A Zeezi zãmsa a karen-biisã sik-m-menga

A Zeezi tedgrã poore, a riga zĩn t’a yi n bas biiga. Rẽ t’a keta Filip Sezaare soolmẽ wã. Masã, a rɩka sor n debd Kapɛrnawom. Yaa yẽ ne a karen-biisã bala, la yaa a sẽn da pa rat tɩ “ned bãng bãmb sẽn beẽ” wã yĩnga. (Mark 9:30) Rẽ, a na n tõog n sõnga a karen-biisã tɩ b segl b mens a kũumã sẽn kolgã yĩnga, la a sõng-b tɩ b wa tõog n kell n moon koɛɛgã. A yeel-b lame yaa: “B na n zãmba Ninsaal Bi-riblã n yõk-b n kõ ninsaalbã. B na n kʋ-b lame, la rasem a tãab daarã, b na n vʋʋgame.”—Matye 17:22, 23.

Ka pipi la woto a Zeezi sẽn gomd a kũumã yell ne a karen-biisã ye. Sẽn nan pa kaoose, a goma rẽ yell hal t’a Pɩyɛɛr yeel tɩ yel-beed a woto kõn paam-a ye. (Matye 16:21, 22) Sẽn paas me, tʋm-tʋmdb a tãab n yã a tedgrã tãngã zugu, la b wʋm b sẽn gom a kũumã yellã. (Luk 9:31) So-kãngã wã, a Zeezi gomdã sãama a karen-biisã sũy wʋsgo, baa ne b sẽn da pa wʋmd a võor zãngã. (Matye 17:23) La b ra yɛɛsdame n pa rat n sok-a n bãng a võor ye.

B wa n taa Kapɛrnawom, zĩig ning a Zeezi sẽn zĩnd n yɩɩdã. Leb n yaa a tʋm-tʋmdbã wʋsg ba-yir la be. Sẽn deegd-b wẽnd-doogã yaoodã wa n soka a Pɩyɛɛr sokre. Tõe tɩ yaa sẽn na n paam n ning a Zeezi taale. B soka woto: “Yãmb karen-saambã ka yaood wẽnd doogã yaoodã la?”—Matye 17:24.

A Pɩyɛɛr leokame t’a yaoodame. La a Zeezi bãnga rẽ fãa. B sẽn ta yiri, a Zeezi pa bas t’a Pɩyɛɛr reng yẽ n gom yõor yaoodã yell ye. A sok-a-lame yaa: “Sɩmo! Fo tagsda a wãna? Dũni rĩm-dãmbã deegda yaood la yõor yaood ãnda rãmb nengẽ? B kamba nengẽ bɩ, bɩ sãambã nengẽ?” La a Pɩyɛɛr yeelame tɩ yaa sãambã nengẽ. Rẽ la a Zeezi yeel-a yaa: “Sã n yaa a woto, rẽnd tẽngã kamb ka tog n yao ye.”—Matye 17:25, 26.

A Zeezi Ba wã la ãndũniyã gill naaba. Leb n yaa yẽ la nebã wat n waoogd wẽnd-doogẽ wã. Dẽnd Wẽnnaam Biigã pa tog n yao wẽnd-doogã yaood ye. Baasgo, a Zeezi yeelame: “Sẽn na yɩl tɩ tõnd da wa beeg-ba, kẽng ko-kãsengã noore, n lob zĩm-lɛoog n yõk zĩnf ning sẽn na n yɩ-a pipi n gãd lɛoogã. Yaag a noorã tɩ f na n yãnda ligd beenẽ n yiis n wa n yao maam ne fo yĩnga.”—Matye 17:27.

Karen-biisã wa n tigma taab n na n sok a Zeezi n bãng ned ning sẽn na n yɩ kãseng n yɩɩd Wẽnnaam soolmã pʋga. A Zeezi sẽn gom a kũumã yellã, b ra yɛɛsdame n ka rat n sok-a n wʋm a võor sõma ye. La b yaool n ka yɛɛsd n na n sok n bãng b beoog vɩɩmã sẽn na n yɩ to-to ye. A Zeezi bãnga sẽn da be a karen-biisã yamẽ wã. Rẽ pa yel-sãang ne-a ye. B sẽn wa n lebg n wat Kapɛrnawomã, b ra bee poorẽ n wẽed no-koeemd rẽ wɛɛngẽ. Rẽ n so t’a sok-b yaa: “Yaa bõe poorẽ la yãmb dag n wẽed nokoeemd ne taab sorã zugã?” (Mark 9:33) Yãndã yõka karen-biisã tɩ b sĩnda, bala b ra wẽeda no-koeemd n dat n bãng sẽn yaa-a kãseng n yɩɩd bãmb sʋkã. Tʋm-tʋmdbã wa n baas n soka a Zeezi yaa: “Ãnda n yaa kãseng n yɩɩd arzãn [“saasẽ,”MN] soolem pʋgẽ?”—Matye 18:1.

IYaa sẽn kolg yʋʋm a tãab la woto karen-biisã sẽn tũud a Zeezi, n kelgd a goamã la b yãt a sẽn maand bũmb ninsã. Dẽnd b ra pa segd n le wẽed no-koeemd ye. La b yaa neb sẽn pa zems zãnga. B sẽn zĩnd tũudum ning pʋgẽ wã me kɩtame tɩ b nong ziir la naam. Sẽn paase, a Zeezi ra yeela a Pɩyɛɛr t’a na n kõ-a-la saasẽ soolmã “kʋɩlen-biisi.” Tõe tɩ rẽ kɩtame t’a tagsdẽ t’a yɩɩda a taabã. Tõeeme me t’a Zak ne a Zã ra tagsda woto, bãmb sẽn paam n yã a Zeezi tedgrã tãngã zugã yĩnga.

Sẽn yaa a soab fãa, a Zeezi maana bũmb n na n sõng-b tɩ b toeem b tagsgã. A boola bi-bilf n yals b sʋka, la a yeel a karen-biisã yaa: “Sɩd-sɩda, mam yeta yãmb tɩ yãmb sã n ka tek yam n lebg wa kom-bãoonego, yãmb kõn kẽ arzãn soolem pʋgẽ ye. Yaa woto yĩng tɩ ned ning fãa sẽn na n sik a meng n yɩ wa bi-kãngã, yẽnda n na n yɩ kãseng n yɩɩd arzãn soolem pʋga. La ned ning fãa sẽn na n deeg bi-bilf a woto mam yʋʋrã yĩnga, yaa mam mengã la a reegda.”—Matye 18:3-5.

Ad a Zeezi sɩd mii neb zãmsg sõma! A pa yik a sũur ne a karen-biisã, n yeel tɩ b yaa neb sẽn nong naam ye. Makrã a sẽn dɩkã tara pãnga. Kom-bõonegã pa zẽkd b mense, b pa baood yʋʋr me. A Zeezi ra ratame t’a karen-biisã bãng tɩ b segd n modg n sika b mens wa kamba. Rẽ n so t’a sagl a karen-biisã, n yeel-b yaa: “Ned ning sẽn yaa-a yao-zʋʋg yãmb sʋkã, yaa yẽnda soab n yaa kãsenga.”—Luk 9:48.