Rĩung sẽn na n soog tẽngã gilli

Fo mii Rĩung ning yell d sẽn gomdã bɩ?— Yaa Wẽnnaam Rĩungã. Yẽ la Rĩung ning sẽn na n wa kɩt tɩ tẽngã gill lebg arzãnã. Fo rat n bãnga bũmb a taab Rĩungã sẽn na n maan bɩ?—

Rĩung fãa tara naaba. Naabã n get a tẽngã nebã yelle. Fo mii Wẽnnaam Rĩungã naab bɩ?— Yaa a Zezi Kirist. A bee saasẽ. Ka la bilfu, a na n sooga nebã fãa sẽn be tẽngã zugã. Fo tagsdame t’a Zezi sã n wa soog tẽngã gilli, vɩɩmã na n yɩɩ noog bɩ?—

D vɩɩmã na n yɩɩ noogo. Tẽngã gill sã n wa lebg arzãna, nebã pa na n le zab taaba, b pa na n le kʋ taab me ye. Nebã fãa na n nonga taaba. Bãag pa na n le yõk ned ye. Ned baa a ye pa na n le ki ye. Zoensã ninã na n pukame. Ned ka na n le yɩ wʋng bɩ muk ye. Neb nins sẽn pa tõe n kẽnã na n tõog n kẽname, hal n tõe n wudg menga. Nebã fãa na n paama rɩɩb tɩ seke. Rũmsã pa na n le zab taab ye. B pa na n le maan ned wẽng ye. Neb nins sẽn ki wã na n vʋʋgame. D goma a Rebeka, a Rahaab, a Davɩɩd, a Eli la neb a taab yell seb-kãngã pʋgẽ. Bãmb me na n vʋʋgame. Fo ratame tɩ b sã n wa vʋʋg bɩ f paam n yãnd-b bɩ?—

A Zeova nonga foo. A ratame tɩ fo sũurã yɩ noogo. Fo sã n kell n wɩng ne Biiblã zãmsgo, n bãng a Zeova la f sak-a, fo na n wa paam n vɩɩmda arzãnã pʋgẽ wakat sẽn kõn sa. Fo rata woto bɩ?—