Sak piiga
Rĩung b ‘sẽn ka tõe n tol n sãam’
1. Ãdem-biisã sẽn be tɛka, bõe la dũniyã yɛl wilg vẽenega?
DAAR fãa, dũniyã yɛl wilgda vẽeneg tɩ ninsaalbã sẽn zãgs a Zeova naam sẽn ka to wã n bao soog-m-mengã, b pa paam sũ-noog ye. Ninsaal naam buud ba a ye pa naf nebã fãa ye. Baa ninsaalbã sẽn paam nasaar bãngr wʋsg n yɩɩd pĩndã, b pa tõog tɩ baa nin-yɛng ye ra bẽ la a ra ki ye. Ninsaalbã naam pa kɩt tɩ zabã, nen-kɛglmã, bi-beerã, zãmbã bɩ naongã sa ye. Goosneema rãmbã sẽn weoogd nebã ket n soo nebã ne pãng tẽns wʋsg pʋsẽ. (Koɛɛg soaba 8:9) Masĩn dãmb buud toor-toorã, rat-tɩ-loogã la zɩɩlmã fãa sẽn fãoog taab rẽgemda tẽngã, koomã la pemsmã. Taoor dãmbã sẽn pa zãad laogã sõma wã kɩtame tɩ lebg toog ne neb wʋsg tɩ b paam b sẽn dat sẽn na yɩl n vɩɩmdã. Ninsaalbã sẽn dɩ naam n maan yʋʋm tusa wã wilgame tɩ gom-kãngã sẽn yaa vẽenegã yaa sɩda: “Ninsaal ka tar noor ne a vɩɩm sẽn na n yɩ bũmb ninga ye. Ninsaal ka so a meng vɩɩm yell ye.”—Zeremi 10:23.
2. Bõe bal n yaa ãdem-biisã zu-loees tɩɩm?
2 Yellã tɩɩm yaa bõe? Yaa Wẽnnaam Rĩungã, a Zezi sẽn zãms a karen-biisã tɩ b pʋʋs a yĩng woto wã: “Tɩ yãmb [rĩungã] wa, tɩ yãmb daab maan dũniyã zug wa sẽn maand [saasẽ wã].” (Matɩe 6:9, 10) B bilga Wẽnnaam saasẽ Rĩungã 2 Pɩɛɛr 3:13 pʋgẽ wa ‘yĩngr paalgã,’ sẽn dɩt naam ‘tẽn-paalgã’ zugu, sẽn dat n yeel tɩ nin-tɩrsã. Wẽnnaam saasẽ Rĩungã tara yõod wʋsg hali n kɩt t’a Zezi tik a moonegã rẽ zugu. (Matɩe 4:17) A wilgame tɩ Rĩung kãng segd n waa pipi zĩigẽ tõnd vɩɩmã pʋgẽ n yeele: “Bɩ y reng n bao Wẽnnaam [rĩungã] ne bãmb tɩrlem, la bõn-kãens fãa na paas yãmba.”—Matɩe 6:33.
3. Bõe yĩng tɩ Wẽnnaam Rĩungã bãngr paoong yaa yãgb bũmb n yɩɩd sẽn keta fãa?
3 Rũndã-rũndã, Wẽnnaam Rĩungã bãngr paoong yaa yãgb bũmb n yɩɩd sẽn keta fãa, bala ka la bilfu, Rĩung kãng na n toeema tẽng zug naamã wakat fãa yĩngã. Daniɛll 2:44 reng n togsame: “La rĩm dãmb kãens [rũndã-rũndã goosneem dãmbã] sẽn dɩt naam wakate, Wẽnnaam sẽn be yĩngra na n kɩtame tɩ [saasẽ rĩung] sẽn ka tõe n sãam la buud a taab sẽn ka tõe n deeg zĩndi [ninsaalb pa na n le rɩ naam tẽng zug ye]. A na n wãa soolem kãens [masã rãmbã] fãa tɩ b menem n bas-a t’a yaas wakat fãa.” Woto, Rĩungã na n sãama dũni wẽng kãngã gilli, n baas yaoolem dayã. Wakat kãnga, ned pa na n wags ne saasẽ Rĩungã tẽngã zug naam dɩɩb wɛɛngẽ ye. D sɩd segd n talla mi-beoog wʋsg ne Wẽnnaam, yolsg ning rẽ sẽn na n wa ne wã sẽn kolg wʋsgã yĩnga!
4. Bõe n zĩnd yʋʋmd 1914 sẽn tɩ loe ne Rĩungã, la bõe yĩng tɩ woto tar yõod ne tõndo?
4 Yʋʋmd 1914, b kɩtame t’a Kirist Zezi lebg Rĩma, n paam sor n na n ‘dɩ naam a bɛɛba sʋka.’ (Yɩɩl Sõamyã 110:1, 2) Yʋʋm-kãng me, zãmaan wẽng kãngã ‘yaoolem wakat’ sɩngame. (2 Tɩmote 3:1-5, 13) Wakat kãng sasa, yɛl nins Wẽnnaam sẽn da reng n vẽneg n wilg a Daniɛllã sɩd zĩnda saasẽ. ‘Wakat fãa Kãsmã’ sẽn yaa Wẽnnaam a Zeova wã kõo ninsaal Biribl a Zezi Kirist “soolem ne waoogre la naam, tɩ tẽnsa fãa neb sẽn yaa soolem toɛy-toɛya n gomd goam toor-toora sak-a.” A Daniɛll wilga a sẽn yã vẽnegrã pʋgẽ wã n gʋls woto: “A na n dɩɩ naam wakat fãa n ka bas ye, la a [rĩungã] ka na n tol n sɛ ye.” (Daniɛll 7:13, 14) Yaa ne saasẽ Rĩung kãng sẽn be Kirist Zezi nugẽ wã maasem la Wẽnnaam na n kɩt tɩ sẽn nong-b tɩrlmã paam bõn-sõma ka tɛk a sẽn da rat n maane, a sẽn wa n naan a Ãdem ne a Hawa sẽn yaa tõnd pipi yaab rãmbã Arzãn pʋgẽ wã.
5. Bõe sẽn tɩ loe ne Rĩungã la d sɩd rat n bãnge, la bõe yĩnga?
5 Yãmb ratame n yɩ Rĩungã soolem ned sẽn yaa sakd bɩ? Sã n yaa woto, y na n sɩd datame n bãng saasẽ goosneema wã nanambs la a sẽn na n tʋm tʋʋm ninsi. Y na n dat n bãnga a sẽn maand bũmb ning masã la a sẽn na n maan bũmb ning beoog-daare, la a sẽn baood tɩ y maan bũmb ninga. Y sã n maag y yĩng n vaees n bãng Rĩungã sẽn ya a soaba, y na n nand-a lame n paase. Y sã n sak a naamã, y na n tõogame n togs neb a taabã bõn-kãsems nins Wẽnnaam Rĩungã sẽn na n maan n kõ nin-sakdbã.—Yɩɩl Sõamyã 48:13, 14.
Wẽnnaam Rĩungã nanambse
6. a) Sã n yaa ne Gʋlsg Sõamyã, Mesi Rĩungã yaa ãnd naam pukri? b) Tõnd sẽn zãmsd bũmb ning Rĩung kãng zugã segd n kɩtame tɩ d rat n maan bõe?
6 Pipi, d bãng tɩ Mesi Rĩung kãng ya a Zeova mengã naam sẽn ka to wã pukri. Ya a Zeova n kõ a Biriblã “soolem ne waoogre la naam.” Wẽnnaam Biriblã sẽn lebg Rĩm n sɩng naamã rɩɩbã poore, koees n zĩnd saasẽ n togs woto tɩ sɩd zemse: “Dũniyã soolem fãa lebga tõnd Zusoaba [Wẽnnaam a Zeova] la bãmb Kirist dẽnda, la bãmb [a Zeova] na n dɩɩ naam wakat sẽn ka sɛta.” (Wilgri 11:15) Woto, bũmb ning fãa tõnd sẽn ne Rĩung kãng la a sẽn maand bũmb ninsã wɛɛngẽ tõe n pẽnega tõnd ne a Zeova mengã n paase. D sẽn zãmsd bũmb ningã segd n kɩtame tɩ d tʋll n sak a naam sẽn ka to wã wakat fãa yĩnga.
7. Bõe yĩng t’a Zezi Kirist sẽn ya a Zeova Na-pʋgdgã noom tõnd wʋsgo?
7 Bãng-y me t’a Zeova yãka a Zezi Kirist t’a ya a Na-pʋgdga. A Zezi sẽn yɩ tʋʋm-mit ning Wẽnnaam sẽn tũnug ne n naan tẽngã la ninsaalbã yĩnga, a mii tõnd ratmã n yɩɩd tõnd fãa. Sẽn paase, hal ãdem-biisã sɩngrẽ, a wilgame t’a ‘ra maanda sũ-noog ne ninsaalbã.’ (Yelbũna 8:30, 31; Kolos rãmba 1:15-17) A ra nonga ninsaalbã wʋsg hal n sak n wa tẽng zug n kõ a vɩɩmã tɩ yɩ rond tõnd yĩnga. (Zã 3:16) Woto, a kɩtame tɩ d tõe n paam fãagr ne yel-wẽnã la ne kũumã, la a pak vɩɩm sẽn pa satã sor n kõ-do.—Matɩe 20:28.
8. a) Bõe yĩng tɩ Wẽnnaam goosneema wã na n kaoos tɩ yaool n pa woto ne ninsaalbã naam? b) Bõe loees n be ‘tʋm-tʋmd sẽn tũud sɩd la sẽn tar yamã’ la saasẽ goosneema wã sʋka?
8 Wẽnnaam Rĩungã vigla kãn-kãe n be wakat fãa. Rĩungã sẽn na n ket n be wakat fãa wã ya a Zeova mengã sẽn pa kiidã yĩnga. (1 Tɩmote 1:17) A Zezi Kirist Wẽnnaam sẽn bobl naamã pa wa rĩm dãmb a taabã sẽn kiidã ye. (Rom dãmba 6:9; 1 Tɩmote 6:15, 16) Neb 144 000 sẽn yaa Wẽnnaam sõgen dãmb sẽn yaa sakdb tɩ b ‘goam yaa toor-toore, la b buud yaa toor-toore, la b soolem yaa toor-toorã,’ n na n lagem ne Kirist n dɩ naam saasẽ. Wẽnnaam kɩtame tɩ bãmb me pa tõe n ki ye. (Wilgri 5:9, 10; 14:1-4; 1 Korẽnt dãmba 15:42-44, 53) Bãmb wʋsg zoe n bee saasẽ, la yaa sẽn ket-b tẽng zugã la ‘tʋm-tʋmd sẽn tũud sɩd la sẽn tar yamã’ rũndã-rũndã, sẽn tʋmd Rĩungã yĩng wakat fãa tẽng zug ka wã.—Matɩe 24:45-47.
9, 10. a) Nin-bʋs buud sẽn wat ne welsg la kʋɩɩbg la Rĩungã na n sãame? b) Tõnd sã n pa rat n yɩ Wẽnnaam Rĩungã bɛɛba, d segd n laka d mens ne manesem bʋse?
9 Ka la bilfu, wakat ning a Zeova sẽn yãkã sã n ta, a na n tʋma a saasẽ tãb-biisã tɩ b wa yɩlg tẽngã. B na n sãama ninsaalb nins sẽn zãgs tɩ b kõn sak n deeg a naam sẽn ka to wã, la sẽn paoogd segls nins a sẽn maan ne nonglem a Zezi Kirist maasem yĩngã wakat fãa yĩnga. (2 Tesalonik rãmba 1:6-9) Rẽ na n yɩɩ a Zeova daarã, sẽn yaa wakat ning b sẽn gũ n kaoos t’a na n wilg baraar tɩ zemsame t’a yɩ ãndũniyã Naab sẽn ka to wã. “Gese, [a Zeova] daar watame, yaa daar sẽn tar toog ne sũ-puugri la sũ-yikri sẽn yaa kãsenga n na n kɩt tɩ tẽnga . . . yel-wẽn-maandba menem.” (Ezai 13:9) “Baraar na n yɩɩ sũ-puugr daare, na n yɩɩ toog ne yel-pakr daare, la sãoong ne sabaab raare, la libsg ne lik bida raare, la sawat ne wulug raare.”—Sofoni 1:15.
10 B na n sãama ziri tũudmã fãa n paas ninsaalbã goosneema rãmbã ne b tãb-biisã fãa, dũniyã na-wẽng a Sʋɩtãan sẽn da tudgdã. B na n sãama neb nins fãa sẽn maand wa dũni kãngã nebã n yaa rat-m-yembr dãmba, pʋ-lik rãmb la yoaadbã. B na n yõka a Sʋɩtãan ne a zĩn dãmbã n balg yʋʋm tusr yĩng tɩ b pa tõe n pẽneg tẽngã neb ye. Yaa Wẽnnaam Rĩungã bal n na n ges tẽngã yɛl rẽ wẽnde. Ad woto sɩd na n yɩɩ yolsg n kõ neb nins fãa sẽn nong tɩrlmã.—Wilgri 18:21, 24; 19:11-16, 19-21; 20:1, 2.
Rĩungã sẽn na n pids Wẽnnaam daabã to-to
11. a) Wãn to la Mesi Rĩungã na n pids a Zeova raabã ne tẽngã? b) Rĩungã naam na n waa ne bõe n kõ neb nins sẽn na n vɩɩmd rẽ wẽnd tẽngã zugã?
11 Wẽnnaam Rĩungã na n pidsa Wẽnnaam pipi raabã zãng fasɩ ne tẽngã. (Sɩngre 1:28; 2:8, 9, 15) Hal tɩ ta masã, ãdem-biisã pa sak n maan raab kãng ye. La “dũni ning sẽn watã” na n saka ninsaal Biribl a Zezi Kirist. Neb nins fãa sẽn na n paam fãagr a Zeova bʋ-kaoorã sẽn wat dũni kʋd-kãngã zugã sasa wã na n tʋma zems-n-taar pʋgẽ, n sak Kirist sẽn yaa Rĩmã sẽn yet bũmb ningã fãa ne sũ-noogo, tɩ tẽngã gill lebg arzãna. (Hebre dãmba 2:5-9) Ãdem-biisã fãa na n maana sũ-noog ne b nusã tʋʋma, la b na n dɩɩ tẽngã sẽn na n wom biis sõma wã nafa hal wʋsgo.—Yɩɩl Sõamyã 72:1, 7, 8, 16-19; Ezai 65:21, 22.
12. Wãn to la Rĩungã soolem neb yamã la b yĩnsã na n wa zems zãnga?
12 Wẽnnaam sẽn da wa n naan a Ãdem ne a Hawa wã tɩ b ra zemsa zãnga, la Wẽnnaam da ratame tɩ tẽngã pid ne b kambã la b yagensã, tɩ b fãa yamã la b yĩnsã zems zãnga. Raab kãng na n paama pids-kãseng Rĩungã naam sasa. Rẽ baoodame tɩ b yiis yel-wẽnã biisi, la sẽn na yɩl tɩ rẽ yɩ, Kirist pa na n yɩ Rĩm bal ye, la a na n yɩɩ Maankʋʋd Kãsem me. Ne maag-m-menga, a na n sõnga a soolmã neb nins sẽn yaa sakdbã tɩ b rɩ a maoongã sẽn yẽesd yel-wẽnã nafa.
13. Nafa bʋs yĩngã wɛɛngẽ la Rĩungã naam na n wa ne?
13 Wẽnnaam Rĩungã naam dɩɩb wakate, tẽngã neb na n paama nafa kãsems yĩngã wɛɛngẽ. “Dẽ, zoens nin na n pukame la wʋms tʋb na n yoosame. Dẽ, wobs na n yikame n tĩims wa yãgse la mugs zɛlma na n laka ne sũ-noog yɩɩla.” (Ezai 35:5, 6) Yĩng sẽn pa sakd gesg kʋʋlmã bɩ bãasã yĩngã na n lebga poll n yɩɩd biig rẽndã, la bã-kʋdã na n saame tɩ yĩns keelem wa. “A yĩnga na n le yɩɩ sõama n yɩɩd a yãadem wakate. Yẽ na n le lebga wa a sẽn da yaa bũmb ninga a bi-bɩɩlem wakatã.” (Zoob 33:25) Daar n wat tɩ ned ba a yembr pa na n le yeel t’a “ka laafɩ ye.” Bõe yĩnga? Bala neb nins sẽn yaa wẽn-zoɛtbã na n paama b mens ne yel-wẽndã la ne a sẽn wat ne tood ninsã. (Ezai 33:24; Luk 13:11-13) N-ye, Wẽnnaam “na n yẽesa nintãma fãa t’a ra le zĩnd bãmb ninẽ ye, la kũum ka na n le zĩnd ye, la sũ-sãoong bɩ yãbre walla toog kõn le zĩnd yɛs ye, tɩ bõe, dẽenem bũmb fãa loogame.”—Wilgri 21:4.
14. Bõe me n yaa tɩlae tɩ ninsaal paam n zems zãnga?
14 La paam n zems zãngã pa d sẽn na n paam yĩns laafɩ la yam sẽn yaa sõma bal ye. D segd n talla a Zeova zʋg-sõma wã me, bala b naana tõnd ‘n wõneg Wẽnnaam.’ (Sɩngre 1:26) Sẽn na yɩl n maan dẽ, rɩllame tɩ d paam zãmsg wʋsgo. Dũni paalgã pʋgẽ, ‘tɩrlem na n zĩndame.’ Woto, wala a Ezai sẽn deng n togsã, ‘dũniyã rãmb na n zãmsa tɩrlem.’ (2 Pɩɛɛr 3:13; Ezai 26:9) Yaa rẽ n wat ne laafɩ, buud fãa neb la zo-rãmb sʋka, zak pʋgẽ, la sẽn yɩɩd fãa, laafɩ ne Wẽnnaam mengã. (Yɩɩl Sõamyã 85:11-14; Ezai 32:17) Neb nins sẽn zãmsd tɩrlmã na n paama zãmsg bilf-bilf n bãng Wẽnnaam daabã ne bãmba. B nonglmã ne a Zeova sã n kɩ yẽg sõma b sũyã pʋsẽ, b na n tũu a noyã b vɩɩmã nens fãa pʋsẽ. B na n tõog n yeela wa a Zezi sẽn yeel tɩ ‘mam sẽn maand bũmb ninsa tata m Ba yam daar fãa’ wã. (Zã 8:29) Ad vɩɩmã sɩd na tall yamleoogo, ãdem-biisã fãa sã n wa maand woto!
Bũmb nins a sẽn zoe n maan tɩ yaa vẽenega
15. Tũnug-y ne sul-kãngã sogsg n wilg Rĩungã sẽn zoe n pids bũmb ninsi, la y wilg d sẽn segd n maand bũmb ning masã.
15 Bõn-kãsems nins Wẽnnaam Rĩungã ne a poorẽ dãmbã sẽn pidsã yaa vẽenese. Sogsg la verse nins sẽn pʋgdã na n tẽeg-y-la bõn-kãens kẽer sẽn zoe n pidsã, n paas yɛl Rĩungã poorẽ dãmb fãa sẽn tõe la sẽn segd n maandẽ masã.
Ne ãnd la Rĩungã reng n zab ne, la rẽ waa ne bõe? (Wilgri 12:7-10, 12)
Kirist sẽn deeg a naamã tɛka, yaa sul-bʋg yaoolem neb tigisg yell la a ges-yã? (Wilgri 14:1-3)
Sã n yaa ne Matɩe 25:31-33, tʋʋm-bʋg la a Zezi pĩnd n yeel t’a na n tʋma to-kãsengã sɩngr poore?
Tʋʋm-bʋg n deng n maand rũndã-rũndã? Ãnd dãmb n tʋmd tʋʋm-kãngã? (Yɩɩl Sõamyã 110:3; Matɩe 24:14; Wilgri 14:6, 7)
Bõe yĩng tɩ bɛɛb nins sẽn yaa politikã neb la tũudmã neb pa tõog n yals koe-moonegã? (Zakari 4:6; Tʋʋma 5:38, 39)
Bõe toeeng n zĩnd neb nins sẽn sakd Rĩungã naamã vɩɩm pʋgẽ? (Ezai 2:4; 1 Korẽnt dãmba 6:9-11)
Yʋʋm tusr Rĩungu
16. a) Kirist na n dɩɩ naam wakat a wãn pʋgẽ? b) Bõn-kãsems bʋs n na n zĩnd sasa kãng la a poore?
16 B sã n wa lob a Sʋɩtãan ne a zĩn dãmbã bog-zulungẽ wã poore, a Zezi Kirist ne a na-rɩt-n-taas 144 000 na n dɩɩ naam, n yɩ rĩm dãmb la maan-kʋʋdb yʋʋm tusri. (Wilgri 20:6) Wakat kãng sasa, Wẽnnaam na n kɩtame tɩ ãdem-biisã wa zems zãnga, tɩ yel-wẽndã la kũum ning a Ãdem sẽn yɩ sabab tɩ beẽ wã menem wakat fãa yĩnga. Yʋʋm tusr naamã saabẽ, a Zezi sẽn yaa Mesi sẽn yaa Rĩm la Maankʋʋdã sã n wa tʋm a tʋʋmdã n sa, a “na n lebsa [rĩungã]” a Ba nugẽ, “tɩ Wẽnnaam yɩ fãa ne fãa.” (1 Korẽnt dãmba 15:24-28) Sasa kãng masã, b na n basa a Sʋɩtãan wakat bilf t’a mak ãdem-biisã b sẽn fãagã n ges b sã n na n ket n sakda a Zeova naam sẽn ka to wã. Yaoolem mak-kãng sã n wa sa, a Zeova na n sãama a Sʋɩtãan ne tõtb nins fãa sẽn pʋg-a wã. (Wilgri 20:7-10) Rẽ tɩ neb nins sẽn teel a Zeova naam sẽn ka to wã, sẽn dat n yeel tɩ sor ning a sẽn tar n na n dɩ naamã, wilga b sakr sẽn pa vigsd ne-a wã zãng-zãnga. Wakat kãngã b na n paama zems-n-taar ning sẽn togã ne a Zeova, la b paam t’a sak-b wa a komdibli la a kompugli, a sẽn na n kõ vɩɩm sẽn pa sate.—Rom dãmba 8:21.
17. a) Bõe n na n paam Rĩungã, yʋʋm tusrã saabẽ? b) Wãn to la Rĩungã ‘ka na n tol n sãame’?
17 Woto yĩnga, a Zezi mengã ne neb 144 000 tʋʋmd ning sẽn tɩ loe ne tẽngã na n toeemame. Rẽ poore, yaa tʋʋm-bʋg la b na n maane? Biiblã pa wilgd ye. La tõnd sã n kell n sak a Zeova naam sẽn ka to wã wakat fãa, d na n ket n vɩɩ yʋʋm tusr Naamã saabẽ, n yã a Zeova raab ning sẽn tɩ loe ne bãmba, la a ãndũniyã sẽn yaa kãsengã sẽn na n yɩ a soaba. Baasg zãnga, Kirist yʋʋm tusr naama na n kaoosa “wakat fãa,” la a Rĩungã “ka na n tol n sɛ ye.” (Daniɛll 7:14) Wãn to? Bũmb a yembr n yaa vẽenega: neb a taab sẽn tar daab sẽn yaa toor ne a Zeova rẽndã pa na n deeg naamã ye, bala ya a Zeova n na n yɩ Naaba. Sẽn paas me, Rĩungã ‘ka na n tol n sãam’ ye, a sẽn pids bũmb ninsã sẽn na n pa wakat fãa wã yĩnga. (Daniɛll 2:44) Sẽn paase, Mesi wã sẽn yaa Rĩm la Maankʋʋdã ne a rĩm-taasã sẽn yaa maan-kʋʋdbã na n paama waoogr wakat fãa yĩnga, b sẽn tʋm a Zeova tʋʋmdã ne sɩdã yĩnga.
Lebg-n-gese
• Bõe yĩng tɩ yaa Wẽnnaam Rĩungã bal n yaa ãdem-biisã zu-loees tɩɩm? Wakat bʋg la Wẽnnaam Rĩungã Rĩm sɩng naam dɩɩbo?
• Bõe n tall yamleoog n yɩɩd ne yãmba, Rĩung kãng la a sẽn na n pids bũmb ningã wɛɛngẽ?
• Bõe la Rĩungã zoe n pids tɩ d tõe n yã vẽenega, la wãn to la tõnd me sõngd ne rẽ?
[Foto, seb-neng 92 93]
Wẽnnaam Rĩungã naam dɩɩb wakate, nebã fãa na n zãmsa tɩrlem