Sak piig la a tãabo
Kʋʋn-kãseng sẽn be a Zeova geerã taoore
1. a) Nand tɩ Wẽnnaam sõgen dãmb sẽn deng kiris-nebã zãmaanã la neb 144 000 paam b keoorã, bõe n segd n paam-ba? b) Bõe la ‘kʋʋn-kãseng’ neb sẽn vɩ rũndã-rũndã na n tõog n paame?
WẼNNAAM sõgen dãmb nins sẽn yɩ wẽn-sakdbã lʋɩɩsa Wẽnnaam daabã maaneg taoor b vɩɩmã pʋgẽ, sẽn sɩng ne a Abɛll n tɩ ta Lisd a Zã. La b fãa kiime, n gũud n na n vʋʋg Wẽnnaam dũni paalgã pʋgẽ tẽng zugu. Neb 144 000 sẽn na n dɩ naam ne Kirist saasẽ Rĩungã pʋgẽ wã me segd n kiime n yaool n tõog n paam b keoorã. Baasg zãnga, Wilgri 7:9 yetame tɩ yaoolem day kãensã, ‘kʋʋn-kãseng’ neb sẽn yit soolem fãa n pa na n ki, la b saagdame n na n vɩɩmd wakat sẽn pa sat tẽng zugu. Yãmb bee b sʋk bɩ?
Kʋʋn-kãsengã sẽn ya a soaba
2. Bõe n wa n kɩt tɩ b bãng kʋʋn-kãsengã yell b sẽn gom Wilgri 7:9 pʋgẽ wã sẽn yaa b rãmb vẽenega?
2 Yʋʋmd 1923, a Zeova sõgen dãmbã bãngame tɩ “piis” nins yell a Zezi sẽn gom Matɩe 25:31-46 pʋgẽ wã, la “piis a taab” nins yell a sẽn gom Zã 10:16 pʋgẽ wã yaa neb sẽn na n paam vɩɩm sẽn pa sat tẽng zugu. Yʋʋmd 1931, b bãngame tɩ neb nins b sẽn bilg Ezekɩɛll 9:1-11 pʋgẽ sẽn paam bãnd b rĩyẽ wã me tara tẽng zug vɩɩmã saagre. Rẽ poore, yʋʋmd 1935, b bãngame tɩ kʋʋn-kãsengã bee piis a taab nins yell a Zezi sẽn gomã sʋka. Rũndã-rũndã, kʋʋn-kãseng kãngã sẽn tar Wẽnnaam lohormã yaa neb milyõ rãmba.
3. Bõe yĩng tɩ b sẽn yeel tɩ ‘yalsa geera taoorã’ pa wilgd tɩ kʋʋn-kãsengã yaa neb sull sẽn be saasẽ?
3 Wilgr 7:9 pʋgẽ, b pa yã tɩ kʋʋn-kãsengã be saasẽ ye. B yasa Wẽnnaam ‘geera taoore.’ La rẽ pa baood tɩ b zĩnd saasẽ ye. Rat n yeelame bal tɩ Wẽnnaam get-b lame. (Yɩɩl Sõamyã 11:4) Bũmb ning sẽn wilgd tɩ ‘kʋʋn-kãsengã b sẽn ka tõe n sõd n sɛ wã’ pa sull sẽn be saasẽ wã yaa d sẽn na n mak a nebã sõor sẽn pa yãk takɩ wã ne bũmb ning b sẽn gʋls Wilgri 7:4-8 la Wilgri 14:1-4 pʋgẽ wã. Beenẽ, b wilgame tɩ nebã sõor b sẽn yãk tẽngã zug tɩ na n kẽng saasẽ wã yaa neb 144 000.
4. a) ‘To-kãseng’ ning pʋgẽ kʋʋn-kãsengã sẽn na n põsã yaa bõe? b) Wa b sẽn togs Wilgri 7:11, 12 pʋgẽ wã, ãnd dãmb n get kʋʋn-kãsengã la b lagemd bãmb n balemd Wẽnnaam?
4 Wilgri 7:14 gomda kʋʋn-kãsengã yell woto: “Bãmb yaa neb sẽn yi to-kãsenga pʋgẽ.” B paam n põsa to-kãseng ning buud sẽn zɩ n zĩnd hal dũniyã sɩngr tɛk n pa na n le zĩndã. (Matɩe 24:21) B sã n wa yet ne mi-beoog tɩ fãagrã yita Wẽnnaam la Kirist nengẽ, bõn-naands nins fãa sẽn yaa Wẽn-sakdbã na n naaga bãmb n yeel tɩ: “Ãmiina! Pẽgr la waoogr la yam la bark pʋʋsgo la naam la pãnga la noor bee ne tõnd Wẽnnaam wakat sẽn ka sɛt ye. Ãmiina.”—Wilgri 7:11, 12.
B wilgame tɩ b zemsa ne põsbo
5. Wãn to la d tõe n bãng b sẽn baood tɩ kʋʋn-kãsengã maan bũmb ningã?
5 Kʋʋn-kãsengã sẽn na n paam koglg to-kãsengã pʋgẽ wã yaa bũmb sẽn zems ne a Zeova no-tɩrsã. Biiblã wilga neb nins sẽn na n paam fãagrã zʋg sẽn yaa to-to vẽenega. Woto yĩnga, sẽn nong-b tɩrlmã tõe n wilga masã tɩ b zemsa ne põsbo. Bõe la nin-kãens segd n maane?
6. Bõe yĩng tɩ b sẽn mak kʋʋn-kãsengã neb ne piisã zemse?
6 Piis tara bʋgsem la b sakd nana-nana. Woto, a Zezi sẽn wa n yeel t’a ra tara piis a taab sẽn pa saasẽ sullã nebã, a ra pa rat n wilg bal tɩ yaa neb sẽn dat n vɩɩmd wakat sẽn pa sat tẽng zug ye, la a ra rat n yeelame tɩ b ra na n sakame me n tũ a zãmsgã. A yeelame: “Mam piisa wʋmda mam koɛɛga. Mam mii bãmba, la bãmb tũuda maam.” (Zã 10:16, 27) B yaa neb sẽn sɩd kelgd la b sakd bũmb ning a Zezi sẽn yetã, n lebgd a karen-biisi.
7. Zʋg-sõma bʋs la a Zezi karen-biisã segd n modg n talle?
7 Zʋg a taab bʋs la a Zezi karen-bi-kãensã fãa segd n talle? Wẽnnaam Gomdã yetame “tɩ y bas yãmb pĩnd tʋʋma sẽn yaa nin-kʋdga rẽnda . . . n yeelg nin-paalga Wẽnnaam sẽn naan wa bãmb wẽnego ne tɩrlem la pʋ-peelem sẽn wat ne sɩda.” (Efɛɛz rãmba 4:22-24) B modgdame n na n tall zʋg-sõma sẽn paasd Wẽnnaam sõgen dãmbã zems-n-taare. Zʋg-kãens yaa: “nonglem la sũ-noogo la laafɩ la sũ-mare la maan neere la sũ-maasem la tẽebo la sũ-bʋgsem la yõk-m-menga.”—Galat dãmba 5:22, 23.
8. Kʋʋn-kãsengã sẽn sõngd sẽn zae-bã kellã, yaa bõe n na n paam-ba?
8 Kʋʋn-kãsengã sõngda sẽn saagd-b n na n tɩ vɩɩmd saasẽ wã neb sẽn pa waoog la sẽn lʋɩt moonegã tʋʋmd taoorã. (Matɩe 24:14; 25:40) Piis a taabã sõngd-b lame, baa b sẽn mi tɩ b na n paama kɩɩsg sẽn yit bɛɛbã nengẽ wã, a Zezi Kirist ne a malɛgsã sẽn dig a Sʋɩtãan ne a zĩn dãmbã n yiis saasẽ yaoolem day kãensã sɩngrẽ tɩ b sig tẽng zugã yĩnga. Woto waa ne ‘toog neb nins sẽn be dũniyã zugã zutu. Tɩ bõe, Sʋɩtãana sigame n wa bãmb nengẽ, la a sũ-puugra yaa kãsenga a sẽn bãng t’a wakat yaa bilfa yĩnga.’ (Wilgri 12:7-12) Woto, a Sʋɩtãan kɩɩsda Wẽnnaam sõgen dãmbã n paasdẽ, zãmaan kãngã saab sẽn tar kolgrã sasa.
9. Hal sẽn ta zĩ-bʋg la Wẽnnaam sõgen dãmbã tõog n moon koe-noogã, la bõe yĩnga?
9 Baa ne nams-toaagã, moonegã tʋʋmd ket n kẽngda taoore. Rĩungã moondb sẽn da yaa neb tus a wãn bal dũni gill pipi zabrã baasgẽ wã, masã b yaa milyõ rãmba, bala a Zeova kãabame: “Zab-teed nins fãa neb sẽn maand n na n zab ne fooma ka na n tõog ye.” (Ezai 54:17) Baa Zʋɩf rãmbã bʋ-kaoodb sul-kãseng ned a yembr sak n deegame tɩ ned pa tõe n gɩdg Wẽnnaam tʋʋmd ye. Nin-kãng goma ne Fariziẽ rãmba pipi yʋʋm kob-gĩndẽ wã a Zezi karen-biisã yell n yeel tɩ: “Bɩ y bas daop kãense n da maan bãmb bũmb ye. . . . Tʋʋm kãng sã n yaa neb rẽnda a na n yɩɩ zaalem. La a sã n yaa Wẽnnaam dẽnda, yãmb ka tõe t’a yɩ zaalem ye; bɩ y gũus yãmb mense n da wa zab ne Wẽnnaam ye.”—Tʋʋma 5:38, 39.
10. a) Kʋʋn-kãsengã neb ‘bãnd’ võor yaa bõe? b) Wãn to la Wẽnnaam sõgen dãmbã sakd koɛɛg sẽn yit saasẽ?
10 B bilga kʋʋn-kãsengã wa neb sẽn paam bãnd n na n põse. (Ezekɩɛll 9:4-6) ‘Bãndã’ wilgda vẽeneg tɩ b rɩka b mens n kõ a Zeova, n deeg lisg n ya a Zezi karen-biisi, la tɩ b maood n na n talla Kirist zʋg-sõma wã buudu. B sakda koɛɛg sẽn yit saasẽ n gomd a Sʋɩtãan dũni gill ziri tũudmã yell sẽn yet-b tɩ: “Mam neba, bɩ y yi yẽ pʋgẽ n da lagem ne yẽ yel-wẽna la y paam a tooda ye.”—Wilgri 18:1-5.
11. Ne manesem bʋg sẽn tar yõod la kʋʋn-kãsengã neb wilgd tɩ b ya a Zeova sõgen dãmba?
11 A Zezi leb n yeela a karen-biisã tɩ: “Yãmb sã n nong taaba, neba fãa na n bãngame tɩ yãmb yaa mam karen-biisi.” (Zã 13:35) La dũni kãngã tũudum toɛy-toɛyã neb yẽ kʋʋda taab zabã pʋsẽ, naoor wʋsgo yaa b tẽnsã sẽn yaa toor-toorã yĩng bala. Wẽnnaam Gomdã yetame: “Ned ninga fãa sẽn ka maand tɩrga la ned ninga sẽn ka nong a ba-biig me ka Wẽnnaam ned ye. Bõn-kãng wilgda [neb nins] sẽn yaa Wẽnnaam kamba la [neb nins] sẽn yaa Sʋɩtãana kamba. Tɩ bõe, koɛɛg ninga . . . b sẽn togs yãmbã, a yaa tɩ tõnd nong taaba. La d ra yɩ wa a Kayẽ sẽn da yaa wẽng soaba rẽnd n kʋ a ba-biiga ye.”—1 Zã 3:10-12.
12. To-kãsengã sasa, a Zeova na n maana bõe ne ‘tɩɩs’ nins sẽn womd biis sẽn ka yõodã?
12 A Zezi yeelame: “Tɩ-sõng fãa womda bi-sõama, la tɩ-wẽng fãa womda bi-wẽnse. Tɩ-sõng ka tõe n wom bi-wẽns ye, la tɩ-wẽng me ka tõe n wom bi-sõama ye. Tɩɩg ninga fãa sẽn ka womd bi-sõama, b na n kɛ-a lame n lob bugmẽ. Dẽ, yaa ne bãmb biisã la yãmb na n bãng bãmba.” (Matɩe 7:17-20) Dũniyã tũudum sẽn womd biis ninsã kɩtdame tɩ b bãng tɩ b yaa ‘tɩ-wẽnse,’ a Zeova sẽn na n sãam ka la bilf to-kãsengã sasa wã.—Wilgri 17:16.
13. Wãn to la kʋʋn-kãsengã neb wilgd tɩ b zemsa ne fãagr to-kãsengã sasa?
13 Wilgri 7:9-15 wilgda bũmb nins sẽn kɩt tɩ kʋʋn-kãsengã paam fãagrã. B ne-b lame tɩ b lagem taab n ‘yas a Zeova geerã taoore,’ n sakd a naam sẽn ka to wã. B “peka b fut tɩ lebg peelse ne Pebila zɩɩm,” n wilgdẽ tɩ b saka a Zezi maoongã sẽn yẽesd yel-wẽnã. (Zã 1:29) B rɩka b mens n kõ Wẽnnaam n wilg rẽ ne koom lisg reegre. Woto yĩnga, b yaa yɩlem Wẽnnaam taoore, tɩ b sẽn yer fu-peelsã makd rẽ, la b maand ‘a tʋʋmda wĩntoog ne yʋngo.’ Yãmb nee y sẽn segd n maan to-to tɩ y vɩɩmã zems n paas ne b sẽn bilg ka wã bɩ?
A Zeova raabã maaneg nafa masã tɛka
14. Nafa sẽn pa wõnd b taab nins a Zeova sõgen dãmbã sẽn paamd masã tɛkã sãnda la bʋse?
14 Woto me, tõe tɩ y yãa nafa sẽn pa wõnd a taab neb nins sẽn maand a Zeova raabã sẽn paamd masã tɛkã. Wala makre, yãmb sẽn bãng a Zeova raabã sẽn yaa tɩrgã, y bãngame tɩ y tõe n wa paama vɩɩm sẽn be yamleoog beoog-daare. Rẽ kɩtame tɩ y vɩɩmã tar võor masã, sẽn yaa maan sɩd Wẽnnaamã raabo, n gũud vɩɩm sẽn pa satã tẽng sẽn na n lebg arzãn pʋgẽ. N-ye, Rĩm a Zezi Kirist “na n talla [kʋʋn-kãsengã] n ta vɩɩm ko-bunds zĩisẽ.”—Wilgri 7:17.
15. Wãn to la a Zeova Kaset rãmbã sẽn tũ Biiblã noy politikã la vɩɩm manesmã yɛl wɛɛngẽ wã naf-ba?
15 Nafa kãsems kʋʋn-kãsengã sẽn paamd yaa nonglem, lagem-n-taar la zems-n-taar ning sẽn be a Zeova sõgen dãmbã sʋk dũniyã gill zugã. Tõnd fãa sẽn dɩt tẽeb rɩɩb a yembrã yĩnga, d fãa sakda noy nins sẽn be Wẽnnaam Gomdẽ wã. Yaa rẽ n so tɩ tagsa toɛy-toɛy nins sẽn tɩ loe ne politikã la tẽnsã pa welgd tõndã. D leb n tũuda vɩɩm manesmã no-sõma nins Wẽnnaam sẽn baood t’a nin-buiidã tũ wã. (1 Korẽnt dãmba 6:9-11) Woto, mo-yõsa, welsgã la yoobã sẽn wɛ dũniyã pʋgẽ wã pa be a Zeova nin-buiidã sʋk ye. Bãmb bee b sẽn boond tɩ tẽeb arzãnã pʋgẽ. Ges-y b sẽn bilg rẽ to-to Ezai 65:13, 14 pʋgẽ.
16. Baa ne b sẽn segd zu-loees b vɩɩmã pʋgẽ wã, kʋʋn-kãsengã neb tara saag-bʋgo?
16 A Zeova tẽng zug sõgen dãmbã pa zems zãng ye. Sẽn paase b pa põsd dũni kãngã zu-loees b vɩɩmã pʋgẽ ye. Wala makre, yel-pakr paamd-b lame, bɩ b tõe n kii zaalem tẽnsã zab wakate. B leb n pa põsd bãase, far la kũum ye. La b tara tẽeb tɩ dũni paalgã pʋgẽ, Wẽnnaam “na n yẽesa nintãma fãa t’a ra le zĩnd bãmb ninẽ ye, la kũum ka na n le zĩnd ye, la sũ-sãoong bɩ yãbr walla toog kõn le zĩnd yɛs ye.”—Wilgri 21:4.
17. Baa yel-beed ning sẽn wa fãa, saag-kãseng bʋg la neb nins sẽn balemd sɩd Wẽnnaamã gũud beoog-daare?
17 Baa y sã n maan kaalem masã, kʋʋlem, bãaga, sãmpogr bɩ bɛɛbã namsg yĩnga, a Zeova na n vʋʋg-y-la Arzãnã pʋgẽ. (Tʋʋma 24:15) Rẽ, y na n tõog n ket n maanda kibs tẽebã wɛɛngẽ Kirist yʋʋm tusr naamã sasa. Y nonglmã ne Wẽnnaam na n paasame, y sã n ne a raabã sẽn paamd pidsg tɩ be yamleoog wʋsgã. La bark nins a Zeova sẽn na n ning nebã yĩngã wɛɛngẽ wã na n paasa y nonglmã ne-a me. (Ezai 25:6-9) Ad sɩd yaa beoog-daar sẽn be bark meng n gũud Wẽnnaam nin-buiidã!
Lebg-n-gese
• Yel-kãseng bʋg la Biiblã rɩk n tɩ loe ne kʋʋng kãsengã?
• Tõnd sã n sɩd rat n zĩnd kʋʋn-kãsengã sẽn tar Wẽnnaam lohormã sʋka, yaa bõe la d segd n maan masã tɛka?
• Yãmb getame tɩ kʋʋn-kãsengã sẽn tar bark nins masã la a na n ye paam Wẽnnaam dũni paalgã pʋgẽ wã yõod taa zĩ-bʋgo?
[Foto, seb-neng 123]
Kʋʋn-kãsengã neb milyõ rãmb lagma taab n balemd sɩd Wẽnnaamã