Neb kʋʋng yãa a Zeezi tɩ pãntekotã pa ta ye

A Zeezi vʋʋgrã poore, a kɩtame tɩ tʋm-tʋmdb 11 wã seg-a Galɩle tãng a ye zugu. Karen-biis a taab me n zĩnd be. B fãa taa bãmb 500. Sɩngrẽ wã, kẽer ra maanda sãmbse. (Matye 28:17; 1 Korẽnt-rãmbã 15:6) La bũmb ning a Zeezi sẽn yeel-b baraarã sõnga b ned kam fãa t’a kɩs sɩd t’a sɩd vʋʋgame.

A Zeezi togs-b lame tɩ Wẽnnaam kõo yẽ pãng saasẽ la tẽngã zugu. A yeel-b lame yaa: “Bɩ y kẽng n maan nebã buud fãa tɩ yɩ mam karen-biisi, n lis bãmb ne Ba, la Bi-ribla, la Sɩɩg-sõng yʋʋre, la y zãms bãmb tɩ b sak bũmb nins fãa mam sẽn yeel yãmb tɩ y maanã.” (Matye 28:18-20) Baa a Zeezi vʋʋgrã poore, a ket n datame tɩ b moon koe-noogã.

A Zeezi kõo sẽn tũud-b yẽ wã fãa tʋʋm-yɛnga. F yaa rao tɩ f yaa pag wall biiga, f tog n maana karen-biisi. Bɛɛbã tõe n makame n na n gɩdg-b tɩ b pa le moon koɛɛgã la b zãms nebã Wẽnnaam daabã ye. La a Zeezi yeela bũmb tɩ b yam gãande. A yeelame: “Wẽnnaam kõo maam pãng fãa sẽn be yĩngri, la sẽn be tẽng zugu.” Gom-kãensã võor yaa bõe? Ad a sẽn paase: “Gese, mam bee ne yãmb wakat fãa, hal tɩ ta wakat sɛɛbo.” A Zeezi pa yeel tɩ neb nins fãa sẽn na n kẽes b toog koɛɛgã mooneg pʋgẽ wã na n paama tõogo, n maan yel-soalem ye. A wilgame tɩ b na n paama Wẽnnaam vʋʋsem sõngã sõngre.

A Zeezi vʋʋgrã poore, a maana “rasem pis-naase,” n da mi n vẽnegd a meng t’a karen-biisã yãt-a. Baa ne a karen-biisã sẽn da pa tõe n bãng-a zĩig pʋgẽ wã, a ‘maana bũmb wʋsg n na n wilg-b t’a vɩɩme,’ la a gom ‘Wẽnnaam soolmã yell’ ne-ba.—Tʋʋmã 1:3; 1 Korẽnt-rãmbã 15:7.

Yaa a Zeezi n kɩt tɩ tʋm-tʋmdbã yi Galɩle n kẽng Zeruzalɛmmã. A tigma ne-b Zeruzalɛm tẽngã pʋga, n yeel-b yaa: “Da zãag-y ne Zeruzalɛm ye. Pa-y be n gũ bũmb ning m ba sẽn da kãabã, kũun ning mam sẽn da gom ne yãmb a yellã. Bala, a Zã rag n lisa nebã koomẽ. La yãmba, rasem bilf sã n paase, yãmb na n paama lisg Sɩɩg-sõng pʋgẽ.”—Tʋʋmã 1:4, 5.

A Zeezi le tigma ne a tʋm-tʋmdbã wakat a to yɛsa, n peeg-b n “kẽng Betani sẽnẽ,” Oliiv tãngã wĩndg sẽn yitẽ. (Luk 24:50) Baa ne bũmb nins fãa a Zeezi sẽn da togs-b yẽ loogrã wɛɛngẽ wã, b ra ket n tẽedame t’a soolmã na n yɩɩ tẽngã zugu.—Luk 22:16, 18, 30; Zã 14:2, 3.

Tʋm-tʋmdbã soka a Zeezi yaa: “Zu-soaba, yaa moasã la y na n deeg Israyɛll soolmã n lebs-ba?” A Zeezi leok-b lame n yeele: “Ka be ne yãmb tɩ y bãng wakate la sasa ning m ba sẽn yãk ne noor ning b sẽn tarã ye.” Rẽ poore, a maneg n goma tʋʋmd ning b sẽn segd n tʋmã yelle. Ad a sẽn yeel-ba: “Sɩɩg-sõng sã n wa yãmb zutu, y na n deega pãnga, la yãmb na n yɩɩ mam kaset dãmb Zeruzalɛm, la Zʋʋde soolmã fãa, la Samaari, hal tɩ ta dũniyã tɛk fãa.”—Tʋʋmã 1:6-8.

A Zeezi ne a tʋm-tʋmdbã rʋʋ Oliiv tɩɩs tãngã zug n yasẽ, t’a Zeezi wa sɩng zẽkre, n kell n loogd saasẽ. Pa kaoos la sawadg lud-a tɩ b pa le ne-a ye. A Zeezi vʋʋgrã poore, a rɩka yĩng n yaa wa ninsaala. La masã, a tekame n lebg wa malɛka, n na n loog saasẽ. (1 Korẽnt-rãmbã 15:44, 50; 1 Pɩyɛɛr 3:18) Tʋm-tʋmdbã sẽn kell n sak-a wã ra ket n yas n getame, la “raop a yiib sẽn yer fu-peels” pukame n yeel-b yaa: “Galɩle nebã, yaa bõe tɩ y yas n get yĩngri? Zeezi-kãngã Wẽnnaam sẽn zẽk tɩ b yi yãmb sʋk to-to n kẽng arzãn [“saasẽ,” MN] tɩ yãmb yã wã, b na n lebg n waa a woto bala.”—Tʋʋmã 1:10-11.

A Zeezi sẽn na n loogã, pa neb ka tɛk n tigim tɩ b peeb bard la tõn-tõod ye. Yaa a karen-biisã sẽn tũ-a ne b sũy fãa wã bal n yã a loogrã. A “na n lebg n waa a woto bala.” Neb ka tɛk pa na n tigim tɩ b peeb bard la tõn-tõod ye. Yaa sẽn tũud-b yẽ wã bal n na n bãng t’a sɩnga naam dɩɩbo.

Tʋm-tʋmdbã leba Zeruzalɛm. Rasem nins sẽn pʋglã, b tigma ne karen-biis a taaba, n paas “a Zeezi ma a Maari ne a Zeezi ma-biisã.” (Tʋʋmã 1:14) B fãa kell n wɩnga ne pʋʋsgo. B pʋʋsame me n na n tõog n yãk karen-biig n ledg a Zʋdaas Iskaryo, tɩ tʋm-tʋmdbã sõor le ta 12. (Matye 19:28) B ra baooda karen-biig sẽn maan kaset ne a Zeezi tʋʋmã la a vʋʋgrã. B maana bãnd n na n bãng ned ning Wẽnnaam sẽn dat tɩ b yãke. La rẽ poore, b pa le wilg Biiblã pʋg tɩ ned n maan bãnd n na n bãng Wẽnnaam daab ye. (Yɩɩn-sõamyã 109:8; Yelbũna 16:33) Bãndã yãka a Matyaase. Tõe t’a ra naaga neb 70 wã a Zeezi sẽn tʋm tɩ b tɩ moon koɛɛgã. Rẽ tɛka, a “naaga tẽn-tʋmdb piig la a yembrã sullẽ.”—Tʋʋmã 1:26.

Zʋɩf-rãmbã yʋʋmd 33 Pãntekotã yɩɩ a Zeezi sẽn loog saasẽ tɩ rasem piiga. Sẽn ta karen-biis 120 n da tigim taab yĩngr doog a ye pʋgẽ Zeruzalɛm. B wa n wʋma bʋrg sẽn wẽnd sob-kãseng sẽn fugdi. Bʋrgã kell n pida roogã gilli. La zĩig pʋgẽ, zɛlma sẽn yaa wa bug-witim n puk n sig ned kam fãa zugu. Karen-biisã fãa sɩngame n gomd buud-goam a taaba. Yaa woto la b paam vʋʋsem sõngã a Zeezi sẽn da yeel t’a na n kõ-b lame wã.—Zã 14:26.