Samaari rao sẽn wilg t’a nonga a to

A Zeezi ra ket n pa zãr ne Zeruzalɛm ye. Zʋɩf-rãmb wʋsg n wa a nengẽ. Kẽer ratame t’a zãms-b bũmb wʋsgo, tɩ sãnda rat bal n paam n bẽd-a. Tõog karen-saamb a yembr n yik n sok a Zeezi yaa: “Karen-saamba, bõe la mam tog n maan n paam vɩɩm sẽn kõn sa wã tɩ yɩ m pʋɩɩre?”—Luk 10:25.

A Zeezi ra miime tɩ raoã sokrã pa a sẽn dat n bãng ye. Tõeeme t’a ratame n bẽd-a, t’a leok tɩ yik zʋɩf-rãmbã sũyã. A Zeezi bãngame me tɩ raoã ra zoe n mii sokrã leoore. Rẽ n so t’a maan yam sẽn na yɩl tɩ yẽ mengã togs leoorã.

A Zeezi sok-a lame yaa: “Bõe la b gʋls tõodã sebrã pʋgẽ, la bõe la fo karemd be?” Raoã sẽn da mi Wẽnnaam tõogã yĩnga, a leokame tɩ zems Tõod 6:5 la Maan-kʋʋr 19:18 sẽn yetã. A yeelame: “Nong Zu-soabã fo Wẽnnaam ne f sũur fãa, la f yalẽ fãa, la f pãng fãa, la f yamã fãa, la f nong f to wa f menga.” (Luk 10:26, 27) A leoorã yaa kɛpɩ bɩ?

A Zeezi yeel-a lame yaa: “Fo leokrã yaa sõama. Maan a woto, tɩ f na vɩɩmde.” La sõsgã na n teka woto bal bɩ? Ayo. Bala pa leoor bal la raoã rat ye. A ratame n “wilg t’a yaa tɩrga.” A ratame t’a Zeezi yeel bũmb sẽn wilgd tɩ yẽ tagsa wã yaa sõma, tɩ wilg tɩ yẽ sẽn tar manesem ning ne neb a taabã yaa sõma. Rẽ n so t’a sok a Zeezi yaa: “Ãnda la mam to?” (Luk 10:28, 29) Sokrã wõnda a yaa yaalga, la a võorã tagmame. Bõe yĩng tɩ d yet woto?

Zʋɩf-rãmbã ra tẽedame tɩ bãmb “to” yaa ned sẽn tũud bãmb minimdã bala. Tõe tɩ b ra tagsdame me tɩ Maan-kʋʋr 19:18 goamã teenda rẽ. Sɩd me, b ra getame tɩ b sã n kẽ ned sẽn pa zʋɩf zakẽ bɩ n naag-a n maan bũmbu, “ka zems” ne tõogã ye. (Tʋʋmã 10:28) Dẽnd tõog karen-saambã tagsame tɩ yẽ sã n maand a zʋɩf-taasã bal neere, a yaa nin-tɩrga. Tõe t’a Zeezi karen-biis kẽer meng ra tagsda woto. B ra tagsdame tɩ ned sã n pa zʋɩf, pa tɩlɛ tɩ b maan-a neere, bala a pa b “to” ye.

A Zeezi na n maana wãn n wilg tɩ tagsg a woto pa zemse, n pa sãam raoã la zʋɩf-rãmb a taabã sũyã? A togs-b-la kibare. A yeelame: “Dao n dag n yi Zeruzalɛm n dabd Zeriko. A tɩ lʋɩɩ fãadb sʋka, tɩ b rees a sẽn tarã, n pãb-a hal t’a kolg kũum, tɩ b bas-a n looge. Mikame tɩ maan-kʋʋd n dag n dɩk so-kãnga. A yãnda raoã, la a gilg n loog n bas-a lame. Woto me, Leevi ned a yembr taa zĩ-kãnga. A yãnda raoã, la a gilg n loog n bas-a lame. La Samaari ned sẽn dag n togd sor taa raoã sɛɛgẽ n yãnd-a, t’a nimbãaneg yõk-a.”—Luk 10:30-33.

Rao ning a Zeezi sẽn togsd kibarã ra miime tɩ maan-kʋʋdb la Leevi rãmb wʋsg sẽn tʋmd wẽnd-doogẽ wã yita Zeriko. B sã n yi wẽnd-doogẽ wã n kuiisẽ, b maanda sẽn ta kilo 23. Sorã yaa yelle, bala wagda n mi n yekd nebã. Maan-kʋʋd wall Leevi buudã ned sã n yã tɩ zʋɩf bee yell pʋgẽ, rẽ yĩnga b pa tog n sõng-a sɩda? La a Zeezi kibarã pʋgẽ, b pa sõng b zʋɩf-taagã ye. Yaa Samaari rao n sõng-a. Zʋɩf-rãmbã yaool n da kisa Samaari nebã.—Zã 8:48.

Bõe la Samaari raoã maan n sõng zʋɩfã sẽn poglã? A Zeezi yeelame: “A kolga raoã, n tɩbs a noadã ne kaam la reezẽ rãam, la a vil-b ne pɛɛla. Rẽ sẽn sa, a rɩk-a lame n zombg a meng bõn-zoambedga, n tall-a n kẽng sik zĩigẽ n tɩ ges a yelle. Vẽkembeoogo, a yãka deniye a yiib n kɩs sik zĩigã soab n yeel-a t’a yõdg n ges bãadã yelle, la t’a ligd sã n kẽ, a lebgre a meng na lebs-a.”—Luk 10:34, 35.

A Zeezi sẽn togs kibarã, a bas n soka raoã sokr sẽn kɩt t’a tagse. Ad a Zeezi sɩd yaa karen-saam-kãsenga. A sokame yaa: “Bãmb b tãabã sʋka, bʋg n wẽnda a yaa ned ning sẽn lʋɩ-a fãadbã sʋkã to?” Tõog karen-saambã yeela woto: “Yaa ned ning sẽn zoe-a yẽnda nimbãanegã.” Tõe tɩ yaa a sẽn pa rat n sak n yeel tɩ “Samaari nedã” yĩnga. La a Zeezi wilga b sẽn tõe n dɩk yam ning kibarã pʋgẽ, n yeel raoã yaa: “Kẽng n tɩ maan a woto.”—Luk 10:36, 37.

A Zeezi sẽn maan woto wã kɩtame t’a zãmsgã kẽ a kɛlgdbã sõma. A sã n da yeelẽ raoã bal tɩ ned sẽn pa zʋɩf me yaa a “to,” rẽ yĩnga, yẽ ne zʋɩf-rãmb a taabã ra na sak n deeg a goamã sɩda? Tõe tɩ b ra pa na n sak ye. La a sẽn togs kibar n gom bũmb a kɛlgdbã sẽn mi sõma wã, b fãa bãnga sẽn yaa ned ning la b to wã vẽenega. Dẽnd sẽn nong-a a to wa a meng yaa ned sẽn nong nebã fãa n maand-b neer n pa bakdẽ, wa Wẽnnaam sebrã sẽn yetã.