SAK A 2
A Rebeka da ratame t’a Zeova sũur yɩ noogo
A Rebeka yɩɩ pag sẽn da nong a Zeova. A sɩdã yʋʋr da yaa a Izaak. Yẽ me ra nonga a Zeova. Maana wãn t’a Rebeka wa lebg a Izaak paga? Bõe la a maane, n wilg t’a da ratame t’a Zeova sũur yɩ noogo? D reng n gom a sɩd a Izaak yelle.
A Izaak yɩɩ a Abrahaam ne a Saara biiga. B ra bee Kanaã. Kanaã tẽngã neb ra pa tũud a Zeova ye. La a Abrahaam da ratame t’a Izaak pagã yɩ ned sẽn tũud a Zeova. A buudã neb kẽer ra bee Harã. Rẽ n so t’a yeel a tʋm-tʋmd a ye t’a kẽng be n tɩ bao pag n wa kõ a Izaak. Tõe tɩ yɩɩ a tʋm-tʋmd a Eliezɛɛr.
A Rebeka tʋma wʋsg sẽn na yɩl tɩ yʋgma wã paam koom n yũ
A Abrahaam tʋm-tʋmdb a taab n tũ a Eliezɛɛr. Harã ra zãra wʋsgo. B kẽnga ne yʋgma piiga, n zɩlg rɩɩb la kũun wʋsgo. La a Eliezɛɛr ra na n maana wãn n bãng n yãk pʋg-sõng n kõ a Izaak? Yẽ ne tʋm-tʋmdbã sẽn ta Harã wã, b tɩ yalsa bulg sɛɛga, bala a Eliezɛɛr ra miime tɩ pʋg-sadbã na n wa yãka koom bulgẽ wã. A pʋʋsa a Zeova n yeel tɩ pʋg-sad ning yẽ sẽn na n kos koomã, t’a sak n kõ yẽ la a yũnug a yʋgma wã, a na n bãngame tɩ yaa yẽ la a Zeova rat tɩ yɩ a Izaak paga.
Sẽn yɩ bilfu, a Rebeka waa bulgẽ wã. Biiblã yeelame t’a ra yaa neer wʋsgo. A Eliezɛɛr kos-a-la koom n na n yũ. A Rebeka kõ-a-la koomã la a yeele: “M na n tooga koom n yũnug yãmb yʋgma wã me tɩ b tɩge.” Tags n gese! Yʋgemd yũuda koom wʋsgo, sẽn yɩɩd fãa ko-yũud sã n tar-a. Dẽnd a Rebeka kẽnga bulgẽ wã naoor ka tɛk n tɩ toog koomã. Fo sã n ges fotã, bõe n wilgd t’a Rebeka sɩd tʋma wʋsgo?— A Eliezɛɛr sũur yɩɩ noogo, a Zeova sẽn leok a pʋʋsgã tao-tao wã.
A Eliezɛɛr kõo a Rebeka te-neeba. A Rebeka yeela a Eliezɛɛr ne tʋm-tʋmdb a taabã tɩ b wa tũ yẽ n kuli. B sẽn ta wã, a Eliezɛɛr togsa zakã rãmb a Abrahaam sẽn tʋm yẽ t’a wa maan bũmb ningã, la a wilg a Zeova sẽn leok yẽ pʋʋsgã to-to wã. Zakã rãmb sẽn bãng tɩ b ratame t’a Rebeka lebg a Izaak pagã, b sũy yɩɩ noogo.
A Rebeka tũu a Eliezɛɛr n kẽng Kanaã n tɩ lebg a Izaak paga
La fo tagsdame t’a Rebeka na n sak n lebga a Izaak pag bɩ?— A Rebeka bãngame tɩ yaa a Zeova n tʋm a Eliezɛɛr. Rẽ n so t’a zakã rãmb sẽn sok-a a sã n dat n tũ n kẽnga Kanaã n tɩ lebg a Izaak pagã, a yeelame yaa: ‘N-ye, m na n tũume.’ Tao-tao bala, a sɩd tũu a Eliezɛɛr n looge. B sẽn ta Kanaã, a kẽe kãadem ne a Izaak.
A Rebeka sẽn sak n maan a Zeova sẽn datã, a ning-a-la barka. A yɩɩ a Zezi yaab-poaka. Wa a Rebeka, fo sã n maan t’a Zeova sũur yɩ noogo, a na n ninga foo barka.