A Sɩmo boola a Zeezi a zakẽ wã Betani

A Zeezi sẽn yi Zeriko wã, a teesa Betani. Sorã taa kilo 20, n le yaa tãnga, hal tɩ kẽndã pa nana ye. A Lazaar ne a tãop a yiibã ra bee Betani. Yaa tẽn-bil sẽn be Oliiv tɩɩs tãngã yaanga. A zãrmã ne Zeruzalɛm zemsa kilo a tãabo.

Zʋɩf-rãmb wʋsg zoe n taa Zeruzalɛm, Pakã yĩnga. B waa pĩnda, n na n “yɩlg b mense.” Bala tõe tɩ b sɩɩsa kũum wall b maana bũmb n pa bãnge, tɩ kɩt tɩ b yaa rẽgd Wẽnnaam nifẽ. (Zã 11:55; Sõdbo 9:6-10) Kẽer meng tigma taab wẽnd-doogẽ wã. B ra sokda taab a Zeezi sã n na n waa Pakã, hal tɩ yaa kɩɩs-taaba.—Zã 11:56.

No-koɛɛmã ra lebga wʋsg a Zeezi zugu. Tũudmã taoor dãmb kẽer ra baood-a lame n na n kʋ. B pʋd n yeela nebã tɩ ned sã n bãng a Zeezi zĩiga, bɩ a wa togs bãmb tɩ b tɩ yõk-a. (Zã 11:57) A Zeezi sẽn vʋʋg a Lazaarã poore, b baoome n na n kʋ-a. (Zã 11:49-53) Rẽ n so tɩ kẽer ra sokd b mens a Zeezi sã n na n sak n waa zãma wã sʋka.

A Zeezi taa Betani arzũm daare, “Pakã tigr ket tɩ rasem a yoobe.” (Zã 12:1) Zʋɩf-rãmbã nengẽ, rayã sɩngda wĩndgã lʋɩɩs poor n baas vẽkembeoog wĩndgã kõom. A Zeezi taame tɩ Nizã kiuug rasem a 8 sẽn yaa vʋʋsg daarã nan pa ta ye. Vʋʋsg daarã sɩngda arzũmã wĩndgã kõom poore, n baas sibrã wĩndgã lʋɩɩs poore. A Zeezi ra pa na n sak n yi Zeriko n kẽng Betani vʋʋsg daarã, bala zʋɩf-rãmbã tõogã gɩdga rẽ. A sẽn ta Betani wã, tõe t’a siga a Lazaar yirã wa a sẽn da minim n maandẽ wã.

Sibrã raar zaabre, a Sɩmo segla rɩɩb n bool a Zeezi ne a tũud-n-taasã, n paas a Lazaare, tɩ b na n wa rɩ yẽ zakẽ wã. A Sɩmo me ra bee Betani. B ra boond-a lame tɩ “yĩng soab” bɩ wãoore. Tõe tɩ pĩndã wãood n da tar-a, t’a Zeezi sãoog-a. A Mart sẽn yaa pag sẽn nong tʋʋma yĩnga, a ra gilgd n pʋɩta rɩɩbã. A Maari yẽ ra maaga a yĩng n pẽneg a Zeezi, n kelgd-a. La so-kãngã wã, bũmb la a maan tɩ yik neb kẽer sũyã.

A Maari wa n paka albatr tʋk sẽn pid ne “tɩdar sẽn maan ne naar halaale.” (Zã 12:3) Yaa kaam ligd sẽn yaa toogo. Taa deniye 300, yʋʋmd tõr yaoodo. A Maari paka kaamã n walg a Zeezi zugã la naoã, n yaool masã n yẽes a Zeezi naoã ne a zoobdã. Kaamã yũug kell n pida roogã.

Karen-biisã sũy puugame, tɩ b sok woto: “Yaa bõe tɩ b sãam tɩdar kaamã?” (Mark 14:4) A Zʋdaas Iskaryo pʋd n yeelame yaa: “Bõe tɩ b ka koos tɩdarã deniye kobs-tã n kõ naong rãmba?” (Zã 12:5) Pa naong rãmbã yell n da pak-a ye. A ra zuuda ligdã b sẽn ningd koglgã pʋg karen-biisã yĩngã.

A Zeezi gom n sõnga a Maari. Ad a sẽn yeele: “Yaa bõe tɩ yãmb namsd pagã a woto? A maana tʋʋm-sõng mam yĩnga. Bala, naong rãmbã bee ne yãmb daar fãa, la maam, yãmb ka na n paam tɩ mam be ne yãmb daar fãa ye. Pagã sẽn walg mam yĩngã tɩdar kaamã, yaa mam mumb yĩnga. Sɩd-sɩda, mam yeta yãmb tɩ dũni tɛk fãa, zĩig ning fãa b sẽn na n moon koe-no-kãngã, b na n goma bũmb ning pagã sẽn maanã yelle, a tẽegr yĩnga.”—Matye 26:10-13.

Yaa rasem a yiib la woto a Zeezi sẽn be Betani. La zĩig fãa, nebã wʋmame t’a waame. Zʋɩf-rãmb wʋsg waa a Sɩmo zakẽ wã, la pa sẽn na n yã a Zeezi bal ye. B ra ratame me n yã a Lazaar “a Zeezi sẽn vʋʋg t’a yi kũum sʋkã.” (Zã 12:9) La maan-kʋʋdbã kãsem-dãmb yẽsa ne taab n na n kʋ a Zeezi ne a Lazaar fãa. B ra tagsdame tɩ yaa a Zeezi sẽn vʋʋg a Lazaarã n kɩt tɩ neb wʋsg yik n tẽed-a wã. Hakɩɩka, nin-kãensã wẽnemã sɩd yaa wʋsgo.