A Zeezi manesmã makr wakatã yaa mak-sõngo

A Zã sẽn lis a Zeezi wã poor bala, Wẽnnaam vʋʋsem sõngã talla a Zeezi n kẽng Zʋʋde rasempʋɩɩgẽ wã. Bũmb wʋsg zug la a ra tog n bʋgse, bala a lisgã sasa “yĩngr pakame.” (Matye 3:16) Rẽ kɩtame t’a ra tõe n tẽeg bũmb kẽer a sẽn zãms la a maan saasẽ. Dẽnd yaa vẽeneg t’a sẽn da segd n bʋgs bũmb ninsã waoogame.

A Zeezi maana rasem 40 rasempʋɩɩgẽ wã. A pa tol n dɩ baa fʋɩ. Dẽnd komã ra tar-a-la wʋsgo. Wakat kãng la a Sʋɩtãan wa n na n mak-a. A yeela a Zeezi yaa: “Yãmb sã n yaa Wẽnnaam Bi-ribla, bɩ y kɩt tɩ kug-kãensã lebg buri.” (Matye 4:3) A Zeezi ra miime tɩ pa zems t’a tall tõog ning Wẽnnaam sẽn kõ-a wã n maan yel-solemd n pids a mengã raab ye. Rẽ n so t’a zãgs t’a kõn maan a Sʋɩtãan sẽn yeelã ye.

La a Sʋɩtãan pa loog ye. A baoome n na n kʋɩɩb a Zeezi ne bũmb a to. A yeela a Zeezi t’a yi wẽnd-doogã zug n yɩk n lʋɩ tẽnga, tɩ Wẽnnaam malɛgsã na n kogl-a lame. La a Zeezi pa sak n na n maan woto n wilg a meng ye. A pʋd n togsa gomd sẽn yit Gʋls-sõamyã pʋgẽ, n wilg tɩ ned pa tog n mak Wẽnnaam woto ye.

A Sʋɩtãan le maka a Zeezi naoor a tãab-n-soaba. A wilga a Zeezi “dũniyã soolem toay-toayã fãa ne b ziirã,” n yaool n yeel-a t’a sã n wõgemd n waoog yẽ, a na n kõ-a-la rẽ fãa. La a Zeezi le zãgsa fasɩ, n yeel-a yaa: ‘Kẽng n looge, Sʋɩtãanã!’ (Matye 4:8-10) A Zeezi pa bas t’a Sʋɩtãan tõog n kʋɩɩb-a ye. A ra miime tɩ yaa a Zeova a ye tãa n segd ne waoog-kãnga. Sɩd me, a Zeezi kell n saka Wẽnnaam.

A Sʋɩtãan sẽn mak n na n kʋɩɩb a Zeezi wã, n paas a Zeezi sẽn tall manesem ningã zãmsda tõnd bũmb wʋsgo. A sẽn mak a Zeezi wã wilgdame t’a sɩd beeme, la t’a ka wẽngã tʋlsem sẽn be ned fãa sũurẽ, wa neb kẽer sẽn tagsdã ye. A yaa malɛka. Kiba-kãngã wilgdame me tɩ dũniyã goosneemã rãmbã fãa yaa yẽ n so, n wẽnd-b wa a sẽn date. Sã n pa rẽ, a sẽn yeel t’a na n kõo Kirisã dũniyã goosneemã rãmbã ra pa na n yɩẽ makr ye.

Sẽn paase, a Sʋɩtãan yeelame t’a Zeezi sã n wõgemd n waoog yẽ baa yaa vugr bala, a na n kõ-a-la dũniyã soolem fãa. Dẽnd a tõe n maka tõnd me woto. Wala makre, a tõe n paka sor tɩ d tõe n paam arzɛk bɩ ziir wall naam dũniyã pʋgẽ. Baa sẽn yaa bũmb ning la a Sʋɩtãan maan n dat n kʋɩɩb-do, d sã n dɩk a Zeezi togs-n-taar n kell n sak Wẽnnaam, d wilgdame tɩ d tara yam. Tẽeg-y tɩ makr a tãab-n-soabã poore, a loogame n bas a Zeezi, n gũud “a sẽn na n leb n paam weer a to n mak-ba.” (Luk 4:13) Tõnd me nengẽ tõe n yɩɩ woto. Dẽnd d segd n yɩɩ gũusdb wakat fãa.