A Zeezi pipi yel-solemde

Rasem a tãab la woto a Natanayɛll sẽn lebg a Zeezi karen-biiga. A Zeezi ne a karen-biisã a sẽn nan paamã kẽer rɩka sor n teesd Galɩle soolmẽ wã. B fãa yita beenẽ. Yaa Kana sẽn yaa a Natanayɛll ba-yirã la b rabda. Kana bee Nazarɛt nug-rɩtg babgã sẽn yaa tãmsã, zĩig ning a Zeezi sẽn zĩnd n tãag a bɩʋʋngã. B bool-b-la yi-kãadem kibs tɩ b rabda.

A Zeezi ma a Maari me waa kibsã. Yẽ ne yi-kãadbã zakã rãmb ra yaa zoodo. Wõnda b bõos-a lame t’a sõng ne sãambã yell gesgo. Rẽ n so t’a bãng tao-tao tɩ rãamã paoogame, n togs a Zeezi. A yeel-a lame yaa: “Nebã ka leb n tar reezẽ rãam ye.”—Zã 2:3.

A Maari ra ratame t’a Zeezi maan bũmb n sõng nebã tɩ b paam rãam. La a Zeezi yeel-a lame yaa: “Paga, bõe n be maam ne fo sʋka?” (Zã 2:4) Sẽn mik t’a Zeezi la Rĩm ning Wẽnnaam sẽn yãkã, yaa a Ba wã bal n segd n wilg-a a sẽn tog n maane, pa a zakã neb bɩ a zo-rãmbã ye. A Maari talla yam, n bas t’a biigã na n maan wa a sẽn tagsde. A yeela tʋm-tʋmdbã tɩ b “maan bũmb ning fãa a Zeezi sẽn na n yeel-b tɩ b maane.”—Zã 2:5.

Sĩms bɩ ko-yũ-bɛd a yoob sẽn pees ne kug n dag n be be. Sĩng fãa tõe n deega koom sẽn yɩɩd litr 40. A Zeezi yeela tʋm-tʋmdbã tɩ b “pids sĩmsã ne koom.” Rẽ poore, a yeela woto: “Toog-y moasã n tɩ kõ ned ning sẽn get-a rɩɩbã pʋɩɩb yellã.”—Zã 2:7, 8.

Sẽn get-a rɩɩbã pʋɩɩb yellã sẽn lembã, rãamã sõmblem ling-a lame. La a ra pa mi tɩ tũu ne yel-solemd tɩ b paam rãamã ye. A boola pʋg-paalã sɩd n yeel-a yaa: “Ned fãa rengd n kõo nebã reezẽ rã-sõngã, tɩ nebã nens sã n wa n yuusdẽ, bɩ a yaool n kõ-b reezẽ rãam ning sẽn ka-a sõama zãngã. La foom, fo bĩnga reezẽ rã-sõngã hal tɩ ta moasã.”—Zã 2:10.

Woto n yɩ a Zeezi pipi yel-solemde. Karen-biisã a sẽn nan paamã sẽn yã yel-solemdã, kɩtame tɩ b maneg n tẽ-a. Rẽ poore, a Zeezi ne a ma wã, n paas a ma-biisã kẽnga Kapɛrnawom sẽn pẽ Galɩle mogrã.