A Davɩɩd pa yɩ rabɛɛm ye

Rabeem sã n tar foo, fo maanda a wãna?— Tõe tɩ f na n zoe n kẽnga f baaba bɩ f ma nengẽ. La ned a to me n be n tõe n sõng foo. A tara pãng n yɩɩd nebã fãa. Fo mii sẽn yaa a soab bɩ?— Yaa Wẽnnaam a Zeova. D gom bi-bɩɩg a yembr yelle. A kibarã bee Biiblã pʋgẽ. A yʋʋr la a Davɩɩde. A ra pa zoet rabeem ye. Bala wakat fãa, a ra miime t’a Zeova na n sõng-a lame.

Hal a Davɩɩd sẽn wa n yaa bi-kɩdga, a baaba ne a ma ra gomda a Zeova yell ne-a. Rẽ kɩtame t’a ra nong a Zeova. Sõng-a lame t’a ra pa zoet rabeem, baa sẽn yaa bũmb ning fãa. A ra miime t’a Zeova yaa yẽ zoa, n na n sõng-a. Daar a ye, a Davɩɩd ra bee weoogẽ n gũud piisi. La gɩgemd bɩ bõnyẽeg n wa n yõk a pesg a ye n na n wãbe. Fo mii a Davɩɩd sẽn maan bũmb ning bɩ? A riga bõnyẽegã n tɩ yõke, n pãb-a n kʋ. Daar a to, urs n wa n yõk a pesgo, t’a kʋ ursã me. Fo tagsdame tɩ yaa ãnd n sõng a Davɩɩde?— Sɩd yaa a Zeova.

Daar a to me, a Davɩɩd maana bũmb sẽn wilg t’a pa rabɛɛm ye. Israyɛll nebã ra zabda ne tẽng a ye neba. B boond-b lame tɩ Filisti rãmba. B ra tara sodaag sẽn yaa wok-woko, n yaa bedre, la a tar pãng wʋsgo. A yʋʋr la a Goliate. A ra gomda Israyɛll sodaasã ne a Zeova meng põaasa. A Goliat ra baooda Israyɛll sodaasã noore, n yetẽ tɩ sẽn tar-a pãng bɩ a wa zab ne yẽ. Israyɛll nebã fãa ra zoet-a lame. La a Davɩɩd sẽn wʋmã, a yeela a Goliat yaa: ‘Maam n na n wa zab ne foo. A Zeova na n sõnga maam tɩ m tõog foo!’ Fo pa tagsd t’a Davɩɩd yɩɩ gãndaoog sɩda?— N-ye, a sɩd yɩɩ gãndaoogo. Fo rat n bãnga sẽn baas to-to bɩ?

A Davɩɩd wʋka kug a nu, la a rɩk a loaabgã n na n tɩ zab ne a Goliate. A Goliat sẽn yã t’a Davɩɩd paoodame wã, a yaal-a lame. La a Davɩɩd yeel-a lame yaa: ‘Fo zãada sʋʋg n wat mam nengẽ. La mam wata fo nengẽ ne a Zeova yʋʋre.’ A Davɩɩd yãka kugr a ye n ning a loaabgẽ wã, n yilim n yilim n lobge, tɩ kugrã kell n tɩ wẽ a Goliat rĩirã n fõr n kẽ, t’a lʋɩ n ki. Rabeem yõka Filisti rãmbã, hal tɩ b fãa zoe. Bõe yĩng t’a Davɩɩd tõog n kʋ a Goliate?— Yaa a Zeova n sõng-a. Bala a Zeova tara pãng wʋsg n yɩɩd a Goliate.

A Davɩɩd kibarã zãmsda foo bõe?— A Zeova tara pãng n yɩɩd nebã fãa. A yaa fo zoa. Dẽnd bũmb sã n wa maan tɩ rabeem tar foo, bɩ f tẽeg t’a Zeova tõe n sõnga foo tɩ f tõog rabeemã.