Namsg buud fãa na n saa ka la bilfu!

Tõe tɩ yãmb zoe n soka y meng n dat n bãng bũmb ning sẽn kɩt tɩ namsg beẽ wã. Sẽn na maan yʋʋm tusa, zabã, naongã, yel-beed toɛy-toɛyã, bi-beerã, wẽg-taabã, bãasã la kũumã namsa ãdem-biisã. Neba namsa yʋʋm nins sẽn loogã pʋsẽ n yɩɩd pĩndã. Rẽ yĩnga wakat n wat tɩ yel-kãensã fãa na n sa bɩ?

N-ye, d tõe n kɩsa sɩd tɩ namsg buud fãa na n saa ka la bilf bala! Biiblã sẽn yaa Wẽnnaam Gomdã yeelame: “Nin-wẽng kõn tol n zĩnd ye. . . . La sũ-maasem dãmba na n sooga dũniyã n maan sũ-noog laafɩ wʋsg yĩnga.” Rẽ na n kaoosa wakat a wãna? “Nin-tɩrs na n sooga dũniyã la bãmb na n zĩnda a zug wakat sẽn ka sɛta.”—Yɩɩl Sõamyã 37:10, 11, 29.

Wẽnnaam sã n wa kɩt tɩ wẽnemã la namsgã sa, tẽngã na n lebga arzãna. Rẽ, nebã na n tõog n vɩɩmda ne laafɩ la sũ-noog wakat sẽn-kõn-sa yĩnga. Wẽnnaam Gomdã reng n yeelame: “[Wẽnnaam] na n yẽesa nintãmã fãa t’a ra le zĩnd bãmb ninẽ ye, la kũum ka na n le zĩnd ye, la sũ-sãoong bɩ yãbre walla toog kõn le zĩnd yɛs ye.”—Wilgri 21:4.

Dũni-paalg kãng pʋgẽ, b na n vʋʋga sẽn ki-bã meng tɩ bãmb me paam bark kãense: “Nin-tɩrsã la sẽn pa-b tɩrsã me vʋʋgr na n zĩndame.” (Tʋʋma 24:15, NW) Yaa rẽ n so t’a Zezi ra yeel bi-bɛɛg a ye sẽn tek yam n kos sugr woto: “Fo na n zĩnda ne maam paradis [arzãna].”—Luk 23:43.

Sɩnga wãn tɩ namsg wa beẽ?

Sẽn mik tɩ Wẽnnaam da ratame tɩ ãdem-biisã vɩɩmd vɩɩm sẽn tar bark woto wã, bõe yĩng t’a bas tɩ namsg wa beẽ? Bõe yĩng t’a bas tɩ namsgã kaoosd wʋsg woto?

Wẽnnaam da naana a Ãdem ne a Hawa tɩ b yĩnsã la b yamã fãa zems zãnga. A ning-b-la arzãn pʋgẽ la a bobl-b tʋʋmd sẽn be yamleoogo. Biiblã yeelame tɩ “Wẽnnaam yãa bũmb nins fãa [a] sẽn naanã, la gese, a yaa sõama wʋsgo.” (Sɩngre 1:31) B sã n da kell n sakẽ Wẽnnaam, b ra na n doga kamb sẽn zems zãnga, la arzãna ra na n wa yalg n lima tẽngã gilli, tɩ nebã vɩɩmd a zug laafɩ la sũ-noog pʋgẽ wakat sẽn-kõn-sa.

Wẽnnaam naana a Ãdem ne a Hawa tɩ b tõe n yãk yam b toor n maan b sẽn date. B ra pa wa masĩn dãmb sẽn pa tõe n yãk b sẽn na n maaneg b toorã ye. La b sã n da rat n kell n tall b sũ-noogã, b ra segd n tũuda Wẽnnaam noyã. Bala Wẽnnaam yeelame: “Mam yaa [a Zeova], yãmb Wẽnnaam. Mam zãmsda yãmb y meng sõngr yĩnga. Mam yãagda yãmb sor ninga yãmb sẽn tog n tũ wã zugu.” (Ezai 48:17) B sã n yãk n na n maan bãmb mens sẽn dat bala, na n waa ne yel-beedo, bala Wẽnnaam pa naan ninsaalbã tɩ b tõog n soog b mens n pa teeg yẽ ye. Biiblã yeelame: “Yaa [a Zeova] n wilgd ned sore. Ninsaal na n yɩɩ wãn n bãng a sore?”—Yelbũna 20:24.

Zu-bʋko, tõnd pipi yaab rãmbã tagsame tɩ b ra tõe n sooga b mens n pa teeg Wẽnnaam tɩ yɩ sõma. La b sẽn tõdg Wẽnnaam sor-wilgrã, a pa kogl-b tɩ b kell n yɩ neb sẽn zẽms zãng ye. Rẽ kɩtame tɩ b pãnga sɩng boogr bilf-bilfu, tɩ b kʋʋle, n wa baas n ki. Sẽn yaa bãmb n dog tõndã yĩnga, kɩtame tɩ tõnd me yaa neb sẽn pa zems zãnga, n kiidẽ.—Rom dãmb 5:12.

Ãnda n segd n dɩ naam?

Bõe yĩng tɩ Wẽnnaam pa sãam a Ãdem ne a Hawa la a lebs n maan rao a to ne a paga? Yaa tɩ b kɩɩsame tɩ Wẽnnaam pa tar sor n na n dɩ naam ãndũniyã gill zug ye. Yaa wala b sẽn da sok woto bala: Ãnd soab n tar sor n na n dɩ naam ãndũniyã gill zugu? La ãnd soab n na n dɩ naamã tɩ zemse? Bɩ wala b sẽn sok tɩ: Rẽ yĩnga Wẽnnaam sã n da pa rɩtẽ naam ãdem-biisã zutu, b vɩɩmã kõn yɩẽ sõma n yɩɩg woto sɩda? Wẽnnaam sẽn kõ-b sẽk wʋsg tɩ b soog b mensã, yaa sẽn na yɩl tɩ b bãng sã n yaa ninsaalbã sẽn na n dɩ naam taab zut la sõma bɩ, bɩ a Zeova sẽn na n yɩ b naab la sõma n yɩɩda. Wẽnnaam sẽn kõ ninsaalbã sẽk ningã seka b na mak n sigl sigls toɛy-toɛy naamã rɩɩbo, nebã ne taab zĩnd-n-taarã, laogã zãab la tũudmã wɛɛngẽ n pa teeg Wẽnnaam sor-wilgr n gese.

Rẽ baasa wãn to? Sẽn na maan yʋʋm tusa, ãdem-biisã vɩɩm kell n yɩɩ namsg woo namsgo. Ninsaalbã ra nan zɩ n nams wala b sẽn nams to-to yʋʋm nins sẽn loogã pʋgẽ wã ye. Dũni gill zabr a yiib-n-soabã sasa, neb milyõ rãmb la b kʋ-yã. Sẽn yɩɩd neb milyõ 100 n ki zab toɛy-toɛy a taab pʋsẽ. Bi-beerã la nen-kɛglmã taa zĩig zãnga. Dorgã rɩkr piuuga dũniyã gill zugu. Taoor bãasã ket n longda neb wʋsgo. Yʋʋmd fãa, komã la bãasã kʋʋda neb milyõ rãmba. Zagsã pʋsẽ vɩɩm sãoong la neb nins sẽn basd no-sõma wã tũubã sõor paasa zĩig fãa. Ninsaalbã goosneema baa a yembr pa tar yel-kãensã tɩɩm ye. B baa a yembr pa tõog n kɩt tɩ kʋʋlmã, bãasã la kũumã sa ye.

Ninsaalbã yɛl yaa wala Biiblã sẽn da reng n togs tõnd wakatã sẽn da na n wa yɩ to-to wã bal kɛpɩ. Wẽnnaam Gomdã wilgame tɩ tõnd wakatã yaa dũni kãngã “yaoolem wakate,” tɩ ‘tood na n zĩndi.’ La wala Biiblã sẽn yeelã bal kɛpɩ, ‘nin-wẽnsa ne zãmb dãmb maanda wẽng n paasdẽ.’—2 Tɩmote 3:1-5, 13.

Namsg buud fãa saab kolgame

Bũmba fãa wilgdame tɩ d kolgda wakat ninga Wẽnnaam sẽn kõ ãdem-biisã sor tɩ b soog b mens tɩ baas wẽnga saabo. Yaa vẽeneg masã tɩ ãdem-biisã sã n pa teeg Wẽnnaam, b pa tõe n dɩ naam tɩ yɩ sõma ye. Yaa Wẽnnaam naamã bal n tõe n wa ne bãane, sũ-noogo, laafɩ, la vɩɩm sẽn pa sate. Dẽnd wakat ning a Zeova sẽn bas tɩ wẽnemã la namsgã zĩndã kolga saabo. Ka la bilfu, Wẽnnaam na n kẽesa a toog ãdem-biisã yɛlẽ, n sãam dũni kãngã sẽn yaa wẽngã gilli.

Biiblã bãngr-gomd a yembr yeelame tɩ “rĩm dãmb kãens [ninsaalbã goosneemã rãmbã sẽn be mãsa wã] sẽn dɩt naam wakate, Wẽnnaam sẽn be yĩngra na n kɩtame tɩ soolem sẽn ka tõe n sãam . . . zĩnd [saasẽ]. A na n wãa soolem kãens fãa [masã goosmeemã rãmbã] tɩ b menem n bas-a t’a yaas wakat fãa.” (Daniɛll 2:44) Biiblã tõrã gom-zu-raoog la woto: A Zeova na n wilga ne a saasẽ Rĩungã maasem tɩ yẽ n tar sore, la yẽ bal n tõe n dɩ naam ãndũniyã gill zug tɩ zemse. A Zezi sẽn wa n deng n togsd ‘yaoolem dayã’ bãnd bõn-kãseng a yembre, a yeelame: “Wẽnnaam soolem koe-noog kãngã na n moona dũniyã tɛk fãa tɩ yɩ kaset buud fãa yĩnga. Dẽ, dũniyã sɛɛb na yaool n ta.”—Matɩe 24:14.

Ãnd dãmb n na n põs dũniyã saabẽ? Biiblã leokdame: “Nin-tɩrs na n zĩnda tẽnga pʋgẽ, pʋ-peelem dãmb na n zĩnda a pʋgẽ. La b na n yiisa nin-wẽns tẽnga pʋgẽ.” (Yelbũna 2:21, 22) Nin-tɩrsã yaa neb nins sẽn zãms a Zeova raabã la b maand-a wã. A Zezi Kirist yeelame: “Vɩɩm sẽn ka sɛta yaa woto, tɩ bãmb na bãng yãmb sẽn yaa sɩd Wẽnnaam sẽn ka to la a Zezi Kirist yãmb sẽn tʋm a soabã.” (Zã 17:3) N-ye, “dũniyã . . . , loogdame la ned ninga sẽn maand Wẽnnaam daab paada wakat sẽn ka sɛta.”—1 Zã 2:17.   

Biiblã verse rãmb nins sẽn be seb-kãngã pʋgẽ wã yita Wẽnnaam Sebre b sẽn zems ne moorã gʋlsg yaoolem noyã pʋgẽ. Verse sã n pʋgl ne NW wilgdame t’a yita Les Saintes Écritures — Traduction du monde nouveau pʋgẽ.