãmb yam; tɩ bõe, yãmb yaa mam Wẽnnaam.”—Yɩɩl Sõamyã 143:10.
6 Yãmb bee kʋʋn-kãsengã a Zeova sẽn tigimd masã n lagemd-b taab balengã pʋgẽ wã sʋk bɩ? Yãmb sẽn tall manesem ning ne zãmsgã y sẽn paam a Gomdẽ wã wilgdame tɩ y sɩd miime tɩ zãms-kãng yita a Zeova nengẽ bɩ? Hal sẽn ta zĩ-bʋg la y na n ‘tũ yẽ sorã’?
Lagem-n-taarã sẽn maand to-to
7. a) Hal sẽn ta zĩ-bʋg la nebã na n lagem taab Wẽnd baleng hakɩkã pʋgẽ? b) Bõe yĩng tɩ yaa yãgb bũmb tɩ d lebg a Zeova balemdb masã, la wãn to la d tõe n sõng neb a taabã tɩ b maan woto?
7 A Zeova ratame tɩ yĩngr la tẽng rãmbã fãa lagem taab a baleng hakɩkã pʋgẽ. Ad d sɩd gũuda daar ning sẽn vɩ-bã fãa sẽn na n wa balem sɩd Wẽnnaam yɛngã! (Yɩɩl Sõamyã 103:19-22) La nand tɩ rẽ wa tõog n yɩ, rɩlla a Zeova sãam neb nins fãa sẽn zãgsd tɩ b kõn maan a raabã sẽn yaa tɩrgã. Ne nimbãan-zoeere, a rengd n togsa a sẽn dat n maan bũmb ningã, tɩ nebã sẽn be zĩig ning fãa bɩ b tõe n toeem b vɩɩm manesmã. (Ezai 55:6, 7) Rũndã-rũndã, b taasda koɛɛg sẽn yaa yãgb bũmb ‘soolem fãa la buud fãa la goam toɛ-toɛy fãa la neba fãa’ n yet woto: “Bɩ y zoe Wẽnnaam la y waoog bãmba; tɩ bõe, bãmb bʋʋd kaoob wakat taame. Bɩ y waoog sẽn naan-a yĩngri la tẽnga ne ko-kãsenga la ko-bundsã.” (Wilgri 14:6, 7) Yãmb saka koe-kãngã bɩ? Sã n yaa woto, y tara zu-noog n na n bool neb a taab me tɩ b wa bãng sɩd Wẽnnaam yɛngã la b balm-a.
8. D sã n zãms Biiblã zãms-yẽg n bãng poore, bõe me la d segd n bao n maan ne d sũur fãa?
8 A Zeova pa rat tɩ neb sẽn yet tɩ b tẽed-a lame n yaool n ket n baood b mens nafa balm-a ye. Wẽnnaam datame tɩ neba wa paam ‘a raabã bãngr’ hakɩk la b tũ rẽ b vɩɩmã pʋgẽ. (Kolos rãmba 1:9, 10) Woto yĩnga, neb sẽn zãmsd Biiblã zãms-yẽg la b tar mi-beoog ne rẽ wã baoodame n na n yɩ kiris-neb sẽn bɩ tẽebã wɛɛngẽ. B ratame n bãng a Zeova sõma n paase, n wʋm a Gomdã võor sõma n paase, la b tũ-a n paas b vɩɩmã pʋgẽ. B baoodame n na n dɩk togs-n-taar ne tõnd saasẽ Ba wã zʋg-sõma, la b get yɛlã wa yẽ mengã sẽn get-b to-to wã. Rẽ kɩtdame tɩ b baood soay n na n kẽes b mens tʋʋmd ning sẽn fãagd yõyã pʋgẽ, a Zeova sẽn kɩt tɩ b maand dũniyã gill zug rũndã-rũndã wã. Yãmb me rat n maana woto bɩ?—Mark 13:10; Hebre dãmba 5:12-6:3.
9. Wãn to la lagem-n-taar hakɩkã tõe n zĩnd masã?
9 Biiblã wilgdame tɩ lagem-n-taar n segd n zĩnd neb nins sẽn maand a Zeova raabã sʋka. (Efɛɛz rãmba 4:1-3) Lagem-n-ta-kãng segd n zĩnda masã, baa ne tõnd sẽn vɩ dũni sẽn be welsg pʋgẽ, la d maood ne d meng pãn-komsmã. A Zezi pʋʋsa ne a sũur fãa n dat t’a karen-biisã fãa yɩ yembre, tɩ b paam lagem-n-taar hakɩka. Rẽ võor da yaa bõe? Pipi, yaa b sẽn da segd n paam zems-n-taar ne a Zeova la ne a Biriblã. Yiib-n-soaba, yaa b sẽn da segd n tall lagem-n-taar ne taabã. (Zã 17:20, 21) Sẽn na yɩl tɩ yɩ woto, a Zeova tũnugda ne kiris-neb tigingã siglg n zãmsd a nin-buiidã.
Yel-bʋs n sõngd n wat ne lagem-n-taarã?
10. a) Tõnd mengã sã n lakd Biiblã n leokd sogsg sẽn pak-do, na n naf-d-la wãn to? b) Vaees-y bũmb nins sẽn sõngd n kɩt tɩ kiris-nebã zĩnd lagem-n-taar pʋgẽ wã, n leok sogsg nins sẽn be sul-kãngã pʋgẽ wã.
10 Yɛl a yopoe la b sõdg-yã, tɩ sõngd n wat ne lagem-n-taar Wẽnnaamã baleng pʋgẽ. Y sã n wa leokd sogsg nins sẽn tɩ loe ne yel-kãensã wã, bɩ y tags a yembr fãa sẽn tar pãn-tusdg ning yãmb zems-n-taarã ne a Zeova la ne kiris-neb a taabã zut to-to. Y sã n tags zĩ-kãensã zutu, la y karem verse nins goam b sẽn pa gʋlsã, na n sõnga yãmb tɩ y paam yam ning sẽn yit Wẽnnaam nengẽ wã n paase, tɩ y tõog n tags sõma n paase, la y paas y yam-vẽenemã, sẽn yaa zʋg-sõma sẽn yaa tɩlae ne-dã. (Yelbũna 5:1, 2; Filip rãmba 1:9-11) Ges-y bõn-kãensã ball-balle.
1) Tõnd sak n deegame tɩ ya a Zeova bal n segd n yãk noyã, n wilg sẽn yaa sõma la sẽn yaa wẽngã. “Teeg [a Zeova] ne f sũur fãa la f ra teeg f meng bãngr ye. Fo sẽn maand bũmb ninga fãa, bɩ f tẽeg Zusoaba yelle, la b na n demsa fo sorã.”—Yelbũna 3:5, 6.
Bõe yĩng tɩ d segd n bao a Zeova sagls la a sor-wilgri, d sã n wa yãkd yam n na n maan bũmbu? (Yɩɩl Sõamyã 146:3-5; Ezai 48:17)
2) D tara Wẽnnaam Gomdã tɩ wilgd-d sore. “Yãmb sẽn deeg Wẽnnaam koɛɛga tõnd sẽn togs yãmbã, yãmb ka reeg-a wa ninsaal koɛɛg ye, la yãmb reeg-a-la wa Wẽnnaam koɛɛga sẽn tʋmd yãmb sẽn tẽeda pʋsẽ, la a sɩd yaa woto.”—1 Tesalonik rãmba 2:13.
Bõe yĩng tɩ yaa yell tɩ d maan sẽn “wẽnd” tɩrg d meng nifẽ bala? (Yelbũna 14:12; Zeremi 10:23, 24; 17:9)
Tõnd sã n pa mi Biiblã sẽn kõt saglg ning bũmb zugu, bõe la d segd n maane? (Yelbũna 2:3-5; 2 Tɩmote 3:16, 17)
3) Tõnd fãa rɩta tẽeb rɩɩb a yembre. “Fo kamba fãa na n yɩɩ [a Zeova] karen-biisi.” (Ezai 54:13) “La bɩ tõnd tẽeg taab yelle la d yik taab ratem tɩ maan nonglem la tʋʋm sõama. Bɩ d da bas taab tiging wa neb kẽer sẽn maanda ye. La bɩ d sagl taaba, la bɩ d sagl n yɩɩd tõnd sẽn yã tɩ daar kolgdame wã yĩnga.”—Hebre dãmba 10:24, 25.
Nafa bʋs la neb nins sẽn dɩt tẽebã rɩɩb fãa a Zeova sẽn kõtã paamda? (Ezai 65:13, 14)
4) Ya a Zezi Kirist la tõnd taoor soaba, la pa ninsaal ba a yembr ye. “La bɩ yãmb da bao tɩ neb bool yãmb tɩ Karensaamb ye, tɩ bõe, yãmb karen-saamb ya a ye bala, la yãmb fãa yaa ba-biisi. Bɩ y ra bool ned dũniyã zug tɩ yãmb ba ye, tɩ bõe, yãmb Ba ya a ye bala n be [saasẽ]. Bɩ yãmb da bao tɩ neb bool yãmb tɩ [taoor] dãmb ye, tɩ bõe, yãmb [taoor soab] ya a ye bala, yaa Kirist.”—Matɩe 23:8-10.
Ned segd n tagsa tõnd sʋkã t’a yɩɩda a taaba bɩ? (Rom dãmba 3:23, 24; 12:3)
5) Sã n yaa ne tõndo, yaa Wẽnnaam Rĩungã sẽn ya a goosneemã wã bal la ãdem-biisã zu-loees tɩɩm. “Dẽ yĩnga, bɩ yãmb pʋʋs woto: ‘Tõnd Ba sẽn be [saasẽ], tɩ yãmb yʋʋr yɩ ne waoogre. Tɩ yãmb soolem wa, tɩ yãmb daab maan dũniyã zug wa sẽn maand [saasẽ wã].’ Bɩ y reng n bao Wẽnnaam soolem ne bãmb tɩrlem.”—Matɩe 6:9, 10, 33.
Wãn to la “reng n bao Wẽnnaam soolem” sõngd n kogl tõnd lagem-n-taarã? (Miise 4:3; 1 Zã 3:10-12)
6) Vʋʋsem sõngã kɩtdame t’a Zeova balemdbã tar zʋg-sõma sẽn yaa tɩlae ne kiris-nebã lagem-n-taarã. ‘Vʋʋsem sõng biis yaa nonglem la sũ-noogo la laafɩ la sũ-mare la maan neere la sũ-maasem la tẽebo la sũ-bʋgsem la yõk-m-menga.’—Galat dãmba 5:22, 23.
Bõe la d segd n maan sẽn na yɩl tɩ Wẽnnaam vʋʋsem sõngã wom biis tõnd nengẽ? (Tʋʋma 5:32)
Tõnd sã n tar Wẽnnaam vʋʋsem sõngã, wãn to la rẽ tar pãn-tusdg tõnd ne d kiris-nin-taasã zems-n-taar zugu? (Zã 13:35; 1 Zã 4:8, 20, 21)
7) Wẽnnaam balemdb hakɩkã fãa moonda a Rĩungã koe-noogo. “Wẽnnaam soolem koe-noog kãngã na n moona dũniyã tɛk fãa tɩ yɩ kaset buud fãa yĩnga. Dẽ, dũniyã sɛɛb na yaool n ta.”—Matɩe 24:14.
Bõe n segd n kɩt tɩ d tʋll n moon koe-noogã wʋsgo? (Matɩe 22:37-39; Rom dãmba 10:10)
11. Tõnd sã n tũ Biiblã sagls d vɩɩmã pʋgẽ, nafa bʋs la rẽ na n wa ne?
11 D sã n tar lagem-n-taar a Zeova balengã pʋgẽ, pẽnegda tõnd ne-a, la sõngda tõnd tɩ d paam lagem-n-taar sẽn be yamleoog ne d tẽed-n-taasã. Yɩɩl Sõamyã 133:1 yetame: “Gese, ned ne a ba-biis sã n zĩ ne taaba yaa neere, a yaa noogo.” D sã n lak d mens ne dũniyã la a rat-m-yembrã, a yoobã, a nen-kɛglmã la d tigim ne neb nins sẽn sɩd nong a Zeova la b sakd a noyã, d sɩd paamda yolsgo!
Lak-y y mens ne bũmb nins sẽn wat ne welsgã
12. Bõe yĩng tɩ d segd n zãag d mens ne soog-m-mengã?
12 Sẽn na yɩl n da sãam lagem-n-taar ning tõnd sẽn tar ne d saam-biisã dũniyã gill zugã, d segd n laka d mens ne bũmb nins sẽn wat ne welsgã. Bõn-kãensã a yembr yaa bao n soog f menga, n da sak Wẽnnaam la a noyã ye. Sẽn na yɩl n sõng-d tɩ d lak d mens ne rẽ, a Zeova wilgame tɩ soog-m-mengã yẽgr ya a Sʋɩtãanã. (2 Korẽnt dãmba 4:4; Wilgri 12:9) Ya a Sʋɩtãan n tus a Ãdem ne a Hawa tɩ b pa kelg Wẽnnaam sẽn da yeelã, n kɩɩs-a n maan b mens sẽn date. Rẽ waa ne yel-beed n kõ bãmb ne tõnd me. (Sɩngre 3:1-6, 17-19) Dũni kãngã pida ne neb sẽn nong soog-m-menga, n pa rat n tũ Wẽnnaam la a noyã ye. Yaa rẽ n so tɩ d segd n zãgs soog-m-meng kãngã buud tõnd sũyã pʋsẽ.
13. Bõe n na n wilg tɩ tõnd sɩd segendame n na n vɩɩmd Wẽnnaam dũni paalgã sẽn yaa tɩrgã pʋgẽ?
13 Wala makre, ges-y kãabg sẽn be yamleoog ning a Zeova sẽn maan n wilg t’a na n ledga masã dũni wẽngã ne sa-paals la tẽn-paalg “tɩrlem sẽn na n zĩnd b pʋsẽ” wã. (2 Pɩɛɛr 3:13) Rẽ pa segd n kɩt tɩ tõnd segl d mens masã sẽn na yɩl n wa vɩɩmd wakat kãng sẽn na n yɩ tɩrlem wakatã sɩda? Rẽ baoodame tɩ d tũ Biiblã sagl-kãngã: “Bɩ y ra nong dũniyã walla bũmb nins sẽn be dũniyã pʋgẽ wã me ye. Ned sã n nong dũniyã, Ba nonglem ka be a pʋgẽ ye.” (1 Zã 2:15) Woto yĩnga, d lakda d mens ne dũni kãngã yamã, a soog-m-meng manesmã, a rat-m-yembrã, a yoobã la a nen-kɛglmã. Wakat fãa, d baoodame n kelgd a Zeova la d sakd-a ne d sũur fãa, baa ne tʋlsem wẽns sẽn be tõnd mensã sẽn pa zems zãngã pʋgẽ fãa. Tõnd vɩɩmã tõr kõta kaset tɩ d tagsgã la yam ning sẽn kɩt tɩ tõnd maand yɛlã tika Wẽnnaam daabã maaneg zugu.—Yɩɩl Sõamyã 40:9.
14. a) Bõe yĩng tɩ tar yõod tɩ d zãms n bãng a Zeova sorã masã la d tũ-a d vɩɩmã pʋgẽ? b) Verse nins b sẽn ning sullã pʋgẽ wã võor ne tõnd yaa bõe?
14 Wakat ning a Zeova sẽn yãk n na n sãam zãmaan-wẽng kãngã la neb nins sẽn nong-a wã sã n ta, a pa na n viig daarã ye. A pa na n viig wakat kãng bɩ n toeem a noyã tɩ zems ne neb nins sẽn ket n dat n tall zood ne dũni kãngã wã, n yaool n zãmsd Wẽnnaam daabã la b pa maand-a ne b sũy fãa wã ye. Yaa masã la d segd n maan Wẽnnaam daabã. (Luk 13:23, 24; 17:32; 21:34-36) Woto yĩnga, d sẽn ne tɩ kʋʋn-kãsengã neb tũuda sagl-kãngã sẽn tar yõod wʋsgã sɩd kengda d raoodo. Sɩda, b baooda bãngr ning a Zeova sẽn tũnugd ne a Gomdã la a siglgã n kõtẽ wã ne yẽesem, la b kẽnd ne lagem-n-taar a sorã sẽn tar-b n debd dũni paalgã pʋgẽ wã zugu! Sẽn paase, d sã n bao n bãng a Zeova n paase, d nonglmã ne-a na n paasame, tɩ d rat n maan a raabã.
Lebg-n-gese
• A Zeova raabã balengã wɛɛngẽ yaa bõe?
• D sã n bãng Biiblã zãms-yẽgã poore, d segd n baoa ne d sũy fãa n maan bõe me?
• Bõe la tõnd ned kam fãa tõe n maan n tall lagem-n-taar ne neb a taabã sẽn balemd a Zeova wã?
[Foto, seb-neng a 4]
‘Sik-m-mens rãmbã na n sooga tẽngã n maan sũ-noog laafɩ wʋsg yĩnga’