Koe-noogã sɩd yita Wẽnnaam nengẽ bɩ?

1. Ãnd n kɩt tɩ b gʋls Biiblã?

Biiblã pʋgẽ la d yãt koe-noog ning sẽn wilgd tɩ nebã na n wa vɩɩmda tẽngã zug wakat sẽn kõn sa wã. (Yɩɩl Sõamyã 37:29) Sɛb 66 n be Biiblã pʋgẽ. Yaa rap 40 la Wẽnnaam yãk tɩ b gʋlse. A Moiiz n gʋls pipi sɛb a nu wã sẽn na maan yʋʋm 3 500 masã. Yaoolem sebrã yaa tʋm-tʋmd a Zã n gʋls sẽn yɩɩd yʋʋm 1 900 masã. Ãnda goam n be Biiblã pʋgẽ? Yaa ne vʋʋsem sõngã maasem la Wẽnnaam vẽneg neb tɩ b gʋlse. (2 Sãmwɛll 23:2) B gʋlsa Wẽnnaam goama, pa b mens tagsa ye. Dẽnd Biiblã yaa a Zeova n so.​—Karm-y 2 Tɩmote 3:16; 2 Pɩɛɛr 1:20, 21.

Ges-y video wã Ãnd n so Biiblã?

2. Bõe n wilgd tɩ Biiblã yaa Wẽnnaam sebre?

Biiblã sẽn togs beoog yɛl tɩ pidsd kɛpɩ wã yaa kaset t’a yaa Wẽnnaam sebre. Ninsaal pa tõe n maan woto ye. (Zozue 23:14) Yaa Wẽnnaam Sẽn-tõe-a-fãa wã bal n mi beoog-daare.​—Karm-y Ezai 42:9; 46:10.

Sebr sẽn yaa Wẽnnaam n so ka tar to ye. Sɩd me, Biiblã ka to ye. B yiisa Biiblã tõr sẽn yɩɩd milyaar a yiibu, ne buud-goam sẽn yɩɩd 450. Baa ne a sẽn yaa seb-kʋdre, la a pa sebr b sẽn zãmsd lekollẽ wã, a sã n gomd tẽngã la bũmb a taabã Wẽnnaam sẽn naanã yelle, yaa kɛpɩ. Neb pis-naasã sẽn gʋls-a wã goam pa kɩɩsd taab me ye. Sẽn paase, Biiblã sẽn gomd nonglmã yell to-to wã wilgda vẽeneg tɩ yaa Wẽnnaam sebre. A goamã ket n tara pãng n tõe n maneg ned vɩɩm. Woto fãa kɩtame tɩ neb milyõ rãmb kɩs sɩd tɩ Biiblã yita Wẽnnaam nengẽ.​—Karm-y 1 Tesalonik rãmb 2:13.

Ges-y video wã Bõe n wilg tɩ Biiblã yaa Wẽnnaam sebre?

3. Bõe yell la Biiblã gomda?

Biiblã togsda koe-noog sẽn wilgd tɩ Wẽnnaam nonga ãdem-biisã, la t’a na n kɩtame tɩ b vɩɩmã yɩ sõma beoog-daare. A wilgda sẽn sɩng to-to t’a Ãdem ne a Hawa kɩt tɩ ninsaalbã fãa kong arzãnã, la sẽn na n yɩ to-to tɩ tẽngã le lebg arzãna.​—Karm-y Wilgr 21:4, 5.

Noy la sagls n be Biiblã pʋgẽ. A leb n tara kibay sẽn togsd Wẽnnaam manesem sẽn yɩ to-to ne pĩnd wẽndẽ neba, tɩ rẽ wilgd a sẽn yaa a soabã. Dẽnd Biiblã tõe n sõnga yãmb tɩ y bãng Wẽnnaam sõma. A wilgda y sẽn tõe n maaneg n paam n yɩ a zoa.​—Karm-y Yɩɩl Sõamyã 19:8, 12; Zak 2:23; 4:8.

4. Y maanda wãn n wʋm Biiblã goam võore?

Seb-kãngã na n sõnga yãmb tɩ y wʋm Biiblã goam võore. A Zezi ra tikda vɛrse rãmb zugu, n bilgd Gʋlsg Sõamyã võore. Yaa woto me la b maand seb-kãngã pʋgẽ.​—Karm-y Luk 24:27, 45.

Koe-noog ning sẽn yit Wẽnnaam nengẽ wã kõta sũ-noog sẽn ka to. La neb n maand b toog kae ne rẽ, tɩ sãnda meng sã n wʋm koɛɛgã bɩ yikd b sũyã. Ra bas-y tɩ rẽ koms y raood ye. Y sã n dat n wa paam vɩɩm sẽn kõn sa wã, yaa tɩlae tɩ y bãng Wẽnnaam sõma.​—Karm-y Zã 17:3.