Wẽnnaam koe-noogã yaa bõe?

1. Koe-bʋg la Wẽnnaam taasd tõndo?

Wẽnnaam datame tɩ vɩɩmã yɩ noog tẽngã zugu. Yaa a sẽn nong ninsaalbã yĩng la a sẽn naan tẽngã la bũmb nins sẽn be a zugã. Ka la bilfu, a na n kɩtame tɩ nebã vɩɩm yɩ noog dũniyã gill zugu. A na n menesa bũmb nins fãa sẽn kɩt tɩ ãdem-biisã namsdẽ wã.—Karm-y Zeremi 29:11.

Goosneemã baa a ye pa tõog tɩ wẽnemã, bãasã la kũumã sa ye. La koe-noog n be. Ka la bilfu, Wẽnnaam na n kɩtame tɩ yẽ goosneemã reeg ninsaalbã goosneem rãmbã fãa zĩiga. Dẽ, nebã na n vɩɩ bãan dũniyã zugu, n tar yĩns laafɩ.—Karm-y Ezai 25:8; 33:24; Daniɛll 2:44.

2. Bõe yĩng tɩ tar yõod tɩ y bãng Wẽnnaam koe-noogã?

Sẽn na yɩl tɩ namsgã sa, Wẽnnaam na n deng n sãama nin-wẽnsã. (Sofoni 2:3) La na n yɩɩ wakat bʋgo? Wẽnnaam sebrã reng n wilga yɛl sẽn na n nams ãdem-biisã rũndã-rũndã. Dẽnd bũmb nins sẽn maandã yaa kaset tɩ nin-wẽnsã sãoong kolgame.—Karm-y 2 Tɩmote 3:1-5.

3. Bõe la y tog n maane?

D segd n karemda Biiblã, n tõog n bãng Wẽnnaam. Biiblã yaa wa lɛtre, ba sẽn tool a kamba. A wilgda d sẽn tõe n maan to-to tɩ d vɩɩmã tall barka, la d sẽn na n maaneg n wa paam n vɩɩmd tẽngã zug wakat sẽn kõn sa. Bãng-y tɩ y sẽn dat n wʋm Biiblã goam võorã pa na n yɩ neb kẽer noog ye. La sẽn yaa rẽ n tõe n kõ-d vɩɩm sẽn kõn sa wã, d pa segd n bas tɩ ned gɩdg-d ye.—Karm-y Yelbũn 29:25; Wilgr 14:6, 7.