Sak pisi
Gũ-y a Zeova daarã ne ratem kãsenga
1. Yãmb sẽn wa n bãng tɩ d na n paama fãagr ne dũni kʋdr kãngã sũ-sãamsã, y tagsg yɩɩ wãn to?
BŨMB nins yãmb sẽn zãms Biiblã pʋgẽ wã sʋka, a ye yaa t’a Zeova ratame tɩ tẽngã fãa lebg arzãna. Dũni paalg kãng pʋgẽ, zabã, bi-be-tʋʋmã, naongã, bãasã, namsgã, la kũumã pa na n le zĩnd ye. Sẽn ki-bã meng na n vʋʋgame. Ad sɩd yaa saagr sẽn yaa kãsenga! Rẽ fãa pidsg kolgame. Woto yaa vẽenega, bala sẽn sɩng ne yʋʋmd 1914, Kirist bee a Rĩungã naam pʋgẽ tɩ ninsaal pa tõe n yã-a ye. La wakat kãng tɛkã, d bee dũni wẽng kãngã yaoolem day pʋsẽ. Yaoolem day kãensã baasgẽ, a Zeova na n sãama zãmaan-wẽng kãngã, la a lugl dũni paalgã a sẽn kãabã.
2. ‘A Zeova daarã’ yaa bõe?
2 Biiblã boonda sãoong kãng sẽn watã t’a ‘Zeova daarã.’ (2 Pɩɛɛr 3:10) Ya ‘a Zeova sũ-puugrã daar’ sẽn na n wa a Sʋɩtãan dũniyã gill zugã. (Sofoni 2:3) A na n taa a zug tẽn-sʋk ‘Wẽnnaam sẽn tõe fãa daar kãsenga zabrẽ, b sẽn boond ne hebre goama tɩ Armagedõ,’ tɩ “dũniyã tɛk fãa nanambs” na n paam sãoong zab-kãng pʋgẽ. (Wilgri 16:14, 16) Yãmb vɩɩm manesmã wilgdame tɩ y kɩsa sɩd t’a ‘Zeova raarã’ kolgame bɩ?—Sofoni 1:14-18; Zeremi 25:33.
3. a) Wakat bʋg la a Zeova daarã na n wa? b) Bõe yĩng tɩ yaa sõma, a Zeova sẽn pa wilg ‘daarã la wakatã’?
3 Biiblã pa yet tõnd wakat takɩ ning a Zezi Kirist sẽn na n wa pids a Zeova bʋ-kaoã n sãam a Sʋɩtãan dũniyã ye. A Zezi yeelame: “Ned ba a ye ka mi daar kãnga la wakat kãng ye, baa malɛk rãmb sẽn be [saasẽ wã] ka mi ye, baa Biiga ka mi ye, yaa Ba bala.” (Mark 13:32) Neb nins sẽn sɩd pa nong a Zeova wã na n dat n viiga a daarã b yamẽ wã, n bao dũniyã yɛla. La neb nins sẽn sɩd nong a Zeova wã na n maana a raabã ne b sũyã fãa, baa zãmaan wẽng kãngã saab sẽn wat wakat ninga.—Yɩɩl Sõamyã 37:4; 1 Zã 5:3.
4. Keoog-bʋg la a Zezi kõ-yã?
4 A Zezi keooga sẽn nong-b a Zeova wã woto: “Gũus-y neere. Bɩ y gũ, tɩ bõe, yãmb ka mi wakat ninga ra-kãng sẽn na n wa ye.” (Mark 13:33-37) A sagla tõnd tɩ d ra bas tɩ rɩɩb la rã-yũur bɩ ‘vɩɩm kãngã yɛlã’ pak tõnd wʋsg hal tɩ d pa le ne tɩ d vɩɩ wakat sẽn pa reem yell sasa ye.—Luk 21:34-36; Matɩe 24:37-42.
5. Wala a Pɩɛɛr sẽn wilgã, yaa bõe la a Zeova daarã na n wa ne?
5 A Pɩɛɛr me sagl-d lame tɩ d ket n gũud ‘a Zeova daarã ne ratem kãsenga. Yaa daar ninga saasã sẽn na n dɩ bugum n yẽnege, la dũniyã bũmb fãa sẽn na n wɩng wʋsg n yẽnegã.’ ‘Saasã’ sẽn yaa ninsaalbã goosneema rãmbã fãa na n sãamame, na n yɩɩ woto me ne ‘tẽngã’ sẽn yaa ãdem-biis nins sẽn yaa wẽnsã. La ‘bũmb nins fãa sẽn be a pʋgẽ wã’ sẽn yaa dũni wẽngã tagsa la a tʋʋmã, wala makre, a nebã sẽn dat n soog b mens n pa kelg Wẽnnaamã, la b maand yoob la b nong laogã na n sãamame. B na n ledga bõn-kãens ne “yĩngr paalg [Wẽnnaam saasẽ Rĩungã] la tẽn-paalga [tẽng zug zãmaan-paalga] tɩrlem sẽn na n zĩnd b pʋsẽ.” (2 Pɩɛɛr 3:10-13) Yel-yɛɛsds kãensã sẽn na n dĩms dũniyã gillã na n waa zĩig pʋgẽ la daar ne wakat b sẽn pa tẽed sasa.—Matɩe 24:44.
Ket-y n gũusd bãndã pidsgu
6. a) Hal sẽn ta zĩ-bʋg la a Zezi sẽn leok a karen-biisã tɩ loe ne Zʋɩf rãmbã zãmaan saabo? b) A Zezi leokrã bab-bʋs n wilg yɛl la manesem sẽn zĩnd yʋʋmd 1914 tɛkã?
6 Tõnd sẽn vɩ wakat ning pʋgẽ wã yĩnga, d segd n sɩd bãnga bãndã sẽn tar yɛl wʋsgã sẽn wilgd tɩ d bee yaoolem dayã, sẽn yaa “zãmaanã baasgã.” Tẽeg-y t’a Zezi sẽn da wa n leok a karen-biisã sokrã sẽn be Matɩe 24:3 pʋgẽ wã, a bilga yel-kãens kẽer verse a 4 n tɩ ta 22 pʋgẽ sẽn paam pidsg bilf Zʋɩf rãmbã zãmaanẽ yʋʋmd 33 la 70 sʋkã sasa wã. La bãngr-gomdã paamda pids-kãseng yʋʋmd 1914 tɛkã, sẽn yɩ wakat ning sẽn zems ne Kirist “belmã la zãmaanã baasgã.” (NW ) Matɩe 24:23-28 togsda tõnd bũmb ning sẽn da na n zĩnd yʋʋmd 70 wã tɛk n tɩ ta Kirist belmã a Rĩungã naam pʋgẽ wã. Yɛl nins b sẽn bilg Matɩe 24:29-25:46 pʋgẽ wã zĩnda saabã wakate.
7. a) Bõe yĩng tɩ tõnd ned kam fãa segd n gũus neer n bãng masã yɛl nins sẽn pidsd bãndã to-to? b) Leok-y sogsg nins sẽn be sul-kãngã baasgẽ wã, n wilg bãndã sẽn pidsd to-to yʋʋmd 1914 tɛkã.
7 Tõnd ned kam fãa segdame n gũus neer n bãng yɛl la manesem nins sẽn pidsd bãndã. D sã n dɩk yel-kãens n tɩ loe ne Biiblã bãngr-goamã, na n sõnga tõnd tɩ d ket n gũud a Zeova daarã wakat fãa. A na n leb n sõnga tõnd tɩ d tõog n gom tɩ neb a taabã sak n tẽ, d sã n wa keoogd nebã tɩ daarã kolgame. (Ezai 61:1, 2) Rẽ sẽn be d yamẽ, bɩ d leok sogsg sẽn bilgd bãndã babs kẽer sẽn be Matɩe 24:7, la Luk 21:10, 11 pʋgẽ wã.
Bãngr-gomd ning sẽn deng n togs tɩ ‘tẽng na n yika zabr ne tẽng tɩ soolem yik zabr ne soolmã’ paama pids-kãseng bʋg sẽn sɩng yʋʋmd 1914 tɛkã? Zabã wɛɛngẽ, bõe n zĩnd yʋʋm-kãng tɛka?
Yʋʋmd 1918, bã-longdem bʋg n kʋ neb sõor sẽn yɩɩd neb sõor ning dũni gill pipi zabrã sẽn kʋ wã? Baa ne logtoeemdã bãngr sẽn ta zĩig ning masã wã, bã-bʋs n ket n kʋʋd nebã?
Hal sẽn ta zĩ-bʋg la komã nams tẽngã neb baa ne nasaar bãngrã sẽn paas yʋʋm kob-gĩnd ning sẽn loogã sasa wã?
Bõe n kɩt tɩ yãmb sɩd tẽed tɩ 2 Tɩmote 3:1-5, 13 bilgda wẽngã la toogã sẽn tar paasgã, yaoolem dayã sẽn dabd b saab zĩigẽ wã yĩnga, lakae pa vɩɩm manesem ning sẽn da sɩng n beẽ wã?
Nebã welgre
8. a) Matɩe 13:24-30, 36-43 pʋgẽ, a Zezi rɩka yel-bʋs me n tɩ loe ne zãmaanã baasgo? b) A Zezi yel-bũndã võor yaa bõe?
8 Yel-kãsems a taab la a Zezi rɩk n tɩ loe ne zãmaanã baasgo. Yel-kãensã a yembr yaa ‘saasẽ rĩungã kambã’ welgr ne “wẽng soaba kamba.” A Zezi goma rẽ yell yel-bũnd pʋgẽ, n wilg bɛ sẽn pʋgl n bʋd nadens ki pʋʋgẽ. A yel-bũndã pʋgẽ, “ki” wã makda kiris-neb hakɩkã sẽn paam vʋʋsem sõng zaeebã. “Nadensa” yaa neb nins sẽn yet tɩ b yaa kiris-neb n yaool n yaa “wẽng soaba kamba,” b sẽn nong a Sʋɩtãan dũniyã yĩnga. B welga nin-kãensã ne ‘Wẽnnaam rĩungã kamba,’ n ning-b bãnd tɩ b na n paam sãango. (Matɩe 13:24-30, 36-43) Rẽ sɩd zĩndame bɩ?
9. a) Dũni gill pipi zabrã poore, welg-kãseng bʋg la b maan neb nins fãa sẽn da yet tɩ b yaa kiris-nebã sʋkã? b) Wãn to la kiris-neb nins sẽn paam vʋʋsem sõng zaeebã wilg tɩ b ra yaa Rĩungã sõgen dãmb hakɩka?
9 Dũni gill pipi zabrã poore, b welga neb nins fãa sẽn da yet tɩ b yaa kiris-nebã sul a yiibu: 1) A yembr yaa kiris-neb ne yʋʋrã tũudum taoor dãmb ne b poorẽ dãmbã, sẽn teel Tẽn-tẽns Lagem-taabã (Société des Nations) sẽn lebg Tẽn-tẽns sẽn lagem taab Siglgã (Organisation des Nations unies) masã wã hal wʋsgã, la b ket n gãt b tẽng-n-biilmã kãn-kãe tẽns nins b sẽn vɩẽ wã. 2) A to wã yaa kiris-neb hakɩkã sẽn kell n teel Wẽnnaam Mesi Rĩungã ne b sũy fãa zab-kãng poorã, n pa teel dũni kãngã tẽnsã. (Zã 17:16) Nin-kãensã wilgame tɩ b yaa Wẽnnaam Rĩungã sõgen dãmb hakɩka, b sẽn moon Wẽnnaam rĩungã “koe-noog kãngã” dũniyã gill zugã yĩnga. (Matɩe 24:14) Rẽ woma bi-bʋse?
10. Rĩungã mooneg tʋʋmd pipi biis yɩɩ bõe?
10 Pipi, b sɩngame n tigisd neb nins sẽn paam Wẽnnaam vʋʋsem sõngã zaeebã, sẽn tar saagr n na n zĩnd ne Kirist saasẽ Rĩungã pʋgẽ wã. Baa ne nin-kãens sẽn be tẽns toɛy-toɛy pʋsẽ wã, b tigim-b-la siglg neb sẽn tar zems-n-taar pʋgẽ. Nin-kãensã sẽn paam vʋʋsem sõng zaeebã bãnd ningr kolga saabo.—Wilgri 7:3, 4.
11. a) Tigisg bʋg la b ket n maanda, la rẽ zemsa ne bãngr-gom-bʋgo? b) Bãngr-gom-kãng pidsgã wilgda bõe?
11 Rẽ poore, ne Kirist sor-wilgrã maasem, b sɩngame n tigimd ‘kʋʋn-kãseng sẽn yi soolem fãa, la buud fãa, la sẽn yaa neb sẽn gomd goam toɛy-toɛy fãa.’ Bãmba yaa ‘piis a taab’ nins sẽn na n põs ‘to-kãsengã’ n kẽ Wẽnnaam dũni paalgã pʋgẽ wã. (Wilgri 7:9, 14; Zã 10:16) Wẽnnaam Rĩungã mooneg tʋʋm-kãngã sẽn segd n tʋm tɩ saabã yaool n wa wã ket n kẽngda taoor rũndã-rũndã. Piis a taabã kʋʋn-kãseng sẽn yaa neb milyõ rãmb masã wã sõngda sẽn zae-bã kellã n moond Rĩungã koɛɛg sẽn tar yõod wʋsgã n pa basdẽ ye. Neba wʋmda koe-kãng tẽnsã fãa pʋsẽ.
Bõe n wat beoog-daare?
12. D segd n ket n moonda wʋsg t’a Zeova daarã yaool n wa bɩ?
12 Yɛlã fãa wilgdame tɩ d kolgda yaoolem dayã saabo, la t’a Zeova daarã kolgame. La bãngr-goam n ket n na n pids tɩ ra-kãng sẽn be rabeem wʋsgã yaool n sɩng bɩ? N-ye. Neb nins sẽn sakd Rĩungã la neb nins sẽn pa sakd-a wã welgr nan pa sa ye. Zĩis sãnda bɛɛbã kɩɩsg sẽn yɩ toaag n kaoos sẽn na maan yʋʋmã pʋsẽ, karen-bi-paalsã sõor fɩɩgdame masã. Baa zĩis nins nebã sẽn zãgsdẽ koe-noogã, a Zeova nimbãan-zoeerã puka vẽenega, tõnd sẽn ket n kõt kasetã yĩnga. Woto yĩnga, bɩ y kell n kẽng taoor ne tʋʋmdã! A Zezi kõta tõnd bas-m-yam tɩ tʋʋmdã sã n wa sa, saabã na n waame.
13. Wa b sẽn gʋls 1 Tesalonik rãmba 5:2, 3 pʋgẽ wã, yel-kãseng bʋg n ket n wate, la a võor ne tõnd na n yɩɩ bõe?
13 Biiblã bãngr-gomd a to sẽn tar yõod wʋsg reng n togsa woto: “Wakat ninga neba sẽn na n yeel tɩ laafɩ la yĩn-maasma, wakat kãng bala, toog na n paama bãmb wa toog sẽn yõkd pag sẽn tʋta, la bãmb kõn põs ye.” (1 Tesalonik rãmba 5:2, 3) D pa mi “laafɩ la yĩn-maasmã” mooneg sẽn na n yɩ to-to nand ye. La pa rat n yeel tɩ dũniyã nanambs na n sɩd tõog n welga ãdem-biisã zu-loees ye. Neb nins sẽn gũud a Zeova daarã ne ratem kãsengã pa na n bas tɩ mooneg kãngã belg-b ye. B miime tɩ rẽ poor bala, sãoong n na n tiig n wa zĩig pʋgẽ.
14. Yel-bʋs n na n zĩnd to-kãsengã wakate, la wãn to la b na n pʋg taaba?
14 To-kãsengã sɩngrẽ, nanambsã na n yik n zaba ne Babilon Kãsengã, sẽn yaa dũniyã gill ziri tũudum soolmã, n sãam-a. (Matɩe 24:21; Wilgri 17:15, 16) Rẽ poore, tẽnsã na n yik n zaba ne neb nins sẽn sakd a Zeova naam sẽn ka to wã, n kɩt t’a Zeova sũur yik wʋsg ne goosneema rãmbã la b poorẽ dãmbã, tɩ rẽ na n wa baas ne b sãoong zãng-zãnga. Woto n na n yɩ to-kãsengã zug tẽn-sʋk sẽn yaa Armagedõ wã. Rẽ poore, b na n loba a Sʋɩtãan ne a zĩn dãmbã bog-zulungẽ, tɩ b pa na n le tõog n kʋɩɩb ãdem-biisã ye. Yaa rẽ n na n baas a Zeova daarã, sẽn yaa wakat ning a yʋʋrã sẽn na n zẽkã.—Ezekɩɛll 38:18, 22, 23; Wilgri 19:11-20:3.
15. Bõe yĩng tɩ na n yɩ yalemd tɩ d tags t’a Zeova daarã ket n zãrame?
15 Zãmaan-kãngã saabã na n waa wakat ning Wẽnnaam sẽn yãkã takɩ. A pa na n viig a wakatã ye. (Habakuk 2:3) Tẽeg-y tɩ Zerizalɛm sãoongã yʋʋmd 70 wã waa tao-tao, sasa ning Zʋɩf rãmbã sẽn da pa tẽed-a wã, b sẽn da wa n tagsdẽ tɩ yellã ra saame n loogã. Yaa wãn to yẽ ne tẽn-kʋdem wẽndẽ Babilonã? A ra tara pãnga, n da tar bas-yard ne a menga, la a ra tara lal-bɛd sẽn karg n gũbg-a. La a lʋɩɩ yʋʋn-yɛnga. Woto me, yaa zĩig pʋgẽ la sãoongã na n wa zãmaan-wẽng kãngã zugu. D modg t’a sã n wa na n wa bɩ mik tɩ tõnd lagma taab Wẽnd baleng hakɩkã pʋgẽ, d sẽn kell n gũ a Zeova daarã wakat fãa wã yĩnga.
Lebg-n-gese
• Bõe yĩng tɩ tar yõod wʋsg tɩ d ket n gũud a Zeova daarã wakat fãa? Wãn to la d tõe n maan woto?
• Wãn to la nebã welgr sẽn maand masã wã pak tõnd mengã?
• Bõe n na n wa maan t’a Zeova daarã yaool n sɩnge? Rẽ wã yĩnga, bõe la tõnd mengã segd n maandẽ masã?
[Foto rãmba, seb-neng 180, 181]
Ka la bilfu, yaoolem dayã na n saa ne a Sʋɩtãan dũniyã sãoongo