Fo zoe n tagsame tɩ fo yaa f ye, tɩ rabeem yõk-f bɩ?

Ges biigã sẽn be fotã zugã. A yaa a ye, tɩ rabeem tar-a. Pa sɩda? A buud zoe n paama foo bɩ?— Neb wʋsg mi n tagsame tɩ b yaa b ye, tɩ rabeem yõk-ba. Biiblã pʋgẽ, b gomda neb sẽn yɩ a Zeova zo-rãmb yelle, la bãmb me ra mi n tagsame tɩ b yaa b ye, tɩ rabeem yõk-ba. Wala makre, a Eli. D tẽeg a kibarã bilfu.

A Eli vɩɩmda Israyɛll t’a Zezi ra nan pa rog ye. La a Akaab sẽn da yaa Israyɛll rĩmã ra pa tũud a Zeova sẽn yaa Wẽnnaam sɩd-sɩdã ye. Yẽ ne a pag a Zezabɛll ra pʋʋsda b wẽnnaam yʋʋr sẽn yaa a Baal. Woto kɩtame tɩ Israyɛll neb wʋsg me ra pʋʋsd a Baal. A Zezabɛll ra yaa nin-wẽnga, n da rat n kʋ neb nins fãa sẽn tũud a Zeova wã, baa a Eli menga. La fo mii a Eli sẽn maan bɩ?—

A zoeeme n zãage! A kẽnga weoogẽ wã n tɩ solg tãng bokẽ. Bõe yĩng t’a zoe?— Rabeem n yõk-a. La a Eli ra pa segd n bas tɩ rabeem yõk-a ye. Bõe yĩnga? Bala a Zeova ra na n sõng-a lame. A ra zoe n maana bũmb n wilg a Eli tɩ yẽ tara pãnga. Daar a ye menga, a Zeova leoka a Eli pʋʋsgo, n kɩt tɩ bugum yi saasẽ n sigi. Dẽnd ra yaa vẽeneg t’a tõe n sõnga a Eli.

A Eli sẽn wa n be bokẽ wã, a Zeova goma ne-a, n sok-a yaa: ‘Bõe la fo maand ka?’ A Eli leokame: ‘Maam m ye bal n ket n tũud foo. Mam yaa m ye tãa. Rabeem n tar maam, bala b rat n kʋʋ maam.’ A Eli ra tẽedame tɩ b zoe n kʋʋ neb nins fãa sẽn tũud a Zeova wã. La a Zeova yeel-a lame yaa: ‘Ayo, fo pa f yembr ye. Neb 7 000 n ket n tũud maam. Ra zoe rabeem ye. Mam dat n kõo foo tʋʋm a taaba.’ Fo tagsdame t’a Eli sẽn wʋm woto wã, a sũurã yɩɩ noog bɩ?—

Bũmb ning sẽn paam a Eli wã zãmsda foo bõe?— Ra wa tags tɩ fo yaa f ye, tɩ rabeem yõk-f ye. Fo tara zo-rãmb sẽn nong a Zeova la b nong foo. Rẽ me, a Zeova tara pãng wʋsgo. A na n sõnga foo daar fãa! Fo sẽn bãng tɩ fo pa f yembrã, fo sũur yaa noog bɩ?—