Sak a nii
‘Zab-y ne malɛg-wẽnsã’
1. Bõe yĩng tɩ malɛg-wẽnsã tʋʋm pak tõnd wʋsgo?
B SÃ N yeel tɩ malɛg-wẽns n be, neb kẽer laadame. Yaool n pa laad yell ye. D tẽed tɩ d pa tẽed me, malɛg-wẽns n be, la b baoodame n na n nams ninsaalba fãa, t’a Zeova balemdbã pa põsd nams-kãng ye. Togs sɩda, ya a Zeova balemdbã meng la malɛg-wẽnsã zabd ne n yɩɩda. Tʋm-tʋmd a Poll keoogda tõnd yel-kãng wɛɛngẽ woto: “Tɩ bõe, tõnd zabr ka be ne ninsaal ye, la a yaa ne [malɛg-wẽns] buud fãa sẽn be yĩngri la bãmb dĩm dãmba la pãens rãmba la lik soaadba sẽn so pãng masã.” (Efɛɛz rãmba 6:12) Yaa rũndã-rũndã la malɛg-wẽnsã namsd nebã n yɩɩda, bala b riga a Sʋɩtãan t’a yi yĩngr n wa tẽng zugu, la a sũurã puuga wʋsgo, a sẽn mi t’a wakatã yaa bilfã yĩnga.—Wilgri 12:12.
2. Wãn to la d tõe n zab n tõog malɛg-wẽnsã pãng sẽn yɩɩd ninsaal pãngã?
2 Tõnd tõe n zaba ne malɛg-wẽnsã pãng sẽn yɩɩd ninsaal pãngã n tõog bɩ? N-ye, la yaa d sẽn na n teeg a Zeova zãng-zãng bala. D segd n kelga a Zeova la d sak n tũ a Gomdã saglse. D sã n maand woto, d na n põsa tood nins a Sʋɩtãan sẽn so b rãmbã sẽn tarã, wala makre, b sẽn namsd b yĩnsã pʋsẽ, la b tar sũ-sãamsã yĩnga.—Zak 4:7.
Dũniyã soaadb sẽn be yĩngrã
3. Ãnd dãmb la a Sʋɩtãan nams ne nams-toaaga, la wãn to la a maand rẽ?
3 A Zeova sẽn be saasẽ n get tẽngã, a bilgda tõnd dũniyã yɛl tɩ zemsd kɛpɩ. Vẽnegr pʋgẽ, a kɩtame tɩ tʋm-tʋmd a Zã yã a Sʋɩtãan sẽn yaa wa ‘dargõ zẽega,’ sẽn dat n sãam Wẽnnaam Mesi Rĩungã, b sẽn wa n dog-a saasẽ yʋʋmd 1914. La a Sʋɩtãan sẽn pa tõogã, a waa ne nams-toaag Rĩung kãng tẽng zug poorẽ dãmbã sẽn da gomd a yʋʋr yĩngã zutu. (Wilgri 12:3, 4, 13, 17) Wãn to la a Sʋɩtãan zabd zab-kãngã? A tũnugda ne ninsaalb nins sẽn ya a poorẽ dãmbã.
4. Ãnd soab n kõt ninsaalbã goosneema rãmb b pãngã, la wãn to la d mi rẽ?
4 Rẽ poore, b wilga a Zã we-rũng sẽn tar zut a yopoe la yɩɩl piig sẽn da tar tõog ‘buud fãa, ninsaalba fãa, goama fãa neba la soolem fãa’ neb zutu. Rũn-kãng makda dũniyã gill nanambse. Bũmb a to la b wilg a Zã: ‘Dragõ wã [a Sʋɩtãan] kõo rũngã a pãnga la a naama la a noor kãsengã.’ (Wilgri 13:1, 2, 7) Sɩda, ya a Sʋɩtãan n kõt ninsaalbã goosneema rãmb pãng la naam. Woto yĩnga, wala tʋm-tʋmd a Poll sẽn bilg-a to-to wã, ‘dũniyã soaadb’ hakɩk yaa ‘malɛg-wẽns sẽn be yĩngrã,’ sẽn so ninsaalbã goosneema rãmbã. Neb nins fãa sẽn dat n balem a Zeova wã segd n wʋma rẽ fãa võor sõma.—Luk 4:5, 6.
5. Bõe yĩng tɩ b tigimd nanambsã masã?
5 Baa ne nanambs wʋsg sẽn yet tɩ b yaa wẽn-tũudbã, buud ba a yembr kae n sakd a Zeova naamã bɩ a Zezi Kirist sẽn yaa Rĩm ning a sẽn yãkã naam ye. B fãa maooda ne b pãng tɛk n dat n kell n tall b naamã. Wala Wilgr sebrã sẽn wilgdã, rũndã-rũndã, ‘zĩn dãmb goam’ n tigimd dũniyã nanambs tɩ b wa ‘Wẽnnaam pãng sẽn tõe fãa da-kãsengã zabr’ Armagedõ.—Wilgri 16:13, 14, 16; 19:17-19.
6. Bõe yĩng tɩ d segd n gũus tɩ b ra wa belg-d tɩ d teel a Sʋɩtãan dũniyã?
6 Daar fãa, mo-yõsã sẽn tɩ loe ne na-baoorã, zĩnd-n-taarã, laogã la tũudmã namsda ãdem-biisã n welgd-ba. Nebã nong n wilgda ne b no-goam bɩ b tʋʋm tɩ b teenda b tẽngã, b buudã, bɩ b buudã gomd walla neb nins tarem sẽn yaa yembr ne-bã. Naoor wʋsgo, yellã sẽn pa pak b rãmbã meng wat n wilgame tɩ b bee babg a yembr poorẽ. La bãmb sẽn be ned ning poorẽ walla b sẽn tʋmd bũmb ning yĩngã sẽn ya a soab fãa, sɩd-sɩda, yaa ãnd poorẽ la b be? Biiblã yeta vẽeneg tɩ “dũniyã fãa bee wẽng soaba nugẽ.” (1 Zã 5:19) Wãn to masã la d na n maan n da tudg wa neb a taabã? Yaa d sẽn na n zĩnd Wẽnnaam Rĩungã poorẽ bala, la d ra kẽes d toog baa bilf dũniyã mo-yõs pʋsẽ ye.—Zã 17:15, 16.
Wẽng soabã sɩlem
7. Wãn to la a Sʋɩtãan sɩlmã yaa vẽenega, a sẽn tʋmd to-to ne ziri tũudmã pʋgẽ?
7 Ãdem-biis sẽn sɩng n beẽ tɛka, a Sʋɩtãan tũnuga ne yaalg la namsg meng-meng sẽn na yɩl n kɩt tɩ nebã bas wẽn-baleng hakɩkã. A leb n tʋmda ne sɩlem la belgr n yɩɩd pĩndã n tudgd nebã. Woto, ne sɩlem, a kɩtame tɩ neb wʋsg tũ ziri tũudmã n pa tẽeb lik pʋgẽ, n kɩt tɩ b tagsdẽ tɩ b maanda Wẽnnaam daabo. Nin-kãens sẽn pa tar Wẽnnaam bãngr hakɩk la b pa nong sɩdã yĩnga, tõe tɩ b nonga tũudum yel-soalem la yel-yɛɛsds bɩ bõn-bãna. (2 Tesalonik rãmba 2:9, 10) La b reng n togsa tõnd tɩ baa neb nins sẽn naag tũudum sẽn yaa sɩdã pʋgẽ wã sʋka, “kẽer na n basa tẽebo, la b na n saka belgr sɩɩse la zĩn dãmb koeese.” (1 Tɩmote 4:1) Wãn to la rẽ tõe n yɩ?
8. Wãn to la a Sʋɩtãan tõe n kẽes tõnd ziri tũudmã pʋgẽ, baa tõnd sã n balemd a Zeova?
8 A Sʋɩtãan sɩlemda ne tõnd pãn-komsmã n na n kʋɩɩb-do. Tõnd ket n zoeta ninsaalb bɩ? Sã n yaa woto, tõe tɩ d na n basame tɩ roagdb bɩ yags sẽn pẽdgd tõnd kɩt tɩ d sak n maan ziri tũudmã yɛla. Tõnd yaa wuk-m-meng soab bɩ? Sã n yaa woto, pa gũusi d na n sãama d sũuri, b sã n sagl tõndo, bɩ neb a taabã sã n pa sak tõnd tagsg bũmb zugu. (Yelbũna 15:10; 29:25; 1 Tɩmote 6:3, 4) D sã n pa rems d tagsgã n tũ Kirist mak-sõngã, tõe tɩ d na n kelga neb nins sẽn ‘togsd koɛɛg sẽn noom tõndã bala,’ neb nins sẽn yet tɩ f sã n karemd Biiblã la f pa maand wẽng bala sekame wã. (2 Tɩmote 4:3) A Sʋɩtãan pa bʋʋde, tõnd tɩ lagma tũudum sull a to bɩ d ket n bee d pĩnd tũudmẽ wã ye, a sã n paam bal tɩ tõnd pa balemd a Zeova wa a sẽn wilg ne a Gomdã la a siglgã maasmã, sekame.
9. Wãn to la a Sʋɩtãan tũnugd ne pag ne rao lageng tʋlsmã ne sɩlem n kʋɩɩbd nebã?
9 A Sʋɩtãan leb n belgda nebã ne sɩlem tɩ b pids b yĩngã ratem ne manesem sẽn pa zemse. Yaa woto la a maand pag ne rao lagengã tʋlsem wɛɛngẽ. Neb wʋsg zãgsda Biiblã noy sẽn tɩ loe ne yoobã, n get neb sẽn pa kẽ kãadem n yaool n gãe taabã wa bũmb sẽn zemse, bɩ wa bũmb sẽn wilgd tɩ b bɩɩme. Yaa wãn to yẽ ne neb nins sẽn kẽ kãadma? Bãmb sʋkã neb wʋsg yoodame. Kẽer sã n pa yood me, b kaooda kãadem bɩ b welgd taab sẽn na yɩl n tɩ rɩk ned a to. A Sʋɩtãan sɩlmã ya a tus nebã tɩ b vɩɩmd yõ-noogrã yĩng masã, n da tags vɩ-kãng sẽn wat ne wẽng nins kaoosg zugẽ bãmb mens la neb a taab zutã yelle, sẽn yɩɩd fãa n da tags vɩ-kãng sẽn sãamd b zems-n-taarã ne a Zeova la a Biriblã yell ye.—1 Korẽnt dãmba 6:9, 10; Galat dãmba 6:7, 8.
10. A Sʋɩtãan tũnugda ne bõe n dat n kɩt tɩ d tall manesem sẽn pa zems yoobã la nen-kɛglmã wɛɛngẽ?
10 D roga ne reem tʋlsem me. Reemã sã n yaa sõma, a tõe n yẽega d yĩnsã la a kõ-d sũ-noogo. La tõnd manesem yaa wãn to, a Sʋɩtãan sã n maan sɩlem n tũnug ne reemã wakat n bao n kɩt tɩ tõnd tall tagsg sẽn yaa toor ne Wẽnnaam dẽndã? Wala makre, tõnd miime t’a Zeova kisa yoob la nen-kɛglem. B sã n wa yiisd bõn-wẽns kãensã televiziõ wã pʋgẽ, sĩnima walla teatrẽ, tõnd zĩime bal n ket n get fãa bɩ? Ra yĩm-y me t’a Sʋɩtãan na n kɩtame tɩ bõn-kãens lebg wẽns n paase, a bog-zulungẽ wã lobr wakat sã n kolgdẽ ye, bala “nin-wẽnsa ne zãmb dãmb na n maana wẽng n paase, b na n belga neb a taaba la bãmb mens na n paama belgre.” (2 Tɩmote 3:13; Wilgri 20:1-3) Bɩ d gũus wakat fãa ne a Sʋɩtãan kʋɩɩbgã.—Sɩngre 6:13; Yɩɩl Sõamyã 11:5; Rom dãmba 1:24-32.
11. Wãn to la ned sẽn mi tɩ tɩɩm maaneg pa sõma tõe n lʋɩ bẽdg pʋgẽ, a sã n pa gũusi?
11 Tõnd leb n miime tɩ ned sẽn maand tɩɩm (bagre, sõodo, la mak n bool kɩɩmsã) yaa bũmb a Zeova sẽn kisi. (Tõodo 18:10-12) Woto yĩnga, pa na n wa d yamẽ tɩ d tɩ bʋg bagr ye, la d pa na n deeg bagb d yir me sẽn na yɩl tɩ b wa tʋm b zĩn dãmb tʋʋmã ye. La nin-kãngã buud sã n yi televiziõ wã bɩ ẽntɛrnetã pʋgẽ masã, tõnd na n ges-a lame bɩ? Tõnd pa na n sak tɩɩm soab sõngr sẽn tar loees ne zĩn dãmb ye, la rẽ yĩnga d na n sakame masã n pid d bi-pɛɛlg tɩ-gãn n tẽed tɩ na n kogl-a-la ne wẽng bɩ? D sẽn mi tɩ Biiblã gɩdgame tɩ d ra maan neb a taab tɩɩmã, d na n sak n deega tɩɩm n kogl d mens bɩ?—Galat dãmba 5:19-21.
12. a) Wãn to la yɩɩlã tõe n nek tags-wẽns tõnd nengẽ? b) Wãn to la ned fu-yerdɩ wã, a zugã manegr la a no-goamã tõe n wilg t’a nonga neb a Zeova sẽn kis b vɩɩm manesmã? d) Bõe la d segd n maan t’a Sʋɩtãan sɩlmã ra rɩ-do?
12 Biiblã yetame tɩ d pa segd meng n gom yoob la tʋʋm dẽgd buud fãa yell (ne yam wẽng) tõnd sʋk ye. (Efɛɛz rãmba 5:3-5) La yaa wãn to, b sã n yɩɩnd bõn-kãensã hal tɩ b kelgr noom wʋsgo? Tõnd na n sɩngame n togsd goam sẽn wilgd pag ne rao lageng sẽn pa tũ ne kãadem, dorg rɩkr bɩ tʋʋm wẽns a taab wa bõn-sõma bɩ? Bɩ tõnd sẽn mi tɩ d pa segd n dɩk togs-n-taar ne neb nins sẽn maand bõn-kãensã wã, rẽ yĩnga, tõnd ningda d futã wa bãmba, n manegd d zugã bɩ d gomd wa bãmb bɩ? Ad sɩd yaa ne sɩlem kãseng meng la a Sʋɩtãan makd n na n kɩt tɩ ninsaalbã tall tags-wẽns wa yẽ! (2 Korẽnt dãmba 4:3, 4) Tõnd sã n pa rat t’a sɩlmã tõog-do, bɩ d ra naag dũniyã n kẽ weoog ye. D ra yĩm dũniyã ‘lik soaadbã’ sẽn yaa b rãmb ye, la d mao ne b kʋɩɩbgã ne d pãng tɛka.—1 Pɩɛɛr 5:8.
B segl-d lame, sẽn na yɩl tɩ d tõoge
13. Baa ne tõnd fãa sẽn tar pãn-komsmã, wãn to la d tõe n tõog a Sʋɩtãan dũniyã?
13 Nand t’a Zezi ki, a yeela a tʋm-tʋmdbã tɩ: “Bɩ y maan sũ-noog tɩ mam tõoga dũniyã.” (Zã 16:33) Bãmb me ra tõe n tõogame. Yʋʋm 60 poore, tʋm-tʋmd a Zã gʋlsame: “Ned ninga sẽn tõoga dũniyã yaa ãnda, a sã n ka ned ninga sẽn tẽed t’a Zezi yaa Wẽnnaam Biigã?” (1 Zã 5:5) Tõnd wilgdame tɩ d tara tẽeb kãngã buudu, d sã n sak a Zezi noyã la d tall bas-yard ne Wẽnnaam Gomdã wa a Zezi. Bõe me la d segd n maane? D segd n lagma ne tiging ning a Zezi sẽn ya a Zusoabã. D sã n maan yel-wẽnd bɩ d tek yam n kos Wẽnnaam sugr ne d sũur fãa a Zezi maoongã maasem yĩnga. Woto, baa ne tõnd pãn-komsmã la d tudgrã fãa, tõnd me na n tõogame.—Yɩɩl Sõamyã 130:3, 4.
14. Karm-y Efɛɛz rãmba 6:13-17, la y tũnug ne sogsg la verse nins sẽn be sullã pʋgẽ wã n wilg tẽebã zab-teoog fãa yõodo.
14 Sẽn na yɩl n tõoge, rɩllame tɩ d “bob Wẽnnaam zab-teed fãa,” n da bas zab-teoog ba a yembr ye. Lak-y y Biiblã Efɛɛz rãmba 6:13-17 n ges b sẽn bilg zab-te-kãens to-to. Rẽ poor bɩ y leok sogsg nins sẽn pʋgdã, n ges zab-teoog fãa sẽn tõe n kogl-y to-to.
‘D sẽb sɩdã tɩ yɩ d sẽbdga’
Baa ne d sẽn mi sɩdã, wãn to la Biiblã sɩd zãmsg la a zug bʋgsgo, n paas tigissã kẽngr wakat fãa kogend tõndo? (1 Korẽnt dãmba 10:12, 13; 2 Korẽnt dãmba 13:5; Filip rãmba 4:8, 9)
‘Tɩrlmã gãntika’
Tɩrlmã noy yita ãnd nengẽ? (Wilgri 15:3)
Wilg-y a Zeova no-tɩrsã kɩɩsg sẽn tõe n wa sãam ned tẽeb to-to. (Tõodo 7:3, 4; 1 Sãmwɛll 15:22, 23)
‘D wid laafɩ Koe-noog togsg ratem tɩ yɩ d neooda’
D sã n kẽnd nebã nengẽ n na n tɩ gom ne-b Wẽnnaam sẽn maand bũmb ning n na n wa ne laafɩ wã yelle, wãn to la woto kogend tõndo? (Yɩɩl Sõamyã 73:2, 3; Rom dãmba 10:15; 1 Tɩmote 5:13)
‘D tall tẽeb sẽn yaa wa gãong sẽn yalem’
Tõnd sã n tar tẽeb sẽn kɩ yẽg sõma, d manesem na n yɩɩ wãn to ne neb kẽer sẽn maood n dat n kẽes tõnd sãmbs bɩ rabeem pʋgẽ wã? (2 Rĩm dãmba 6:15-17; 2 Tɩmote 1:12)
‘D fõgen fãagr tɩ yɩ d kut pugla’
Wãn to la fãagrã saagr sõngd tõnd tɩ d gil bẽdg ning sẽn yaa maan yɩɩr tɩ loog noor laogã yɛl wɛɛngẽ wã? (1 Tɩmote 6:7-10, 19)
‘Vʋʋsem sõngã sʋʋga’
Bõe zug la tõnd segd n tik wakat fãa d sã n wa zabd ne yɛl nins sẽn dat n sãam tõnd tẽebã bɩ neb a taabã tẽebã? (Yɩɩl Sõamyã 119:98; Yelbũna 3:5, 6; Matɩe 4:3, 4)
Bõe me n yaa tɩlae sẽn na yɩl n zab tẽebã zabr n tõoge? Naoor a wãn la d tõe n tũnug ne bõn-kãngã, la ãnd yĩnga? (Efɛɛz rãmba 6:18, 19)
15. Wãn to la d tõe n zab tẽebã zabr sõma?
15 D sẽn yaa Kirist sodaasã, d bee tãb-biis sẽn yaa wʋsg sẽn zabd tẽebã zabr pʋgẽ. D sã n ket n gũusdẽ la d tʋmd sõma ne zab-teed nins fãa Wẽnnaam sẽn kõ-dã, d ka na n pa zab-kãng pʋgẽ ye. D pʋd n na n tõogame n sõng Wẽnnaam sõgen dãmb a taabã. D na n yɩɩ tao-tao n zab tẽebã zabr n moon Wẽnnaam Mesi Rĩungã sẽn yaa saasẽ goosneema a Sʋɩtãan sẽn zabd ne wʋsgã koe-noogo.
Lebg-n-gese
• Bõe yĩng t’a Zeova balemdbã pa kẽesd b toog baa bilf dũniyã mo-yõs pʋsẽ?
• Sɩlem kẽer bʋs la a Sʋɩtãan tũnugd ne n dat n sãam kiris-nebã tẽebo?
• Wãn to la zab-teed nins Wẽnnaam sẽn kõ-dã kogend tõnd d tẽebã zabr pʋgẽ?
[Foto, seb-neng 76]
Tẽnsã tigimda taab n na n zab Armagedõ