B sẽn na n sãam zʋɩf-rãmb nins sẽn ka tẽebã võore

A Zeezi modga naoor wʋsg n na n sõng nebã tɩ b tags bãmb zoodã ne Wẽnnaamã yelle. A sẽn sõs ne kʋʋngã Fariizẽ wã zak noor n sa wã, a le paam n na n sõnga neb tɩ b tags rẽ zugu.

Neb kẽer tẽega yel-beed sẽn paam Galɩle tẽngã neba, n gom rẽ yell ne a Zeezi. Yaa Rom guvɛrneer a Põns Pilat n kʋ Galɩle neba, n ‘daag b zɩɩm n kalem ne b maandã zɩɩm.’ (Luk 13:1) Bõe yĩng tɩ b gom rẽ yell ne a Zeezi?

Tõeeme tɩ nin-kãens kʋʋbã yɩɩ wakat ning zʋɩf-rãmb tusa sẽn wa n yik n kɩɩsd a Pilate, a sẽn dɩk wẽnd-doogã ligd n na n me ko-sor n tall koom n wa Zeruzalɛmmã. Tõe t’a Pilat zemsa ne wẽnd-doogã taoor-dãmba, tɩ b sak n kõ-a ligdã. Wõnda sẽn tẽeg-b yellã ra tagsdame tɩ yel-beedã sẽn paam Galɩle nin-kãensã wã yaa b yel-wẽnã yĩnga. A Zeezi wilgame tɩ b tagsgã pa zems ye.

A Zeezi sok-b lame yaa: “Yãmb tẽedame tɩ Galɩle nin-kãens sẽn nams a woto wã, b yaa yel-wẽn maandb n yɩɩd Galɩle neb a taabã la?” A wẽneg n leokame tɩ ayo. A pʋd n keooga zʋɩf-rãmbã, n yeel woto: “Yãmb sã n ka tek yam n kos sugri, yãmb fãa na n sãama a woto me.” (Luk 13:2, 3) A Zeezi tẽeg-b-la yel-beed a to. Wõnda yel-be-kãng sẽn maanã ra nan pa kaoos ye. Tõeeme tɩ yaa ko-sorã meeb n wa ne rẽ me.

A Zeezi yeelame: “Neb piig la a nii Siloe gãosgã sẽn lʋɩ n bʋʋg-b n kʋ-bã, yãmb tagsdame tɩ bãmb yaa bɛɛgdb n yɩɩd Zeruzalɛm neb a taabã la?” (Luk 13:4) Tõe tɩ nebã ra sɩd tagsdame tɩ yaa nin-kãens tʋʋm-wẽnsã yĩng la b sẽn ki wã. A Zeezi le wilgame tɩ ka sɩd ye. A miime tɩ “toog wall noog” paamda ned buud fãa. Dẽnd yaa yel-lingdem sẽn tũ ne b yõore. (Koɛɛg soaba 9:11) Nebã ra segd n dɩka yam yel-kãngã pʋgẽ. Rẽ n so t’a Zeezi yeel-b woto: “Yãmb sã n ka tek yam n kos sugri, yãmb fãa me na n sãama a woto.” (Luk 13:5) Bõe yĩng masã t’a keoog-b n yɩlme?

Yaa a koe-moonegã sẽn da kolg saabã yĩnga. A rɩka makr n wilg tɩ yaa tɩlɛ tɩ b tek yam. A yeela woto: “Ned n dag n tar kankang sẽn sel a reezẽ tɩɩs pʋʋgẽ. A waame n na n yãgs biisi, la a ka yã ye. Dẽ, a yeela pʋʋgã koaad yaa: ‘Yʋʋm a tãab moasã la mam wat n dat kankangã biisi, la m ka yãt ye. Keeg-a! Bõe yĩng t’a yãmb zĩigã zaalem?’ Reezẽ tɩɩs pʋʋgã koaad leokame n yeele: ‘M soaala, leb n bas-y-yã-a roandã yɛsa. Ka ne rẽ, mam na n tuume n gilg-a la m ning-a birga. Daar ninga, a na wom biisi. La a sã n ka wome, bɩ y keeg-a.’”—Luk 13:6-9.

Sẽn yɩɩd yʋʋm a tãab masã la a Zeezi sẽn makd n na n sõng zʋɩf-rãmbã tɩ b tall tẽebã. La neb bilf bal n sak n lebg a karen-biisi. Baasgo, d tõe n yeelame t’a tʋʋmdã woma biisi. Yʋʋm a naas-n-soab la woto masã, t’a Zeezi maneg n wɩng ne tʋʋmdã. A moona koɛɛgã Zʋʋde ne Peere soolmã la a zãms nebã. A sẽn maan woto wã, yaa wa a sẽn tuk bok n gilg kankangã sẽn makd zʋɩf-rãmbã, la a ning birga. La rẽ yĩnga, tʋʋm-kãng talla yõod bɩ? Neb nins sẽn sak n lebg a karen-biisã pa waoog ye. Zʋɩf-rãmbã fãa la bal pa sak n tek yam n kos sugr ye. Rẽ n kɩt tɩ b segd ne sãoongo.

A Zeezi sẽn yeel woto wã pa yã n kaoos la zʋɩf-rãmbã le maan bũmb tɩ wilgdẽ tɩ b sɩd ka tek yam ye. Baraarã yɩɩ vʋʋsg daare, t’a Zeezi ra be karen-doog a ye pʋgẽ n zãmsd nebã. A yãa pag sẽn namsd na maan yʋʋm 18. Yaa zĩn n kẽ-a t’a ka tõe n doog baa bilf ye. Pagã nimbãaneg yõka a Zeezi, t’a yeel-a yaa: “Paga, fo paama yolsg ne f komsmã.” (Luk 13:12) A Zeezi zẽka a nug n tik pagã, la zĩig pʋgẽ a roogame hal n sɩng n pẽgd Wẽnnaam.

Karen-doogã naab sũur yikame, t’a yeele: “Dasem a yoob n be tʋʋm yĩnga. Wa-y da-kãens tɩ b maag-yã, tɩ da yɩt tõnd vʋʋsg daarã ye.” (Luk 13:14) Naabã pa kɩɩs t’a Zeezi tara tõog n sãoogd neb ye. La a zaba nin-buiidã b sẽn wa vʋʋsg daar t’a Zeezi sãoog-bã. A Zeezi leoka vẽeneg yaa: “Zãmb rãmba, yãmb ned kam fãa ka lokd a naaf a rɩɩb koglgẽ n tall n tɩ yũnug vʋʋsg daarã sɩda? La pʋg-kãngã sẽn yaa a Abrahaam bi-pugla, t’a Sʋtãan loe-a hal yʋʋm piig la a nii wã, d ka tog n lok-a vʋʋsg daare?”—Luk 13:15, 16.

Yãndã yõka bɛɛbã. La nebã sũy yɩɩ noog wʋsg ne bõn-kãsems nins a Zeezi sẽn maanã. Baraarã, a Zeezi leb n wẽe yel-bũn a yiib n gom Wẽnnaam Rĩungã yelle. A ra zoe n wẽe yel-bũn-kãens a sẽn wa n sõsd ne nebã Galɩle mogrã noorã.—Matye 13:31-33; Luk 13:18-21.