A rɩka yam a kongrã pʋgẽ

1, 2. a) A Zonas baoo yel-bʋg n kõ a meng ne sẽn da be-b koglgã pʋgẽ wã? b) Bõe la a Zonas kibarã tõe n sõng tõnd tɩ d bãnge?

A ZONAS bee koom koglg pʋgẽ, la a wʋmda bʋrg hal tɩ namsd-a. A yam la a kɩt tɩ bʋrgã sa. Pa sebgã sẽn pengd koglgã sẽbdsã tɩ maand bʋʋrã, bɩ ko-wiisã sẽn wẽed koglgã n da namsd-a n yɩɩd ye. Yaa sẽn be-b koglgã pʋgẽ wã kelemsã. Koglgã rat n bõrame t’a naabã la a sõngd-bã maand b sẽn tõe sẽn na yɩl tɩ ra bõr ye. A Zonas tagsame tɩ b fãa na n kiime. A yaool n miime tɩ yaa yẽ yelle!

² Sɩnga wãn t’a Zonas wa be zu-loe-kãngã pʋgẽ? A kɩɩsa a Zeova sẽn yaa a Wẽnnaamã tɩ lebg yelle. Bõe la a maan-yã? Tara tɩɩm bɩ? Sogs-kãensã leoorã na n sõng-d lame tɩ d bãng bũmb wʋsgo. Wala makre, d na n bãngame tɩ baa ned sẽn tar tẽeb sõma tõe n wa tudgame, la t’a tõe n lebs n manega yellã.

Galile no-rɛɛsa

3-5. a) B sã n gomd a Zonas yelle, neb wʋsg nong n tẽegda bõe? b) Bõe la d mi a Zonas zugu? (Ges-y vẽnegrã sẽn be tẽngrã.) d) Bõe n wilgd t’a Zonas tʋʋmdã pa yɩ nana bɩ noog baa bilfu?

³ A Zeova ra yãka a Zonas t’a yɩ yẽ no-rɛɛsa. La naoor wʋsgo, b sã n gomd a Zonas yelle, nebã nee a sẽn maan tɩ pa sõma wã bala. Wala makre, a sẽn yɩ tõata, n kɩɩs a Zeova wã. La a yaool n maana bũmb wʋsg sẽn sek pẽgre. Tẽeg-y tɩ yaa a Zeova meng n yãk-a. A Zeova ra pa na n dɩk tʋʋmd a woto n bobl-a, sã n da mik t’a yaa kɩɩsd bɩ nin-wẽng ye.

⁴ Biiblã pa togsd tõnd bũmb wʋsg a Zonas zug ye. (Karm-y 2 Rĩm dãmb 14:25.) D miime bal t’a yita Gat-Hefeer sẽn be kilo a 4 ne Nazarɛtã. Yʋʋm 800 poore, a Zezi roagdbã zĩnda Nazarɛt n wub-a.a Yɩɩ Israyɛll buud piigã rĩm a Zeroboam a yiib-n-soabã naam sasa la a Zonas ra yaa no-rɛɛsa. Rẽ t’a Eli kii hal sẽn kaoose. A Eliize meng sẽn ledg a Eli wã kii a Zeroboam ba wã naam sasa. Baa ne a Zeova sẽn da kɩt tɩ no-rɛɛsdb kãensã menes a Baal tũudmã Israyɛll nebã sʋkã, b ra ket n maanda b toog kae ne a Zeova noyã. Lebga rĩm sẽn da ‘beegd’ a Zeova n so tẽngã masã, tɩ nin-buiidã me tũud yẽ. (2 Rĩm 14:24) Dẽnd a Zonas tʋʋmdã pa yɩ nana bɩ noog baa bilf ye. La baasgo, a pa bas ye.

⁵ La daar a ye, a Zeova tʋma a Zonase, t’a tags tɩ tʋʋmdã yaa toog wʋsgo. Rẽ tɛk la yɛlã sɩng-yã. Bõe la a Zeova ra kos-a t’a maane?

“Yik n kẽng Niniiv”

6. Tʋʋm-bʋg la a Zeova kõ a Zonase, la bõe yĩng tɩ ra wõnd yaa toogo?

⁶ A Zeova yeela a Zonas yaa: “Yik n kẽng Niniiv sẽn yaa tẽn-kãsengã n tɩ moon n yeel t’a nebã kongame. Tɩ bõe, mam yãa bãmb wẽnemã.” (Zon. 1:2) D tõe n wʋma a Zonas sẽn tags tɩ tʋʋmdã yaa toogã võore. Niniiv zãrmã ra taa kilo 800, t’a sã n na n kẽn nao bɩ na n kolg kiuugu. La pa sorã woglem meng la a Zonas ra bʋʋd ye. A ra tog n tɩ taasa Asiiri nebã sẽn be Niniivã a Zeova bʋ-kaoor koɛɛga. Nebã fãa ra miime tɩ nin-kãensã yaa nen-kɛglem dãmb hal tɩ loog nugu. A Zonas ra taasda Israyɛll nin-buiidã a Zeova koɛɛga, tɩ wʋsg pa sakdẽ ye. Dẽnd yaa toog t’a tags tɩ neb sẽn pa tũud a Zeova na n sakame. Tags-y n ges-y no-rɛɛsã sẽn na n tɩ be Niniiv sẽn bedmã pʋgẽ yẽ a ye. Tẽng b sẽn wa n boondẽ meng tɩ nin-kʋʋdb tẽnga.—Nah. 3:1, 7.

7, 8. a) Bõe n wilgd t’a Zonas ra sɩd yãka yam n na n tõdg a Zeova tʋʋmdã? b) Bõe yĩng tɩ d pa segd n yɩ tao-tao n kao a Zonas bʋʋdo?

⁷ D pa mi a Zonas sã n tagsa woto fãa yelle. D sẽn mi bal yaa t’a zoeeme. A Zeova tʋm-a-la yaanga, t’a zoe n tees nin-taoore, hal n zãage. A kẽnga mogrã noor tẽng a ye sẽn boond tɩ Zope, n yã koom koglg sẽn dabd Tarsis n kẽ. Bãngdb kẽer yeelame tɩ Tarsis ra bee Ɛspayn. Sã n yaa rẽ, a Zonas sẽn da rabdẽ wã ne Niniiv kolga kilo 3500. Yaa tɩlae t’a pasg mog-kãsengã, la rẽ ra tõe n kaoosa yʋʋmde. Dẽnd a Zonas sɩd ra rat n maana a sẽn tõe fãa n tõdg a Zeova tʋʋmdã.—Karm-y Zonas 1:3.

⁸ Woto rat n yeelame t’a Zonas yaa rabɛɛm bɩ? D pa segd n yɩ tao-tao n kao a bʋʋd ye. D pʋd n na n yãame t’a Zonas talla raoodo. A ra yaa ninsaal sẽn pa zems zãng wa tõndo, n tudgd wʋsgo. (Yɩɩl 51:7) Ned beeme tɩ rabeem zɩ n yõk-a bɩ?

9. D tõe n tagsa bõe ne tʋʋmd a Zeova sẽn kõ-do, la wakat kãnga bõe la d pa segd n yĩmi?

⁹ Wẽnnaam tõe n kõo tõnd tʋʋmd ninga, tɩ d tagsdẽ tɩ yaa toogo, wall d tagsdẽ tɩ d pʋd n pa tõe ye. Tõe tɩ d tagsdame meng tɩ Rĩungã koe-noogã mooneg b sẽn bobl kiris-nebã pa nana, tɩ kẽesd-d rabeem. (Mat. 24:14) D sẽn yaa koangdbã yĩnga, d tõe n wa yĩmame t’a Zezi yeelame tɩ “Wẽnnaam tõee bũmb fãa.” (Mark 10:27) Yaa d sã n mi n wa yĩm rẽ la d wʋmd a Zonas rabeemã võore. La a Zonas sẽn zoe wã, bõe yell n paam-a?

A Zeova kibla a no-rɛɛsã sẽn kɩɩs-a wã

10, 11. a) Koglgã sẽn wa n zãagdẽ wã, tõe t’a Zonas tagsame tɩ bõe? b) Yel-bʋg n paam sẽn da be-b koglgã pʋgẽ wã?

¹⁰ Mams-y y yamẽ a Zonas sẽn kẽed koglgã pʋgẽ n na n zĩndi. Tõe tɩ yaa Fenisi koglg sẽn wʋkd koosem. Koglgã naab ne neb nins sẽn sõngd-a wã sɩnga b tʋʋmã, n segend so-toakã t’a Zonas zĩ n getẽ, hal tɩ b wa rɩk sore. Koglgã sẽn wa n zãagdẽ wã, tõe t’a tagsame t’a paam n põsa a Zeova tʋʋmdã sẽn kẽesd-a rabeemã. La zĩig pʋgẽ, seb-kẽeng n yiki.

¹¹ Sebgã rãmba mogrã hal tɩ nebã yɛɛse. Ko-wiisã sẽn da zẽkd to-to wã tõe n luba batayo kẽeng menga. Tao-tao bala, ko-wiisã sɩnga koglgã pengre, t’a lengd goabg la rɩtg n dat n bõre, tɩ nebã pa mi b sẽn kẽedẽ ye. Rẽ yĩnga, a Zonas ra zoe n miime tɩ yaa a ‘Zeova n kɩt tɩ seb-kẽengã yik koomã zug’ wa yẽ mengã sẽn wa n yeelã bɩ? D pa tõe n bãng ye. La sẽn be-b koglgã pʋgẽ wã sɩngame n boond b wẽnnaam dãmbã, t’a Zonas getẽ, n miẽ tɩ wẽnnaam kãensã pa tõe n sõng-b ye. (Maan. 19:4) A yeela a kibarã pʋgẽ tɩ sebgã yɩɩ kẽenga, “hal tɩ koglgã rat n sãame.” (Zon. 1:4) La sẽn mik t’a Zonas Wẽnnaamã tʋm-a lame t’a zãgsã, a yɩta wãn n pʋʋs-a n kos sõngre?

12. a) Bõe yĩng tɩ d pa segd n kao a Zonas bʋʋdo, sebgã sẽn da lengd koglgã t’a bao zĩig n gãe-yã? (Ges-y vẽnegrã sẽn be tẽngrã.) b) Wãn to la a Zeova sõng tɩ b bãng yellã soaba?

¹² A Zonas sẽn tags t’a pa tõe n maan baa fʋɩ n sõng-bã, a baoo zĩig koglgã pʋgẽ n tɩ gãande. A sɩd gũsa tamm.b Koglgã naab yã-a lame n nek-a, n yeel tɩ yẽ me yik n pʋʋs a Wẽnnaamã. Sẽn da be-b koglgã pʋgẽ wã sẽn wa n bãng tɩ sebgã pa zaalmã, b maana poeere, n na n ges sẽn yaa ned ning yĩng la yel-kãngã paam-ba. B sẽn wa n maand poeerã, yaa vẽeneg t’a Zonas sũurã ra kiuusdame. Tao-tao bala, b bãnga sẽn yaa a soaba. Yaa a Zeova n kɩt tɩ seb-kẽengã yiki, leb n yaa yẽ n kɩt tɩ poeerã yõk a Zonase.—Karm-y Zonas 1:5-7.

13. a) Bõe la a Zonas togs nebã? b) A yeela koglgã rãmb tɩ b maan yẽ bõe, la bõe yĩnga?

¹³ A Zonas togsa koglgã rãmb yẽ sẽn yaa ned ningã, la sẽn sɩng to-to tɩ yẽ wa kẽed koglgã. A yeelame tɩ yẽ yaa Wẽnnaam a Zeova sẽn tõe fãa wã tʋm-tʋmda. A paasame t’a tʋma yẽ tɩ yẽ kɩɩs n zoetẽ, la tɩ yaa rẽ yĩng la b sẽn be yel-kãngã pʋgẽ wã. Linga nebã wʋsgo, t’a Zonas meng neẽ tɩ b yɛɛsame. B sok-a lame n ges b na n maan-a-la bõe tɩ koglgã ra bõr tɩ b fãa ki. A leokame tɩ bõe? Tõe tɩ zĩig pʋgẽ wã, a bãngame tɩ yellã tɩɩm yaa b sẽn na n lob yẽ koomã pʋgẽ, la a ra tagsda mogrã zulum la koomã sẽn yaa maasgã. Rẽ yĩnga, a na n basame tɩ nebã fãa ki, n yaool n miẽ t’a tõe n fãag-b lame bɩ? Ayo. A yeel-b-la woto: “Rɩk-y maam n lob koomã pʋgẽ tɩ koomã sigi. Tɩ bõe, mam miimi tɩ yaa mam yĩng la sob-kẽeng kãngã wa-yã.”—Zon. 1:12.

14, 15. a) Bõe la d tõe n maan n wilg tɩ d tara a Zonas tẽebã buudu? b) A Zonas sẽn yeel tɩ b lob yẽ koomã pʋgẽ wã, koglgã rãmb maana wãna?

¹⁴ Yaa vẽeneg tɩ ka rabɛɛm goam la woto ye. A Zeova sũur tog n yɩɩ noogo, a Zonas sẽn yeel woto tɩ wilgdẽ t’a yaa raood soaba, la tɩ neb a taabã neer n pak-a n yɩɩdã. D neeme t’a Zonas gomdã wilgdame t’a tẽebã ra tara pãnga. Tõnd me sã n modg tɩ yaa neb a taabã neer n pak-d n yɩɩda, d rɩkda a Zonas togs-n-taare. (Zã 13:34, 35) D sã n yã ned sẽn be nimbãaneg pʋgẽ, ned sũur sẽn sãame, wall ned sẽn dat sõngr tũudmã wɛɛngẽ, d sakd n sõnga a soabã bɩ? D sã n maand woto, a Zeova sũur na n yɩɩ noog ne-do.

¹⁵ Tõeeme t’a Zonas gomdã sãama koglgã rãmb sũyã, bala b ra pa rat n sak n maan a sẽn yeelã ye. B maana b sẽn tõe fãa sẽn na yɩl n ta b sẽn datẽ wã baa ne sebgã, la pa yãk neng ye. Sebgã pʋd n da tara yãngr bala. B sẽn wa n mik tɩ sẽn maand kae wã, b pʋʋsa a Zonas Wẽnnaam a Zeova, n kos-a t’a ra ning-b taal ye. Rẽ poore b zẽka a Zonas n lob koomẽ wã.—Zon. 1:13-15.

A Zeova zoee a Zonas nimbãanega, la a fãag-a

16, 17. Wilg-y bũmb ning sẽn maane, b sẽn lob a Zonas koomẽ wã. (Ges-y fotã me.)

¹⁶ A Zonas kell n lʋɩɩ ko-wiisã sʋk bal faoo! Tõe t’a maoome n na n dugi, tɩ ko-wiisã limd-a, n pemd-a yaar-yaare, tɩ koglgã yaool n tar teesgo. Ko-wiisã pãng kɩtame t’a sɩng bõrbo, n tar sigb bala, tɩ yẽ meng neẽ tɩ tɩɩm le kae ye.

¹⁷ A Zonas sebrã pʋgẽ, a togsa a tagsg sẽn yɩ to-to a sẽn wa n be koomã pʋgẽ wã. A tagsa yɛl kẽer a sẽn da maand yelle. A tagsa a sẽn pa na n le yã a Zeova ro-neerã sẽn be Zerizalɛmmã, t’a sũurã sãame. A yeelame tɩ yɩɩ wa yẽ siga hal koomã tẽngr-tẽngre, n kolg tãens sẽn be lond pʋsẽ, tɩ gʋɩ-vãad gaam a zugu. Ra wõnda be n na n yɩ a yaoogo.—Karm-y Zonas 2:3-7.

18, 19. a) A Zonas sẽn wa n be koomã tẽngrã bõe n maane? b) Zĩif ning sẽn vel-a wã yaa wãn-wãna, la ãnd nug n be yellã pʋgẽ? (Ges-y vẽnegrã sẽn be tẽngrã.)

¹⁸ La nan pa sa ye! Bõn-vɩɩg sẽn yaa par-wẽnde, sablg tuu-taa, n da be koomẽ wã. A kolga a Zonase, n yaag a no-yalengã n vel-a.

¹⁹ Masã yẽ, saame! La yel-solemd n maane. A Zonas mikame t’a ket n vɩɩme. A pa pogle, a pa bedsd me. A pʋd n ket n vʋʋsda sõma, baa sẽn wõnd yaa be n na n yɩ a yaoogã. A wa n bãngame tɩ sɩd yaa yel-solemd tɛkẽ. Yaa vẽeneg tɩ yaa a Wẽnnaam a Zeova n ‘yãk zĩm-bedr t’a vel-a.’c—Zon. 2:1.

20. A Zonas sẽn yeel bũmb ning a pʋʋsgã pʋgẽ wã wilgda tõnd bõe yẽ mengã zugu?

²⁰ Wakat a wãn la a Zonas na n maan zĩifã pʋgẽ? Ra yaa lik bida. A Zonas zɩ n yã lik a woto buud ye. A zĩnda be n tags a sẽn na n yeel Wẽnnaam a Zeova bũmb ninga. Rẽ poore a pʋʋsame. A pʋʋsgã bee Zonas sebrã sak a yiib-n-soabã pʋgẽ, tɩ d sã n karem bɩ d bãngd bũmb wʋsg a Zonas mengã zugu. Sɩd me, d yãtame t’a Zonas ra mii Gʋlsg Sõamyã sõma, bala a goamã wʋsg yita Yɩɩll Sõamyã sebrã pʋgẽ. Leb n wilgdame t’a yɩɩ mi-beoog soaba. A pʋʋsgã baasgẽ, a yeela woto: “Mam na n maana maoong n kõ yãmb n pʋʋs-y barka. Bũmb ningã mam sẽn pʋlem yãmbã, m na n dolame. Yaa yãmb n so fãagre.”—Zon. 2:10.

21. A Zonas bãnga bõe fãagrã wɛɛngẽ, la bõe la d segd n tẽegdẽ?

²¹ Ned kae n dat n zĩnd zĩif pʋgẽ ye. La a Zonas sẽn zĩnd be wã, a bãngame tɩ ned sã n tũud a Zeova, a tõe n fãag-a-la sẽn yaa zĩig ning fãa, la wakat ning fãa. A Zeova tõog n yãa a tʋm-tʋmdã sẽn da be zĩifã pʋgẽ wã, n fãag-a. (Zon. 2:1) A Zeova a ye tãa n tõe tɩ ned zĩnd zĩif pʋgẽ rasem a tã n pa ki, tɩ bũmb me pa maan-a ye. Rũndã-rũndã me, yaa sõma tɩ d tẽegdẽ t’a Zeova n yaa ‘Wẽnnaam ning sẽn so d vɩɩmã.’ (Dan. 5:23) Pemsmã d sẽn vʋʋsdã la d yõorã meng yita yẽ nengẽ. Y wilgda a Zeova y mi-beoogo, n sakd a noyã bɩ?

22, 23. a) Bõe n da na n wilg a Zonas sã n yaa mi-beoog soaba? b) D fãa sẽn yaa koangdbã, wãn to la d tõe n dɩk a Zonas makre?

²² La a Zonas yẽ? Rẽ yĩnga a lebga sakda, n na n wilg a Zeova a mi-beoog bɩ? N-ye. Rasem a tãab poore, zĩifã tɩ “wʋka a Zonas koomã noore.” (Zon. 2:11) Ges-y koe! A Zeova pa kɩt tɩ zĩifã wʋk a Zonas koomã pʋgẽ t’a na n dug n yi ye. La yaa vẽeneg t’a sẽn yikã, yẽ n da segd n bãng a sẽn na n teesẽ. Rẽ n na n wilg a sã n sɩd yaa mi-beoog soaba. Zonas 3:1, 2 wã yetame: “Zu-soabã le goma ne a Zonas naoor a yiib-n-soab n yeele: ‘Yik n kẽng Niniiv sẽn yaa tẽn-kãsengã n tɩ moon koɛɛg ning mam sẽn kõ foomã.’” A Zonas na n maana wãna?

²³ A pa yals n sok a meng rẽ ye. Kibarã yeta woto: “A Zonas yikame n kẽng Niniiv wa Zu-soabã sẽn yeelã.” (Zon. 3:3) A saka tʋʋmdã. Hakɩka, a rɩka yam a kongrã pʋgẽ. Zĩ-kãngã wɛɛngẽ me, d tog n dɩka a Zonas togs-n-taare. D fãa kongdame, d fãa tudgdame. (Rom 3:23) La d rɩkda yam d kongr fãa pʋgẽ n le wɩng ne Wẽnnaam sakr bɩ, bɩ d komsda raood n pa le rat n maan baa fʋɩ?

24, 25. a) Bõe la a Zonas paam n bãng tɩ yaa barka? b) Bark bʋs la a Zonas na n wa paame?

²⁴ A Zonas sẽn sak a Zeova wã, a ning-a-la bark bɩ? N-ye. Bala wõnda a Zonas wa n bãngame tɩ koglgã rãmb põsame. A sẽn sak tɩ b lob-a koomã pʋgẽ tɩ neb a taabã na n põsã, sebgã yõka zĩig pʋgẽ, tɩ koglgã rãmb ‘zoe a Zeova wʋsgo,’ n bas b wẽnnaam dãmbã la b maan maand n kõ a Zeova.—Zon. 1:15, 16.

²⁵ Bark-kãsems a taab me la a Zonas na n wa paam beoog-daare. A Zezi goma a Zonas sẽn zĩnd zĩm-pataabrã pʋgẽ wã yelle, n na n deng n wilg tɩ yẽ sã n ki, a na n maana rasem a tãab yaoogẽ wã. (Karm-y Matɩe 12:38-40.) A Zonas sã n wa vʋʋg arzãnã pʋgẽ tẽngã zugu, la a wʋm a Zezi sẽn yeelã, a sũur na n yɩɩ noog wʋsgo. (Zã 5:28, 29) A Zeova ratame tɩ yãmb me paam a barkã. Wa a Zonase, bɩ d rɩk yam d kongr fãa pʋgẽ, n wɩng ne a Zeova sakre, la d modg tɩ neb a taabã yell pak-d n yɩɩda.