A Zezi yɩɩ sakda

Yaa nana tɩ f sak f roagdbã wakat fãa bɩ?— Wakat ninga, pa nana ye. Fo mii a Zezi sẽn da sakd neb nins bɩ?— Fo sã n tẽeg t’a Zezi saka a Zeova la a sak a roagdbã, tõe n sõnga foo tɩ f sak f roagdbã, baa sã n wa pa nana. D gom a Zezi sakrã yelle.

A Zezi ra bee ne a Ba a Zeova saasẽ n yaool n na n wa tẽngã zugu. La a sẽn wa tẽngã zugã, a ra tara roagdb me. Yaa a Zozɛf ne a Maari. Fo mii sẽn sɩng to-to tɩ b wa lebg a Zezi roagdb bɩ?—

A Zeova rɩka a Zezi vɩɩmã n ning a Maari pʋgẽ wã, t’a Maari rog-a t’a vɩɩmd tẽngã zugu. Yɩɩ yel-solemde! A Zezi zĩnda a Maari pʋgẽ wã kiis a wɛ, t’a yaool n na n dog-a wa kom-peels a taabã. Dẽnd a Maari ne a sɩd a Zozɛf n yɩ a Zezi roagdb tẽngã zugu.

A Zezi sẽn wa n tar yʋʋm 12, a maana bũmb sẽn wilgd t’a nonga a Ba a Zeova wʋsgo. Yẽ ne a zakã rãmb kẽnga hal Zerizalɛm, n na n tɩ maan kibs n waoog a Zeova. La b sẽn wa n lebgdẽ wã, a Maari ne a Zozɛf gẽesa a Zezi n pa yã ye. Fo mii a Zezi sẽn da be zĩig ning bɩ?—

A Zozɛf ne a Maari zoee tao-tao n leb Zerizalɛm, n tɩ gẽes a Zezi zĩig fãa. B sũurã sãama wʋsgo, bala b ra pa ne-a ye. La rasem a tãab poore, b tɩ yã-a-la wẽnd-doogẽ wã. Bõe yĩng t’a Zezi ra be be?— Bala a ra miime tɩ beenẽ, b na n goma a Ba a Zeova yell t’a kelge. A ra nonga a Zeova, n baood n na n bãng a sẽn na n maan bũmb ning t’a Zeova sũur yɩ noogo. A Zezi sẽn wa n lebg bedrã, a ra ket n sakda a Zeova. A ra sakda a Zeova daar fãa, baa sã n da pa nana, la baa sã n da yaa tɩlae t’a namse. A ra sakda a Zozɛf ne a Maari me bɩ?— N-ye. Biiblã yeelame t’a ra sakdame.

A Zezi sẽn yɩ sakdã zãmsda foo bõe?— Wilgdame tɩ fo segd n saka f roagdbã, baa sã n pa nana. Fo na n sak n maana woto bɩ?—