Sak a nu
A Zeova balemdbã paam-m-mengã
1, 2. a) Soog-m-meng bʋg la Wẽnnaam kõ pipi rao wã ne a pagã? b) Togs-y noy a wãn a Ãdem ne a Hawa sẽn da segd n tũ.
A ZEOVA sẽn da wa n naan pipi rao wã la pipi pagã, b ra soo b mens n yɩɩd rũndã-rũndã ninsaalbã zĩig sẽn zãre. B ra bee arzãnã sẽn yaa Edɛn zẽ-neerã pʋgẽ. Bãag ra pa sãamd b sũ-noogã ye, bala b yamã la b yĩnsã ra zemsa zãnga. Kũum da pa gũud-b wala a sẽn gũud tõnd fãa masã wã ye. Sẽn paase, b ra tara yam daabo, n da tõe n yãk b sẽn dat n maaneg b toore. La b sã n da rat n ket n so b mens woto, b ra segd n saka Wẽnnaam noyã.
2 D rɩk makr ne Wẽnnaam noy nins sẽn zãad ãndũniyã. Yaa sɩd tɩ Wẽnnaam pa wilg no-kãens vẽeneg woto ye, la a sẽn da naan a Ãdem ne a Hawa to-to wã kɩtame tɩ no-kãens sakr da yaa nana. Rɩɩb yamleoog ra tẽegd-b lame tɩ b segd n dɩɩme, tɩ ko-yũud da tẽegd-b tɩ b segd n yũu koom, tɩ wĩndg kõom da tẽegd-b tɩ b segd n gũsame. Sẽn paase, a Zeova ra bobl-b-la tʋʋmde, tɩ d tõe n yeel tɩ rẽ yaa noore, bala a ra wilgda b sẽn da segd n maan bũmb ninsi. B ra segd n doga kamba, n soog tẽngã bõn-vɩɩs buud toor-toor la b yalg arzãnã hal t’a wa pid tẽngã gilli. (Sɩngre 1:28; 2:15) Ad sɩd ra yaa noor sẽn be yamleoog la sẽn tar yõodo! No-kãng ra na n kõ-b-la tʋʋmd sẽn be sũ-noog wʋsgo, la a kɩt tɩ b tõog n dɩk b tõodã n tʋm ne b pãng tɛk tɩ yɩ sõma wʋsgo. B ra leb n tara sor n na n yãk bãmb sẽn na n tʋm b tʋʋmdã to-to. Bõe la b ra ye rat n paase?
3. Wãn to la a Ãdem ne a Hawa ra tõe n tʋm ne b yam-yãkrã sõma?
3 Yaa vẽeneg t’a Ãdem ne a Hawa sẽn da paam sor n na n yãk bãmb mens sẽn dat n maan bũmb ninsã, pa rat n yeel tɩ b sẽn yãk n na n maan bũmb ning fãa ra na n yɩɩ sõma ye. B yam-yãkrã ra segd n zemsa ne Wẽnnaam noyã. Wãn to la b ra na n bãng no-kãense? Ra yaa b sẽn na n kelg b Naandã la b tags bũmb nins a sẽn naana zugu. Wẽnnaam kõo a Ãdem ne a Hawa yam tɩ sek tɩ b tõe n tũ b sẽn da zãms bũmb ningã. A sẽn naan-b tɩ b zems zãngã yĩnga, b ra tõe n dɩka togs-n-taar ne Wẽnnaam zʋg-sõma wã nana-nana, b sã n wa na n yãk yam n maan bũmbu. B sã n sɩd da tar mi-beoog ne Wẽnnaam sẽn da maan bũmb ning n kõ-bã, la b sã n da tʋll n ta a yam, b ra na n modgame n maan woto.—Sɩngre 1:26, 27; Zã 8:29.
4. a) B sẽn gɩdg a Ãdem ne a Hawa tɩ b ra rɩ tɩɩg a yembr biisã ra kɩtame tɩ b pa so b mens bɩ? b) Bõe yĩng tɩ no-kãng ra zemse?
4 Rẽnd wa sẽn zemse, Wẽnnaam da na n maka a Ãdem ne a Hawa n ges b sã n da na n saka yẽ sẽn yaa b Naandã, n tʋm tɩ zems ne a noyã. A Zeova kõo a Ãdem no-kãngã: “Fo tõe n yãgsa tɩɩsa fãa sẽn be zẽeda zĩigẽ wã biis n dɩ, la ra sak n yãk sõama ne wẽng bãngr tɩɩga biis n dɩ ye. Tɩ bõe, fo sã n dɩ a biisa daare, fo sɩd na n kiime.” (Sɩngre 2:16, 17) A Hawa me naanegã poore, b togs-a-la no-kãngã. (Sɩngre 3:2, 3) Gɩdg-kãngã ra kɩtame t’a Ãdem ne a Hawa ra pa so b mens bɩ? Ayo. B ra tara rɩɩb tɩ sek tɩ pa tũ ne tɩ-kãng biisã ye. (Sɩngre 2:8, 9) Ra zemsa fasɩ tɩ b sak n deeg tɩ tẽngã ra yaa Wẽnnaam n so, bala yaa yẽ n naan-a. Rẽnd Wẽnnaam tara sor n na n yãk noy sẽn zems ne a raabã la sẽn nafd ãdem-biisã.—Yɩɩl Sõamyã 24:1, 10.
5. a) Wãn to la a Ãdem ne a Hawa menems b soog-m-mengã? b) Bõe n ledg a Ãdem ne a Hawa soog-m-mengã, la rẽ waa ne bõe tõnd zutu?
5 La yaa bõe n maane? Malɛk n tall naam tʋlsem n tʋm ne a yam daabã wẽng n lebg Sʋɩtãana, sẽn dat n yeel tɩ “kɩɩsda.” A belga a Hawa n yeel-a bũmb sẽn kɩɩsd Wẽnnaam daabã. (Sɩngre 3:4, 5) A Ãdem maana wa a pagã n kɩɩs Wẽnnaam noorã. B sẽn dɩk b sẽn da pa so wã yĩnga, b yiibã konga b soog-m-mengã. Yel-wẽndã n da so-b masã, la wala Wẽnnaam sẽn da yeelã, b baas n kiime. Rẽnd bũmb ning b sẽn taas b kambã la b yagensã ra yaa yel-wẽnã, la yaa rẽ n kɩt tɩ b tʋll wẽng maanegã. Yel-wẽnã leb n waa ne komslem sẽn wat ne bãase, kʋʋlem la kũum. A Sʋɩtãan kɩtame tɩ wẽngã tʋlsem paase, tɩ rẽ kɩt tɩ ãdem-biisã vɩɩm pid ne kisgri, tʋʋm-beedo, maan f to pãnga, la zab sẽn yãgs neb milyõ rãmb wʋsg yõyã. Ad woto sɩd yaa toor fasɩ ne soog-m-meng ning Wẽnnaam sẽn da kõ ninsaalbã sɩngrẽ wã!—Tõodo 32:4, 5; Zoob 14:1, 2; Rom dãmba 5:12; Wilgri 12:9.
D sẽn na n paam d mens to-to
6. a) Wãn to la d tõe n yã paam-m-meng hakɩkã? b) Yaa paam-m-meng bʋg buud yell la a Zezi sẽn goma?
6 D sã n ges yɛlã sẽn keng to-to rũndã-rũndã wã, pa lingr la nebã sẽn baood ne b sũy fãa n na n paam b mensã ye. La wãn to la paam-m-meng hakɩkã tõe n wa? A Zezi yeelame: “Yãmb sã n tall mam goama, yãmb yaa mam karen-biis hakɩɩka. Yãmb na bãng sɩda, la sɩda na kõ yãmb [paam-m-menga].” (Zã 8:31, 32) Paam-m-meng kãng pa ninsaalbã sẽn saagd n na n paam a soabã, b sã n zãgs naab bɩ naam buud n toeem ne a to wã ye. Ayo, la yaa paam-m-meng ne ãdem-biisã zu-loees fãa yẽgre. A Zezi sẽn da gomdã yaa paam-m-meng ne yel-wẽnã yembdo. (Zã 8:24, 34-36) Woto yĩnga, ned ning sẽn lebgd a Zezi Kirist karen-biig hakɩk vɩɩma paamda toeeng wʋsgo: a paama a menga!
7. a) Wãn to la d tõe n paam d mens ne yel-wẽnã masã tɛka? b) Bõe la d segd n maan n paam d mens woto?
7 La woto pa rat n yeel tɩ masã kiris-neb hakɩkã ye pa tar wẽngã tʋlsem b sẽn dog ne wã ye. B sẽn dog ne yel-wẽnã yĩnga, b segd n ket n maooda ne-ba. (Rom dãmba 7:21-25) La ned sã n sɩd tũud a Zezi zãmsgã, a pa na n le yɩ yel-wẽnã yamb ye. Yel-wẽnã pa na n le soog-a wa na-toaag sẽn kõt noy t’a segd n sak tɩlae ye. Kiris-ned vɩɩmã ye pa vɩɩm sẽn pa tar võore, sẽn kɩt t’a sũur kasetã yaa rẽgd ye. A na n paama sũur-kaset sẽn yaa sõma Wẽnnaam taoore, bala yel-wẽn nins a sẽn da maan pĩnda paama sugri, a sẽn tẽed Kirist maoongã yĩnga. Yel-wẽnã tʋlsem tõe n dat n soog-a lame, la a sã n pa sak-ba, a sẽn tẽr Kirist zãmsgã sẽn yaa yɩlemdã yĩnga, a wilgdame tɩ yel-wẽnã le pa so-a ye.—Rom dãmba 6:12-17.
8. a) Kiris-nedemd hakɩkã kɩtdame tɩ d paam d mens ne yɛl toɛy-toɛy bʋse? b) Manesem bʋg la d segd n tall ne nanambsã?
8 Tõnd sẽn yaa kiris-nebã, d paama d mens ne yɛl toɛy-toɛya. D paama d mens ne ziri zãmsgã sẽn wat ne wẽng ningã, ne tẽeb ziri wã la ne yel-wẽnã yembdo. D sẽn bãng sẽn ki-bã halhaal meng-mengã la vʋʋgrã kɩtame tɩ d paam d mens ne kũumã rabeem sẽn ka võorã. D sẽn mi tɩ ka la bilfu Wẽnnaam Rĩungã sẽn yaa tɩrgã na n ledga ninsaalbã goosneema rãmbã sẽn pa zems zãngã yolsda tõnd n kõt-d saagr masã. (Daniɛll 2:44; Matɩe 6:10) La rẽ pa kõt tõnd sor tɩ d paoog tẽnsã nanambs la b noyã ye.—Tɩt 3:1, 2; 1 Pɩɛɛr 2:16, 17.
9. a) Ne nonglem, wãn to la a Zeova sõngd tõnd tɩ d paam d mens rũndã-rũndã? b) Wãn to la d tõe n yãk yam n maan sẽn yaa neere?
9 A Zeova pa basd tõnd tɩ d kẽ tudgr pʋgẽ n yaool n bãng vɩɩm manesem ning sẽn yaa sõma n yɩɩdã ye. A mii a sẽn naan tõnd to-to, n mi bũmb ning sẽn kõt tõnd sũ-noog hakɩkã, la bũmb ning sẽn na n naf tõnd wakat sẽn kõn sa yĩnga. A mii tagsa la manesem nins sẽn tõe n wa sãam ned zems-n-taarã ne yẽ la ne neb a taabã, bɩ n kɩt t’a soabã kong dũni paalgã menga. Ne nonglem, a Zeova wilgda tõnd bõn-kãense, ne Biiblã la a tẽng zug siglgã maasem. (Mark 13:10; Galat dãmba 5:19-23; 1 Tɩmote 1:12, 13) Wẽnnaam sẽn naan tõnd tɩ d tar yam-yãkrã, yaa tõnd n segd n yãk yam ne d sẽn na n maan bũmb ninga. D sã n sak n tũ Biiblã sẽn yetã n pa maan wa a Ãdmã, d na n yãka yam n maan sẽn yaa neere. Rẽ, d na n wilgame tɩ sẽn pak tõnd n yɩɩd yaa d paam zems-n-taar ne a Zeova.
Paam-m-meng buud a to baoobo
10. A Zeova Kaset rãmb kẽer baoa paam-m-meng bʋg buudu?
10 Wakat ninga a Zeova Kaset rãmb sẽn yaa kom-bɩɩse, bɩ sẽn yaa kãsemb tõe n data paam-m-meng buud a to. Dũniyã yamleoog tõe n yõk-b lame. La b sã n tagsd a yell wakat fãa, maan bũmb nins sẽn wɛ dũniyã pʋgẽ wã tʋlsem wat n lebga wʋsgo, tɩ yaool n pa zems ne kiris-nebã ye. Tõe tɩ nin-kãens pa baood n na n yũ dorge, n yũ rãam tɩ loog bɩ n yo ye, la b sɩngdame n maand tũud-n-taar ne neb sẽn pa kiris-neb hakɩka, n dat tɩ nin-kãens sak-ba. B tõeeme meng n dɩk togs-n-taar ne b goamã la b manesmã.—3 Zã 11.
11. Wakat ninga belgr ning sẽn kɩtd tɩ f wa maan wẽngã yita yɛ?
11 Wakat ninga, yaa ned sẽn yet t’a balemda a Zeova n belgd-f tɩ f wa tall manesem sẽn pa segd ne kiris-neda. Yel-kãng zĩnda pipi kiris-nebã sʋka, la a tõe n zĩnda tõnd sʋk me rũndã-rũndã. Naoor wʋsgo, nin-kãens buudã rat n maana yɛla, n tagsdẽ tɩ woto b na n nooga b yõore, tɩ yaool n kɩɩsd Wẽnnaam noyã. B tusda neb a taabã tɩ b noog b yõyã, n kãabd-b “lohorem, la b mens [yaool n] yaa wẽng yembse.”—2 Pɩɛɛr 2:19.
12. Wẽnnaam noyã kɩɩsg wata ne bi-wẽns bʋse?
12 Paam-m-meng kãngã buud sẽn yaa belgrã baasda ne wẽng wakat fãa, bala a wata ne Wẽnnaam noyã kɩɩsgo. Wala makre, yoob tõe n waa ne sũ-sãamse, bãase, kũum, pʋg rɩkr sẽn pa tũ ne f raab la kãadem kaoob menga. (1 Korẽnt dãmba 6:18; 1 Tesalonik rãmba 4:3-8) Dorgã yũub tõe n waa ne sũ-yikri, n kɩt tɩ ned goam lebg bidsgu, n sãam a ninã, n wa ne nen-soabga, n kɩt t’a soabã vʋʋsem lebg toogo, t’a zʋbsdẽ, walla a ki mengã. A tõe n kẽesa ned yembd pʋgẽ, tɩ rẽ tõe n wa baas ne bi-be-tʋʋm sẽn na yɩl n paam ligd n da dorgã. Rã-yũur wʋsgã me tõe n baasa woto. (Yelbũna 23:29-35) Tõe tɩ neb nins sẽn kẽed minim-wẽns kãensã pʋsẽ wã tẽedame tɩ b soo b mense, la sã n wa beẽ-beẽ, b wat n mikame tɩ b lebga yel-wẽnã yembse. La yel-wẽnã sã n soog-fo, sɩd wata ne toog menga! D sã n tags rẽ fãa yell masã, tõe n sõng-d lame tɩ d põs zu-loe-kãensã.—Galat dãmba 6:7, 8.
Zu-loeesã sẽn sɩngdẽ
13. a) Naoor wʋsgo, wãn to la tʋlsem nins sẽn wat ne zu-loeesã pukda? b) Ãnd soab tagsg la d segd n bãnge, n wʋm ‘tũud-n-ta-wẽnsã’ sẽn yaa b rãmba? d) Y sã n wa leokd sull 13 wã sogsgo, bɩ y wilg a Zeova tagsg yellã zug vẽenega.
13 D sok d mens n ges zu-loeesã sẽn nong n sɩngdẽ. Biiblã wilgdame: “La ned kam fãa tara makr a meng wẽnga ratem sẽn makd yẽnda n bẽt yẽnda. La wẽng ratem sã n dɩk pʋga a rogda yel-wẽna, la yel-wẽna sã n wa n bɩ, a wata ne kũum.” (Zak 1:14, 15) Yaa bõe n wat ne tʋlsem wẽnsã? Yaa bũmb nins sẽn kẽed tõnd yamẽ wã. Naoor wʋsgo, yaa f sẽn maand tũud-n-taar ne neb nins sẽn pa tũud Biiblã noyã yĩnga. Yaa sɩd tɩ d fãa miime tɩ d segd n zãaga d mens ne ‘tũud-n-ta wẽnse.’ (1 Korẽnt dãmba 15:33) La tũud-n-ta-bʋs n yaa wẽnse? A Zeova tagsg yaa bõe ne yel-kãnga? D sã n tags sogsg nins sẽn pʋgdã zut la d karem verse nins b sẽn wilgã, segd n sõnga tõnd tɩ d wa paam tagsg ning sẽn zemsã rẽ zugu.
Neb sã n wõnd nin-tɩrse, rat n yeelame tɩ b yaa tũud-n-ta-sõma bɩ? (Sɩngre 34:1, 2, 18, 19)
Nin-kãens goama la b kʋʋsem goamã tõe n kɩtame tɩ d bãng d sã n segd n maana tũud-n-taar ne-b bɩ? (Efɛɛz rãmba 5:3, 4)
A Zeova tagsg yaa wãn to, tõnd sã n yãk n na n maan tũud-n-taar ne neb sẽn pa nong-a? (2 Kɩbaya 19:1, 2)
Tõnd sã n tʋmdẽ bɩ n karemd ne neb sẽn pa tar tẽeb a yembr ne tõndo, bõe yĩng tɩ d segd n gũusi? (1 Pɩɛɛr 4:3, 4)
Tõnd sã n get televiziõ wã, sĩnima wã, ẽntɛrnetã, la d karemd sɛbã la zʋrno rãmbã, d maanda tũud-n-taar ne neb a taaba. Bõn-kãensã fãa pʋsẽ, ne bõe la d segd n gũusi? (Yelbũna 3:31; Ezai 8:19; Efɛɛz rãmba 4:17-19)
Tõnd sẽn yãkd tũud-n-taas ninsã kɩtdame t’a Zeova get tõnd wãn-wãna? (Yɩɩl Sõamyã 26:1, 4, 5; 97:10)
14. Paam-m-meng hakɩk bʋg n gũud neb nins sẽn tũud Wẽnnaam Gomdã sagls wakat fãa masã tɛkã?
14 Dũni paalgã Wẽnnaam sẽn kãabã taa n saame. Ne a Zeova saasẽ Rĩungã sẽn yaa goosneemã wã maasem, ãdem-biisã na n paama b mens ne a Sʋɩtãan la ne a dũni wẽngã gilli. Bilf-bilfu, b na n yiisa yel-wẽnã biis fãa nin-sakdbã nengẽ, tɩ rẽ kɩt tɩ b zems zãng b yamẽ wã la b yĩnsẽ wã, n tõog n vɩɩmd wakat sẽn pa sat Arzãnã pʋgẽ. Sẽn na n baase, bõn-naandsã fãa na n paama lohorem tɩ zems kɛpɩ ne “a Zeova vʋʋsem sõngã” sẽn kõtã. (2 Korẽnt dãmba 3:17, NW ) Bõe yĩng tɩ d na n kɩɩs Wẽnnaam Gomdã sagls masã n wa kong woto fãa? Bɩ d fãa tʋm ne d kiris-ned paam-m-mengã ne yam rũndã-rũndã, n wilg vẽeneg tɩ tõnd sẽn sɩd rat yaa ‘Wẽnnaam kambã [paam-m-menga] ne b ziirã.’—Rom dãmba 8:21.
Lebg-n-gese
• Soog-m-meng bʋg la pipi rao wã ne a pagã ra tara? Soog-m-meng kãng ne ninsaalbã sẽn tar a soab rũndã-rũndã wã welga zĩ-bʋgo?
• Kiris-neb hakɩkã tara paam-m-meng bʋgo? Zĩ-bʋg la rẽ welg ne dũniyã sẽn boond bũmb ning tɩ paam-m-mengã?
• Bõe yĩng tɩ tar yõod tɩ d zãag d mens ne tũud-n-ta-wẽnsã? Ãnd noy sẽn tɩ loe ne wẽngã la d sakda, n pa maand wa a Ãdma?
[Foto, seb-neng 46]
Wẽnnaam Gomdã keoog-d lame: “Da belg-y y mens ye, tũud-n-ta-wẽns sãamda nin-sõamyã”