A Zeezi roga yɛ, la yɩɩ wakat bʋgo?

Rom soolmã naab a Sezaar Ogust yiisa noore, n yeel tɩ ned fãa segd n leba a ba-yir tɩ b sõd nin-buiidã. Dẽnd a Zozɛf ne a Maari ra tog n kẽnga Betlehɛm sẽn be Zeruzalɛm nug-goabgã. A Zozɛf ba-yir la be.

Sõadgã yĩnga, nebã ra waooga Betlehɛm. A Zozɛf ne a Maari ka paam roog n na n gãand ye. B kong n tɩ gãanda rũms roogẽ. B ra kẽesda bõens la rũms a taab be. Rũmsã roogẽ la a Maari rog a Zeezi. A maneg n vila a biigã ne pɛɛla, n gãneg-a rũmsã rɩɩb koglg pʋgẽ.

Wẽnnaam n kɩt t’a Sezaar Ogust yiis noor n yeel tɩ b sõd nin-buiidã. Bõe yĩng tɩ d yet woto? Bala rẽ kɩtame t’a Zeezi kell n dog Betlehɛm, rĩm a Davɩɩd sẽn yaa a yaabã ba-yiri. Wẽnnaam no-rɛɛsdbã ra pĩnd n togsa hal daar zãr tɩ yaa be la rĩm ning b sẽn pʋlmã na n doge.—Miise 5:1.

A Zeezi rogmã daare, yel-solemd n maane. Pe-kɩɩmb n da be weoogẽ wã ne yʋng n gũud b piisi. Vẽenem n yãg n bui-ba. Vẽenemã wilgda a Zeova ziirã. Malɛk n puk n yeel pe-kɩɩmbã yaa: “Da zoe-y rabeem ye. Bala, mam togsda yãmb koe-noog sẽn na n wa ne sũ-no-kãseng nebã fãa yĩnga. Fãagd la b rog yãmb yĩng dũndã, a Davɩɩd tẽngẽ wã. Bãmb la Kirisã, Zu-soabã. Ad bãnd ning sẽn na n kɩt tɩ yãmb bãng bãmba: Yãmb na n yãnda bi-pɛɛlg sẽn vil ne peend n gãe rũms rɩɩb koglgẽ.” Zĩig pʋgẽ, malɛgs wʋsg yii saasẽ n wa naag malɛkã tɩ b pẽgd Wẽnnaam n yetẽ: “Wẽnnaam sẽn be hal saasẽ-saasẽ wã paam pẽgre! La laafɩ zĩnd dũniyã zugu, neb nins bãmb sẽn nongã sʋka.”—Luk 2:10-14.

Malɛgsã sẽn loogã, pe-kɩɩmbã yeela taab yaa: “Wa-y tɩ d kẽng Betlehɛm n tɩ ges bũmb ning sẽn maan tɩ Zu-soabã togs tõndã.” (Luk 2:15) B yika tao-tao n kẽnge, la b tɩ yãa a Zeezi sẽn sɩd gãe rũms rɩɩb koglgẽ wa malɛkã sẽn togsã. Pe-kɩɩmbã togsa malɛkã sẽn yeel bãmb bũmb ningã, la nebã fãa sẽn wʋmã, ling-b lame. A Maari kelga gom-kãensã neere, n da tagsd b yell a sũur pʋgẽ.

Neb wʋsg tẽedame t’a Zeezi roga yʋʋm-sar kiuug rasem 25. La Betlehɛm soolmẽ wã, yʋʋm-sar kiuugã yaa saas la waoodo. Wakat ning menga, neezã sẽn yaa wa galaasã niida wa saaga. Dẽnd pe-kɩɩmbã ra pa tõe n be yɩng ne yʋngã n gũud b piisã ye. Sẽn paase, waoodã sẽn da be a piig la a yiib zugã, Rom naabã pa na n sak n yiis noor n yeel tɩ ned fãa leb a ba-yir sõadgã yĩng ye. Bala nin-buiidã sũur ra zoe n pa noom ne-a ye. Dẽnd a Zeezi rogmã tog n yaa zĩ-likr kiuugã pʋgẽ.