Kãadmã yaa Wẽnnaam kũuni

1, 2. a) Neb sã n kẽ kãadem paalem, wakat ninga d sokda d mens sogs-bʋse, la bõe yĩnga? b) Sogs-bʋs leoor la d na n bao n bãng sag-kãngã pʋgẽ?

YÃMB nonga kãadem kibs kẽnd bɩ? Neb wʋsg nonga rẽ, bala yaa sũ-noog wakate. Y yãta raoã ne a pʋg-paalã sẽn nag sõma. Sẽn paase, b nensã bee laado! Daar-n-kãnga, b sũy sɩd yaa noogo, la b tagsdame tɩ b vɩɩmã na n yɩɩ noogo.

² La d segd n bãngame tɩ rũndã-rũndã, neb wʋsg pa waoogd kãadmã wa pĩndã ye. Neb sã n kẽ kãadem paalem, tõnd sẽn dat yaa b vɩɩmã yɩ noogo, la wakat ninga d sokda d mens woto: ‘Rẽ yĩnga b na n sɩd paama sũ-noog b kãadmã pʋg sɩda? B kãadmã na n kaoosame sɩda?’ Sẽn na yɩl tɩ kãadmã yɩ noog la kaoose, yaa raoã ne pagã sẽn na n teeg Wẽnnaam, la b tũud a noyã b kãadmã pʋgẽ. (Yelbũna 3:5, 6) B segd n maana woto sẽn na yɩl n pa Wẽnnaam nonglmã pʋgẽ. Neb nins sẽn dat n kẽ kãadmã nong n sokda b mens woto: ‘Bõe yĩng tɩ mam dat n kẽ kãadem? Nin-bʋg buud la m segd n kẽ kãadem ne? Wãn to la m tõe n segl m meng n yaool n kẽ kãadem? La bõe n tõe n sõng rao ne a pag tɩ b kell n tall sũ-noog b kãadem pʋgẽ?’ D ges Biiblã sẽn yet bũmb ning sogs-kãensã zugu.

BÕE YĨNG TƖ Y RAT N KẼ KÃADEM?

3. Bõe yĩng tɩ pa sõma tɩ d kẽ kãadem bʋʋm faad yĩnga?

³ Neb kẽer tẽedame tɩ kãadmã yaa tɩlae sẽn na yɩl n paam sũ-noogo, bɩ tɩ ned sã n pa kẽ kãadem a vɩɩmã pa tar võor ye. La woto yaa ziri. A Zezi yɩɩ ra-kõore, la a yeelame tɩ ra-kotã yaa Wẽnd kũuni, la a sagl tɩ ned ning sẽn tõe, bɩ a ra kẽ kãadem ye. (Matɩe 19:10-12) Tʋm-tʋmd a Poll me goma ra-kotã nafa yelle. (1 Korẽnt dãmba 7:32-35) A Zezi ne a Poll pa gɩdg kãadem kõom ye. Ned sã n zãmsd “nebã tɩ b ra kẽ kãadem,” a taasd-b-la “zĩn dãmb koeese.” (1 Tɩmote 4:1-3) Ned sẽn pa kẽ kãadem tõe n tʋma a Zeova tʋʋmdã tɩ bũmb pa tiis-a ye. Dẽnd yɩta sõma tɩ d ra kẽ kãadem bʋʋm faad yĩnga, wala makre neb a taab sẽn yet tõnd tɩ d kẽ yĩng ye.

4. Bõe yĩng tɩ yaa kãadem sẽn yaa sõma pʋgẽ la kambã tõe n paam wubr sõma?

⁴ La bʋʋm bee sẽn tõe n kɩt tɩ ned kẽ kãadem bɩ? N-ye. Kãadmã me yaa Wẽnnaam kũuni. (Sɩngre 2:18) Dẽnd a tara nafa, la a tõe n kõo ned sũ-noogo. Y tõe n paama kamb kãadem pʋgẽ. Kãadmã sã n yaa sõma la y na n tõog n wub kambã sõma, bala kambã rata roagdb sẽn nong-b tɩ kibl-b la wilg-b sore. (Yɩɩl Sõamyã 127:3; Efɛɛz rãmba 6:1-4) La pa y sẽn dat kambã yĩng bal n segd n kɩt tɩ y kẽ kãadem ye.

5, 6. a) Sã n yaa ne Koɛɛg Soab 4:9-12, zood nafa kẽer la bʋse? b) Wãn to la kãadem tõe n yɩ wa wĩir sẽn kal a tãabo?

⁵ Wẽnnaam Gomdã yeta woto: “Neb a yiib n são nin-yende. Tɩ bõe, bãmb paamda b tʋʋmdã yõod sõma. Bãmb ned a ye sã n lʋɩ, ned a to wã yikda yẽ. La nin-yend tara toogo. Tɩ bõe, yẽ sã n lʋɩ, ned a to ka be sẽn na n yik yẽ ye. Neb a yiib sã n gãand ne taaba, b wɩngda taab yĩnsi. La ned sã n ya a yembre, a na n yɩɩ wãn n wɩng a yĩnga? La ned sã n tar pãng n tõe neb a taaba, neb a yiib tõee yẽ. La wĩir sã n kal a tãabo, a ka tõe n [tõsg, NW ] naana ye.”—Koɛɛg Soaba 4:9-12.

⁶ Pipi, vɛrse kãensã gomda zoodã sẽn wat ne nafã ninsã yelle. La kãadmã pʋgẽ, raoã ne a pagã zood segd n yɩɩga zood a taabã fãa. Wala vɛrse wã sẽn wilgã, sã n yaa woto, b na n sõngda taaba, n belsd taaba, la b kogend taaba. Pagã ne raoã zoodã bal pa sek sẽn na yɩl tɩ b kãadmã tall pãng ye. Neb a yiibã zood yaa wa wĩir sẽn kal a yiibu, a tõe n tõsga nana-nana. La wa vɛrse wã sẽn wilgã, wĩir sã n kal a tãabo, pa tõe n tõsg nana ye. Raoã ne a pagã sã n baood wakat fãa n na n ta a Zeova yam, b kãadmã na n yɩɩ wa wĩir sẽn kal a tãabo. B sẽn tũud a Zeova wã yĩng na n kɩtame tɩ b kãadmã sɩd tall pãnga.

7, 8. a) Sagl-bʋg la a Poll kõ neb nins sẽn pa kẽ kãadem tɩ pag ne rao lagengã tʋlsmã namsd-bã? b) Bõe la Biiblã yet vẽeneg kãadmã wɛɛngẽ?

⁷ Yaa kãadmã pʋgẽ me bal la rao ne pag tõe n kẽ ne taab tɩ pa kɩɩs Wẽnnaam noor ye. Dẽnd yaa kãadmã pʋgẽ bal la d tar sor n tõe n paam sũ-noog ning pag ne rao lagengã sẽn kõtã. (Yelbũna 5:18) Baa ned sã n yõsg bi-bɩɩlmã wakat sẽn yaa sasa ning pag ne rao lagengã tʋlsem sẽn tar pãng wʋsgã, tʋlsem kãng tõe n ket n namsd-a lame. A sã n pa tõog a menga, a tõe n wa tʋma tʋʋm-yoodo. Wẽnnaam kɩtame t’a Poll sagl neb nins sẽn pa kẽ kãadmã woto: “Bãmb sã n ka tõe n tõog b mense, bɩ b kẽ kãadem; y sã n maan kãadem n são yãmb sẽn na n bas tɩ bõn-kãng ratem wɩng yãmb wa bugum.”—1 Korẽnt dãmba 7:9; Zak 1:15.

⁸ Sẽn yaa bʋʋm ning fãa n kɩt tɩ ned rat n kẽ kãadem, a segd n bãngame tɩ kãadmã na n waa ne zu-loeese. A Poll yeelame tɩ neb nins sẽn kẽ kãadmã “na n paama toogo.” (1 Korẽnt dãmba 7:28) Sẽn kẽ-b kãadmã tara zu-loees sẽn pa kẽ-b kãadmã sẽn pa tare. Yãmb sã n datame n kẽ kãadem, bõe la y tõe n maan tɩ zu-loeesã ra yɩ wʋsgo, la tɩ y sũ-noogã yɩ wʋsgo? Yaa y sẽn na n bãng n yãk pʋg-sõng bɩ sɩd-sõngo.

NIN-BƲG BUUD LA M SEGD N KẼ KÃADEM NE?

9, 10. a) Sagl-bʋs la a Poll kõ kãadmã wɛɛngẽ? b) Ned sã n kɩɩs Wẽnnaam noyã n kẽ kãadem ne ned sẽn pa tũud a Zeova, nong n baasda wãna?

⁹ Wẽnnaam kɩtame t’a Poll sagl neb nins sẽn dat n kẽ kãadmã woto: “Bɩ y ra lagem ne neb nins sẽn ka tẽebã ye.” (2 Korẽnt dãmba 6:14) B sã n naag rũms a yiib n soge, tɩ b bedrmã la b pãngã pa yembre, b yiibã fãa na n namsame. Kãadmã pʋgẽ me yaa woto. Ned sẽn tũud a Zeova sã n kẽ kãadem ne ned sẽn pa tũud a Zeova, na n yɩɩ toogo. B nin-yend sã n dat n pa a Zeova nonglmã pʋgẽ t’a to wã toor kae ne rẽ, b sẽn dat n lʋɩɩs bũmb nins taoor b vɩɩmã pʋgẽ wã pa na n yɩ yembr ye. La na n waa ne sũ-sãamse. Rẽ n so t’a Poll sagl kiris-nebã tɩ b sã n na n kẽ kãadem, bɩ yɩ ne “ned sẽn tũud Zusoabã bala.”—1 Korẽnt dãmba 7:39.

¹⁰ Kiris-neb kẽer tẽedame tɩ b sẽn na n kẽ kãadem ne ned sẽn pa tũud a Zeova n são b sẽn na n yaa b yembre. Kẽer yikdame bal n yãk yam n kɩɩs Biiblã noyã n kẽ kãadem ne ned sẽn pa tũud a Zeova. La naoor wʋsgo baasda yooko. Nin-kãensã wat n mikame tɩ b pa tõe n sõs ne taab yɛl nins sẽn tar yõod n yɩɩdã zug ye. B wat n mikame tɩ b sẽn da yaa b yembrã n são. La kiris-neb wʋsg sẽn pa kẽ kãadem teega Wẽnnaam la b sakd n tũud a noyã kãadmã wɛɛngẽ. (Yɩɩl Sõamyã 32:8) Baa ne b sẽn dat n kẽ kãadmã, b maagda b meng hal n wa paam ned sẽn tũud Wẽnnaam a Zeova.

11. Wãn to la y tõe n bãng n yãk sɩd-sõng bɩ pʋg-sõngo? (Ges-y seb-neng 114 zĩ-gũbrã.)

¹¹ La yaa d bãng tɩ pa ned ning fãa sẽn yet t’a tũuda a Zeova n yaa sɩd-sõng bɩ pʋg-sõng ye. Yãmb sã n dat n kẽ kãadem, bɩ y bao ned zʋg sẽn tat y yam, sẽn nong Wẽnnaam tʋʋmdã, la sẽn nong a Zeova wa yãmba. Tʋm-tʋmd sẽn tũud sɩdã yiisa sɛb wʋsg sẽn gomd kãadmã yelle. Yaa yam tʋʋmd tɩ y tags sagls nins sẽn be seb-kãensã pʋsẽ wã zug sõma, la y pʋʋs a Zeova t’a sõng-y tɩ y paam sɩd-sõng bɩ pʋg-sõngo.a—Yɩɩl Sõamyã 119:105.

12. Kãadmã wɛɛngẽ, bõe la nebã maand tẽns wʋsg pʋsẽ, la mak-sõng bʋg sẽn be Biiblã pʋgẽ n tõe n sõng-ba?

¹² Tẽns wʋsg pʋsẽ, yaa roagdbã n baood sɩd bɩ pag n kõ b biiga. Sã n yaa ne bãmba, yaa roagdbã n tar yam la minim n yɩɩd yel-kãngã wɛɛngẽ. Naoor wʋsgo, kãadem kãensã buud baasda neere, wa sẽn da yaa to-to pĩnd wẽndẽ wã. A Abrahaam sẽn tʋm a sõgnã t’a tɩ bao pag n wa kõ a Izaakã yaa mak-sõng n kõ roagdb nins sẽn dat n sõng b biig t’a paam pag bɩ sɩdã. A Abrahaam ra pa baood tɩ pagã roagdb yɩ ligd rãmb bɩ nin-bɛd ye. A modga wʋsg n bao pag neb nins sẽn tũud a Zeova wã sʋk n kõ a Izaake.b—Sɩngre 24:3, 67.

WÃN TO LA Y TÕE N SEGL Y MENG N YAOOL N KẼ KÃADEM?

13-15. a) Wãn to la Yelbũn 24:27 tõe n sõng rao sẽn dat n kẽ kãadem? b) Bõe la pag tõe n maan n segl a meng kãadem yĩnga?

¹³ Yãmb sã n dat n kẽ kãadem, y segd n soka y meng woto: ‘Mam segla m meng n sa n tõe n kẽ kãadem bɩ?’ Pa y sẽn dat ned sẽn na n nong-yã, pa y sẽn dat n kẽ ne pag bɩ raoã, bɩ y sẽn dat kambã yĩng n wilgd tɩ y segla y meng n sa ye. Neb nins sẽn dat n kẽ kãadmã segd n deng n tagsa yɛl kẽer zugu.

¹⁴ Rao sẽn dat n kẽ kãadem segd n tagsa Biiblã saglg ning sẽn pʋgdã zug neere: “Ges f tʋʋmd yell yɩnga, n maneg f pʋʋg la f yaool n me f zaka.” (Yelbũna 24:27) Gom-kãngã võor yaa bõe? Pĩnd wẽndẽ wã, rao sã n dat n kẽ kãadem, a segd n deng n soka a meng woto: ‘Mam tõe n zãa pag la kamb nins d sẽn na n dogã bɩ?’ A segd n tʋmame. Wala makre, a segd n tõog n koo pʋʋgo, la a ges koodã yell sõma. Yaa woto me rũndã-rũndã. Rao sẽn dat n kẽ kãadem segd n yɩɩ ned sẽn tõe n zã zaka. A sã n tar laafɩ fãa, a segd n tʋmame. Wẽnnaam Gomdã wilgdame tɩ ned sã n pa get a zak rãmb yell yĩngã wɛɛngẽ, tẽebã wɛɛngẽ la a pa wilgdẽ t’a nong-b lame, a yaa nin-wẽng n yɩɩd ned sẽn ka tẽebo.—1 Tɩmote 5:8.

¹⁵ Pag sẽn dat n kẽ kãadem segd n bãngame tɩ yẽ me tara tʋʋm wʋsg zakã pʋgẽ. Biiblã wilgdame tɩ minim la zʋg-sõma kẽer n be pag sẽn segd n tall n tõog n ges zak yelle, la a sõng a sɩda. (Yelbũna 31:10-31) Rap la pagb nins sẽn yãgd n kẽed kãadem tɩ b pa segl b mensã tagsda b mens yell bala. B pa tagsd bũmb ning b sẽn tõe n wa maan n kõ b pagã bɩ b sɩdã yell ye. La sẽn yɩɩd fãa, neb nins sẽn dat n kẽ kãadmã segd n segla b mense, n yɩ neb sẽn tũud Wẽnnaam noyã sõma, n yaool n kẽ kãadmã.

16, 17. Neb nins sẽn segend n na n kẽ kãadmã segd n tagsa Biiblã sagl-bʋs zugu?

¹⁶ Sẽn na yɩl n segl y mens n wa kẽ kãadem, y segd n tagsa tʋʋmd ning Wẽnnaam sẽn bobl sɩdbã la pagbã zug neere. Rao sẽn yaa kiris-ned segd n bãnga zak-sobendã sẽn dat n yɛɛlga. A sẽn yaa zakã soabã pa kõt-a sor t’a weoog a zakã rãmb ye. A segd n dɩka a Zezi togs-n-taare. (Efɛɛz rãmba 5:23) Pag sẽn yaa kiris-ned me segd n bãngame tɩ tʋʋmd ning a Zeova sẽn bobl-a zakã pʋgẽ wã tara yõod wʋsgo. Rẽ yĩnga a na n tõog n saka a sɩdã tõog bɩ? (1 Korẽnt dãmba 11:3) A zoe n sakda a Zeova la Kirist tõogã. (Galat dãmba 6:2) La a sã n kẽ kãadem, a segd n saka tõog a to n paase, sẽn yaa a sɩdã rẽnda. Baa ne a sɩdã sẽn pa zems zãngã, rẽ yĩnga a na n tõog n sakd-a lame la a sõngd-a bɩ? A sã n mi t’a pa tõe n maan woto, bɩ a ra kẽ kãadem ye.

¹⁷ Sẽn paase, sẽn dat n kẽ-a kãadem fãa segd n bãngame t’a tog n maana sẽn tat a to wã yam. (Filip rãmba 2:4) A Poll yeela woto: “Bɩ yãmb ned kam fãa nong a pag wa a menga, la bɩ pag waoog a sɩda.” Wẽnnaam kɩtame t’a Poll bãng tɩ sɩdbã ratame tɩ b pagbã waoogd-b wʋsgo, la tɩ pagbã me ratame tɩ b sɩdbã nong-b wʋsgo.—Efɛɛz rãmba 5:21-33.

18. Bõe yĩng tɩ neb sẽn baood n na n bãng taab zʋg n yaool n kẽ kãadem segd n tall yõk-m-menga?

¹⁸ Bao n bãng taab zʋg n yaool n kẽ kãadmã pa reem yell ye. Yaa sasa kãng la y tõe n bãng y sã n na n tõog n zĩnda ne taab bɩ y pa na n tõoge. Sasa kãng me y segd n yõkda y mense. Bala y na n wa rat n wilgame tɩ y nonga taaba, la yĩngã ratem sẽn tar pãngã yĩnga, y tõe n wa maana bũmb y sẽn tar sor n na n maan y kãadmã poor bala. La neb a yiibã sã n sɩd nong taaba, b ned baa a ye pa na n maan bũmb sẽn na n sãam a to zems-n-taar ne a Zeova ye. (1 Tesalonik rãmba 4:6) Y sã n wa baood n na n bãng taab zʋg bɩ y tall yõk-m-menga. Rẽ na n nafa yãmb y vɩɩmã tõre, y wa n tõog n kẽ kãadem tɩ y pa kẽ kãadem me.

BÕE N TÕE N SÕNG TƖ KÃADEM KAOOSE?

19, 20. Bõe yĩng tɩ kiris-nebã tagsg kãadmã zug segd n yɩ toor ne neb wʋsg tagsgo? Rɩk-y makre.

¹⁹ Ned sã n dat t’a kãadmã kaoose, a segd n talla tagsg sẽn zems kãadmã zugu. Sɩd-sɩda, ned sã n wa paam n kẽ kãadem, a pa segd n ges tɩ saame ye. Nan yaa sɩngre, bala a Zeova lugla kãadmã n dat t’a kaoose. (Sɩngre 2:24) La zu-bʋko, rũndã-rũndã neb wʋsg pa tagsd woto ye. Tẽns kẽer pʋsẽ, nebã yetame tɩ kãadem yaa wa b sẽn gãd wĩy a yiib n yod ne taaba. B pa mi tɩ woto wilgdame tɩ neb wʋsg sẽn tagsd to-to kãadmã zugã yaa kɛgr ye. Wãn to? Bala f sã n yod wĩy a yiib ne taaba, tõe n yɩɩ kãn-kãe. La f sã n dat me f tõe n yodg-a-la nana-nana.

²⁰ Neb wʋsg sɩd tagsdame tɩ kãadmã pa yõor tɛk bũmb ye. B yɩta tao-tao n kẽ, bala b tagsdame tɩ b na n paama b sẽn datã, la tɩ zu-loees sã n wa beẽ, b na n basa taaba. Tẽeg-y tɩ Biiblã rɩka kãadmã n mak ne wĩy sẽn kal taaba. B maanda wĩy nins b sẽn tar n sẽbd batayo rãmbã sõma sẽn na yɩl tɩ b ra wa tõsg bɩ n yidg ye. Baa seb-kãseng sasa, wĩyã segd n kell n gãda batayo wã kãn-kãe. A Zeova me lugla kãadmã n dat t’a kaoose. Tẽeg-y t’a Zezi yeelame tɩ “ned da welg bũmb nins Wẽnnaam sẽn lagem ne taabã ye.” (Matɩe 19:6) Yãmb sã n kẽ kãadem, y tagsg kãadmã zugã segd n yɩɩ wa a Zeova ne a Zezi sẽn tagsd to-to kãadmã zugã. La kãadem sẽn yaa yõor tɛk bũmbã kɩtdame tɩ lebg pakr bɩ? Ayo.

21. Kãadmã pʋgẽ, ned fãa tagsg segd n yɩɩ wãn-wãn a to wã zugu, la bõe n tõe n sõng-b tɩ b maan dẽ?

²¹ Kãadmã pʋgẽ, ned fãa segd n talla tagsg sẽn yaa sõma a to wã zugu. Raoã ne pagã sã n modgd n get taab zʋg-sõma la modgr nins ned kam fãa sẽn maandã, sũ-noog na n zĩnda b kãadmã pʋgẽ. Rẽ yĩnga ned tõe n sɩd maana woto baa ne a pagã bɩ a sɩdã sẽn pa zems zãngã bɩ? B segd n modg n maana woto, bala, baa ne d sẽn mi t’a Zeova miime tɩ d yaa koangdbã, d ratame t’a get d zʋg-sõma wã bala. Yɩɩl gʋlsdã yeela woto: “[Zeova], mam soaala, yãmb sã n tẽeg yel-wẽnã n ka base, ãnda n na n yalse?” (Yɩɩl Sõamyã 130:3) Rao ne a pag me segd n geta taab zʋg-sõma la b kõt taab sugri.—Kolos rãmb 3:13.

22, 23. Mak-sõng bʋg la a Abrahaam ne a Saara kõ neb nins sẽn kẽ kãadmã?

²² Kãadem sã n kaoos yʋʋm wʋsgo, tõe n kɩtame tɩ pagã ne a sɩdã paam sũ-noog n paase. Biiblã gomda a Abrahaam ne a Saara kãadmã sẽn da yaa to-to b kʋʋlem wakatã yelle. Yaa vẽeneg tɩ zu-loees ra pa kongd ye. Tags-y n ges-y a Saara sẽn da wa n loog yʋʋm 60, tɩ b kos-a t’a bas a zakã Uur sẽn da yaa tẽn-noogã n yik n tɩ vɩɩmd fu-rot pʋsẽ a yõor tɛkã. Pa yɩ nana ne-a ye. La a kell n saka a sɩdã. A sɩd sõnga a Abrahaam t’a tõog n maan a sẽn da ratã fãa. A ra sakd-a-la ne a sũur fãa. A pʋd n boola a Abrahaam t’a zu-soab “a sũur pʋgẽ.”c (Sɩngre 18:12; 1 Pɩɛɛr 3:6) A sɩd ra waoogd-a-la ne pʋ-peelem.

²³ Woto pa rat n yeel t’a Abrahaam ne a Saara ra zemsda taab bũmba fãa pʋgẽ ye. Daar a yembre, a Saara yeela bũmb t’a Abrahaam “sũur sãam” wʋsgo. La a Abrahaam kelga a Zeova n sik a meng n sak a pagã gomdã. La rẽ kɩtame tɩ zakã paam barka. (Sɩngre 21:9-13) Rũndã-rũndã me, pagbã ne sɩdbã, baa neb nins sẽn kẽ kãadem sẽn kaoosã, tõe n dɩka yam a Abrahaam ne a Saara kãadmã sẽn yɩ to-to wã pʋgẽ.

24. Kãadem sẽn yaa wãn to n waoogd Wẽnnaam a Zeova, la bõe yĩnga?

²⁴ Kiris-neb hakɩkã sʋka, neb tusa tara sũ-noog b kãadmã pʋgẽ. Pagbã waoogda b sɩdbã wʋsgo, tɩ rapã me nong b pagbã la b waoogd-ba. B modgdame n lʋɩɩsd a Zeova raabã maaneg taoor b vɩɩmã pʋgẽ. Yãmb sã n wa rat n kẽ kãadem, bɩ y bãng n yãk pʋg-sõng bɩ sɩd-sõngo, la y segl y meng sõma kãadmã yĩnga. La y modg tɩ laafɩ la nonglem zĩnd y kãadmã pʋgẽ, tɩ waoog Wẽnnaam a Zeova. Y sã n maan woto, y kãadmã na n sõnga yãmb tɩ y kell n pa Wẽnnaam nonglmã pʋgẽ.