A Zeezi bee Galɩle mogrã noore

Yʋng ning b sẽn na n yõk a Zeezi wã, a ra yeela tʋm-tʋmdbã woto: “M vʋʋgrã zugẽ, m na n deng-y-la Galɩle.” (Matye 26:32; 28:7, 10) Rẽ n so t’a karen-biis wʋsg sɩd rɩk sor n kẽng Galɩle. La yaa bõe la b segd n tɩ maan beenẽ?

A Pɩyɛɛr wa n yeela tʋm-tʋmdb a yoob woto: “Mam na n tɩ yõga zĩma!” Bãmb b yoobã fãa yeela woto: “Tõnd me na n tũu foom.” (Zã 21:3) La yʋngã tõre, b pa paam zĩm ye. Zĩigã sẽn wa n dat n yẽegã, a Zeezi puka mogrã noore, la karen-biisã pa bãng-a ye. A tool n sok-b lame yaa: “M kamba, yãmb ka tar sẽn na rɩ la?” B leokame tɩ ayo, t’a Zeezi yeel-b yaa: “Lob-y zĩm-gãmbrã koglgã rɩtgo, la y na n paamame.” (Zã 21:5, 6) B sẽn lob zĩm-gãmbrã, b yõga zĩm wʋsgo, hal n pa tõe n tak ye.

A Zã yeela a Pɩyɛɛr yaa: “Yaa Zu-soabã!” (Zã 21:7) Tao-tao bala, a Pɩyɛɛr yeelga a zugẽ fuugã a sẽn da pidg la a yõgd zĩmã. A yɩk n lʋɩɩ koomẽ wã, n dug sẽn zems metr pis-wɛ n ta kʋɩl-koakã. Karen-biis a taabã sẽn da be koglgã pʋgẽ wã maaga b yĩng n tak zĩm-gãmbrã sẽn pid ne zĩmã n yiisi.

B sẽn ta kʋɩlgã noorã, b “yãnda bug-saal sẽn wit tɩ zĩm be a zugu, n paas buri.” A Zeezi yeel-b lame tɩ b yãk zĩmã b sẽn nan yõgã n wa. A Pɩyɛɛr vuuga zĩm-gãmbrã n yiisi, la ra pida ne zĩm-bɛd 153. A Zeezi yeel-b lame: “Wa n dɩ-y-yã.” B baa a ye pa sok-a a sẽn yaa a soab ye. Bala b ra miime tɩ yaa a Zeezi. (Zã 21:9-12) Naoor a tãab la woto a Zeezi sẽn vẽneg a meng t’a karen-biis naag taab n yã-a.

A Zeezi kõo b ned kam fãa zĩm la bur tɩ b wãbe. B sẽn dɩ n sa, a soka a Pɩyɛɛr yaa: “Simo, Zã biiga, fo nonga maam n yɩɩd bãmba bɩ?” (Sebr Sõngo) Wõnda rẽ t’a geta zĩmã a Pɩyɛɛr dãmb sẽn yõgã. Rẽ yĩnga a Pɩɛɛr nonga zĩmã yõgb n yɩɩd tʋʋmd ning a Zeezi sẽn dat n kõ-a wã bɩ? A Pɩyɛɛr leokame: “N-yẽe, Zu-soaba! Yãmb miime tɩ mam nonga yãmba.” Rẽ la a Zeezi yeel-a yaa: “Ges mam pe-bi wã yelle.”—Zã 21:15.

A Zeezi le soka a Pɩyɛɛr yaa: “A Zã biig a Sɩmo, dẽ yĩnga, fo nonga maam?” Tõe t’a Pɩyɛɛr pa mi bõe yĩng t’a Zeezi sok-a woto wã ye. La a pelga a pʋg n yeel yaa: “N-yẽe, Zu-soaba! Yãmb yẽ mi tɩ mam nonga yãmba.” A Zeezi yeel-a lame yaa: “Yɩ mam piisã pe-kɩɩma.”—Zã 21:16.

A Zeezi soka a Pɩyɛɛr naoor a tãab-n-soab yaa: “Zã biig a Sɩmo, dẽ yĩnga fo nonga maam?” Tõe tɩ masã wã, a Pɩyɛɛr sokda a meng a Zeezi sã n maanda sãmbs ne yẽ sã n tũud-a-la ne a sũur fãa. A Pɩyɛɛr kell n leokame yaa: “Zu-soaba, yãmb mii bũmb fãa. Yãmb miime tɩ mam nonga yãmba.” A Zeezi le wilg-a-la tʋʋmd ning a sẽn segd n tʋme. A yeela a Pɩyɛɛr yaa: “Ges m piisã yelle.” (Zã 21:17) Sɩda, neb nins sẽn na n sak n lebg kiris-nebã yaa wa piis sẽn be Wẽnnaam yãgr pʋgẽ, tɩ yaa tɩlɛ tɩ taoor-lʋɩtbã ges b yelle.

Nebã ra yõka a Zeezi n sẽb-a n wa baas n kʋ-a, a sẽn tʋm tʋʋmd ning Wẽnnaam sẽn kõ-a wã yĩnga. A wilgame t’a Pɩyɛɛr me na n baasa woto. A yeelame: “Fo sẽn dag n yaa bi-bɩɩgã, fo dag n sẽbgda f sɛɛg sẽbdga, n dabd f sẽn datẽ. La fo sã n wa n kʋʋle, fo na n zẽka f bãgdo, tɩ ned a to sẽb foom f sẽbdgã, n tall foom n kẽng f sẽn ka ratẽ ye.” Ne rẽ fãa, a Zeezi yeel-a lame yaa: “Wa n tũ maam!”—Zã 21:18, 19.

A Pɩyɛɛr wẽnemd n yãa tʋm-tʋmd a Zã, n sok a Zeezi yaa: “Zu-soaba, la bõe n na n paam rao-kãngã?” Bõe n da na n paam tʋm-tʋmd ning a Zeezi sẽn nong wʋsgã? A Zeezi leokame, n yeele: “Mam sã n dat t’a vɩɩmd hal tɩ mam wa, bʋg n pak foom?” (Zã 21:21-23) Woto wilgdame t’a Pɩyɛɛr segd n tũu a Zeezi, n da bao n na n bãng a taabã sẽn maand ye. La a Zeezi ra rat n yeelame me t’a Zã na n paama yõ-wok n yɩɩd tʋm-tʋmdb a taabã, la t’a ra n wa vẽnega a Zã t’a yã yẽnda sẽn na n wa reeg naamã.

Bũmb a taab la a Zeezi maan-yã, hal tɩ b sã n da na n gʋls rẽ fãa, sɛbã ra pa na n tall sõor ye.