Sak a yiibu
Pẽg-y a Zeova sẽn yaa sɩd Wẽnnaam yɛngã
1. Sɩd Wẽnnaam yɛngã yaa ãnda?
BIIBLÃ yetame tɩ baa ne b sẽn get bũmb wʋsg wa wẽnnaam dãmbã, “Wẽnnaam a yembr bal n be. Bãmb yaa tõnd ba.” (1 Korẽnt dãmba 8:5, 6) ‘Wẽnnaam a yembrã’ ya a Zeova sẽn yaa bũmb fãa Naandã. (Tõodo 6:4; Wilgri 4:11) A Zezi yeelame t’a yaa “m Wẽnnaam sẽn yaa yãmb me Wẽnnaamã.” (Zã 20:17) A sak n deega goam nins a Moiiz sẽn da reng n yeel tɩ: “[A Zeova] yaa Wẽnnaam. B ka tar to ye.” (Tõodo 4:35) A Zeova yɩɩda bũmb nins fãa nebã sẽn balemdã zĩig sẽn zãre, wala makre wẽn-naandse, ninsaalb b sẽn get wa wẽnnaam dãmba, bɩ a bɛ a Sʋɩtãan sẽn yaa ‘dũni kãnga wẽnnaamã.’ (2 Korẽnt dãmba 4:3, 4) A Zeova, a Zezi sẽn yeel t’a ‘ya a yen, n yaa sɩd Wẽnnaamã,’ yaa toor fasɩ ne bãmb fãa.—Zã 17:3, Kãab-paalgã Koe-noogo.
2. D sã n bãngd Wẽnnaam, bõe la d segd n maane?
2 Neb nins sẽn tar mi-beoogã sã n wa bãng Wẽnnaam zʋg-sõma wã sẽn be yamleoogã, la b bãng a sẽn zoe n maan bũmb ning la a sẽn na n maan bũmb ning n kõ-dã, b rat n pẽneg-a lame. B nonglmã ne a Zeova sã n bɩtẽ la b sẽn dat n pẽg-a. Wãn to? Nananda, yaa b sẽn na n gom a yell ne neb a taabã. Rom dãmba 10:10 yetame tɩ ‘yaa ne noor goam la ned kɩt kaset n paamd fãagre.’ Manesem a to yaa b sẽn na n dɩk a togs-n-taar b goamẽ wã la b manesmẽ wã. Efɛɛz rãmba 5:1 yetame: “Bɩ yãmb yɩ Wẽnnaam togs-n-taas wa kom-nongdse.” Sẽn na yɩl n maan woto sõma n paase, rẽnda d bãng a Zeova sẽn sɩd ya a soaba.
3. Wẽnnaam zʋg-kãsemsã yaa bʋse?
3 Biiblã fãa pʋgẽ, goam wʋsg n wilgd Wẽnnaam zʋg-kãsemsã. Bãmb b naasã yaa yam, tɩrlem, pãng la nonglem. ‘Yam bee ne Wẽnnaam.’ (Zoob 12:13) ‘Bãmb soɛya fãa yaa tɩrse.’ (Tõodo 32:4) A tara ‘pãng kãsenga.’ (Ezai 40:26) ‘Wẽnnaam yaa nonglem.’ (1 Zã 4:8) La Wẽnnaam zʋg-kãsems a naasã sʋka, bʋg n yaa kãseng n yɩɩda, n wilgd Wẽnnaam sẽn ya a soabã n yɩɩd a taabã?
“Wẽnnaam yaa nonglem”
4. Wẽnnaam zʋg-sõma wã sʋka, yaa bʋg n kɩt t’a naan ãndũniyã la bõn-vɩɩsã fãa?
4 Ges-y bũmb ning sẽn kɩt t’a Zeova naan ãndũniyã, malɛgsã la ninsaalbã. Ya a yamã bɩ a pãngã yĩnga? Ayo, tɩ bõe, baa sã n yaa ne a yamã la ne a pãngã la Wẽnnaam tʋm ne me, pa bãmb n kɩt t’a naan tõnd ye. A tɩrlmã me leb n pa kɩtd tɩ yaa tɩlae ne-a t’a kõ neb a taab vɩɩm ye. Yaa Wẽnnaam nonglem kãsengã n kɩt t’a naan neb a taab tɩ bãmb me tar sũ-noogo. Yaa nonglmã n kɩt t’a rat tɩ ãdem-biis nins sẽn yaa sakdbã paam vɩɩm wakat sẽn pa sat Arzãn pʋgẽ. (Sɩngre 1:28; 2:15) Nonglmã kɩtame t’a segl n na n yiis taal ning a Ãdem beegrã sẽn wa ne ãdem-biisã zutã.
5. Sã n yaa ne Biiblã, a Zeova kõta mak-sõng sẽn yaa kãseng ne zʋg-sõng bʋg pukri, la bõe yĩnga?
5 Rẽnd Wẽnnaam zʋg-sõma wã fãa sʋka, sẽn ya a kãseng n tɩ yɩɩdã ya a nonglmã. Yaa nonglmã n ya a mengã halhaale. Baa ne a yamã, a tɩrlmã la a pãngã sẽn tar yõod to-to ningã fãa, Biiblã zɩ n yeel t’a Zeova yaa bõn-kãens ba a yembr ye. La a sɩd yetame t’a yaa nonglem. N-ye, a Zeova yaa nonglmã mak-sõng sẽn tɩ yɩɩd fãa. Nonglem kãng tika noy zutu, lakae a pa nonglem sẽn tũud sũur tʋlsem bal ye. Wẽnnaam nonglmã tika sɩdã la tɩrlmã noy zutu. Yaa nonglem kãng n yɩɩd nonglem buud a taabã fãa, tɩ Wẽnnaam a Zeova mengã kõt mak-sõng sẽn yaa kãseng zĩ-kãng wɛɛngẽ. Nonglem kãng pa naag ne rat-m-yembr baa bilfu, la wakat fãa a pukda ne tʋʋm sẽn yaa vẽenese.
6. Bõe n kɩt tɩ tõnd tõe n dɩk togs-n-taar ne Wẽnnaam, baa ne a sẽn yɩɩd tõndã?
6 Yaa nonglem kãseng kãng n kɩt tɩ d tõe n dɩk togs-n-taar ne Wẽnnaam sẽn yaa woto. D sẽn yaa ninsaalb sẽn ka pãnga, n pa zems zãng la d yaa koangdbã yĩngã, d tõe n tagsame tɩ d pa na n tol n tõog n maan dẽ ye. La ad bũmb a to me sẽn wilgd a Zeova nonglem kãsengã: A mii tõnd sẽn tõe la d sẽn pa tõe, la a pa baood tɩ tõnd maan yɛlã tɩ zems zãng ye. A miime tɩ tõnd ket n zãra ne zems-zãngã. (Yɩɩl Sõamyã 51:7) Yaa rẽ n so tɩ Yɩɩl Sõamyã 130:3, 4 yetẽ: “[Zeova] mam soaala, yãmb sã n tẽeg yel-wẽna n ka base, ãnda n na n yalse? La sugr bee yãmb nengẽ, tɩ neb tõe n zoe yãmba.” N-ye, a Zeova yaa ‘Wẽnnaam sẽn yaa nimbãan-zoeta la bark kõata. A sũur ka yikd tao-tao ye, la a [sõmblem] yaa wʋsgo.’ (Yikri 34:6) “[Zeova], yãmb yaa sõngo la y kõta sugri.” (Yɩɩl Sõamyã 86:5) Ad woto sɩd kengda sũuri! D sẽn maand Wẽnnaam sẽn be yamleoog woto raabã, la d paam t’a nong-do, la a get d yell ne nimbãan-zoeerã sɩd kengda pɛlga.
7. Wãn to la d tõe n yã a Zeova nonglmã bũmb nins fãa a sẽn naanã pʋsẽ?
7 D leb n tõe n yãa a Zeova nonglmã bũmb nins a sẽn naanã pʋgẽ. Tags-y bõn-sõma wʋsg nins a Zeova sẽn kõ tõnd d sũ-noog yĩngã, wala tãensã, kãgã, kʋɩlsã la ko-kãsemsã sẽn be rasãndã yelle. A kõo tõnd rɩɩb buud toor-toor sẽn na yɩl tɩ rɩɩbã yɩ-d noogo, la a zã d vɩɩmã. A Zeova leb n kõo tõnd tɩ-puud buud toor-toor sẽn be rasãnde, la rũms buud toor-toor gesg sẽn be yamleoogo. A maana yɛlã tɩ tõe n kõ ãdem-biisã sũ-noogo, baa ne rẽ sẽn da pa tɩlaeyã. Yaa sɩd tɩ tõnd sẽn pa zems zãng n leb n vɩ dũni wẽng kãngã pʋgẽ wã, d pa tõe n dɩ bũmb nins a sẽn naanã nafa zãng ye. (Rom dãmba 8:22) La yãmb wee n mams n ges bũmb nins a Zeova sẽn na n maan n kõ tõnd arzãnã pʋgẽ wã! Yɩɩl gʋlsdã kõta tõnd bas-m-yam woto: “Yãmb pukda y nugu, la bõn-vɩɩs fãa paamda bark tɩ seke.”—Yɩɩl Sõamyã 145:16.
8. Wãn to la a Zeova wilg a nonglmã n tɩ yɩɩd ne tõndo?
8 Wãn to la a Zeova wilg a nonglmã n tɩ yɩɩd ne ãdem-biisã? Biiblã wilgdame: “Wẽnnaam nonga dũniyã hal tɩ b kõ b Biiga sẽn ka to, tɩ ned ninga fãa sẽn tẽed bãmb kõn sãam ye, la a na paam vɩɩm sẽn ka sɛta.” (Zã 3:16) Yaa ninsaal sõmblmã yĩng la a Zeova maan woto bɩ? Rom dãmba 5:8 leokame: “Wẽnnaam wilga bãmb nonglem tõnd yĩnga, tɩ tõnd sẽn da ket n yaa yel-wẽna rãmba Kirist kii tõnd yĩnga.” N-ye, Wẽnnaam tʋma a Biriblã sẽn zems zãngã t’a wa tẽngã zug n kõ a vɩɩmã tɩ yɩ maoong sẽn yaa rond tɩ fãagd tõnd ne yel-wẽnã la kũumã taale. (Matɩe 20:28) Rẽ paka sor n kõ neb nins sẽn nong Wẽnnaamã tɩ b na n paam vɩɩm sẽn pa satã. Zu-noogo, neb nins fãa sẽn dat n maan Wẽnnaam daabã tõe n dɩɩ a nonglmã nafa, bala Biiblã yeta tõnd tɩ: “Wẽnnaam ka tũusd neb ye. La buud fãa sʋka, ned ninga sẽn zoet bãmba la sẽn maand tɩrga, yẽ soab tata bãmb yam.”—Tʋʋma 10:34, 35.
9. A Zeova sẽn kõ a Biriblã tɩ yɩ rond tõnd yĩngã segd n kɩtame tɩ d rat n maan bõe?
9 A Zeova sẽn kõ a Biriblã tɩ yɩ rond n pak vɩɩm sẽn pa satã sor tõnd yĩngã segd n kɩtame tɩ d rat n maan bõe d vɩɩmã pʋgẽ masã? Rẽ segd n paasa tõnd nonglmã ne sɩd Wẽnnaam a Zeova. Rẽ segd n kɩtame me tɩ d rat n kelg a Zezi, sẽn gomd Wẽnnaam yʋʋr yĩngã. ‘[A Zezi] kii neba fãa yĩnga, tɩ neb nins sẽn vɩ wã kõn vɩ b mens yĩng yɛs ye, la b na vɩ sẽn ki-a bãmb yĩngã yĩnga.’ (2 Korẽnt dãmba 5:15) A Zezi makrã tũub sɩd bee yamleoog wʋsgo, bala a ra rɩkda a Zeova nonglmã la a nimbãan-zoeerã togs-n-taar sõma. Rẽ yɩɩ vẽeneg ne a Zezi sẽn yeel sik-m-mens rãmbã woto wã: “Bɩ y wa mam nengẽ, yãmb fãa sẽn yɛ la sẽn tʋkd zɩɩb sẽn yaa zɩsgo, la mam na kõ yãmb vʋʋsgo. Bɩ y rɩk mam nao wã n zãms bũmb nins mam sẽn na n wilg yãmbã. Tɩ bõe, mam yaa sũ-mar soaba la m yaa nin-nana la yãmb na paam vʋʋsgo. Tɩ bõe, mam yɛla yaa naana, la mam zɩɩb yaa faasga.”—Matɩe 11:28-30.
D tall nonglem ne neb a taabã
10. Wãn to la d tõe n wilg tɩ d nonga kiris-neb a taabã?
10 Wãn to la d tõe n wilg tɩ d nonga kiris-neb a taabã ne nonglem buud ning a Zeova ne a Zezi sẽn nong tõndã? Ges-y tõnd sẽn tõe n maan dẽ to-to: “Nonglem maanda sũ-mare, la a pida ne neerlem. Nonglem ka maand sũ-kiir ye. Nonglem ka pẽgd a meng ye, la a ka wukd a meng ye. Nonglem ka maand sẽn ka zems ye, la a ka baood a meng sõngr bal ye, la a ka maand sũ-yikr ye, la a ka tagsd wẽng ye. Nonglem ka maand sũ-noog ne wẽng ye, a maanda sũ-noog ne sɩda. A maanda sugr ne bũmb fãa, la a tẽeda bũmb fãa, a gũuda a tẽeb pidsg ne bũmb fãa, la a tõe n tõoga toog fãa pʋgẽ. Nonglem ka sɛt abada.”—1 Korẽnt dãmba 13:4-8; 1 Zã 3:14-18; 4:7-12.
11. Ãnd me la d segd n nongẽ, la wãn to?
11 Ãnd me la d segd n nongẽ, la wãn to? A Zezi yeelame: “Bɩ y kẽng n maan neba buud fãa tɩ b yɩ mam karen-biisi n lis bãmb ne Ba la Biiga la [vʋʋsem sõng] yʋʋre. La y zãms bãmb tɩ b sak bũmb nins fãa mam sẽn da togs yãmbã.” (Matɩe 28:19, 20) Rẽ baoodame tɩ d moon koe-noogã sẽn tɩ loe ne arzãnã sẽn yaa Wẽnnaam dũni paalgã sẽn watã, tɩ neb nins sẽn nan pa kiris-neb hakɩk wa tõndã wʋm. A Zezi wilga vẽeneg tɩ tõnd nonglmã pa segd n tek neb nins sẽn tar tẽeb a yembr ne tõndã ye, bala a yeelame: “Yãmb sã n nong neb nins sẽn nong yãmbã [bala], yãmb keoor yaa bõe? Yõor yaood dɛɛgdba me ka maand woto sɩda? La yãmb sã n pʋʋsd yãmb ba-biisa bala, yãmb maandame n yɩɩd neb a taaba bɩ? Neb sẽn ka pʋʋsd Wẽnnaam me ka maand woto bɩ?”—Matɩe 5:46, 47; 24:14; Galat dãmba 6:10.
‘Kẽn-y ne a Zeova yʋʋre’
12. Bõe yĩng tɩ Wẽnnaam yʋʋrã zems ne yẽ bala?
12 D tõeeme me n pẽg sɩd Wẽnnaamã wʋsgo, d sẽn na n bãng a yʋʋrã sẽn ka to sẽn yaa Zeova wã, n boond-a la d zãmsd neb a taaba tɩ b bãng yʋ-kãnga. Yɩɩl gʋlsdã rata ne a sũur fãa tɩ nebã “bãng tɩ yaa yãmb y ye bal yʋʋr n yaa [Zeova]; yãmb yaa Sẽn-ka-to dũniyã tɛk fãa.” (Yɩɩl Sõamyã 83:19) Yʋʋr sẽn yaa Zeova wã rat n yeelame tɩ “A kɩtdame tɩ yɩ.” A yaa Wẽnnaam Kãseng ning sẽn yãkd raabo, la a pidsd-a wakat fãa. La yaa sɩd Wẽnnaamã bal n tõe n tall yʋ-kãngã, bala ninsaalbã pa tõe n kɩs sɩd tɩ b sẽn dat n maanã na n sɩd tõogame ye. (Zak 4:13, 14) Ya a Zeova bal n tõe n yeel t’a gomdã “na n tõoga” bũmb ning yẽ sẽn tʋm-a t’a tɩ maanã. (Ezai 55:11) Neb wʋsg sũy yɩɩ noog wʋsgo, b sẽn yã Wẽnnaam yʋʋrã b Biibl dãmbẽ wã pipi wã la b bãng a võorã. (Yikri 6:3, NW ) La yaa b sẽn na n “kẽn ne a Zeova yʋʋr . . . wakat fãa yĩng” bal la bãng-kãng na n naf-ba.—Miise 4:5, NW.
13. Bãng a Zeova yʋʋrã la kẽn ne a yʋʋrã baoodame tɩ d maan bõe?
13 Yɩɩl Sõamyã 9:11 goma Wẽnnaam yʋʋrã yell n wilg tɩ: “Neb nins sẽn mi yãmb yʋʋra dellda yãmba.” Bãng tɩ Wẽnnaam yʋʋr ya a Zeova bal pa sek ye, bala rẽ tɛk pa wilgd tɩ f teeg-a lame ye. Wẽnnaam yʋʋrã bãngr dat n yeelame tɩ bãng a Zeova sẽn yaa Wẽnnaam ninga, waoog a zu-sobendã, sak a noyã, la f teeg-a bũmb fãa pʋgẽ. (Yelbũna 3:5, 6) Woto, kẽn ne a Zeova yʋʋr me rat n yeelame tɩ f rɩk f meng n kõ-a, la f gom a yʋʋr yĩnga, n yɩ a balemda, la f modg tɩ f sẽn vɩ to-to wã sɩd zems ne Wẽnnaam daabã. (Luk 10:27) Yãmb maanda woto bɩ?
14. D sã n dat n maan a Zeova raabã wakat sẽn pa sate, wãn to la d segd n ges a raabã maanego?
14 Tõnd sã n dat n maan a Zeova raabã wakat sẽn pa sat yĩnga, d pa segd n ges a raaba maaneg wa zɩɩb bal ye. Tʋm-tʋmd a Poll sagla a Tɩmote sẽn da zoe n maand a Zeova raabã hal yʋʋm wʋsgã n yeel-a tɩ: “Mao ne Wẽnnaam sakre.” (1 Tɩmote 4:8a) Yaa f sũur sẽn na n pid ne mi-beoog ne ned la f sakd-a. ‘Wẽn-sakr’ kɩtdame tɩ d tar waoogr kãseng ne a Zeova mengã. A kɩtdame tɩ f nong-a wʋsgo, f sẽn nand yẽ ne a noyã yĩnga. A kɩtdame tɩ d rat tɩ ned fãa ges a yʋʋrã wa bũmb sẽn tar waoogr wʋsgo. D segdame n bao n yɩ wẽn-sakd d vɩɩmã pʋgẽ, d sã n dat n kẽn ne a Zeova sẽn yaa sɩd Wẽnnaam yɛngã yʋʋr wakat sẽn ka sɛta.—Yɩɩl Sõamyã 37:4; 2 Pɩɛɛr 3:11.
15. Wãn to la d tõe n sak Wẽnnaam zãng-zãnga?
15 Sẽn na yɩl n tũ Wẽnnaam wa a sẽn dat to-to wã, d segd n balm-a-la ne d sũur fãa, bala a yaa “Wẽnnaam sẽn baood sakr zãng-zãnga.” (Yikri 20:5, NW ) Tõnd pa tõe n nong Wẽnnaam la d leb n nong dũni wẽngã ye, bala a Sʋɩtãan n yaa dũni kãngã wẽnnaam. (Zak 4:4; 1 Zã 2:15-17) A Zeova mii tõnd ned kam fãa sẽn baood n na n yɩ ned ninga. (Zeremi 17:10) Tõnd sã n sɩd nong tɩrlem, a neeme, la a na n sõnga tõnd tɩ d maan sũ-mar ne kɩs-sɩd d daar fãa zu-loeesã pʋgẽ. A sẽn sõngd tõnd ne a vʋʋsem sõngã sẽn tar pãng wʋsgã yĩnga, a na n kɩtame tɩ d tõog wẽngã sẽn pid dũni kãngã wã. (2 Korẽnt dãmba 4:7) A na n leb n sõnga tõnd tɩ d kell n tall d saagrã sẽn tar pãng sẽn yaa wa paam n vɩɩmd wakat sẽn pa sat tẽng zugã. Ad sɩd yaa saag-kãseng menga! D segd n talla mi-beoog wʋsg ne rẽ, la d tʋlg n maan sɩd Wẽnnaam a Zeova sẽn kɩt tɩ rẽ tõe n yɩ wã raabo.
16. Bõe la yãmb ne neb milyõ rãmb a taab segd n tʋlg n maane?
16 Dũniyã gill zugu, neb milyõ rãmb n sak yɩɩl gʋlsdã sẽn gʋls woto wã boolle: “D lagem n pẽg [a Zeova] la d zẽk bãmb yʋʋre.” (Yɩɩl Sõamyã 34:4) A Zeova boonda yãmb tɩ y wa naag kʋʋng sẽn tar paasgã sẽn be tẽnsã fãa pʋsẽ wã n maan woto.
Lebg-n-gese
• A Zeova yaa Wẽnnaam bʋg buudu? Wãn to la a zʋg-sõma wã bãngr vẽeneg nafd tõndo?
• Wãn to la d tõe n tall nonglem ne neb a taabã?
• Bãng a Zeova yʋʋrã la kẽn ne a yʋʋrã baoodame tɩ d maan bõe?
[Foto rãmba, seb-neng 14]
A Zeova sẽn tar nonglem wʋsgã, ‘a na n puka a nugu, tɩ bõn-vɩɩs fãa paam bark tɩ seke’