Sak a yoobe
Gomd ning sẽn pak d fãa wã
1, 2. a) Gom-bʋg la a Sʋɩtãan wa ne Edɛn zẽedẽ wã? b) Wãn to la yel-kãngã puk a goamẽ wã?
GOMD n pak yãmba. Yaa gom-kãseng ning sẽn yɩɩd a taabã fãa tɩ pak ãdem-biisã gillã. Yãmb saagr ne vɩɩmd wakat sẽn kõn sa wã bee ne yãmb sẽn na n zĩnd a soab ning poorẽ gom-kãngã pʋgẽ. Gom-kãngã waa tõdgrã sẽn zĩnd Edɛn zẽedẽ wã sasa. A Sʋɩtãan soka a Hawa tɩ: “Rẽ yĩnga Wẽnnaam sɩd yeela yãmb tɩ y ra rɩ tɩɩs nins fãa sẽn be zẽeda zĩigẽ wã biis bɩ?” A Hawa leokame n wilg Wẽnnaam sẽn yeel bũmb ning tɩɩg a yembr wɛɛngẽ wã: ‘Wẽnnaam yeela tõnd tɩ d ra yãk a biis n dɩ tɩ d sã n dɩ-a, d na n kiimi.’ Rẽ poore, a Sʋɩtãan yeelame t’a Zeova yagda ziri, la a yeel tɩ pa tɩlae t’a Ãdem ne a Hawa sak Wẽnnaam n tõog n vɩɩmd ye. A Sʋɩtãan yeelame tɩ Wẽnnaam da mongda a bõn-naandsã bõn-sõma, t’a pa kõt-b sor tɩ b yãk b mens noy vɩɩmã pʋgẽ ye. A yeela woto: “Wẽnnaam miimi tɩ daar ninga yãmb sẽn na n yãk a biisã n dɩ, yãmb nina na n pukame tɩ yãmb lebg wa Wẽnnaam n mi sõama ne wẽng n bake.”—Sɩngre 3:1-5.
2 Sɩda, a Sʋɩtãan da yetame tɩ ninsaalbã sã n da yãk b toorẽ noyã, ra na n naf-b lame n yɩɩd b sẽn da na n sak Wẽnnaam noyã. A sẽn yeel woto wã, a ra pa sak Wẽnnaam sẽn da rɩt a naamã to-to wã ye. Yaa woto la gom-kãseng ning sẽn tɩ loe ne Wẽnnaam ãndũni naam sẽn ka to wã, sẽn dat n yeel tɩ sor ning a sẽn tar n na n dɩ naamã wa-yã. Rẽ waa ne sok-kãngã masã : Bõe n yaa sõma n yɩɩd ne ninsaalbã, a Zeova naamã bɩ, bɩ naam a to sẽn lebsd yẽ kɛɛngã? A Zeova ra tõeeme n kʋ a Ãdem ne a Hawa zĩig pʋgẽ, la rẽ ra pa na n welg naam sẽn ka to wã yell zãng ye. Wẽnnaam sẽn bas tɩ ãdem-biisã sõor fɩɩg tɩ kaoos wʋsgã, a tõog n kõo kaset ne bũmb ning sẽn na n maane, nebã sã n soog b mens n bas yẽ ne a noyã.
3. Gomd a yiib-n-soab bʋg la a Sʋɩtãan wa ne?
3 A Sʋɩtãan sẽn kɩɩs sor ning a Zeova sẽn tar n na n dɩ naamã, a pa tek yɛl nins sẽn zĩnd Edɛn zẽedẽ wã ye. A maana sãmb-sãmb ne a Zeova bõn-naands a taabã wẽn-sakre, tɩ rẽ lebg gomd a yiib-n-soab sẽn tɩ loe ne pipi soabã wʋsgo. Kɩɩs-kãng wa n paka a Ãdem ne a Hawa kamba la b yagensã fãa, n paas Wẽnnaam malɛgsa fãa, la a Zeova pipi Biriblã a sẽn nong wʋsgã menga. Wala makre a Zoob wakatã, a Sʋɩtãan yeelame tɩ nebã sẽn maand a Zeova raabã pa b sẽn nong-a wã yĩng bɩ a sẽn dɩt naamã to-to wã yĩng ye. A yeelame tɩ yaa nebã sẽn baood b mens nafrã yĩng bal n kɩt tɩ b maand a raabã, la tɩ zu-loees sã n wa, b fãa na n kɩɩsa Wẽnnaam n maan b mens sẽn dat bala.—Zoob 2:1-6; Wilgri 12:10.
Ãdem-biisã vɩɩm sẽn wilg bũmb ninga
4, 5. Bõe la ãdem-biisa vɩɩm wilg-yã, ninsaalbã sẽn bao n na n soog b mensã?
4 Ad zãms-kãseng a yembr naam sẽn ka to wã wɛɛngẽ: Wẽnnaam pa naan ãdem-biisa tɩ b bas yẽ naamã la b soog b mens n tõog tɩ b vɩɩmã yɩ sõmã ye. A naan-b lame tɩ b ra segd n sak a no-tɩrsã bãmb mens nafr yĩnga. No-rɛɛs a Zeremi sak n deega woto: “[Zeova], mam miime tɩ ninsaal ka tar noor ne a vɩɩm sẽn na n yɩ bũmb ninga ye. Ninsaal ka so a meng vɩɩm yell ye. Zusoaba, bɩ y [kibl] tõndo.” (Zeremi 10:23, 24) Yaa rẽ n so tɩ Wẽnnaam Gomdã sagend tõnd woto: “Teeg [a Zeova] ne f sũur fãa la f ra teeg f meng bãngr ye.” (Yelbũna 3:5) Wala Wẽnnaam sẽn naan ãdem-biisã n yãk noy tɩ b tũub kogend b vɩɩmã, woto me, a yãka noy sẽn tɩ loe ne sõma la wẽnga, tɩ b sã n tũ-b bɩ b wat ne zems-n-taar ãdem-biisã ne taab sʋka.
5 Vẽenega, Wẽnnaam da miime tɩ ãdem-biisa ra pa tõe n soog b mens tɩ yɩ sõma tɩ sã n pa tũ ne yẽ naamã ye. Ninsaalbã sẽn bao n na n bas Wẽnnaam naamã n soog b mensã, b yãka naam, ne laog zãab la tũudum sigls toor-toore, la yɩɩ faoore. Sigl-kãensã sẽn yaa toɛy-toɛyã kɩtame tɩ ninsaalbã kɩɩs taab tɩ baas ne nen-kɛglem, zaba, la kũum. “Ninsaal [soo] a to n maand-a wẽnga.” (Koɛɛg Soaba 8:9) Sɩd yaa woto n zĩnd ãdem-biisa vɩɩm fãa pʋgẽ. Wa Wẽnnaam Gomdã sẽn da reng n togsã, nin-wẽnsã la zãmb dãmba “maana wẽng n paase.” (2 Tɩmote 3:13) Yʋʋm kob-gĩnd 20 soabã sasa, ãdem-biisã bãngr la b te-paal yiisgã paasa wʋsgo, la yel-beedã me yɩɩ wẽng n yɩɩd pĩnda. Zeremi 10:23 sɩd pidsa naoor ka tɛka: b pa naan ninsaalbã tɩ b soog b mensã vɩɩm ye.
6. Ka la bilfu, wãn to la Wẽnnaam na n kɩt tɩ ninsaalbã sẽn bas yẽ n bao soog-m-meng ningã sa?
6 Nebã sẽn bas Wẽnnaam n soog b mensã sẽn wom bi-wẽns nins kaoosg zugẽ wã wilga vẽeneg la wakat fãa yĩng tɩ ãdem-biisã naam pa tol n tõe n yɩ sõma ye. Yaa Wẽnnaam naamã bal n kõt sũ-noogo, zems-n-taare, yĩns laafɩ la vɩɩm. Sẽn paase, Wẽnnaam Gomdã wilgdame tɩ ka la bilfu, a Zeova na n kɩtame tɩ ninsaalbã naam sa. (Matɩe 24:3-14; 2 Tɩmote 3:1-5) Ka la bilfu, a na n kẽesa a toog ãdem-biisã yɛlẽ sẽn na yɩl n lugl a naamã tẽngã zugu. Biiblã bãngr-gomd yeta woto: “Rĩm dãmb kãens [ninsaalbã nanambs sẽn be masã wã] sẽn dɩt naam wakate, Wẽnnaam sẽn be yĩngra na n kɩtame tɩ soolem [sẽn be saasẽ] sẽn ka tõe n sãam la buud a taab sẽn ka tõe n deeg zĩndi [ninsaalb pa na n tol n le rɩ naam tẽng zug ye]. A na n wãa soolem kãens fãa [masã rãmbã] tɩ b menem n bas-a t’a yaas wakat fãa.”—Daniɛll 2:44.
D sẽn na n maan to-to n põs n kẽ Wẽnnaam dũni paalgã pʋgẽ
7. Wẽnnaam naamã sã n wa menems ninsaalbã naam, ãnd dãmb n na n põse?
7 Wẽnnaam naamã sã n wa menems ninsaalbã naam, ãnd dãmb n na n põse? Biiblã leokdame: “Nin-tɩrs [neb nins sẽn sak tɩ Wẽnnaam bal n segd n dɩ naamã] na n zĩnda tẽnga pʋgẽ, pʋ-peelem dãmb na n zĩnda a pʋgẽ. La b na n yiisa nin-wẽns [neb nins sẽn pa sak tɩ Wẽnnaam bal n segd n dɩ naamã] tẽnga pʋgẽ.” (Yelbũna 2:21, 22) Woto me, yɩɩl gʋlsdã yeelame: “A keta bilf bala tɩ nin-wẽng kõn tol n zĩnd ye . . . Nin-tɩrs[ã] na n sooga dũniyã la bãmb na n zĩnda a zug wakat sẽn ka sɛta.”—Yɩɩl Sõamyã 37:10, 29.
8. Wãn to la Wẽnnaam na n wilg zãng-zãng t’a naam sẽn ka to wã zemsame?
8 A Sʋɩtãan dũniyã sãoong poore, Wẽnnaam na n lugla dũni paalga. A na n kɩtame tɩ nen-kɛglmã, zabã, naongã, farã, bãasã la kũumã sẽn namsd dũniyã neb hal sẽn na maan yʋʋm tusa wã ra le zĩnd be ye. Biiblã bilgda bark nins sẽn gũud sakdbã ne gom-kãensã sẽn be rasãndã: “[Wẽnnaam] na n yẽesa nintãma fãa t’a ra le zĩnd bãmb ninẽ ye, la kũum ka na n le zĩnd ye, la sũ-sãoong bɩ yãbre walla toog kõn le zĩnd yɛs ye, tɩ bõe, dẽenem bũmb fãa loogame.” (Wilgri 21:3, 4) Ne a saasẽ Rĩungã bɩ a goosneemã wã a sẽn bobl Kiristã maasem, Wẽnnaam na n wilgame tɩ sɩd zemsame t’a yɩ tõnd Rĩm la d Naaba.—Rom dãmba 16:20; 2 Pɩɛɛr 3:10-13; Wilgri 20:1-6.
Wẽn-sakdbã sẽn tall manesem ning gomdã taoore
9. a) Wãn to la neb nins sẽn kell n sak a Zeova ne kɩs-sɩdã ra get a goamã? b) Wãn to la a Nowe wilg a sakr ne a Zeova wakat fãa, la a makrã zãmsda tõnd bõe?
9 Hal tẽn-kʋdem wẽndẽ n tõk masã, rap la pagb sẽn tall tẽeb saka a Zeova sẽn yaa b Naab sẽn ka to wã wakat fãa. B ra miime tɩ b vɩɩmã ra bee ne b sẽn na n kelg-a la b sak-a. A Nowe yɩɩ sakd woto. Rẽ n so tɩ Wẽnnaam yeel-a tɩ: “Ninsaalba fãa sãoong wakat taame, . . . bɩ f maan koglg f meng yĩnga.” A Nowe saka a Zeova noorã. La baa ne b sẽn deng n togs-bã, a Nowe wakatẽ nebã kell n tʋma b tʋʋm wala yell da pa wat ye. La a Nowe yẽ mee kogl-kãseng la a ra ket n moond a Zeova no-tɩrsã. Biiblã paasda woto: “A Nowe maana woto. Bũmb nins fãa Wẽnnaam sẽn yeel yẽ t’a maana, yẽ maaname.”—Sɩngre 6:13-22; Hebre dãmba 11:7; 2 Pɩɛɛr 2:5.
10. a) Wãn to la a Abrahaam la a Saara sak a Zeova naam sẽn ka to wã? b) Bõe la a Abrahaam la a Saara makrã tõe n zãms tõndo?
10 A Abrahaam ne a Saara me kõo mak-sõng a Zeova naam sẽn ka to wã sakr wɛɛngẽ, bala b maana bũmb nins fãa a sẽn kõ-b noor tɩ b maana. B ra bee Uur sẽn da yaa Kalde rãmbã soolmẽ tẽng sẽn tar arzɛkã. La a Zeova sẽn da wa n yeel a Abrahaam t’a yi be n kẽng tẽn-zẽng a sẽn da pa miẽ wã, a sak n ‘kẽnga wa a Zeova sẽn da yeel-a wã.’ A Saara sɩd ra segd n tara naar vɩɩm: a ra tara yiri, zo-rãmb la buudu. Ne rẽ fãa, a saka a Zeova la a sak a sɩdã n kẽng Kanaã, baa ne a sẽn da pa mi bũmb ning sẽn da gũud-a be wã.—Sɩngre 11:31-12:4; Tʋʋma 7:2-4.
11. a) Yel-bʋs pʋsẽ la a Moiiz sak a Zeova naam sẽn ka to wã? b) A makrã tõe n zãmsa tõnd bõe?
11 A Moiiz me yɩɩ ned sẽn sak a Zeova naam sẽn ka to wã yɛl sẽn yaa tood wʋsg pʋsẽ, a sẽn da wa n kẽng n tɩ yã a Faraõ Ezipt hal tɩ yɩ tak-tɩ-m-takã. Woto ra pa rat n yeel t’a Moiiz ra tara bas-yard tɩ loog ne a meng ye. Ayo, a pʋd n da pa tẽed t’a tõe n goma sõma ye. La a saka a Zeova noorã. Ne a Zeova teelg la a Aarõ sõngre, a kẽnga a Faraõ sẽn yaa tõatã taoor naoor wʋsgo, sẽn na yɩl n taas-a a Zeova goama. Israɛll neb kẽer sãbga a Moiiz wʋsgo. Ne rẽ fãa, a Moiiz sakame n maan bũmb nins fãa a Zeova sẽn kõ-a noor t’a maana, tɩ tũ ne yẽ sabab tɩ Israɛll paam fãagr Ezipti.—Yikri 7:6; 12:50, 51; Hebre dãmba 11:24-27.
12. a) Bõe n wilgd tɩ sak a Zeova wakat fãa yɩɩda f sẽn na n sak bũmb Wẽnnaam sẽn kɩt tɩ b gʋlsã bala? b) D sã n wʋm sak Wẽnnaam wakat fãa wã võore, wãn to la rẽ sõngd tõnd tɩ d tũ 1 Zã 2:15?
12 Neb nins sẽn da sakd a Zeova wakat fãa wã ra pa get tɩ sẽn yaa tɩlae ne bãmb yaa b sak Wẽnnaam sẽn da kɩt tɩ b gʋlsã bal ye. Woto, a Potifaar pagã sẽn da wa n mak n na n kʋɩɩb a Zozɛf t’a yo ne-a wã, Wẽnnaam da nan pa kɩt tɩ b gʋls noor sẽn wilgd tɩ yoob kisame ye. La a Zozɛf sẽn da mi bũmb ning kãadmã a Zeova sẽn lugl Edɛn zẽedẽ wã wɛɛngẽ wã kɩtame t’a bãng tɩ Wẽnnaam da pa rat tɩ rao lagem ne ned a to pag ye. A Zozɛf ra pa rat n ges hal sẽn ta zĩ-bʋg la Wẽnnaam da na n bas-a t’a rɩk Ezipt nebã togs-n-taar ye. A saka a Zeova noyã, a sẽn tags Wẽnnaam yel-manesmã ne ãdem-biisã zutã, la a tũ bũmb ning a sẽn bãng tɩ yaa Wẽnnaam daabã.—Sɩngre 39:7-12; Yɩɩl Sõamyã 77:11, 12.
13. Wãn to la neb nins sẽn pʋgdã wilg t’a Sʋɩtãan yaa ziri yagda: a) a Zoobe? b) Hebre kom-bɩɩs a tãabã?
13 Baa b sã n be mak-toaag pʋgẽ, neb nins sẽn sɩd mi a Zeova wã pa basd-a ye. A Zeova sẽn da pẽgd a Zoobã, a Sʋɩtãan yeelame t’a Zoob arzɛkã fãa sã n da sa, bɩ t’a sã n da lʋɩ bãaga, a na n basa Wẽnnaam. La a Zoob wilgame t’a Sʋɩtãan yaa ziri yagda, baa yẽ mengã sẽn da pa mi bũmb ning sẽn kɩt tɩ yel-beedã ra be a zugã. (Zoob 2:9, 10) Yʋʋm kobs loogr poore, a Sʋɩtãan da ket n baoodame n na n wilg t’a tara bʋʋm, n tus Babilon rĩmã sũur sẽn yikã t’a yeel t’a na n loba Hebre kom-bɩɩs a tãab bug-witmẽ, b sã n pa sak n wõgemd bõn-naandg rĩmã sẽn kɩt tɩ b maana taoore. Kom-bɩɩsã ra segd n maana yãkre. Yaa b sak rĩmã noore, wall b sak a Zeova noorã n zãgs bõn-naandgã pʋʋsgo. La b wilga vẽeneg tɩ ya a Zeova la b balemd-a, la tɩ yaa yẽ la b Naab sẽn ka to. Ne bãmba, Wẽnnaamã sakr da tara yõod n yɩɩd b mensã yõy menga.—Daniɛll 3:14-18.
14. Wãn to la tõnd sẽn yaa ninsaalb sẽn pa zems zãngã tõe n wilg tɩ d sɩd sakda a Zeova wakat fãa?
14 La rẽ yĩnga d segd n tika mak-kãensã zut n tags masã tɩ sẽn na yɩl n ket n sakd a Zeova, rẽnda d zems zãnga, bɩ n tags tɩ ned sã n tudgi, tɩɩm ye kae bɩ? Pa woto abada. Biiblã wilgda tõnd t’a Moiiz konga wakat ninga. Baa ne a Zeova sũur sẽn pa yɩ noogã a pa bas a Moiiz rẽ yĩng ye. A Zezi Kirist tʋm-tʋmdbã me ra tara pãn-komsem. A Zeova sẽn mi tɩ tõnd roga ne pãn-komsmã yĩnga, baa tõnd sã n beege a pa na n bas-do, d sã n pa kɩɩsd a raabã ne yamleoog ye. La pãn-komsem sã n kɩt tɩ d maan wẽnga, d segd n modgame n tek yam n kos sugr ne d sũur fãa, la d modg tɩ ra lebg minung ye. Woto, d wilgdame tɩ d sɩd nonga bũmb ning a Zeova sẽn yet tɩ yaa sõma wã, la tɩ d kisa a sẽn yet tɩ yaa wẽngã. Tẽeb ning d sẽn tar ne a Zezi maoongã sẽn yẽesd yel-wẽnã maasem yĩnga, d tõe n yɩɩ yɩlem Wẽnnaam nifẽ.—Amos 5:15; Tʋʋma 3:19; Hebre dãmba 9:14.
15. a) Ninsaalba fãa sʋka, ãnd n da kell n tall burkĩnd Wẽnnaam taoor tɩ zems zãnga, la bõe la rẽ wilg-yã? b) Wãn to la a Zezi mak-sõngã nafd tõndo?
15 La woto rat n yeelame tɩ ninsaalb pa tõe n sak a Zeova naam sẽn ka to wã tɩ zems zãng bɩ? Sok-kãngã leokr kell n yɩɩ wa “sãmbg kãseng” sẽn na maan yʋʋm 4 000. (1 Tɩmote 3:16) Baa ne b sẽn da naan a Ãdem t’a zems zãngã, a pa kõ makr sẽn zems zãng Wẽnnaam sakrã wɛɛngẽ ye. Rẽnd ãnd n da tõe? Ned da ka be yẽ kambã la a yagensã sẽn da yaa yel-wẽn-maandbã sʋk n tõe n maan dẽ ye. Ninsaal ning bal sẽn da maan woto ra ya a Zezi Kirist. (Hebre dãmba 4:15) A Zezi sẽn maan bũmb ningã wilgdame tɩ yɛlã sẽn da yaa nana n yɩɩd ne a Ãdmã yĩnga, a ra tõe n saka Wẽnnaam tɩ zems zãnga, a sã n da rata. Pa Wẽnnaam naanegã n da tar zang ye. Woto yĩnga, tõnd rat n dɩka a Zezi Kirist togs-n-taare, Wẽnnaam noyã sakr wɛɛngẽ, la d wilg tɩ d kõo d mengã zãng-zãng a Zeova sẽn yaa ãndũniyã Naab sẽn ka to wã.—Tõodo 32:4, 5.
Tõnd mengã leoka gomdã wãn to?
16. Bõe yĩng tɩ d segd n gũus wakat fãa ne manesem ning d sẽn tar ne a Zeova naam sẽn ka to wã?
16 Rũndã-rũndã, gomd ning sẽn tɩ loe ne ãndũni naam sẽn ka to wã paka tõnd fãa. Tõnd sã n togs vẽeneg tɩ d bee a Zeova poorẽ, a Sʋɩtãan na n zaba ne tõndo. Bũmb fãa pʋgẽ a zabda ne tõndo, la a na n kell n maana woto hal tɩ ta a dũni wẽngã saabo. Rẽnd d segd n maana gũusg wakat fãa. (1 Pɩɛɛr 5:8) Tõnd manesmã wilgda tõnd sẽn be a soab poorẽ, gom-kãseng ning sẽn tɩ loe ne a Zeova naam sẽn ka to wã wɛɛngẽ, n paas gomd a yiib-n-soab ning sẽn tɩ loe ne tall burkĩnd ne Wẽnnaam, d sã n be makr pʋgẽ wã. Tõnd pa segd n tags tɩ kɩɩsgã pa yelle, a sẽn wɛ dũniyã pʋgẽ wã yĩng bal ye. Kell n tall d burkĩndã rat n yeelame tɩ d mao n tũ a Zeova no-tɩrsã d vɩɩmã nens fãa pʋsẽ.
17. Ziri la wagdem sɩnga ne ãnda, tɩ kɩt tɩ d segd n lak d mens ne rẽ?
17 Wala makre, d pa segd n dɩk a Sʋɩtãan sẽn yaa “ziri ba” wã togs-n-taar ye. (Zã 8:44) D segd n yɩɩ sɩd dãmb d manesmã fãa pʋgẽ. A Sʋɩtãan dũniyã pʋgẽ, kom-bɩɩsã pa nong n togsd b roagdbã sɩd ye. La kom-bɩɩs nins sẽn yaa kiris-nebã pa maand woto ye. Rẽ, b wilgdame t’a Sʋɩtãan ka bʋʋm, a sẽn yet tɩ Wẽnnaam sõgen dãmbã na n basa b wẽn-sakrã makr taoorã ye. (Zoob 1:9-11; Yelbũna 6:16-19) Ligdã baoob pʋgẽ me, manesem buud n be n tõe n wa wilg tɩ ned bee “ziri ba” wã poorẽ, la t’a pa be Wẽnnaam sẽn yaa sɩd soabã poorẽ ye. Tõnd lakda d mens ne manesem wẽns kãensã. (Miise 6:11, 12) Sẽn paas me, ned ka bʋʋm n na n zu, ba a sã n be raab pʋgẽ bɩ ned ning a sẽn zuudã sã n yaa arzɛk soab ye. (Yelbũna 6:30, 31; 1 Pɩɛɛr 4:15) Baa nebã sã n nong n zuud tõnd sẽn beẽ wã, bɩ bũmb ning b sẽn zu wã yõod sã n pa wʋsg me, wagdem yaa wagdem, a yaa bũmb sẽn kɩɩsd Wẽnnaam noyã.—Luk 16:10; Rom dãmba 12:2; Efɛɛz rãmba 4:28.
18. a) Mak-bʋg n na n wa ãdem-biisã fãa zut Kirist yʋʋm tusr naamã saabẽ? b) Minung bʋg la d segd n tall masã tɛka?
18 Kirist yʋʋm tusr naamã wakate, rẽ tɩ b loba a Sʋɩtãan ne a zĩn dãmbã bog-zulungẽ wã, tɩ b ye pa tõe n belg ninsaalbã ye. Ad rẽ sɩd na n yɩɩ yolsg menga! La yʋʋm tusrã poore, b na n yiis-b lame n bas wakat bilf yĩnga. A Sʋɩtãan ne neb nins sẽn na n zĩnd a poorẽ wã na n baoome n kʋɩɩb ninsaalb sẽn zems zãng sẽn ket n sakd Wẽnnaamã. (Wilgri 20:7-10) Tõnd sã n paam zu-noog n zĩnd wakat kãnga, d manesem na n yɩɩ wãn to ne gomd ning sẽn tɩ loe ne ãndũni naam sẽn ka to wã? Ninsaalba fãa sẽn na n zems zãng wakat kãngã wã yĩnga, kɩɩsg buud fãa na n yɩɩ ne yamleoogo, la a na n waa ne sãoong wakat fãa yĩnga. Rẽnd tara yõod wʋsg tɩ masã tɛk bɩ d minim n yɩt tao-tao n sakd noy nins fãa a Zeova sẽn tũnugd ne a Gomdã bɩ ne a siglgã n kõtẽ wã. Yaa woto la tõnd wilgd tɩ d sɩd sakda yẽ sẽn yaa ãndũniyã Naab sẽn ka to wã.
Lebg-n-gese
• Gom-bʋg sẽn yaa kãseng n pak tõnd fãa? La wãn to la gomdã wa n pak tõndo?
• Sã n yaa ne tẽn-kʋdem wẽndẽ dap la pagb sẽn da sakd a Zeova to-to wakat fãa wã, bõe la b maan tɩ zems pẽgre?
• Bõe yĩng tɩ tar yõod wʋsg tɩ d tall manesem sẽn waoogd a Zeova daar ne a to fãa?