Malɛk rãmba naab a Misɛll yaa ãnda?

BIIBLÃ pʋgẽ, b pa gomd malɛk ning b sẽn boond t’a Misɛllã yell wʋsg ye. La b sã n wa gomd a yelle, yaa raood tʋʋmd la a maanda. A Daniɛll sebrã pʋgẽ, a Misɛll zaba ne malɛg-wẽnse. A Ziid sebrã pʋgẽ, a wẽe no-koeemd ne a Sʋɩtãanã. La Wilgr sebrã pʋgẽ, a yika zabr ne a Sʋɩtãan la a zĩn dãmbã. A sẽn teel Wẽnnaam a Zeova naamã n zab ne Wẽnnaam bɛɛbã yĩnga, a Misɛll wilgame t’a tʋʋmã zemsa ne a yʋʋrã võor sẽn yaa: “Ãnd n zem Wẽnde?” La a Misɛll yaa ãnda?

Wakat-wakate, b boonda neb kẽer ne yʋy toɛy-toɛya. Wala makre, b boonda zak soab a Zakoob t’a Israɛll me, la tʋm-tʋmd a Pɩɛɛr t’a Sɩmo. (Sɩngre 49:1, 2; Matɩe 10:2) Woto me, Biiblã wilgdame tɩ Misɛllã yaa a Zezi Kirist yʋʋr a to a sẽn da tar t’a nan pa wa tẽng zugu, la a tẽng zug vɩɩmã poor me. Bɩ d ges yɛl sẽn tik Gʋlsg Sõamyã zug sẽn kɩt tɩ d yet woto wã.

Malɛk rãmba naaba. Wẽnnaam Gomdã pʋgẽ, b gomda ‘malɛk rãmba naab’ a Misɛll yelle. (Ziid 9) Ges-y tɩ b yeelame t’a Misɛll yaa malɛk rãmba fãa naaba. Rẽ rat n yeelame tɩ malɛg-kãngã sẽn yaa naabã yaa a yembr bala. Sɩda, Biiblã pʋgẽ, b sã n gomd ‘malɛk rãmba naab’ yelle, yaa malɛk a yembr yell la b gomda, zɩ n yɩ malɛgs wʋsg yell ye. Sẽn paase, a Zezi tʋmda malɛk rãmb naab tʋʋmde. Soaal a Zezi Kirist sẽn vʋʋgã wɛɛngẽ, 1 Tesalonik rãmba 4:16 yetame: “Zusoaba meng na n yii arzãn n sig ne rãamde la ne malɛk rãmba naab koɛɛga la ne Wẽnnaam baorgo.” Woto yĩnga, b bilga a Zezi koɛɛgã wala malɛk rãmb naab koɛɛga. Rẽ n so tɩ verse kãngã wilgdẽ t’a Zezi mengã yaa malɛk rãmb naab a Misɛll.

Tãb-bɩɩs taoor soaba. Biiblã yetame t’a “Misɛll ne bãmb malɛk rãmba zaba ne dragõ wã, la . . . ne yẽ malɛk rãmba.” (Wilgri 12:7) Woto, a Misɛll yaa malɛg-sõms tãb-biis taoor soaba. Wilgr sebrã leb n bilgda a Zezi wa malɛg-sõms tãb-biis taoor soaba. (Wilgri 19:14-16) La tʋm-tʋmd a Pɩɛɛr pʋd n yeelame meng tɩ malɛgsã sakda a Zezi Kirist. Woto yĩnga, Biiblã gomda a Misɛll ne a “malɛk rãmba,” la a Zezi ne a “malɛk rãmba” me yelle. (Matɩe 13:41; 16:27; 24:31; 1 Pɩɛɛr 3:21, 22) Wẽnnaam Gomdã pa wilgd zĩig baa a yembr tɩ malɛg-sõms tãb-biis sul a yiib n be saasẽ wã, t’a Misɛll yaa a yembr naaba, t’a Zezi yaa a to wã naab ye. Woto yĩnga, zemsame tɩ d yeel t’a Misɛll pa ned a to n zʋʋg a Zezi Kirist a sã n wa tʋmd saasẽ wã ye.a

[Tẽngr note]