A Daniɛll bãngr-goamã sẽn deng n togs Mesi wã waoong to-to
NO-RƐƐS a Daniɛll vɩɩmda sẽn yɩɩd yʋʋm 500 sẽn deng a Zezi rogmã. Ne rẽ fãa, a Zeova kõo a Daniɛll vẽnegr sẽn da na n sõng nebã tɩ b bãng wakat ning a sẽn da na n zae a Zezi ne vʋʋsem sõngã, sẽn dat n yeel t’a yãk-a lame t’a yɩ Mesi bɩ Kiristã. B yeela a Daniɛll woto: “Bɩ f bãng tɩ b sẽn kõ noor tɩ b le me Zerizalɛma hal tɩ ta Wẽnnaam nin-tũusdga sẽn yaa naaba wakat na n yɩɩ yʋʋm a yopoe naoor a yopoe, la yʋʋm pis-yoob la a yiib naoor a yopoe.”—Daniɛll 9:25.
Sẽn na yɩl n bãng Mesi wã waoong sasa, pipi, d segd n bãnga yʋʋmd ning b sẽn tik n sɩng sõdg n tall n wa ta Mesi wã pukr wakatã. Sã n yaa ne bãngr-gomdã, yaa “b sẽn kõ noor tɩ b le me Zerizalɛmã” tɛka. Yaa wakat bʋg la b kõ noorã? Sã n yaa ne Biibl gʋlsd a Nehemi, b sẽn yiis noorã tɩ b lebg n me Zerizalɛm lalsã, “rẽ tɩ naab a Artazɛgzɛs reega b naama tɩ yʋʋm pis-yiiblẽ.” (Nehemi 2:1, 5-8) Pĩnd yɛlã mitb me wilgdame tɩ yʋʋmd 474 sẽn deng a Zezi rogmã, a Artazɛgzɛs rɩɩ a pipi yʋʋm tõr naam. Woto yĩnga, a naamã rɩɩb yʋʋm 20 soabã ra yaa yʋʋmd 455 sẽn deng a Zezi rogmã. Masã tõnd bãngame t’a Daniɛll bãngr-gomdã sẽn gom Mesi wã pukr yellã sɩnga pidsg yʋʋmd 455 sẽn deng a Zezi rogmã.
A Daniɛll wilgda yʋʋm sõor ning sẽn da na n loog tɩ ‘Wẽnnaam nin-tũusdga sẽn yaa Naabã’ bɩ Mesi wã yaool n pukã. Bãngr-gomdã goma “yʋʋm a yopoe naoor a yopoe, la yʋʋm pis-yoob la a yiib naoor a yopoe” yelle, tɩ fãa yaa yʋʋm 69 naoor a yopoe. Sasa kãngã kaoosa wakat a wãna? Zʋɩf rãmbã ra minim n magda yʋʋm a yopoe-poe. Wala makre, b ra maanda Vʋʋsg yʋʋmd yʋʋm a yopoe soab fãa. (Yikri 23:10, 11) Woto yĩnga, yʋʋm 69 naoor a yopoe wã kaoosa yʋʋm 483.
Sẽn ket yaa d geel masã. D sã n sɩng ne yʋʋmd 455 sẽn deng a Zezi rogmã, n sõd yʋʋm 483, tallda tõnd n ta yʋʋmd 29 a Zezi rogmã poore. Yaa yʋʋm kãng takɩ la a Zezi paam lisg n lebg Mesi wã!a (Luk 3:1, 2, 21, 22) Woto pa Biiblã bãngr-gomd pidsg sẽn tar pãng sɩda?
[Tẽngr note]
a Sẽn sɩng ne yʋʋmd 455 sẽn deng a Zezi rogmã, n tɩ ta a Zezi rogmã ket yʋʋm-yende, yaa yʋʋm 454. La sẽn sɩng ne a Zezi rogmã ket yʋʋm-yend n tɩ ta pipi yʋʋmd a rogmã poore, yaa yʋʋm-yende (yʋʋmã sõdgr pa sɩngd ne zaalem ye, sɩngda ne yembre). La sẽn sɩng ne a Zezi rogmã, a pipi yʋʋmd n tɩ ta yʋʋmd 29 wã, yaa yʋʋm 28. D sã n dɩk yʋʋm 454 n paas yʋʋm yende, la yʋʋm 28 n fãoog taaba, fãa yaa yʋʋm 483. B kʋʋ a Zezi a sẽn lebg Mesi wã yʋʋm a wãn poore, yʋʋmd 33 wã sasa. (Daniɛll 9:24, 26) Ges-y Prêtons attention à la prophétie de Daniel ! sak 11, la Étude perspicace des Écritures, volum a 2, seb-neng 995-997. Yaa a Zeova Kaset rãmbã n yiis seb-kãensã b yiibã fãa.
[Diagram/Foto rãmba, seb-neng 198]
“YƲƲM PIS-YOPOE NAOOR A YOPOE”
yʋʋm 490
yʋʋm a 7 naoor a 7 yʋʋm 62 naoor a 7 yʋʋmd a 1 naoor a 7
(yʋʋm 49) (yʋʋm 434) (yʋʋm a 7)
y. 455 y. 406 s. d. a Z. r 29 33 36
“B sẽn kõ noor Zerizalɛm sẽn lebs n me wã Mesi wã waoongo Mesi wã kʋʋbo ‘Yʋʋm 70 naoor a 7 wã’ saabo
tɩ b le me Zerizalɛmã”