Sak piig la a yiibu
Yãmb lisgã võore
1. Bõe yĩng tɩ lisgã yell segd n pak tõnd fãa?
YƲƲMD 29 wã, Lisd a Zã lisa a Zezi Zʋrdẽ kʋɩlgẽ wã. A Zeova mengã ra getame, la a wilgame tɩ taa a yam. (Matɩe 3:16, 17) Woto, a Zezi kõo a karen-biisã fãa makr tɩ b tũ. Yʋʋm a tãab la pʋɩ-sʋk poore, a Zezi kõo no-kãensã a karen-biisã: “B kõo maam pãng fãa sẽn be [saasẽ] la sẽn be dũniyã. Bɩ y kẽng n maan neba buud fãa tɩ b yɩ mam karen-biisi n lis bãmb ne Ba la Biiga la [vʋʋsem sõng] yʋʋre.” (Matɩe 28:18, 19) Yãmb paama lisg tɩ zems ne a Zezi sẽn togs ka wã bɩ? Sã n pa rẽ, y segendame n na n maan woto bɩ?
2. Lisgã wɛɛngẽ, sogs-bʋs n baood leokre?
2 Sẽn yaa to-to fãa, tara yõod tɩ ned ning fãa sẽn dat n maan a Zeova raabã la a vɩɩmd a dũni paalgã sẽn yaa tɩrgã pʋgẽ wʋm lisgã võor sõma. Ad sogsg kẽer sẽn baood leokre: Rũndã-rũndã, kiris-nebã lisg võor yaa yembr ne a Zezi lisgã võor bɩ? Reeg lisg ‘Ba wã la Biriblã la vʋʋsem sõng yʋʋr’ yĩng rat n yeelame tɩ bõe? Vɩɩmd tɩ zems ne kiris-ned koom lisgã võor yaa bõe?
Lisg nins a Zã sẽn maanã
3. A Zã lisgã yɩɩ ãnd dãmb yĩng bala?
3 Sẽn zems kiis a yoob sẽn deng a Zezi lisgã, Lisd a Zã kẽngame n tɩ moon Zida weoogẽ wã n yetẽ: “Tek-y yam n kos sugri, tɩ [saasẽ rĩungã] kolgame.” (Matɩe 3:1, 2) Nebã wʋma a Zã sẽn yeelã n sak n tũ. B togsa b yel-wẽna nebã taoore, n tek yam n kos sugr n bas-ba, n yaool n wa a Zã nengẽ n deeg lisg Zʋrdẽ kʋɩlgẽ wã. Lis-kãng yɩɩ Zʋɩf rãmbã yĩng bala.—Luk 1:13-16; Tʋʋma 13:23, 24.
4. Bõe yĩng tɩ ra yaa yãgb bũmb ne pipi yʋʋm kob-gĩndẽ Zʋɩf rãmbã tɩ b tek yam n kos sugri?
4 Ra yaa yãgb bũmb ne Zʋɩf kãensã tɩ b tek yam n kos sugri. Yʋʋmd 1513 sẽn deng Kirist zãmaanã, b yaab rãmbã ra maana kaoole, sẽn yaa pʋleng b sẽn maan ne Wẽnnaam a Zeova. La b yel-wẽn-kãsemsã yĩnga, b pa pids kaool kãng ye, n paam taal dẽ yĩnga. La a Zezi wakatã b ra bee yel-kãseng taoore. ‘A Zeova ra-kãsengã sẽn kõt rabeemã’ a Malaki sẽn deng n togsã ra pẽnegdame. Yʋʋmd 70 kiris-nebã zãmaanã pʋgẽ, ra-kãng waa sasa ning Rom tãb-biisã sẽn sãam Zerizalɛm ne a wẽnd-doogã la b kʋ sẽn yɩɩd Zʋɩf rãmb milyõ wã. B reng n tʋma Lisd a Zã sẽn tall yẽesem ne Wẽnnaam baleng hakɩkã tɩ sãoong kãng nan pa wa, ‘sẽn na yɩl n segl neb a Zeova yĩnga.’ B ra segd n teka yam n kos sugr ne b yel-wẽna b sẽn maan n beeg a Moiiz Tõogã kaoolã, la b segl n sak Wẽnnaam Biribl a Zezi, a Zeova sẽn da tʋm b nengẽ wã.—Malaki 3:22-24; Luk 1:17; Tʋʋma 19:4.
5. a) A Zezi sẽn wa n na n deeg lisgã, bõe yĩng t’a Zã ra pa rat n lis-a? b) A Zezi lisgã ra makda bõe?
5 A Zezi mengã ra bee neb nins sẽn wa a Zã nengẽ n na n deeg lisgã sʋka. La yaa bõe yĩng tɩ yẽ me wa? A Zã sẽn mi t’a Zezi ra pa tar yel-wẽnd n na n togsã yĩnga, a yeelame: “Yaa maam n tog n wa yãmb nengẽ tɩ y lis maam. La gese, yãmb wata mam nengẽ!” La a Zezi lisgã ra na n maka bũmb a to. Rẽ n so t’a Zezi leoke: “Bɩ y sak t’a yɩ woto masã, tɩ bõe, a zemsame tɩ tõnd pids bũmb nins fãa sẽn yaa tɩrgã.” (Matɩe 3:13-15) A Zezi sẽn da pa tar yel-wẽndã yĩnga, a lisgã ra pa makd tek yam n kos sugr yel-wẽn yĩng ye. A leb n da pa baood n na n dɩk a meng n kõ Wẽnnaam ye, bala a ra zoe n bee buud sẽn dɩk a meng n kõ a Zeova pʋgẽ. La yẽ lisgã a yʋʋm 30 zugã ra yaa toore. A lisgã ra makda a sẽn wilg a meng a saasẽ Ba wã n na n pids bũmb ning Wẽnnaam sẽn da rat t’a maanã.
6. Wãn to la a Zezi wilg t’a ra pa reemd ne Wẽnnaam sẽn da rat t’a maanã?
6 Wẽnnaam daabã ne Kirist Zezi ra yaa tʋʋmd sẽn tɩ loe ne Rĩungã. (Luk 8:1) A ra leb n tɩ loee ne a sẽn da na n dɩk a ninsaal vɩɩmã sẽn zems zãngã n kõ tɩ yɩ rond la kaool paalgã yẽbgrã. (Matɩe 20:28; 26:26-28; Hebre dãmba 10:5-10) A Zezi pa reem ne a koom lisgã sẽn da makd bũmb ningã ye. A pa bas tɩ yɛl a taab tiis-a ye. A maana Wẽnnaam daabã wakat fãa n dɩk Wẽnnaam Rĩungã mooneg tɩ yɩ a tʋʋm-kãseng hal n tɩ ta a kũum.—Zã 4:34.
Kirist karen-biisã koom lisgu
7. Yʋʋmd 33 Pãntekotã tɛka, lis-bʋg la b yeel kiris-nebã tɩ b maane?
7 Ya a Zã n lis a Zezi pipi karen-biisã koomẽ n yaool n tall-b n tɩ wilg a Zezi sẽn na yɩl tɩ b wa yɩ saasẽ Rĩungã neba. (Zã 3:25-30) A Zezi kɩtame tɩ karen-bi-kãens me lis neba, tɩ lis-kãng võor da yaa yembr ne a Zã lisgã. (Zã 4:1, 2) La sẽn sɩng ne yʋʋmd 33 Pãntekotã, b sɩngame n tʋmd tʋʋmd ning sẽn yaa lis nebã ‘Ba wã la Biriblã la vʋʋsem sõngã yʋʋr yĩngã.’ (Matɩe 28:19, NW ) Y sã n lebg n ges lis-kãng võorã na n naf-y-la wʋsgo.
8. Reeg lisg ‘Ba wã yʋʋr yĩng’ rat n yeelame tɩ bõe?
8 Reeg lisg ‘Ba wã yʋʋr yĩngã’ rat n yeelame tɩ bõe? Rat n yeelame tɩ f saka a yʋʋrã, a naamã, a zu-sobendã, a raabã la a noyã. Ges-y rẽ sẽn baood tɩ d maanega. 1) A yʋʋrã wɛɛngẽ, Yɩɩl Sõamyã 83:19 yetame: “Yãmb y ye bal yʋʋr n yaa [a Zeova]; yãmb yaa Sẽn-ka-to dũniyã tɛk fãa.” 2) A naamã wɛɛngẽ Zeremi 10:10 yetame: “Yaa [a Zeova] n yaa sɩd Wẽnnaam.” 3) A zu-sobendã wɛɛngẽ, Wilgri 4:11 yeta tõndo: “Tõnd Zusoaba [a Zeova] la tõnd Wẽnnaam, yãmb n zems tɩ reeg pẽgre la waoogre la pãnga, tɩ bõe, yãmb n naan bũmb fãa, la yaa yãmb daaba yĩng la yãmb naan bãmb tɩ b beẽ.” 4) D segdame me n sak n deeg tɩ ya a Zeova la vɩɩmã kõt sẽn na n fãag tõnd ne yel-wẽnã la ne kũumã: “Fãagr yaa [a Zeova] n so.” (Yɩɩl Sõamyã 3:9; 36:10) 5) D segd n sak n deegame tɩ ya a Zeova la noy lugend sẽn yɩɩd fãa wã: “A Zeova yaa tõnd bʋ-kaooda, a Zeova yaa tõnd noy lugenda, a Zeova yaa tõnd Rĩma.” (Ezai 33:22, NW ) A sẽn tar zu-sobend woto fãa wã yĩnga, b sagenda tõndo: “Nong [a Zeova] fo Wẽnnaam ne f sũur fãa, la ne f sɩɩga fãa, la ne f yam fãa.”—Matɩe 22:37.
9. Reeg lisg ‘Biriblã yʋʋr yĩng’ rat n yeelame tɩ bõe?
9 Reeg lisg ‘Biriblã yʋʋr yĩng’ rat n yeelame tɩ bõe? A rat n yeelame tɩ d sak a Zezi Kirist yʋʋrã, a naamã la a zu-sobendã. A yʋʋrã sẽn ya a Zezi wã rat n yeelame tɩ “a Zeova yaa fãagre.” A tara naam, bala yaa yẽ la Wẽnnaam Biribl yend a sẽn naan a toore, la Wẽnnaam sẽn naan pipi. (Matɩe 16:16; Kolos rãmba 1:15, 16) Zã 3:16 gomda Biribl kãng yell woto “Wẽnnaam nonga dũniyã [ãdem-biis nins b sẽn tõe n fãagã] hal tɩ b kõ b Biiga sẽn ka to, tɩ ned ninga fãa sẽn tẽed bãmb kõn sãam ye, la a na paam vɩɩm sẽn ka sɛta.” A Zezi sẽn sak Wẽnnaam hal tɩ ta a kũumã, Wẽnnaam vʋʋg-a lame n kõ zu-sobend n paase. Sã n yaa ne tʋm-tʋmd a Polle, Wẽnnaam zẽka ‘[a Zezi] ne waoogr sẽn yaa kãseng’ n yɩɩd saasẽ la tẽng zugu, t’a pʋgd a Zeova n yaa yiib-n-soaba. Yaa woto yĩng n kɩt tɩ “ne a Zezi yʋʋre dũma fãa sẽn be yĩngri ne sẽn be tẽnga zugu la sẽn be tẽngã pʋgẽ wã na n yĩgimdame, la tɩ zɩlma fãa na n kɩsa kaset t’a Zezi Kirist yaa Zusoaba, tɩ yɩ tõnd Ba a Wẽnnaam waoogre.” (Filip rãmba 2:9-11) Woto rat n yeelame tɩ d sak a Zezi noyã sẽn yit a Zeova meng nengẽ wã.—Zã 15:10.
10. Reeg lisg ‘vʋʋsem sõngã yʋʋr yĩng’ rat n yeelame tɩ bõe?
10 Reeg lisg ‘vʋʋsem sõngã yʋʋr yĩng’ rat n yeelame tɩ bõe? A rat n yeelame tɩ f sak vʋʋsem sõngã tʋʋmde. La vʋʋsem sõngã yaa bõe? Ya a Zeova pãngã, a sẽn tar n pidsd a raabã. A Zezi yeela a karen-biisã woto: “La mam na kos m Ba, la bãmb na kõ yãmb Sõangd a to, tɩ bãmb pa ne yãmb wakat sẽn ka sɛta. Bãmb yaa sɩd sɩɩga.” (Zã 14:16, 17) Bõe la a ra na n sõng-b tɩ b maane? A Zezi yeel-b-la woto n paase: “La [vʋʋsem sõngã] sã n wa yãmb zutu, yãmb na reeg pãnga. La yãmb na n yɩɩ mam kaset dãmb Zerizalɛm, ne Zide la Samari ne dũniyã tɛk fãa.” (Tʋʋma 1:8) Yaa ne vʋʋsem sõngã me la a Zeova tũnug ne n kɩt tɩ b gʋls Biiblã: “Bãngr-goama ka yɩ ne ned yam ye. La yaa [vʋʋsem sõng] sẽn tʋm neb nins pʋsẽ wã n togs Wẽnnaam yĩnga.” (2 Pɩɛɛr 1:21) Woto, d sã n zãmsd Biiblã, wilgdame tɩ d sakd n deega vʋʋsem sõngã tʋʋmde. Manesem a to sẽn wilgd tɩ d sakd n deega vʋʋsem sõngã sõngr yaa d sẽn na n kot a Zeova t’a sõng-d tɩ d wom ‘vʋʋsem sõngã biisi,’ sẽn yaa “nonglem la sũ-noogo la laafɩ la sũ-mare la maan neere la sũ-maasem la tẽebo la sũ-bʋgsem la yõk-m-menga.”—Galat dãmba 5:22, 23.
11. a) Lisgã võor hakɩk yaa bõe rũndã-rũndã? b) Wãn to la lisgã yaa wa kũum la vʋʋgre?
11 Pipi neb nins sẽn deeg lisg tɩ zems ne a Zezi noyã ra yaa Zʋɩf rãmb la neb sẽn tuub n sak Zʋɩf rãmbã tũudum, sẽn sɩng ne yʋʋmd 33 wã. Rẽ poor bilfu, Samari nebã me paama zu-no-kãseng n tõe n yɩ kiris-neba. Rẽ poore, yʋʋmd 36, bu-zẽmsa neb sẽn pa kẽ bãongã me ra tõe n yɩɩ Kirist karen-biisi. Nand tɩ b reeg lisgu, Samari nebã ne bu-zẽmsã neba, n paas Zʋɩf rãmbã la neb nins sẽn tuub n sak Zʋɩf rãmbã tũudmã ra segd n dɩka b mens n kõ a Zeova n yɩ a Biriblã karen-biisi, n maan a raabã. Kiris-neb koom lisgã võor yaa woto hal ne rũndã-rũndã. Koomã pʋgẽ lisg yaa makr sẽn zems sẽn wilgd tɩ ned rɩka a meng n kõ Wẽnnaam, bala lisgã makda mumbu. Y sẽn lis kooma pʋgẽ wã makda yãmb sẽn bas y pĩnd vɩɩm manesmã. Y sẽn pukd koomẽ wã makda y sẽn lebg n vʋʋg n na n maan Wẽnnaam daabã. Neb nins fãa sẽn lebgd kiris-neb hakɩkã reegda “lisg a yembr” kãngã. B lisgẽ wã, b lebgda a Zeova Kaset rãmb sẽn yaa kiris-neba, tʋm-tʋmdb Wẽnnaam sẽn kõ sore.—Efɛɛz rãmba 4:5; 2 Korẽnt dãmba 6:3, 4.
12. Kiris-neb koom lisgã mamsg yaa bõe, la yaa wãn to?
12 Wẽnnaam nifẽ, lis-kãngã buud tara yõod wʋsg fãagrã wɛɛngẽ. Wala makre, a sẽn gom a Nowe sẽn me koglgã tɩ yẽ ne a zakã rãmb paam fãagr be wã poore, tʋm-tʋmd a Pɩɛɛr gʋlsame: ‘Ko-kãnga mamsda koom lisg sẽn fãagd yãmb me masã wã, a ka yĩnga rẽgd yiisg yĩng ye, la a yaa kaset sõng sũur pʋgẽ tɩ tõnd baooda sẽn tat Wẽnnaam yam a Zezi Kirist kũum vʋʋgr yĩnga.’ (1 Pɩɛɛr 3:21) Koglgã ra yaa bũmb sẽn wilgd vẽeneg t’a Nowe ra sakame n tʋm tʋʋmd ning Wẽnnaam sẽn kõ-a wã. Koglgã meeb saab poore, “dũniyã sẽn da be pĩnda sãama koom sẽn lim-a wã yĩng[a].” (2 Pɩɛɛr 3:6) La a Nowe ne a zakã rãmb “bal n põs ne koomã, bãmb yaa neb a nii.”—1 Pɩɛɛr 3:20.
13. Ne koom lisgã maasem, kiris-ned paamda fãagr ne bõe?
13 Rũndã-rũndã, neb nins sẽn tik tẽeb ning b sẽn tar ne Kirist sẽn vʋʋgã zugã n dɩk b mens n kõ a Zeova wã reegda lisgu, n wilg tɩ b rɩka b mens n kõ Wẽnnaam. B maanda bũmb nins Wẽnnaam sẽn dat tɩ d maan rũndã-rũndã wã, n paamd fãagr ne wẽng ning sẽn be dũni kãngã pʋgẽ wã. (Galat dãmba 1:3, 4) B pa na n le naag-b ne zãmaan-wẽng kãngã n sãam ye. Wẽnnaam na n kɩtame tɩ b põs sãoong kãngã, la a kõt-b-la sũur kaset sẽn yaa sõma. Tʋm-tʋmd a Zã kõta Wẽnnaam sõgen dãmbã bas-m-yam woto: “Dũniyã ne a ratem wẽnga me loogdame, la ned ninga sẽn maand Wẽnnaam daab paada wakat sẽn ka sɛta.”—1 Zã 2:17.
D tʋm tʋʋm nins b sẽn bobl-dã
14. Bõe yĩng tɩ lisgã bal pa kɩtd tɩ ned paam fãagre?
14 Na n yɩɩ tudgr tɩ d tags tɩ lisgã bal n kɩtd tɩ d na n paam fãagre. Lisgã tara yõodo, sã n mikame tɩ nedã sɩd rɩka a meng n kõ a Zeova a Zezi Kirist maasem yĩngã, la a kell n maan Wẽnnaam daabã ne burkĩnd hal tɩ saabã ta. “Ned ninga sẽn na n tall a tẽeb hal tɩ wakat ta, a na n paama fãagre.”—Matɩe 24:13.
15. a) Rũndã-rũndã, Wẽnnaam daabã ne kiris-neb nins sẽn deeg lisgã yaa bõe? b) Yɩ Kirist karen-biig yõod segd n taa zĩ-bʋg tõnd vɩɩmã pʋgẽ?
15 A Zezi sẽn da rɩk a tẽng zug vɩɩmã n tʋm to-to ningã me ra zemsa ne Wẽnnaam sẽn da rat t’a maana. A ra segd n kiime tɩ yɩ maoongo. Sã n yaa ne tõndo, d segd n dɩka d yĩnsã tɩ yɩ maan-vɩɩs n kõ Wẽnnaam, n kɩɩs d mengã raab n maan yẽ raabã. (Rom dãmba 12:1, 2) Baa yaa wakat-wakat bal la d maand wa dũniyã neb sẽn gũbg tõndã, bɩ d sã n tika d vɩɩmã tʋʋm sẽn nafd tõndã bal zutu, n balemd Wẽnnaam ne rok-m-zugẽ bala, sɩd-sɩda, d pa maand Wẽnnaam daabã ye. (1 Pɩɛɛr 4:1-3; 1 Zã 2:15, 16) Zʋɩf a yembr sẽn sok a sẽn segd n maaneg n paam vɩɩm sẽn pa satã, a Zezi yeelame tɩ sɩd tara yõod t’a tall vɩɩm manesem sẽn yaa yɩlemde. La a wilga bũmb sẽn tar yõod n yɩɩd rẽ menga: A segd n yɩɩ a Zezi karen-biiga, sẽn dat n yeel tɩ kiris-neda. Rẽ segd n yɩɩ bõn-kãseng a vɩɩmã pʋgẽ. Bõn-kãng pa segd n leb poorẽ tɩ laogã baoob lʋɩ taoor ye.—Matɩe 19:16-21.
16. a) Tʋʋm-bʋg sẽn tɩ loe ne Rĩungã la b bobl kiris-nebã fãa? b) Wa b sẽn bilg seb-nens 116 la 117 pʋsẽ wã, manesem kẽer bʋs sẽn yaa sõma la d tũnugd ne n moond Rĩungã? d) Tõnd sã n moond koe-noogã ne d sũy fãa, wilgda bõe?
16 Yaa y leb n bãng neer tɩ Wẽnnaam sẽn da rat t’a Zezi maana neng a yembr yaa tʋʋm-kãseng sẽn tɩ loe ne Wẽnnaam Rĩungã. A Zezi mengã paama vʋʋsem sõng zaeeb n na n wa yɩ Rĩma. La a sẽn da ket tẽng zugã yẽ me kõo kaset ne yẽesem sẽn tɩ loe ne Rĩungã. B bobla tõnd me kaset kũun tʋʋm-kãngã, la d segd n tʋm-a-la ne d sũy fãa. D sã n maan woto, d wilgdame tɩ d nanda a Zeova naam sẽn ka to wã, la tɩ d nonga d taabã. (Matɩe 22:36-40) D leb n wilgdame tɩ d lagma ne d saam-biis a taabã n balemd a Zeova dũniyã gill zugu, tɩ d fãa yaa Rĩungã moondba. D fãa tara zems-n-taar dũniyã gill zugu, n baood n na n paam vɩɩm sẽn pa satã tẽngã zug sẽn yaa Rĩung kãng soolmã.
Lebg-n-gese
• A Zezi lisgã ne rũndã-rũndã lisgã wõnda taab zĩ-bʋse, la zĩ-bʋs la b pa yembre?
• Reeg lisg ‘Ba wã la Biriblã la vʋʋsem sõngã yʋʋr yĩng’ võor yaa bõe?
• Tʋm tɩ zems ne kiris-ned koom lisgã baoodame tɩ d maan bõe?
[Foto rãmba, seb-neng 116, 117]
MANESEM KẼER D SẼN TŨNUGD NE N MOOND RĨUNGÃ
Zak-zaka
D roagdba
D tʋmd-n-taase
D karen-bi-taase
Soayã zutu
Lebg n tɩ ges sẽn dat-b n bãng n paasã
Biiblã zãmsg nebã yiya