A Zeezi boola karen-biis a naase

Nazarɛt nebã sẽn bao n na n kʋ a Zeezi wã, a kẽnga Kapɛrnawom. Pa zãr ne Galɩle mogrã b sẽn boond me tɩ “Zenezarɛt ko-kãsengã” ye. (Luk 5:1) Woto pidsa gomd a Ezayi sẽn da reng n togse. A ra yeelame tɩ Galɩle nebã sẽn yɛg mogrã na n yãa vẽenem kãsenga.—Ezayi 8:23–9:1.

Kapɛrnawom me, a Zeezi kell n mooname n yetẽ tɩ saasẽ “soolem kolgame.” (Matye 4:17) A wa n yãa a karen-biis a naase. B ra zoe n tũ-a lame n gilgi, la b sẽn tũ taab n yi Zʋʋde n wa wã tɛka, b le tɩ sɩnga b nug-tʋʋmdã sẽn yaa zĩm-yõgbã. (Zã 1:35-42) La masã wã, b segd n tũu a Zeezi wakat fãa, t’a tõog n zãms-b koe-moonegã, t’a sã n wa loog saasẽ bɩ bãmb kell n moone.

A Zeezi ra kẽnda mogrã noore, n wa yã a Sɩmo Pɩyɛɛr ne a ba-biig a Ãndere, la b tʋmd-n-taas sẽn manegd b zĩm-gãmba. A Zeezi kẽe a Sɩmo koglgã pʋgẽ, n kos-a t’a zãag ne kʋɩl-koakã bilfu. B sẽn zãag bilfã, a Zeezi zĩndame, n sɩng n na n sõs ne kʋʋngã sẽn tigim koomã noorã. A goma Wẽnnaam Rĩungã yelle.

Dẽ poore a Zeezi yeela a Pɩyɛɛr yaa: “Kẽng-y koomã sʋk n tɩ lob y zĩm-gãmbã wã n yõg zĩma.” A Pɩyɛɛr leokame: “Karen-saamba, tõnd tʋma yʋngã tõr n ka tol n yõk bũmb ye. La yãmb sẽn yeelã yĩnga, m na n loba zĩm-gãmbã wã.”—Luk 5:4, 5.

B sɩd lobame, n yõg zĩm wʋsgo, hal tɩ gãmbã wã sɩng pãrsgo. Tao-tao bala, rapã kamsa b tʋmd-n-taas sẽn be koglg a to pʋgẽ tɩ b wa sõng-ba. Zĩig pʋgẽ wã tɩ b pidsa kogend a yiibã ne zĩm hal tɩ sɩng bõrbo. A Pɩyɛɛr sẽn yã rẽ wã, a yĩgimda a Zeezi taoor n yeele: “Zu-soaba, zãag-y y meng ne maam. Bala, mam yaa yel-wẽn maanda.” La a Zeezi yeel-a lame: “Da zoe rabeem ye. Sẽn sɩng ne moasã, fo na n yɩɩ nin-baooda.”—Luk 5:8, 10.

A Zeezi yeela a Pɩyɛɛr ne a Ãndere woto: “Wa n tũ-y maam, tɩ m na n kɩtame tɩ y lebg nin-baoodba.” (Matye 4:19) Zĩm-yõgdb a yiib me la a bool-yã. Yaa a Zak ne a Zã. B ba wã yʋʋr la a Zebede. Zĩig pʋgẽ, bãmb me sakame n na n pʋg-a. Dẽnd b naasã fãa basa b tʋʋmdã sẽn yaa zĩmã-yõgbã, n lebg a Zeezi pipi karen-biis sẽn na n tũ-a wakat fãa.