D bãnga bũmb sẽn da solge, tɩ d sũyã noome

Ned zoe n togsa foo bũmb neb a taabã sẽn pa mi bɩ?—a B boonda rẽ tɩ bũmb sẽn solge. Biiblã gomda bũmb yelle, n yetẽ tɩ ra solgame. Wẽnnaam meng n da solg bõn-kãnga. Yaa nebã sẽn da pa mi wã yĩng la b sẽn yeel tɩ solgame wã. Baa malɛgsã meng baoome n na n bãng sẽn yaa bũmb ninga. Fo rat n bãngame bɩ?—

Hal hal sẽn kaoose, Wẽnnaam naana rao a ye ne pag a ye. Raoã yʋʋr da yaa a Ãdem, tɩ pagã yʋʋr la a Hawa. Wẽnnaam maana zĩig sẽn yaa neer n kõ-ba, tɩ b ra vɩ be. B ra boonda zĩ-kãng tɩ Edɛn zẽed zĩiga. A Ãdem ne a Hawa sã n da sak Wẽnnaam, bãmb ne b kambã la b yagensã ra na n manega tẽngã gill tɩ lebg zĩ-neer bɩ arzãna, wa Edɛn. B ra na n vɩɩme n pa kiidẽ ye. La fo tẽra a Ãdem ne a Hawa sẽn maan bũmb ningã bɩ?—

A Ãdem ne a Hawa kɩɩsa Wẽnnaam. Yaa rẽ n kɩt tɩ tẽngã pa arzãnã. La Wẽnnaam yeelame t’a na n wa kɩtame tɩ tẽngã gill lebg neere, tɩ nebã vɩ ne sũ-noogo, n pa kiidẽ ye. A na n maana wãn tɩ rẽ tõoge? Kaoosame tɩ nebã ra nan pa mi Wẽnnaam sẽn na n maan to-to ye. Ra yaa bũmb sẽn solge.

A Zezi sẽn wa tẽngã zugã, a togsa nebã bũmb ning sẽn solgã. A wilgame tɩ yaa Wẽnnaam Rĩungã. A yeela nebã tɩ b pʋʋs tɩ Rĩungã wa. Yaa Wẽnnaam Rĩungã n na n kɩt tɩ tẽngã lebg arzãna.

Fo sẽn bãng bõn-kãngã sẽn da solgã, fo sũurã pa noom sɩda?— Tẽeg tɩ yaa neb nins sẽn sakd a Zeova wã bal n na n vɩɩmd arzãnã pʋgẽ. Pagb la rap n zĩnd pĩndã n sak a Zeova, tɩ b gomd b yell Biiblã pʋgẽ. Fo rat n bãnga b kibayã bɩ?— D na n goma b kẽer yelle, la d ges d sẽn tõe n maan to-to n yɩ wa bãmba.