Dũni paalg wa sẽn zems Wẽnnaam kãabgã

BIIBLÃ sẽn yaa Wẽnnaam Gomd b sẽn gʋlsã kõta tõnd saagre, a sẽn yet tɩ: “Wa sẽn zems bãmb kãabgo, tõnd gũuda yĩngr paalg la tẽn-paalga, tɩrlem sẽn na n zĩnd b pʋsẽ.”—2 Pɩɛɛr 3:13.

“Yĩngr paalga” yaa bõe? Biiblã rɩka yĩngrã bɩ saasã n tɩ loe ne naam dɩɩbo. (Tʋʋma 7:49) “Yĩngr paalga” yaa guvɛrnema paalg sẽn na n dɩ naam tẽngã zugu. A yaa paalga, bala a na n ledga masã naamã. A leb n yaa bõn-paalg Wẽnnaam daabã pidsg pʋgẽ. Yaa Rĩung ning yĩng a Zezi sẽn zãms tõnd tɩ d pʋʋsã. (Matɩe 6:10) Sẽn yaa Wẽnnaam n lugl-a-la t’a be saasẽ wã yĩnga, b boond-a lame tɩ ‘saasẽ soolem.’—Matɩe 7:21.

“Tẽn-paalga” yaa bõe? Pa tẽngã meng-meng la b na n ledg ne a to ye, bala Biiblã togsda vẽeneg tɩ neb n na n zĩnd tẽng zug ka wakat sẽn pa sate. “Tẽn-paalga” yaa ãdem-biis zãmaan paalga. A na n yɩɩ paalga, bala rẽ tɩ b menemsa nin-wẽnsã. (Yelbũna 2:21, 22) Neb nins fãa sẽn na n vɩɩmd wakat kãngã wã na n waooga Naandã la b sak-a, la b vɩɩmd tɩ zems ne a noyã. (Yɩɩl Sõamyã 22:28) B sagenda tẽnsã fãa neb tɩ b zãms no-kãens la b tũ-b b vɩɩmã pʋgẽ. Yãmb maanda woto bɩ?

Wẽnnaam dũni paalgã pʋgẽ, nebã fãa na n saka a naamã. Yãmb nonga Wẽnnaam, tɩ rẽ kɩt tɩ y sakd-a bɩ? (1 Zã 5:3) Rẽ yaa vẽeneg yãmb manesmã y yirã, y tʋʋma zĩigẽ bɩ lekollẽ wã bɩ?

Dũni paalg kãng pʋgẽ, ãdem-biisã na n naaga taab n balem sɩd Wẽnnaamã. Yãmb balemda yĩngr la tẽng Naandã bɩ? Y balengã sɩd kɩtame tɩ y tar zems-n-taar ne neb nins sẽn balemd Wẽnd wa yãmbã, n be tẽnsã la buudã fãa pʋsẽ wã la sẽn gomd goam toɛy-toɛya fãa wã bɩ?—Yɩɩl Sõamyã 86:9, 10; Ezai 2:2-4; Sofoni 3:9.

[Zĩgũbri, seb-​neng 17]

Wẽnnaam ning sẽn kãabd bõn-kãensã wã

Wẽnnaam ning sẽn kãabd bõn-kãensã wã yaa saasã la tẽngã Naanda. Yaa yẽ la a Zezi Kirist sẽn yeel t’a yaa “sɩd Wẽnnaam sẽn ka to” wã.—Zã 17:3.

Neb wʋsg waoogda wẽnnaam dãmb bãmb mens sẽn maane. Neb milyõ rãmb wõgemdeda yimaas rãmb sẽn pa vɩ taoore. Neb a taab waoogda ninsaalbã siglsi, ninsaalbã tags-bɛd sẽn tik nebã nif sẽn ne wã bala, bɩ b mens tʋlsmã. Baa neb nins sẽn yet tɩ b balengã tika Biiblã zugã pa waoogd a soab ning seb-kãng sẽn yet t’a yaa sɩd ‘Wẽnnaam sẽn ka to wã’ yʋʋr ye.—Tõodo 4:35.

Naandã meng yetame: “Mam ya a Zeova. Yaa mam yʋʋr la woto.” (Ezai 42:5, 8, NW ) Yʋ-kãngã pukda sẽn yɩɩd naoor 7 000 Biiblã b sẽn gʋls pipi ne hebre la gɛrk goamã pʋsẽ wã. A Zezi Kirist zãmsa a karen-biisã tɩ b pʋʋs woto: “Tõnd Ba sẽn be [saasẽ,] tɩ yãmb yʋʋr yɩ ne waoogre.”—Matɩe 6:9.

Sɩd Wẽnnaamã tara zʋg-bʋse? A yeelame tɩ yẽ yaa Wẽnnaam sẽn yaa “nimbãan-zoeta la bark kõata. Mam sũur ka yikd tao-tao ye, la mam nonglem yaa wʋsgo. La mam yaa sɩd soaba.” A leb n wilgdame t’a pa basd neb nins sẽn kɩɩsd a noyã ne yamleoogã taal n pa sɩbg-b ye. (Yikri 34:6, 7) A sẽn tall manesem ning ne nebã pĩnd wẽndẽ wã wilgdame tɩ bilg-kãngã yaa sɩda.

B segd n waooga yʋ-kãnga la yʋʋrã soab menga, bɩ n ges-b wala sõngo. A sẽn yaa Naab sẽn ka to ãndũniyã gill pʋgẽ wã la a yaa Naandã yĩnga, a segda ne tõnd sakr la d balengo. Yãmb mengã sakd-a lame la y balemd-a bɩ?

[Zĩ-gũbri/Foto, seb-​neng 18]

Toeen-bʋs la “yĩngr paalg la tẽn-paalga” na n wa ne?

Tẽngã toeemame n lebg arzãna Luk 23:43

[Zĩ-gũbri/Foto rãmba, seb-​neng 19]

Na n naf-y lame bɩ?

Wẽnnaam pa tõe n yag ziri ye!—Tɩt 1:2.

A Zeova yetame: “Gomd ninga sẽn yit mam noorẽ wã ka na n le wa mam nengẽ zaalem ye. A na n maana bũmb ninga mam sẽn datã. La a na n tõoga bũmb ninga mam sẽn tʋm-a t’a tɩ maanã.”—Ezai 55:11.

A Zeova zoe n naanda “yĩngr paalg la tẽn-paalga.” Saasẽ guvɛrnema wã zoe n sɩnga naam dɩɩbo. B zoe n yẽbga ‘tẽn-paalgã.’

Wilgr sebrã sẽn togs bõn-sõms kẽer “yĩngr paalga la tẽn-paalga” sẽn na n wa ne n kõ ãdem-biisã poore, a togsda Wẽnnaam mengã goam woto: “Gese, mam maanda bũmb fãa paalse.” A paasame me: “Gʋlse! Tɩ bõe, gom-kãens yaa sɩda la b zemsa reegre.”—Wilgri 21:1, 5.

Sokr ning sẽn tar yõodã yaa: Tõnd maanda toeeng nins sẽn segdã sẽn na yɩl tɩ Wẽnnaam ges tõnd wa ned sẽn zems ne yɩ ‘tẽn-paalgã’ neda, “yĩngr paalga” sẽn na n dɩ naam a zugã sasa bɩ?